Yu Olsem Samting Nating Tasol?
ATING sampela taim yu pilim olsem i no gat wanpela man i save tingim yu? Maski yu stap namel long planti manmeri, tasol ating yu pilim olsem yu stap wanpis, a? Bilong wanem yu pilim olsem? Long wanem long nau ol man i no save tingim ol narapela man.
Long planti hap, taim man i go long beng o long haus sik o long ofis bilong gavman samting, ol i givim hap pepa long em i gat namba long en na ol i save singautim dispela namba, ol i no singautim nem bilong man, na i olsem yumi no gat nem. Ating yu pilim olsem sampela taim, a?
O ating yu wok long wanpela bikpela kampani i gat planti handet handet man i wok long en. Olsem na yu pilim olsem yu samting nating tasol na ol i no save tingim yu yet. Ol manmeri i stap long ol bikpela bikpela taun, sampela i save pilim olsem ol i stap wanpis olgeta. Bilong wanem ol i pilim olsem? Long wanem ol i no save liklik long ol manmeri i stap klostu long ol.
Tru tumas, long nau ol dispela samting mekim na planti manmeri i pilim olsem ol i samting nating tasol na ol narapela man i no save tingim ol. Long.nau narapela man i resis long winim narapela man na ol i lusim pasin bilong sori. Ol i no tingim ol narapela man.
Tasol olsem wanem long God? Em i Nambawan Bikpela bilong heven na graun, ating em i antap tumas long yumi na yumi olsem samting nating tasol long ai bilong em? Baibel i tok, wanpela taim i gat “ten tausen taims ten tausen [100 milion]” ensel ol i sanap long ai bilong God Jehova. (Danyel 7:10, NW) Na God Jehova em i Man bilong wokim ol planti planti sta yumi no inap kaunim namba bilong ol. Olsem na ating em i no save tingim ol dispela ensel na ol dispela samting em i bin wokim? Baibel i bekim tok, olsem: “Em i makim namba bilong ol sta pinis, na i save kolim nem bilong ol wan wan.” (Sam 147:4) God i save bosim gut ol dispela samting bilong antap. Na ating em i save kolim nem bilong ol gutpela ensel tu, tasol yumi save long nem bilong tupela tasol, em Maikel na Gebriel.—Danyel 12:1; Luk 1:26.
Na olsem wanem long yumi ol manmeri? God i save tingim yumi? Devit i tok: “Mi askim God olsem, ‘Bikpela, hamas yia i stap yet long laip bilong mi? Wanem taim bai mi dai? Ating laip bilong mi em i sotpela tasol. Yu mas toksave long mi.’ Yu makim sotpela taim tru bilong mi. Long ai bilong yu dispela taim bilong mi em i samting nating. Olgeta man i olsem win tasol, wanpela man i winim long maus.” (Sam 39:4, 5) Sapos man i olsem “win tasol, wanpela man i winim long maus,” orait olsem wanem yumi ken save tru God i save tingim yumi na yumi no olsem samting nating long ai bilong em? Olsem wanem? God i save tingim yumi tru? Em i save tingim YU?—Lukim pes 6.