God i Save Tingim Yu Tru?

LONG nait, sampela taim yu save lukluk antap na lukim ol sta? Yu save tingim ol dispela sta i stap longwe tru long yu? Na bel bilong yu i pilim tru na yu askim skin bilong yu yet: God i save tingim tru yumi ol man nating? God i save tingim mi?

Tri tausen yia bipo King Devit bilong Juda em i kirap nogut taim em i tingim ol samting bilong antap na em i tok: “Taim mi lukim skai yu bin wokim, na taim mi lukluk long mun na olgeta sta yu bin putim i stap antap, mi save ting olsem: Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?” (Sam 8:3, 4) Tru Devit i no save, tasol em i lukim ol samting i stap longwe long graun inap 600,000 lait-yia.a Em i kirap nogut, long wanem, Man bilong wokim ol dispela planti samting i stap longwe tru long antap, em i save tingim ol man tu.

Devit i mekim wankain tok long Sam 144 tu. Em i tok: “Bikpela, mipela manmeri i wanem samting na yu save tingting long mipela? Mipela i olsem samting nating, orait olsem wanem na yu save wari long mipela? Mipela i olsem win i kamap wanpela taim tasol long maus. Mipela i stap sotpela taim tasol, olsem tewel san i save mekim i kamap na i lus kwiktaim.” (Ves 3, 4) Ol man i olsem samting nating na ol i save stap inap liklik taim tasol, tasol Devit i save God i save tingim ol man. Olsem wanem em i save? Long wanem em yet em i save long God Jehova na em i wok long i stap klostu long em.

Yumi Inap i Stap Olsem Wanem Wantaim God?

Olsem wanem yumi save Devit i bilip long God na i stap klostu long em? Sapos yumi skelim liklik ol tok Devit i mekim long ol Sam, orait yumi inap save tru, Devit i stap klostu long God. Yumi ken skelim tok bilong Sam 23 na bai yumi save, Devit em i bilip tru long God Jehova, em Wasman bilong em. Em i tok:

“Bikpela [Jehova] i wasman bilong mi.

Olsem na mi no inap sot long wanpela samting.

Em i mekim mi slip long gutpela gras.

Na em i bringim mi i go long ol liklik wara na mi dring na mi malolo.

Em i givim mi nupela strong.

Na em i save bringim mi long ol gutpela rot, olsem em i tok bipo long mekim.

God, sapos mi wokabaut long ples nogut na bikpela tudak,

Maski, mi no ken pret long samting nogut,

Long wanem, yu stap wantaim mi.

Mi lukim yu holim stik bilong wasman olsem na bel bilong mi i stap isi. Mi no inap bagarap.”—Ves 1-4.

Tru tumas Devit i bilip tru long God na i stap klostu long Em. Yu ting olsem wanem long dispela Sam? Yu pilim tok bilong en? Yu pilim Devit em i olsem “sipsip” na em i bilip tru olsem Wasman bilong em, Jehova, em bai lukautim em? Devit i save, ol man i olsem “win i kamap wanpela taim tasol long maus,” tasol God i save tingim em na lukautim em, Olsem na Devit i bilip tru na em i tok:“Bikpela [Jehova] i wasman bilong mi. Olsem na mi no inap sot long wanpela samting.” Orait, yu mas mekim wanem na bai yu inap bilip tru long God Jehova olsem Devit i mekim?

Pastaim i gat wanpela bikpela samting yumi mas tingim, em olsem: Tru wasman i save lukautim ol sipsip, tasol ol sipsip i mas bihainim wasman bilong ol na harim maus bilong em. I olsem: Sapos yumi laik bai God i tingim yumi, orait yumi mas tingim God na bihainim tok bilong em. Sapos ol sipsip i ranawe lusim banis bilong sipsip o ol i sakim wasman, orait, em i no inap lukautim ol, ol yet i ranawe. Ol man i bin lusim God na sakim tok bilong Em inap longtaim pinis, tasol maski, God i save tingim ol. Em i save tingim ol olgeta wantaim, na em i save tingim ol wan wan. I gat wanem samting na mipela inap tok olsem?

Kirap long Wanem Taim God i Bin Tingim Ol Man?

Kirap long pastaim tru God Jehova i bin tingim ol man na ol samting bai painim ol long bihain. Taim Adam tupela Iv i tingim skin bilong ol yet na ol i bikhet long God long Iden, God i no lusim ol man na bai ol i no gat wanpela gutpela samting bilong wetim i kamap. Nogat. God i tok promis long kamapim wanpela “pikinini” em bai bagarapim nambawan birua bilong ol man, em Seten. (Jenesis 3:15; Rom 16:20) Bihain Jehova i wok long helpim ol man, na ol man wan wan, na sampela taim em i helpim wanpela lain man.

Lo God i givim long ol Isrel kamapim sori bilong God, em sori long ol man na em i tingim ol wan wan. Em i putim lo bilong helpim ol pikinini em papamama bilong ol i dai pinis, na ol meri man bilong ol i dai pinis. Olsem: Em i putim lo na em i tok, taim ol Isrel i kisim wit o bali samting long gaden, ol i mas larim hap i stap na ol dispela pikinini na meri i ken kisim. Olsem na ol inap kisim kaikai maski ol i no gat graun. Em gutpela pasin tru bilong helpim ol dispela taranguman, a? I winim pasin bilong givim welfe samting olsem sampela gavman i save mekim long nau! Long Isrel, maski man i stap rabis, tasol em i gat nem. Olsem wanem? Long wanem em i no ken singaut long ol man i givim kaikai long em o wetim gavman i helpim em. Nogat. Long han bilong em yet em inap kisim kaikai inap long em. Em i mekim gutpela wok long han bilong em yet na em i tenkyu long God bilong em, Jehova, em i Man bilong givim planti samting.—Levitikas 19:9, 10; Rut sapta 2.

Krais i Bihainim Pasin Bilong Papa?

Gutnius Matyu na Mak na Luk na Jon i raitim i kamapim ples klia pasin bilong Jisas, em i save laikim tru ol man na em i laik helpim ol. Em i bihainim tru pasin bilong Papa bilong em, na yumi ken save tru, God i save tingim ol man. (Jon 14:9) Ol tok bilong Krais i givim gutpela tingting long yumi long pasin bilong sori long narapela man na tingim gut narapela man. Jisas yet i bihainim dispela pasin. Taim ol disaipel i go autim tok na ol i kam bek na skin bilong ol i les tru, Jisas i tingim ol na em i sori long ol. Em i save ol i laik malolo liklik. “Olsem na Jisas i tokim ol, ‘Goan, yumi tasol i go long wanpela hap i no gat man, na bai yupela i malolo liklik.’” Planti manmeri i go i kam na Jisas wantaim ol aposel i no gat taim bilong kaikai. Olsem na ol i kisim bot na ol i go long wanpela hap i no gat man. Ol tasol i go.

Tasol bikpela lain manmeri i bihainim ol i go. Orait, nau Jisas i mekim wanem? Yu ting em i les na em i kros long ol? Nogat. “Jisas i go sua, na em i lukim planti tumas manmeri. Na em i sori long ol. O1 i olsem sipsip i no gat wasman. Na em i stat na i givim planti tok long ol.”—Mak 6:30-34.

Krais i bihainim tru pasin bilong Papa bilong em! Papa bilong em i save tingim ol manmeri na em i sori long ol! Krais i kamapim gut dispela pasin bilong God taim em i tok: “Yupela i save, ol man i save baim 5-pela liklik pisin long 2 toea. Tasol God i no lusim tingting long wanpela liklik pisin olsem. Na em i kaunim pinis olgeta gras long het bilong yupela. Yupela i no ken pret. Yupela i winim pe bilong planti liklik pisin.”—Luk 12:6, 7.

Tru tumas, man i laik bihainim Krais Jisas God i no save tingim em i samting nating. Tasol bikpela samting em olsem Yu wok strong long bihainim Krais Jisas? Yu tingim gut ol samting bilong God? (Matyu 5:3) Paslain liklik long taim ol birua i holim Jisas na kilim em i dai, Jisas i beten long Papa bilong em em i tok: “Tasol mi no beten bilong helpim ol dispela [ol 11-pela gutpela aposel] tasol. Nogat. Mi beten bilong helpim ol man [ol narapela disaipel] harim tok bilong ol na i bilip long mi.” (Jon 17:20) Jisas i save God bai tingim ol aposel bilong em na em bai tingim ol man ol bai harim tok bilong ol aposel ol i bilip. Olsem na yumi ken save olgeta man i gat pasin daun kain olsem sipsip ol i ken i go klostu long Bikpela Wasman bilong ol sipsip, em God Jehova.—Sam 23:1.

God i Save Tingim Ol Man long Nau Tu?

Tasol nau ating yu laik save, ‘Sapos God i save tingim ol man, orait i gat wanem samting long nau na yumi ken save long dispela samting? Na olsem wanem God inap helpim mi?’

Jehova, em Bikpela Wasman bilong ol sipsip, em i wokim rot bambai ol manmeri long nau ol i kain olsem sipsip ol inap harim maus bilong em. Em i mekim olsem wanem? Jisas i tok: “Bilong em yet wanpela man i no inap i kam long mi. Nogat. Papa i bin salim mi na mi kam, na sapos em yet i pulim wanpela man, orait dispela man i ken i kam long mi” Long dispela rot, Jehova i pulim ol man i gat pasin daun i kam long em. Em i pulim ol i kam long rot bilong dispela “gutpela wasman bilong sipsip” em i bin makim, em Krais Jisas.—Jon 6:44; 10:11, 14-16.

Dispela wok bilong pulim ol man i kam, God i mekim long wanem rot? Em i salim ol gutpela disaipel bilong Krais, ol witnes bilong Em, ol i go long autim tok. Yes ol witnes Kristen bilong Jehova i autim tok long olgeta hap i gat man i stap long en. Ol helpim olgeta man wan wan i laik save long God, na ol i no save singaut long pe. Sapos yu no kirap yet long i go klostu long Bikpela Wasman bilong ol sipsip, Jehova, yu laik mekim? Yu laik painim God long rot bilong Krais Jisas? Yu mas tingim tok bilong Jisas, em i tok: “Yupela mas paitim dua, na bai God i opim long yupela.” Bikpela Wasman bilong ol sipsip em i kirap pinis long mekim ol samting bilong helpim yu. Em i Pikinini bilong em i kam bilong helpim yumi. Sapos yu pilim dispela pasin God i mekim bilong helpim yu na yu kirap mekim wok bilong God, kwiktaim yu save God i save tingim tru ol man.—Matyu 7:7; 1 Jon 4:7-10.

God i Laik Helpim Ol Man long Bihain Tu?

Man em i olsem win i kamap wanpela taim long maus. Em i save stap inap liklik taim tasol na em i dai. Tasol sapos yu inap i stap gutpela olgeta na i stap amamas tru, yu laik i stap hamas yia? Ating yu tok, ‘Mi laik i stap oltaim.’ Jehova i tok promis long givim laip i stap oltaim long yumi—long gutpela ples paradais long graun. Olsem na long pas Pol i raitim long Taitas, yumi kaunim tok olsem: “[God] i tok pinis long em bai i givim dispela laip [laip i stap oltaim] long yumi. Na em i no save giaman.” (Taitas 1:2) Pol i tingim dispela tok promis bilong God na em i tokim ol narapela man “ol i mas mekim olgeta gutpela wok. Ol i mas kamapim planti gutpela wok, na ol i amamas long dispela. Oltaim ol i mas hapim samting bilong ol na tilim i go long ol arapela man. Sapos ol i mekim olsem, orait bai ol i bungim planti samting bilong helpim ol bihain. Olsem na bai ol inap long kisim laip tru.” Dispela “laip tru” i kamap olsem laip i stap oltaim.—1 Timoti 6:17-19.

God i Save Tingim Ol Man i Dai Pinis?

Tasol ating yu laik save, Olsem wanem long ol man i dai pinis? God i save tingim ol? Em i save tingim ol! Olsem na aposel Pol i “telimautim gutnius bilong Jisas na i tokim ol long Jisas i kirap long matmat.” (Aposel 17:18) Jehova i save tingim ol man wan wan na em bai kirapim bek ol man i dai pinis. Em inap tingim olgeta liklik pasin na tingting bilong man na kirapim bek em. Em i bosim olgeta milion milion lain sta i stap long antap, olsem na i no hatwok long em i tingim olgeta liklik pasin na tingting bilong wanpela man na kirapim bek em. Olsem na Jisas inap tok olsem: “Yupela i no ken tingting planti long dispela. Taim i laik kamap na olgeta man i stap long matmat bai ol i harim maus bilong em [Jisas] , na bai ol i lusim matmat na i kam ausait.”—Jon 5:28, 29.

Sapos yu laik bai Bikpela Wasman bilong ol sipsip, Jehova, i tingim yu long rot bilong Krais Jisas, yu ken tokim Ol Witnes Bilong Jehova long helpim yu. Ol inap i kam long haus bilong yu yet na toktok wantaim yu long ol askim bilong yu long ol tok bilong Baibel, na bai yu harim ol gutpela bekim. O yu ken raitim pas long ol man i wokim dispela nius na bai ol i helpim yu long save, yu inap mekim ol samting bambai God i tingim yu long nau na long bihain tu.

[Futnot]

[Piksa long pes 7]

God i save tingim mipela?

[Piksa long pes 8]

Bikpela Wasman i save sori long olgeta “sipsip” bilong em na lukautim ol