Insait Bilong Ol Tok i Kam long Olgeta Hap

Stap Tambu

Long nau ol i no tambuim tumas pasin pamuk, tasol wanpela dokta, em Dokta J. Mostyn Davis bilong Stet Yunivesiti long Pensilvenia, em i tokaut na i tok, man o meri i stap tambu, em i gutpela. Em i raitim wanpela tok long wanpela nius, em Medical World News, na em i tok, ol dokta i no save tokaut long samting nogut i save kamap taim man o meri i pamuk. Em i tok, long nau sapos yangpela man o meri i laik i stap tambu, ol dokta i no save givim sampela tok long ol bilong helpim ol long i stap tambu; sapos ol i pamuk, ating ol dokta bai kisim mani long dispela. Na em i tok, ol papamama i no save givim sampela tok long pikinini bilong helpim em long i stap tambu; ol papamama bilong nau ol i no save long pasin bilong toktok wantaim pikinini long dispela kain samting. Na em i tok, sampela ogenaisesen olsem welfe o laiplain samting ol i no givim tok long ol yangpela long i stap tambu; ol tok ol i givim long ol em i no tambuim pasin pamuk.

Sampela man i ting, i gutpela sapos i no gat tambu long ol i mekim laik bilong ol na ol i pamuk. Tasol Dokta Davis i tok, sapos man i stap tambu em i no gat asua long mekim meri i gat bel na bai em i gat hevi long dispela; na em i no kisim sik VD, na em i no gat hevi olsem bilong man o meri i mekim sampela samting bilong pasim bel, na i no gat hevi tu long rausim bel. Na dokta i tok, sapos man i stap tambu, em i no gat wok long tromoi mani long baim ol sampela samting bambai meri i no ken kisim bel. Sampela man i bin tok, sapos man i slip wantaim meri na tupela i no marit yet, dispela bai strongim marit bilong ol. Tasol dokta hia em i tok, nogat; sapos man i stap tambu, dispela bai helpim em long lain long bosim ol laik bilong em.

Baibel i tok, “save i kam long God” em i helpim man long “bihainim klinpela tingting,” na sapos man i tambuim laik bilong skin, dispela bai helpim em long “wokabaut stret oltaim, … na daunim laik bilong olpela bel,” na spirit holi “i save kamapim gutpela pasin olsem.” (Jems 3:17; Galesia 5:22, 23) Na Baibel i givim strongpela tok long ol yangpela manmeri na i tokim ol: “Oltaim yu mas ranawe long olgeta laik nogut i save kamap long bel bilong yangpela man. Na yu mas wok long kisim stretpela pasin, na bilip, na pasin bilong sori, na bel isi, wantaim ol man i gat klinpela bel na i save singaut long Bikpela.”—2 Timoti 2:22.

Belhat i Save Bagarapim Klok

Wanpela nius, em American Health, em i tok: “Taim yumi belhat long wanpela man, dispela kros i kik i kam bek long yumi na i paitim masel bilong klok bilong yumi. Taim yumi kros nabaut long ol samting, o yumi laik ran long ka na sampela samting i pasim rot, o yumi sanap long lain na yumi laik baim sampela samting na i gat planti man i paslain long yumi, na yumi belhat na yumi laik bagarapim ol man, dispela kain tingting na pasin i save bagarapim yumi yet.” Wanpela dokta long San Fransisko, em Ray H. Rosenman, MD, em i tok, sapos man i belhat long wanpela samting, dispela bai givim sik long klok bilong em. Dispela dokta wantaim 3-pela wanwok ol i bin skelim ol dispela samting na ol i tok, kros em i as bilong ol sik bilong klok.

Na nius i tok, sampela man i no laik kaikai planti tumas, na ol i laik eksasais na bai klok bilong ol i no ken kisim sik, tasol ol i mas bosim kros bilong ol tu, long wanem, kros inap bagarapim klok. Long nau ol dokta i save long dispela samting, tasol bipo yet Baibel i tok: “Sapos man i gat bel isi, orait bai bodi bilong en i stap gut. Tasol sapos man i mangal na bel nogut oltaim long arapela man, dispela pasin i olsem sik nogut i wok long bagarapim ol bun bilong en.”—Provep 14:30.

Orait, olsem wanem long dispela tingting olsem i gutpela sapos man i kamapim belhat bilong em? Dispela nius i tok moa olsem: ‘Yumi no ken tok sapos man i kamapim belhat bilong em dispela samting inap helpim em na bai belhat bilong em i no ken mekim nogut tumas long em. Na yumi no ken tok sapos man i haitim belhat bilong em dispela samting inap helpim em na bai belhat bilong em i dai liklik. Nogat’ Ol man bilong belhat ol i save “kros, na belhat, na bikmaus.” Ol dispela kain pasin i save bagarapim bodi bilong man na i no ken i stap gut. Na bikpela samting em olsem: Ol Kristen tru i no ken mekim kain pasin olsem.—Efesas 4:31.