Laspela Kaikai Bilong Jisas

Ol Juda i save mekim bung bilong Pasova long olgeta yia long namba 14 de bilong mun Nisan. Dispela bai kirapim ol long tingim hau Jehova i bin helpim ol long lusim kalabus long Isip na kisim ol i kam long Graun Bilong Promis. Long yia 33 C.E., Jisas na ol aposel i mekim bung bilong Pasova long wanpela rum i stap antap, long Jerusalem. Long pinis bilong bung, Jisas i tok: ‘Wanpela bilong yupela bai putim mi long han bilong ol birua.’ Ol aposel i kirap nogut, na askim Jisas: ‘Husat dispela man?’ Jisas i tok: ‘Em dispela man mi givim bret long em.’ Na em i givim hap bret long Judas Iskariot. Wantu, Judas i sanap na lusim dispela rum.

Bihain Jisas i beten, brukim sampela bret i go long planti hap, na givim long ol aposel i stap wantaim em. Em i tok: ‘Kaikai dispela bret. Em i makim bodi bilong mi, em mi bai givim bilong helpim yupela.’ Na bihain, em i beten long wain na givim long ol aposel. Em i tok: ‘Dring dispela wain. Em i makim blut bilong mi, we mi bai givim na bai God i ken fogivim ol sin bilong yupela. Mi promis olsem yupela bai stap king wantaim mi long heven. Mekim olsem long olgeta yia bilong tingim mi.’ Ol disaipel bilong Jisas i save bung long wankain apinun long olgeta yia. Nau yumi kolim dispela bung Kaikai Bilong Bikpela.

Bihain long dispela kaikai, ol aposel i tok pait long husat i stap nambawan. Tasol Jisas i tokim ol: ‘Man i winim ol arapela namel long yupela em man husat i tingim em yet olsem pikinini, em man i no gat nem.

‘Yupela i pren bilong mi. Mi tokim yupela long olgeta samting Papa bilong mi i laik bai mi tokim yupela. Klostu nau bai mi go long Papa bilong mi long heven. Yupela bai stap, na ol manmeri bai save olsem yupela i disaipel bilong mi taim ol i lukim olsem yupela i laikim narapela narapela. Yupela i mas laikim narapela narapela olsem mi bin laikim yupela.’

Na nau, Jisas i beten na askim Jehova long lukautim olgeta disaipel. Em i askim Jehova long helpim ol long wok wantaim na stap bel isi. Em i beten long mekim nem bilong Jehova i stap holi. Bihain Jisas na ol aposel i singim ol song bilong preisim Jehova na ol i go ausait. Klostu nau ol bai arestim Jisas.