Bilong Wanem Planti Man i Save Giaman na Stil?

WANPELA tok bilong ol Englan bilong bipo i olsem: “Rot i stap na man i kamap stilman.” Tasol sampela man i strong long tok olsem: “Stilman i save painim rot.”

Maski wanem samting i kirapim man long mekim pasin giaman o pasin stil, tasol long nau dispela pasin i go bikpela na planti man i ting i no gat rong long en. Ol i save mekim kain kain pasin bilong stil na giaman.

Olsem: Bos i tokim kuskus long senisim buk i makim hamas mani em i bin kisim long wok bisnis bilong em. Bos i tokim kuskus long raitim liklik mani tasol. Na kuskus i no gat tok long dispela pasin giaman. Em i bihainim tasol tok bilong bos. O mama i pasim sampela mani bilong baim kaikai bilong famili na baim samting bilong em yet, na long bel bilong em em i ting: ‘I stret mi ken mekim olsem.’ O man i tokim meri bilong em em i mas wok ovataim, tasol em i giaman, em i go raun wantaim sampela poroman bilong em o wantaim narapela meri.

Papa bilong wanpela stua i tok ol yangpela i save kam pulap long stua na taim wanpela i baim samting ol narapela i stil. Em i tok: “Taim mi manki yet na wanpela manki i stil na ol i lukim em na holim em, em i save pret. Tasol ol yangpela bilong nau ol i no save pret. Sapos yu krosim ol, bihain bai ol i kam bek na bagarapim stua bilong yu.”

I no ol rabisman tasol i save stil. Nogat. Long dispela taim polis i holim wanpela meri bilong Englan em i gat biknem. Em i bin paulim samting bilong stua. Na planti yumi save harim tok long ol man i paulim mani bilong bos bilong ol o bilong kampani samting. Sampela i paulim liklik mani tasol na sampela ol i paulim bikpela mani tru.

Wanem as bilong dispela samting? I gat planti samting na long nau ol man i save giaman na stil. Taim pikinini i liklik yet ol i save harim stori long pasin bilong stil, na ol piksa wokabaut na buk samting i save litimapim nem bilong ol man i giaman o ol i stil.

Wanpela man bilong Brasil i tok, sampela pasin bilong lotu i mekim na ol man i no pret long mekim rong. Ol i ting ol inap i go long konpesio na telimautim sin bilong ol na bai sin i tekewe. I gat kain kain stori giaman ol man i save lain long en na ol i harim ol man bilong politik i mekim tok promis ol i no inap truim. Olgeta dispela pasin bilong giaman i save kirapim ol manmeri long ting olsem i no gat rong long pasin bilong giaman.

Ol i ting sapos ol i mekim liklik tok giaman i no gat rong. Tasol Krais Jisas i tok: “Man i save giaman long liklik samting, em bai giaman long bikpela samting tu.” Na em i makim Seten i as bilong pasin bilong tok giaman. Na em i tok Seten i bosim olgeta manmeri bilong graun. Yumi mas tingim dispela samting, long wanem dispela samting i helpim yumi long save bilong wanem pasin giaman na pasin stil i kamap bikpela long nau.—Luk 16:10, Baibel Today’s English Version; lukim tu Jon 8:44; 14:30.