Pasin Isi i Gat Strong

DRAIVA bilong trak i pasim wanpela ka i kam long narapela hapsait bilong rot. Draiva bilong dispela ka i no daunim lait bilong ka liklik na lait bilong ka i sutim ai bilong draiva bilong trak. Em i belhat na kisim wanpela hap ain na brukim tupela tos bilong ka na em i go pinis. Draiva bilong ka i sindaun i stap tasol. Ka i no gat lait na em i no inap draivim moa. Planti taim kain samting olsem i save kamap, a?

Planti planti manmeri ol i save belhat kwik na ol i save mekim tok nogut o pasin nogut. Ol i no gat pasin isi. Long nau planti man i ting sapos ol i bihainim pasin isi dispela samting i no inap helpim ol. Ol i ting ol i mas strong long mekim tok kros na long pait. Tasol yu ting dispela tingting bilong ol i stret?

Samting i Kamap long Bipo

Bipo bikpela hevi na traim i painim wanpela man. Bikpela lain ol i kam wantaim bainat na stik bilong holim em. Wanpela gutpela poroman bilong em i kamautim bainat bilong em na paitim wanpela birua na katim yau bilong em i pundaun. Bikpela kros na pait i laik kamap. Dispela man ol i laik holim em, em i mekim wanem?

Dispela man em Krais Jisas. Orait, Jisas i mekim wanem? Em i tokim dispela man i laik helpim em, olsem: “Putim bek bainat long ples bilong en. olgeta man i pait long bainat, bai i lus long bainat. Ating yu no save, mi inap askim Papa bilong mi, na em i ken givim mi planti ensel moa, i winim 12-pela lain ami?” (Matyu 26:47-53, NT) Jisas i bihainim pasin isi. Em i putim han long yau bilong dispela man na yau bilong em “i kamap gutpela gen.”—Luk 22:51, NT.

Man i Bihainim Pasin Isi, Yu Ting Em i No Gat Strong?

Jisas i bihainim pasin isi, tasol em i no olsem man i no gat bun, a? Jisas em i gat strong. Em i gat strong bilong Papa bilong em long heven. Em i strong long bihainim pasin i stret. Yu tingim samting em i mekim taim em i kirap mekim wok bilong em long graun? Em i go insait long tempel long Jerusalem na em i lukim “ol man i wok bisnis long bulmakau na sipsip na pisin. Na em i lukim ol man bilong senisim mani ol i sindaun i stap.” Olsem na em i wokim wanpela wip na em i “rausim dispela olgeta man long tempel wantaim ol sipsip na bulmakau.” (Jon 2:14, 15, NT; lukim tu Matyu 23:13-36.) Em i no olsem man i no gat strong!

Pasin Jisas i mekim i soim yumi, pasin isi i no samting bilong skin tasol. Man i bihainim pasin isi em i bihainim pasin bilong God, em dispela pasin i gat strong, tasol em i save mekim pasin isi tu. Jehova i strong long no laikim tru sin. Em i no laikim tru ol pasin nogut na em i tokaut stret long dispela samting. (Provep 6:16-19) Tasol Jehova i gat pasin isi tu, olsem na em i wokim rot bambai ol pekatoman inap kamap wanbel gen wantaim em. Dispela rot em ofa bilong Krais Jisas na wok pris bilong em. (Rom 5:10;1 Timoti 2:5, 6; Hibru 4:14-16) Pasin isi bilong Jehova i opim rot bambai olgeta pasin nogut bilong yumi i ken tekewe long yumi na yumi ken kamap klin. (1 Jon 1:9) Olsem na pasin isi i gat strong. Em i gat strong bilong kisim bek man.

Olsem Wanem Yumi Inap Kisim Pasin Isi?

Ol Kristen i gat pekato na ol i save, pasin isi i no wok strong tumas insait long bel bilong ol. Taim mama i karim yumi, rong bilong Adam i stap long skin bilong yumi. Ol laik nogut bilong olpela bel i stap long skin bilong yumi olgeta manmeri. Yumi stap ausait long laip bilong God. (Efesas 2:3; 4:17, 18) Bipo yumi no gat bilip na yumi no gat wanpela gutpela samting bilong wetim i kamap. Ating yumi les na bel bilong yumi i no amamas. Dispela kain tingting inap mekim na bai man i hatwok long pasim belhat bilong em. (Lukim Provep 25:28.) Tasol taim yumi kisim save long ol pasin bilong God na em i tekewe sin bilong yumi, nau wanem samting i kamap? Nau yumi kamap strong long bilip na yumi wok long bihainim ol gutpela pasin em spirit bilong God i save kamapim long ol man. Wanpela gutpela pasin olsem em pasin isi.—Galesia 5:22, 23.

I no long strong bilong yumi yet na yumi inap kisim dispela gutpela pasin. Nogat. Yumi mas i go klostu long God na kisim strong long Em na bai yumi inap bihainim pasin isi. Yumi mas laik tru long bihainim pasin bilong Jisas na dispela samting tu inap helpim yumi long mekim pasin isi.

Olsem 1 Pita 3:3, 4 (NT) i tok, pasin isi em i samting bilong “insait bilong bel.” Dispela pasin i no i stap long bel bilong yumi taim mama i karim yumi. Em wanpela pasin spirit bilong God i save kamapim na taim yumi kisim stretpela save na bihainim tok bilong God long Baibel yumi kisim. Pasin isi em wanpela pasin bilong ol manmeri i kamap “nupela man” na ol i bihainim pasin wankain olsem bilong God. (Kolosi 3:10, NT) Tasol i hatwok long kisim dispela pasin isi bilong God o nogat?

Sampela Ol i Kisim Pinis

Wanpela longpela man em i gat bikpela skin em i tok: “I hatwok long kisim. Bipo mi man bilong boksen. Taim mi no boksen tu, long ples bilong mi, mi kisim nem olsem ‘man bilong pait.’ Olgeta manmeri long ples ol i pret long mi. Mi gat bikpela strong bilong skin, olsem na mi hambak na mi ting mi nambawan, winim ol narapela man. Mi save amamas long pait long rot. Na long haus tu mi no save bosim gut bel bilong mi o pasim belhat bilong mi. Mi tingim wanpela taim mi belhat long meri bilong mi na mi kirap kikim dua bilong haus daunbilo wanpela taim tasol na bokis ais wanpela taim tasol na mi brukim olgeta. Sampela taim mi sem long pasin mi mekim. Taim mi dring spak na mi traut na mi slip long dispela traut long graun long banis bilong haus bilong mi, mi sem. Long kain taim olsem mi save beten askim God long helpim mi. Bihain mi wok strong moa long bung wantaim Ol Witnes Bilong Jehova. Etpela yia i go pinis mi lusim bia olgeta.

“Mi hatwok long bosim belhat bilong mi. Tasol nau, taim mi go long haus bilong ol man na autim tok, mi inap toktok gut wantaim ol long pasin isi. Mi no les kwik long ol na belhat long ol olsem bipo mi mekim. Mi lukim gutpela pasin bilong sori i stap namel long ol brata spirit bilong mi na dispela samting i helpim mi long bihainim pasin isi. Tasol oltaim mi mas wok strong bambai mi inap sakim ol pasin bilong mi bilong bipo. Nau mi wanpela elda Kristen na mi pilim tru hevi bilong ol manmeri i hatwok long bihainim pasin isi. Tasol mi save yumi inap bihainim.”

Na tingim wanpela meri Amboin. Em i meri bilong belhat na oltaim em i save haitim naip insait long blaus bilong em. Taim em i belhat em i paitim sampela manmeri na ol i kisim bagarap. Tasol bihain em i kisim save long tok i tru bilong Baibel. Nau em i stap wanpela witnes Kristen bilong Jehova inap tupela ten yia pinis na em i tok wanem? Em i tok: “Mi save sapos oltaim mi belhat belhat mi no inap lotuim Jehova. Olsem na em i helpim mi na mi senisim pasin bilong mi. Tasol sampela taim mi hatwok yet long pasim belhat bilong mi, na i olsem mi gat pait bambai mi inap i stap bel isi.”

Stori bilong dispela man na dispela meri i soim yumi, sapos yumi laik bihainim pasin isi yumi mas lusim tingting kranki na pasin kranki planti manmeri bilong dispela graun ol i bihainim. Aposel Pol i rait pas long ol Kristen long Rom na em i tok: “Yupela i no ken wokabaut wankain olsem ol man bilong dispela graun. Nogat. Yupela mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bambai yupela inap long save tru long pasin God i laikim. Bai yupela i save long pasin i gutpela, pasin God i laikim tumas, pasin em inap tru. God i givim marimari long mi, na long dispela mi tokim yupela olgeta wan wan: Yu save long pasin na save bilong yu i olsem wanem, na yu no ken ting yu yet i namba wan tru. Yu mas tingting stret long yu yet inap long mak bilong bilip God i givim yu.” (Rom 12:2, 3, NT) Taim yumi lusim pasin bilong ting yumi yet yumi namba wan tru na yumi aninit long ol narapela man, dispela samting i helpim yumi long mekim pasin isi long ol narapela man.—Filipai 2:3.

Em i Gat Strong Olsem Wanem?

Pasin isi i gat strong bilong helpim yumi long i stap gut wantaim ol narapela man. Hatpela pasin i no inap helpim yumi long mekim olsem. Sapos kros i kamap o wanpela man i belhat long yumi o em i bel nogut o em i bel hevi na yumi bihainim pasin isi, dispela inap helpim yumi long winim dispela hevi. Baibel i tok: “Sapos man i belhat long yu, orait bekim tok isi long em, na bai belhat bilong en i dai.” Tru tumas, “sapos yu mekim tok isi na yu no kros kwik, orait yu inap tanim bel bilong ol man i no laik harim tok bilong yu.”—Provep 15:1; 25:15, Baibel Pisin.

Pasin isi i gat bikpela strong tru! Em inap helpim man long i stap wanbel gen wantaim narapela man; em inap pasim man long mekim sampela tok bilong bagarapim bel bilong narapela man na bai tupela i no inap i stap wanbel moa. Orait, nau yumi ken stori long olsem wanem pasin isi inap helpim yumi long i stap gut wantaim ol narapela man insait long famili na insait long kongrigesen samting. Na bai yumi inap save, pasin isi em gutpela pasin tru.

Insait long Famili

Laik bilong God i olsem: Em i laik bai famili i pas gut wantaim na narapela i sori tru long narapela. Tasol long nau planti taim kros i save kamap insait long famili na ol famili i no i stap amamas! Yumi save gut long ol famili na wanhaus bilong yumi na ating dispela samting i mekim na taim ol i popaia yumi save les kwik long ol na kros i kamap. Tasol yumi olgeta yumi gat pekato na sampela taim yumi save popaia. Taim hevi i kamap, yumi inap mekim i go bikpela, o yumi inap mekim pasin sori na karamapim.

Tingim Jon. Jon i go long wok na long san olgeta em i karim ol hevi i kamap na em i wok strong i stap. Em i ting taim em i go bek long haus bai em inap i stap bel isi na amamas. Tasol taim em i kamap pinis long haus, meri bilong em i kros na em i tok: “Mi tokim yu pinis long kisim kaikai i kam. Bilong wanem yu no mekim?” Orait, Jon bai mekim wanem? Em i save, sapos em i mekim pasin isi bai em i bihainim pasin bilong God. Tasol long kain taim olsem i hatwok long bekim tok isi, a? Tasol Jon i mekim gutpela pasin. Em i putim han long sol bilong meri bilong em na em i tok: “Sori tumas! Mi lusim tingting. Nau bai mi go long stua na baim kaikai. Bai mi kam bek kwik.” Em i mekim gutpela pasin isi na kros i dai.

Na i wankain tu long ol samting papamama i mekim long pikinini bilong ol. Sapos papamama i bihainim pasin isi bai ol pikinini i no pret long i go toktok wantaim papamama na kamapim ol hevi bilong ol. Tingim pasin bilong pikinini i amamas long i go klostu long em. (Matyu 19:14, 15) Bilong wanem ol i laik tru long i go klostu long wanem em yet i tok: “Mi save pasin isi long ol man, na mi save mi yet.” (Matyu 11:29, NT) Yu wanpela papa o mama? Yu save mekim pasin isi olsem Jisas i mekim?

Na olsem wanem sapos papa i no Kristen, tasol meri bilong em disaipel bilong Krais Jisas? Meri i mas bilip na wetim gutpela samting i kamap. Em i mas ting olsem: ‘Ating bihain bai man bilong mi i kirap bihainim tok i tru.’ Meri i mas mekim pasin isi. Em bikpela samting. Lukim tok bilong aposel em i tok: “Yupela maritmeri mas aninit long ol man bilong yupela. Na sapos sampela man i no save bihainim tok bilong God, orait ol i ken lukim yupela meri bilong ol, yupela i no toktok planti, tasol yupela i wokabaut stret. Olsem na ol i ken tanim bel. … Mobeta yupela i bilasim insait bilong bel. Dispela bilas em i no inap long bagarap. Em i pasin bilong bel i stap isi, na bel i malolo Dispela em i gutpela tumas long ai bilong God.”—1 Pita 3:1-4, NT.

Insait long Kongrigesen

Kongrigesen Kristen i olsem wanpela bikpela famili. (Lukim 1 Timoti 3:15) Sapos ol i pas gut wantaim ol brata brata tru, na ol i mekim pasin isi, olsem ol i no kros kros long ol liklik pasin narapela brata o sista i mekim olgeta long kongrigesen i mekim pasin long ol narapela. Na bai ol i stap wanbel na bel isi. Ol brata i gat wok long lukautim kongrigesen long ol samting bilong spirit ol i mas paslain long mekim pasin isi na pasin sori na tingim kongrigesen i olsem wanpela famili. Aposel Pol i tok: “Yu no ken krosim lapun man. Nogat. Yu mas stretim em long tok isi, olsem yu stretim papa bilong yu. Na yu mas stretim ol yangpela man, olsem yu stretim ol yangpela brata bilong yu. Na yu mas stretim ol lapun meri, olsem yu stretim ol mama bilong yu. Na yu mas stretim ol yangpela meri, olsem yu stretim ol susa bilong yu, long klinpela pasin tru.”—1 Timoti 5:1, 2, NT.

Dispela gutpela tok i soim yumi ol wasman o elda i mas bihainim pasin isi olsem bilong Krais. Sapos wanpela brata o sista i mekim wanpela samting i no stret na em i no save em i bin mekim rong, ol elda i no ken mekim hatpela pasin na krosim em. Nogat. Sapos ol i mekim kain pasin olsem ating bai ol i bagarapim bel bilong dispela brata o sista na bai em i belhat. Na dispela kain pasin bai mekim man i surik long ol. Olsem na ol elda i mas tingim gutpela tok spirit holi i kirapim Pol long raitim, olsem: “Ol brata, sapos yupela i lukim wanpela man i mekim wanpela sin, orait yupela man i bihainim Holi Spirit yupela i mas stretim bek isi isi bel bilong dispela man. Yupela i no ken bikhet long em. Yupela olgeta wan wan yupela lukaut. Nogut Seten i traim yu tu.”—Galesia 6:1, NT.

Taim yumi mekim pasin isi yumi bihainim pasin God yet i mekim long yumi. Pol i givim tok long wanpela wasman Kristen, em Taitas, na Pol i tok em i mas “mekim pasin isi tasol long ai bilong olgeta man.” Bilong wanem em i mas mekim olsem? “Yu save, bipo yumi tu i no gat gutpela tingting, na yumi save sakim tok, na Seten i giamanim yumi na yumi longlong nabaut. Yumi bin wok kalabus long kain kain pasin bilong bel i kirap na bilong bodi i amamas. Yumi bin wokabaut long pasin bilong bel nogut long ol man, na mangal long samting bilong ol. Ol man i bin birua long yumi, na namel long yumi tu yumi birua birua tasol i stap.” Tasol Jehova i marimari long yumi na helpim yumi.—Taitas 3:2-7, NT.

Jisas i tokim ol disaipel bilong em ol i mas i stap olsem “lait long ai bilong ol manmeri.” (Matyu 5:16, NT Wanem samting i save pulim ol manmeri long laikim narapela man? Hatpela pasin? o pasin isi? Yu yet yu ting olsem wanem? Ating bai yumi olgeta i wanbel wantaim tok bilong Jisas em i tok: “Olgeta pasin yupela i laikim ol manmeri i mekim long yupela dispela pasin tasol yupela i mas mekim long ol.” (Matyu 7:12, NT) Olsem na yumi mas mekim pasin isi, a?

Long Narapela Man

Ating sampela taim ol narapela man i birua long yumi, olsem long taim yumi go long haus bilong ol na yumi laik autim gutpela tok bilong Kingdom long ol. Taim kain hevi olsem i kamap, yumi mas bihainim pasin isi, olsem ol wasman Kristen i mas mekim insait long kongrigesen. Em bikpela samting. (Lukim 2 Timoti 2:23-26.) Sapos yumi bihainim pasin isi, ating sampela man bipo ol i birua long yumi bai ol i tanim bel na bihainim tok bilong kingdom.

Planti handet tausen manmeri long olgeta hap bilong graun ol i bilip long dispela gutpela tok. Ol i bung wantaim ol Kristen em spirit holi em bin makim ol na nau ol i kamap wanpela bikpela famili; ol i stap olsem ol brata brata tru. Olsem na long nau “planti tumas manmeri … bilong olgeta lain man, na bilong olgeta graun, na bilong olgeta kain skin, na bilong olgeta tok ples” ol i litimapim nem bilong God Jehova na pikinini Sipsip, tupela i bin kisim bek ol. (Revelesen 7:9, 10, NT; 14:1) Ol dispela Kristen i dediket pinis ol i stap na yumi save, pasin isi bilong Jehova i gat strong bilong kisim bek man. Ol i pilim tru gutpela pasin God Jehova i bin mekim long ol, olsem na ol i wok strong long bihainim pasin isi bilong em na gutpela samting i kamap. Gutpela sapos yu tu yu inap i stap wantaim ol manmeri i gat pasin isi ol bai kisim ol gutpela samting God i laik givim long ol man.—Lukim Matyu 5:5.

[Piksa long pes 11]

“Sori tumas! Mi lusim tingting”