Tok Bilong God i Gat Laip
Wanpela Meri Em i Givim Bel Tru
SAPOS meri i givim bel tru long man na man i givim bel tru long meri, em i gutpela samting tru. Na sapos dispela meri i winim olgeta samting i laik traim em na pulim em long lusim dispela man, orait, ol manmeri i lukim dispela gutpela pasin bilong dispela meri, bai bel bilong ol i pilim tru.
Tingim dispela meri bilong Sunem o Sulem. Em i laikim tumas wanpela yangpela man bilong lukautim sipsip. Ol susa bilong dispela meri i laik lukautim gut em na ol i no laik bai em i harim singaut bilong dispela wasman bilong sipsip na em i go wokabaut wantaim em. Olsem na ol i makim em bilong lukautim gaden wain na rausim ol weldok i kam stilim kaikai bilong wain.—Song Bilong Solomon 1:6; 2:8-15.
Long dispela taim, King Solomon i kam wokim kem klostu long haus bilong dispela meri bilong Sulem. Meri i mekim wok bilong em na King i lukim em. Em i lukim gutpela skin bilong dispela meri na em i laikim em. Em i salim sampela boi bilong em i go kisim dispela meri i kam long kem bilong em.—Song Bilong Solomon 6:11, 12; 1:2-4.
Olsem wanem? Meri i larim king i pulim em? Em i laik lusim dispela wasman bilong sipsip? Nogat tru. Em i no sem, em i tokim king, em i laikim tumas dispela wasman bilong sipsip. Tasol Solomon i no laik bai dispela meri i lusim em i go. Em i wok long tokim meri, em i laikim tumas em na em bai tokim ol man long wokim ol gutpela bilas bilong em. Tasol meri bilong Sulem i tok, em i laikim tumas dispela wasman bilong sipsip, em i givim bel tru long em na em i no inap lusim em. Bihain dispela wasman bilong sipsip i kam lukim em na narapela i amamas long toktok wantaim narapela.—Song Bilong Solomon 1:7-17; 2:1, 2.
King Solomon i go bek long Jerusalem na em i kisim meri bilong Sulem i go wantaim em. Tasol wasman bilong sipsip i painim pinis rot na em i go lukim meri long Jerusalem. (Song Bilong Solomon 3:6-11; 4:1-5) Solomon i no inap pulim dispela meri, olsem na em i tokim em long i go bek long haus bilong em. (Song Bilong Solomon 8:5 namba wan hap) Meri bilong Sulem i win tru!
Dispela meri bilong bus em i makim gutpela pasin bilong sori , em i laikim tumas dispela wasman bilong sipsip na em i givim bel tru long em. Olsem tasol dispela lain ol i olsem “meri” bilong Krais, na ol “arapela sipsip” tu, ol i mas laikim tumas “gutpela wasman” bilong ol na givim bel tru long em.—Lukim Jon 10:14, 16; 2 Korin 11:2; Efesas 5:25-32.