I Stap na Wok Bilong Jisas

Lainim Meri Bilong Sameria

JISAS wantaim ol disaipel bilong em ol i lusim Judia na wokabaut i go long Galili. Long rot ol i kamap long hap bilong Sameria. Skin bilong ol i les na ol i sindaun malolo long wanpela hulwara i stap klostu long taun Saika. Planti handet yia bipo Jekop i bin wokim dispela hul bilong kisim wara, na i stap yet nau long taim bilong yumi, klostu long taun Nablus.

Jisas i sindaun i stap klostu long hulwara na ol disaipel bilong em i go long taun bilong baim kaikai. Wanpela meri bilong Sameria i kam bilong pulimapim wara. Jisas i tokim em: “Wara i kam. Mi laik dring.”

Ol Juda i no save poromanim ol Sameria; ol i tingting nogut long ol dispela man bilong narapela lain. Olsem na dispela meri i kirap nogut na em i tok: “Yu Juda, na mi meri bilong Sameria. Olsem wanem na yu tok,Wara i kam, mi laik dring’?”

Jisas i tokim em, ‘Sapos yu save long dispela man i toktok wantaim yu, bai yu tokim em long givim wara i gat laip long yu.’ Em i tok, dispela wara bai kamap olsem “hul wara insait long em. Na dispela wara oltaim bai i kamap kamap na i givim em laip i stap gut oltaim oltaim.”

Meri i bekim tok olsem: “Bikpela man, yu givim dispela wara long mi.”

Nau Jisas i tok: “Yu go singautim man bilong yu pastaim.”

Meri i tok: “Mi no gat man.”

Jisas i tok: “Yu tok yu no gat man, em yu tok tru tumas. Long wanem bipo yu gat 5-pela man. Na dispela man nau yu stap wantaim em, em i no man bilong yu.”

Meri i kirap nogut na em i tok: “Bikpela man, nau mi save, yu profet.” Dispela meri i save tingim ol samting bilong spirit, olsem na nau em i tok ol Sameria i save lotuim God long Maunten Gerisim, tasol ol Juda i save lotuim God long Jerusalem.

Jisas i tok, ol man i lotu we, dispela samting i no bikpela samting, em i tok: “God em i spirit. Na ol man i lotu long em, ol i mas lotu long spirit na long pasin i tru.”

Meri i pilim tru dispela tok na em i tok: “Mi save, Mesaia bai i kam, ol i kolim em Krais. Taim em i kam, bai em i tokim yumi long olgeta samting.”

Jisas i tokim em, “Em mi tasol, nau mi toktok wantaim yu.” Olaman! Dispela meri i kam long 12 klok san bilong pulimapim wara na ating em i kam long dispela taim, long wanem em i sem long pasin em i mekim na em i no laik i kam taim ol narapela meri i kam, tasol nau Jisas i mekim gut tru long em. Jisas i tokaut klia tru long em long samting em i no bin tokim ol narapela man long en. Orait, nau wanem samting i kamap? Wastaua bilong mun bihain bai stori long dispela samting. Jon 4:​3-26.

◆ Taim Jisas i toktok wantaim meri bilong Sameria, bilong wanem meri i kirap nogut?

◆ Jisas i tok wanem long em long wara i gat laip na long ples bilong lotuim God?

◆ Olsem wanem Jisas i kamapim em yet long dispela meri? Bilong wanem yumi kirap nogut long em i tokaut olsem long dispela meri?

[Piksa i karamapim pes olgeta long pes 9]