Yumi Kisim Save Long Ol Kristen Bilong Pastaim
Pol i Raitim Pas i Go long Ol Korin
YUMI save amamas long raitim pas i go long ol man, na yumi save amamas long kisim pas tu, a? Em i wanpela gutpela rot tru bilong toktok wantaim ol pren o wanblut i stap long ol longwe ples. Ol kristen bilong pastaim ol tu i bin raitim sampela pas, na ol dispela pas i gat ol gutpela tok long en na i gutpela long kaunim. Na taim yumi kaunim ol dispela pas yumi ken save long i stap bilong ol man bilong dispela taim bipo na ol hevi ol dispela Kristen i mas karim long dispela taim. Sapos yumi kaunim ol dispela pas yumi inap save long ol dispela Kristen bilong pastaim.
Yumi ken stori long tupela pas aposel Pol i bin raitim i go long ol Kristen bilong Korin long hap bilong Grik, na nau dispela tupela pas i stap long Baibel. Ol dispela pas i kamapim pasin na tingting na sindaun bilong ol man bilong dispela hap, em ol man bilong narapela narapela hap ol i stap long dispela ples na ol i gat ol kain hevi bilong ol na wok bilong ol. Na taim yumi kaunim ol dispela pas yumi inap save gut long aposel Pol, em i wanpela strongpela Kristen tru, na em i namba wan man bilong autim gutpela tok long planti hap i stap aninit long gavman bilong Rom.
Pol i bin i go long Korin long yia 50 C.E., olsem 17 yia bihain long taim Jisas i dai. Long dispela taim Korin em i ples bilong kain kain wok bisnis. Kain kain man bilong ol narapela hap ol i save kam long dispela ples, long wanem, em i stap long rot bilong ol man bilong wokim bisnis ol i karim kago bilong ol i go i kam long ol longwe ples.
Na Korin em i namba wan ples bilong pilai spot. Ol lain bilong ol narapela narapela hap bilong graun ol i save kam na mekim ol bikpela pilai o gems kain olsem ol bikpela pilai bilong Olimpik. Na ol man bilong Korin ol i strong long mekim lotu, na ol i givim bel tru long lotuim wanpela god meri bilong ol Grik, ol i kolim Afrodaiti, na ol i mekim kain kain pasin sem na pasin pamuk taim ol i lotu long em. Olsem na i gat wanpela tok ol man bilong bipo ol i save mekim; sapos ol i tok wanpela man i bihainim pasin bilong ol Korin, i olsem ol i tok, em i mekim pasin pamuk na ol kain pasin olsem.
Ol Dispela Pas
Taim Pol i autim tok long Korin, dispela i kirapim bel bilong sampela Juda na ol i biruaim Pol. Tasol sampela man i laik harim na ol i givim bel long dispela tok, olsem na Pol i stap long dispela ples inap wanpela yia hap na em i kirapim wanpela kongrigesen Kristen. Taim Pol i lusim ol, dispela kongrigesen i strong pinis. Tripela yia bihain long dispela taim, Pol i raitim wanpela pas i go long ol, nau yumi save kolim olsem 1 Korin.
Bilong wanem Pol i raitim dispela pas long Korin? Wanpela samting i olsem: Ol i bin givim sampela askim long em long pas, na nau em i mas bekim ol dispela askim bilong ol. Tasol Pol i tingim wanpela bikpela samting moa na em i salim pas long ol. Em i bin kisim sampela tok long Korin na dispela tok i gat hevi. Pol i harim olsem kongrigesen i bruk na i no stap wanbel, na sampela man i wok long kirapim sampela bilip giaman, na sampela pasin nogut tu i kamap insait long kongrigesen, na sampela man ol i laik kamap bikpela man na ol i litimapim nem bilong ol yet, na dispela i nogutim kongrigesen long ol samting bilong spirit. Olsem na Pol i raitim dispela strongpela pas i go long ol bilong stretim dispela samting; tasol em i givim sampela gutpela tok isi long ol tu bilong mekim gut bel bilong ol. Orait taim kongrigesen bilong Korin i kisim dispela pas na ol i kaunim, ol i bihainim o nogat? Yumi ken tok, ol i bihainim, long wanem, klostu wanpela yia bihain Pol i salim namba tu pas long ol Korin na em i givim gutpela tok long ol na em i tok em i amamas long ol i bin stretim tingting bilong ol.
God yet i givim tingting long Pol na em i raitim ol dispela tok long pas. Olsem na ol dispela tok i no bilong helpim ol man bilong bipo tasol—em inap helpim yumi tu. Olgeta lo i stap insait long ol dispela pas ol i stap yet, na ol Kristen i mas bihainim yet. Olsem na sapos yu kaunim gut dispela tupela pas, bai yu inap save long ol lo bilong marit em ol Kristen i mas bihainim, na olsem wanem yumi ken wokim ol miting bilong lotu tru long God, na husat i mas daun long het o bos insait long kongrigesen, na olgeta Kristen i mas “i stap wanlain tru long wankain tingting na wankain laik.” (1 Korin 1:10) Na long dispela namba wan pas i gat ol gutpela gutpela tok long pasin sori, na i kamapim sampela gutpela tok bilong dispela bilip bilong ol Kristen long man i dai pinis bai i kirap bek. (1 Korin sapta 13 na 15) Tasol olsem yumi bin tok pastaim, ol dispela pas i helpim yumi na bai yumi ken save gut long ol Kristen bilong pastaim.
Ol Dispela Manmeri Bilong Lain Kristen
Ol Kristen bilong Korin ol i wanem kain man? Sampela ol i bilong lain Juda, olsem Krispas, em i hetman bilong haus lotu taim Pol i bin kamap namba wan taim long Korin. (Aposel 18:8) Na sampela ol i no bilong lain Juda; ol i bilong ol narapela lain, na bipo ol tu i bin insait long ol dispela pasin pamuk bilong ol Korin.—1 Korin 6:9-11.
Sampela man bipo ol i bin wok kalabus long ol man, na ating sampela bilong ol tu i bin kamap Kristen, na sampela meri, man bilong ol i dai pinis, na sampela singel, na sampela marit em poroman bilong ol i no bilip long tok bilong God. (1 Korin 7:12-40) Olsem na ating dispela kongrigesen long Korin i wankain liklik olsem ol kongrigesen Kristen ol i stap long ol bikpela taun.
Tasol ol dispela bilipman bilong Korin ol i nupela man tasol long lain Kristen. Olsem na ol i larim wanpela rong i stap insait long kongrigesen. Wanpela man em i bin kisim meri bilong papa bilong em, tasol ol i larim em i bung yet wantaim ol. Ating ol i gat wanpela tingting kranki, olsem ol i ting ol Kristen i stap fri, olsem na ol inap mekim ol kain samting olsem. Na kongrigesen i no i stap wanbel tu; em i bruk hap hap, na wanpela hap lain i bihainim wanpela man na hap lain i bihainim narapela man, na ol i no bihainim Krais. Na ol i no bihainim stret pasin bilong mekim Kaikai Bilong Bikpela long Apinun, na sampela ol i bin dring planti wain long dispela bung na ol i spak!—1 Korin sapta 1, 5, 11.
Na narapela samting tu ol i mekim: Sampela Kristen i kisim ol brata wanbilip bilong ol i go long kot. Na sampela insait long kongrigesen ol i tok, ol man i dai pinis ol i no inap kirap bek. Na sampela ol i wok long litimapim nem bilong ol yet na ol i ting ol i winim ol narapela bilong kongrigesen.—1 Korin 4:18; 3:18; 6:1-8; 15:12.
Ating yu kirap nogut long ol dispela planti hevi i bin kamap insait long dispela kongrigesen, a? Tru, i gat planti hevi i bin kamap. Tasol yumi mas save, taim Pol i kam namba wan taim long autim “gutnius” long Korin na i kam inap long dispela taim, em 5-pela yia tasol. Em i no longtaim, a? Tru God Jehova i bin givim sampela “presen” bilong spirit long ol na bai ol inap mekim bikpela wok long en bilong strongim kongrigesen. Tasol ol Korin i no tingim tumas ol dispela samting—ol i laikim tru dispela strong God i bin givim ol long autim tok long kain kain tok ples. Dispela em i wanpela mak bilong kamapim long ol man i no Kristen, tasol em i no save helpim kongrigesen long kamap strong long spirit na i stap wanbel. Nogat. Olsem na Pol i tokim ol long mekim wok long narapela “presen” ol i bin kisim, em strong bilong autim tok profet; long wanem, dispela bai helpim ol long kamap strong long spirit.—1 Korin 14:1-12.
Tasol i no olsem olgeta i gat tingting nogut; nogat. Planti Kristen bilong Korin ol i gat gutpela tingting, tasol ol i sot long sampela save. Olsem na ol i salim pas long Pol na ol i givim sampela askim long em. Ating ol i laik save long pasin bilong mekim stret sampela wok bilong ol. Na Pol i raitim pas long ol na em i mekim gutpela tok long ol, em i tok: “Yupela oltaim i save tingting long mi na holimpas olgeta dispela tok mi bin kisim na givim long yupela. Olsem na mi tok, yupela i save mekim gutpela pasin tru.” (1 Korin 11:2) Na taim Pol i laik stretim ol na em i givim strongpela tok long ol long pas, planti ol i putim dispela tok long bel bilong ol na kwiktaim ol i kirap na bihainim, long wanem, ol i bel hevi long dispela pasin ol i bin mekim. (2 Korin 7:11) Tasol sampela i wok yet long sakim tok bilong Pol na ol i no laik bihainim.—2 Korin 10:10; 11:4-6.
Ol Gutpela Pasin Bilong Sampela
Insait long tupela pas, Pol i bin kamapim nem bilong sampela man na meri bilong kongrigesen. Wanpela em Sostenis, ating bipo em i wanpela bikpela man long lain Juda taim em i no kamap Kristen yet. (1 Korin 1:1; Aposel 18:17) Na Klowi wantaim famili bilong em tu i bilong Korin, na ol i bin toksave long Pol long ol dispela kros na hevi i kamap insait long kongrigesen. Em i gutpela pasin tru ol i mekim; ol i no pret long bihainim pasin i stret na tokaut long ol rong i kamap insait long kongrigesen! (1 Korin 1:11) Na lain bilong Stefanas tu, em ol i bin kamap Kristen paslain long ol narapela bilong Korin; ol i mekim bikpela wok bilong helpim ol manmeri bilong God—em wanpela gutpela pasin tru yumi ken bihainim. Pol i bin kamapim nem bilong Stefanas wantaim nem bilong Fotyunetas na Akaikas taim em i tokim ol Korin: “Yupela i mas litimapim nem bilong ol dispela kain man.”—1 Korin 16:18, 15, 17.
Na nem bilong Apolos tu i stap long pas bilong Pol. Apolos em i man bilong save gut long pasin bilong toktok, na tok bilong em i save kirapim tingting bilong man. Pol i bin askim em long i go lukim kongrigesen long Korin, tasol long dispela taim em i no laik i go. Ating em i gat sampela ol narapela wok em i mas mekim, o ating em i bin harim tok long lain bilong ol i bruk na sampela i tok ol i bilong Apolos, olsem na em i no laik i go na helpim dispela pasin bilong ol long bihainim wanpela man. (1 Korin 16:12) Olsem na Taitas i helpim Pol na em i go lukim ol Korin, na bihain em i bringim gutpela tok long Pol, em i tok ol Korin i wok long senisim pasin na tingting bilong ol na ol i kamap gutpela. (Taitas 1:5; 2 Korin 7:14, 15; 12:18) Na dispela gutpela yangpela man Timoti tu i bin i go long Korin. Em i bin helpim Pol long kirapim wok bilong autim tok long Korin, na Pol i laik bai Timoti i go bek na lukim ol gen. (1 Korin 4:17; 16:10) Em nau, taim yumi kaunim dispela tupela pas bilong Pol yumi save, dispela lain Kristen long Korin ol i mekim bikpela wok. Ol i wanpela lain tru i bin i stap long bipo, na ol i gat bikpela tingting long mekim wok bilong God na helpim ol brata.
Aposel Pol
Na man bilong mekim bikpela wok tru namel long ol, em aposel Pol. Na taim em i autim gutpela tok long ol Korin, em i no mekim long strongpela pasin na bikmaus na singaut strong olsem sampela man i ting em i mekim. Nogat. Em yet i tok: “Bipo mi stap wantaim yupela, long dispela taim mi no gat strong. Mi gat pret na mi guria planti.” (1 Korin 2:3) Maski planti bikpela hevi i bin kamap insait long ol Kristen bilong Korin, tasol Pol i no les long ol; em i laikim tru ol Korin. Yumi inap pilim dispela sori bilong Pol insait long ol dispela pas em i raitim long ol. Em i givim gutpela tok long ol, na em i amamas tru taim em i harim olsem ol i kisim ol strongpela tok em i givim long ol na ol i bihainim.—1 Korin 4:14; 11:2; 2 Korin 7:8-13.
Bel bilong yumi i sori tru long Pol taim yumi kaunim stori bilong ol bikpela hevi em i bin kisim long mekim wok bilong God—ol man i bin paitim em planti taim, na em i save wokabaut longwe rot, na sampela taim ol man i laik bagarapim em, na em i laik lus long solwara, na ‘wanpela samting olsem nil i sutim skin bilong em,’ ating em i wanpela bikpela sik bilong ai. (2 Korin 12:7-10; 11:21-27) Na Pol i tok: “Na i no dispela tasol. Nogat. Long olgeta de mi tingting planti long lukautim olgeta [ kongrigesen], na dispela i putim bikpela hevi tru long mi.” (2 Korin 11:28) Ating planti elda bilong lain Kristen long nau ol i pilim tru ol dispela hevi bilong Pol.
Tasol Pol i no bel nogut na toktok planti long dispela samting. Nogat. Em i tokaut long ol dispela samting bilong soim ol Korin em inap tru long holim namba insait long kongrigesen na em inap tru long ol i ken daun long tok bilong em, na em i no aninit long ol dispela “namba wan aposel” bilong ol. (2 Korin 12:11-13) Em i amamas long karim ol dispela bikpela hevi, long wanem, dispela i kamapim ples klia olsem em i mekim wok long strong bilong God na em i no mekim long strong bilong em yet. (2 Korin 12:9, 10) Pol i no bilip nating. Em i mekim bikpela wok long dispela bilip bilong em. Olsem na Pol i soim gutpela rot long ol Kristen i ken bihainim.
Pol i tokim ol Korin: “Mi laik kirapim yupela long makim pasin bilong mi na wokabaut.” (1 Korin 4:16) Yumi ol man bilong nau tu yumi mas bihainim dispela tok bilong Pol. Tasol sapos yumi laik bihainim ol dispela gutpela pasin bilong Pol, yumi mas save long em pastaim—yumi mas save long ol gutpela wok bilong em na em i stap strong na i no surik liklik, na yumi mas save long ol tingting i stap long bel bilong em, na em i bin givim bel tru long God. Sapos yu laik save gut long Pol olsem, orait yu ken kaunim tupela pas em i bin raitim long ol Kristen bilong Korin. Ating yu laik kirap nau long kaunim, a?