FRAN PES STORI | WAI NA YUMI MAS BIHAINIM ONEST PASIN?

Pasin Giaman Inap Nogutim Yu

“Sampela taim hevi i kamap na yu mas mekim liklik tok giaman bilong stretim dispela hevi.”—Samantha, Saut Afrika.

Olsem wanem? Yu wanbel long dispela tok? Olsem Samantha, yumi olgeta i bin bungim kain hevi olsem. Pasin yumi mekim long kain taim olsem i soim tingting bilong yumi long onest pasin. Olsem, sapos yumi tingting tasol long holim gutnem bilong yumi, orait oltaim bai yumi tok giaman. Tasol taim ol arapela i save olsem yu bin tok giaman, dispela inap kamapim planti hevi. Yumi ken stori long sampela bilong ol dispela hevi.

OL MAN I NO INAP TRASTIM YU

Sapos ol man i trastim yu, ol bai stap pren bilong yu. Taim tupela pren i trastim ol yet, ol bai bilip long narapela narapela na ol i save olsem pren bilong ol bai helpim ol. Tasol sampela haptaim i mas lus na nau yu inap trastim wanpela man. Olsem na yu mas toktok na kamapim tingting bilong yu long narapela, na tu, mekim sampela samting bilong helpim em. Sapos yu tok giaman wanpela taim tasol, orait pren bilong yu bai i no trastim yu moa. Na yupela i no inap stap gutpela pren moa olsem long bipo.

Olsem wanem? Wanpela gutpela pren i bin giamanim yu? Sapos olsem, yu pilim olsem wanem? Ating yu bin bel hevi. Yumi luksave olsem pasin bilong tok giaman inap bagarapim pasin bilong ol pren long pas gut wantaim.

YU INAP KISIM PASIN BILONG TOK GIAMAN

Long wanpela wok painimaut Robert Innes em profesa bilong ekonomiks long Yunivesiti bilong California i tok: “Em isi tru long kisim pasin bilong tok giaman.” Pasin bilong tok giaman i olsem wanpela sik, sapos oltaim yu poroman wantaim ol man bilong tok giaman, yu tu inap kisim dispela pasin.

Olsem wanem yu inap abrusim pasin bilong tok giaman? Baibel inap helpim yu, olsem na i gutpela yu skelim sampela stiatok bilong Baibel.

Narapela Narapela Pasin Giaman

Tok Giaman

I MAKIM WANEM SAMTING? Mekim tok giaman long wanpela, maski em i gat rait long save long tok tru. Pasin bilong tok giaman inap makim olsem man i paulim tok, kamapim ol ekstra tok o hap stori tasol bilong giamanim narapela, na bai dispela man i bilipim tok bilong em.

BAIBEL I TOK: “Bikpela yet i no laik tru long kain man olsem. Tasol Bikpela i stap wanbel tru wantaim ol man i save wokabaut stret.” (Sindaun 3:32) “Yupela i rausim pinis pasin giaman, olsem na yupela wan wan i mas mekim tok tru long ol arapela.”—Efesus 4:25.

Bagarapim Gutnem

I MAKIM WANEM SAMTING? Mekim ol tok giaman bilong daunim na bagarapim gutnem bilong narapela.

BAIBEL I TOK: “Man bilong mekim pasin nogut i save mekim ol arapela man i tok pait namel long ol yet. Na man bilong tok baksait i save mekim man i kros long pren bilong en.” (Sindaun 16:28) “Sapos ol i no putim paiawut long paia, bai paia i dai. Na sapos ol man i no tok baksait, bai olgeta tok kros i pinis.”—Sindaun 26:20.

Paulim Mani

I MAKIM WANEM SAMTING? Mekim ol tok giaman bilong paulim mani kago bilong narapela.

BAIBEL I TOK: “Sapos wokboi bilong yupela i sot long ol samting, orait yupela i no ken mekim nogut long em.” (Lo 24:14, 15) “Sapos wanpela man i daunim ol rabisman, em i rabisim God. Tasol pasin bilong mekim gut long ol rabisman, em i pasin bilong givim biknem long God.”—Sindaun 14:31.

Pasin Stil

I MAKIM WANEM SAMTING? Yu kisim nating wanpela samting na yu no askim pastaim.

BAIBEL I TOK: “Stilman i no ken stil moa, mobeta em i wok hat na mekim ol gutpela wok long han bilong en bai em i gat ol samting bilong tilim long ol man i sot.” (Efesus 4:28) “No ken giamanim yupela yet. . . . Ol stilman, na ol gridi man, na ol spakman, na ol man bilong toknogutim ol arapela, na ol man bilong pulim ol samting bilong ol arapela, olgeta dispela kain man bai i no inap i go insait long kingdom bilong God.”—1 Korin 6:9, 10.