Rot Bilong Tingim Gut Ol Samting Yu Laik Mekim
ALIS (Alice) i no tingim gut ol samting em i laik mekim na bikpela hevi i painim em. Em i tok: “Mi lusim Jehova na oganaisesen bilong em.” Bihain bihain em i kam bek, tasol em i stap ausait inap 13 yia na em i tok, ‘Long dispela 13 yia mi no amamas liklik.’
Ol Kristen i mas tingting gut; nogut ol i no tingim gut ol wok bilong God ol i mas mekim na hevi i painim ol. Taim Kristen i mas skelim wanem samting em i laik mekim, ating em i no skelim skelim ol samting na nau long laik bilong em yet em i kirap bihainim rot i no stret. Nogat. Ating em i no tingting gut, na laik bilong bel i kamap strong, na nau em i bihainim rot i no stret. Bel bilong yumi i no gutpela olgeta na sapos bel i kirap na paulim tingting bilong yumi, bai yumi no tingting gut na bai kain kain samting nogut na hevi inap painim yumi.
Tru tumas, “bel bilong man i save giaman tru, winim olgeta narapela samting.” (Jeremaia 17:9, NW) Tasol Baibel i soim rot long yumi bilong helpim yumi. Baibel i tok, sapos bel bilong yu i kisim “gutpela tingting,” orait “pasin bilong tingting gut bai i banisim yu na gutpela save bai i was long yu.” (Provep 2:10, 11) Tasol olsem wanem yu ken kisim gutpela tingting?
Tingim Samting i Bin Kamap Bipo
Bilong kisim gutpela tingting yu ken mekim olsem: Taim wanpela hevi i kamap, orait tingim wankain hevi i bin kamap long bipo na tingim ol samting ol wokboi bilong Jehova i bin mekim long dispela taim bipo. Olsem: Sapos yu tingting planti long wanpela pasin i kamap insait long kongrigesen, orait tingim wankain pasin i bin kamap long kongrigesen Kristen bilong pastaim na tingim stori bilong Baibel long dispela samting.
Olsem wanem long kongrigesen bilong Korin long bipo? Tingim dispela kongrigesen na tingim olsem yu yet yu stap long en. Ating tupela o tripela yia bipo, taim Pol i stap inap 18 mun long Korin, yu bin kamap Kristen na long dispela taim yu amamas! Tasol nau samting nogut i kamap insait long kongrigesen na yu no amamas.
Kongrigesen i bruk na i gat kros i stap namel long ol. Ol i no i stap wanbel. (1 Korin 1:10, 11) Wanpela man insait long kongrigesen i bin bagarapim marit, tasol ol i no rausim dispela man. (1 Korin 5:1-5) Narapela Kristen i gat tok long narapela Kristen na ol i go mekim kot long ai bilong ol man ausait. Dispela samting i bagarapim gutpela nem bilong kongrigesen.—1 Korin 6:1-8.
Orait, tingting yet olsem yu stap long dispela kongrigesen bilong Korin long bipo. Yu tingting planti, long wanem sampela insait long kongrigesen i save tok pait long sampela samting i liklik samting tasol. (Lukim tok bilong 1 Korin 8:1-13.) Yu bel hevi long kain kain pasin i kamap insait long kongrigesen, olsem tok pait, na bel nogut long brata, na kros, na bikhet. (2 Korin 12:20) Yu tingting planti, long wanem sampela insait long kongrigesen i litimapim nem bilong ol yet na givim hevi long ol narapela. (1 Korin 4:6-8) Bel bilong yu i pen taim yu harim sampela i sutim tok giaman long Pol na ol i tok, Pol i no gat namba na tok bilong em i samting nating tasol. (2 Korin 10:10; 12:16) Yu tingting planti, nogut ol man i bihainim tingting bilong ol yet ol i bagarapim bilip bilong kongrigesen, na kongrigesen i no bilip moa long ol as tok bilong bilip.—1 Korin 15:12.
Tingting Gut
Yu bel hevi na yu tok, ‘Dispela pasin i no stret. Bilong wanem ol elda i no stretim? Pasin nogut tru i kamap.’
Orait, nau yu mas tingim gut ol samting yu laik mekim. Bai yu lusim kongrigesen bilong Korin na i go mekim wok bilong God long narapela kongrigesen? O bai yu lusim kongrigesen olgeta na yu no bung moa wantaim ol brata Kristen? Bai yu larim ol dispela hevi i daunim amamas bilong yu na bagarapim bilip bilong yu olsem God Jehova na Krais Jisas i bosim kongrigesen? Bai yu bel nogut na toktok planti, na tingting nogut long ol brata Kristen? Bai yu slek long mekim wok bilong autim tok, long wanem yu ting i no gutpela sapos yu singautim ol nupela man i kam long kain kongrigesen olsem?
Yu no i stap long dispela kongrigesen bilong bipo; yu stap long nau. Tasol ating bai yu tok, sapos mi bin i stap long dispela kongrigesen bilong bipo, maski i gat ol dispela hevi, mi no ken lusim kongrigesen bilong God. Tasol olsem wanem sapos ol kain hevi olsem i kamap long nau? Bai yu tingting gut na i stap bel isi? Tru, nau yu ting olsem, ‘Sapos mi bin i stap long dispela kongrigesen long bipo, mi no ken les na lusim kongrigesen.’ Tasol sapos wankain hevi i kamap long nau bai yu tingting gut olsem?
Tok Bilong Stretim Ol i Helpim Ol
Ol Kristen bilong Korin ol i tingting gut em ol i no lusim kongrigesen. Ol i bihainim tingting wankain olsem bilong Pita, em sampela yia bipo sampela disaipel i laik lusim Jisas, na Pita i tok: “Bikpela, bai mipela i go long husat? Tok bilong yu i givim laip i stap gut oltaim oltaim. Na mipela i bilip na save gut olsem, God i bin makim yu olsem man bilong em stret.” (Jon 6:68, 69) Yumi mas i stap klostu long oganaisesen bilong God bambai ol gutpela tok bilong en i ken helpim yumi.
Long ol nupela kongrigesen, kain olsem kongrigesen bilong Korin long bipo, sampela taim hevi i kamap, long wanem ol man i gat sin na ol i no gutpela olgeta, na i mas i gat strongpela tok bilong stretim dispela hevi. Taim Pol i givim tok long ol Kristen long Korin bilong stretim ol, em i no lusim tingting olsem planti ol i stap strong yet olsem “ol brata tru.” (1 Korin 10:14; 2 Korin 7:1; 12:19) Em i no lusim tingting olsem Jehova i save marimari long ol man i bihainim tok bilong em na em i save lusim sin bilong ol.—Sam 130:3, 4.
I gat kain kain man ol i kam insait long kongrigesen Kristen. Sampela ol i kirap kwik na bihainim ol tok bilong God, na sampela ol i isi isi liklik. I gat kain kain as bilong dispela samting. I gat sampela pasin i no hatwok tumas long man i senisim; tasol sampela pasin i hatwok long man i senisim. Olgeta man i gat narapela narapela kain skin na tingting na sindaun, na taim ol i liklik yet ol i bin lain long narapela narapela kain pasin. Tasol man i bihainim gutpela tingting em i no save kros kros long pasin bilong narapela man na sutim tok; nogat; em i save, “pasin bilong sori em i save karamapim planti sin”! (1 Pita 4:8) Jehova wantaim Pikinini bilong em, tupela i no save les kwik long ol liklik pasin kranki ol man long lain bilong ol i mekim. Ol i save, ol dispela man i sinman bilong graun tasol na sampela ol i no strong long spirit. Orait, olsem wanem long yumi? Yumi mas bihainim pasin bilong tupela, a?—1 Korin 13:4-8; Efesas 4:1, 2.
Sapos yu bin i stap long kongrigesen bilong Korin long bipo, taim yu harim strongpela tok Pol i givim long kongrigesen long pasin sori, bai yu tingim gut olsem Krais em i het bilong kongrigesen na em i lukautim. (Matyu 28:20) Na ol dispela tok yu harim bai strongim bilip bilong yu, na bai yu bilip tru long tok promis Jisas i bin mekim long helpim ol disaipel bilong em long i stap wanbel sapos ol i bihainim ol tok ol i kisim long rot bilong lain ‘gutpela wokboi.’ (Matyu 24:45-47; Efesas 4:11-16) Na ol tok bilong Pol bai helpim yu long i stap amamas, na i stap strong maski wanem kain hevi i kamap. Bai yu bilip tru olsem God i save givim strong long yumi bambai yumi inap long karim olgeta hevi em i larim i kamap i stap inap liklik taim.
Tasol sapos pasin nogut i kamap insait long kongrigesen, ol Kristen i no ken larim tasol. Long kongrigesen bilong Korin long bipo sampela strongpela brata, olsem Stefanas na Fotyunetas na Akaikas na sampela bilong lain bilong Klowi, ol i bin kirap na mekim sampela samting bilong stretim dispela samting. Ating ol i bin raitim pas long Pol na toksave long em. (1 Korin 1:11; 5:1; 16:17) Tasol taim ol i toksave pinis long Pol, nau ol i wet tasol. Ol i save Krais i stap bos bilong kongrigesen. Ol i laikim tumas stretpela pasin na ol i no makim longlong pasin na ‘kros long Jehova.’—Provep 19:3.
Yumi tu yumi strong long bihainim stretpela pasin, olsem na yumi no tingting liklik long lusim dispela wok God i bin givim long yumi, em wok bilong autim tok. Sapos yumi slek long mekim dispela wok, bai yumi no tingim gut ol narapela man na yumi no bihainim tok bilong Krais. Olsem na Pol i tok: “Olsem na, ol brata tru bilong mi, yupela mas i stap strong, na i no ken surik liklik. Hatwok yupela i save mekim long Bikpela, em bai i no lus nating. Yupela i save olsem, na oltaim yupela i mas wok strong long wok bilong Bikpela.”—1 Korin 15:58.
Yu Mas Save long Tingting Bilong Seten
Kain hevi olsem i bin kamap insait long kongrigesen bilong Korin long bipo i hatwok moa long karim, winim hevi yumi kisim long han bilong ol man i birua long yumi. Seten i mekim wok long kain hevi olsem bilong paulim tingting bilong yumi, na bai yumi no tingting gut na yumi lusim Jehova. Tasol “yumi save pinis long tingting bilong [Seten].”—2 Korin 2:11.
Pol i tokim ol Kristen long Korin, sapos ol i tingim ol samting i bin painim ol wokboi bilong God long bipo, dispela bai helpim ol. Pol i tok: “Dispela olgeta samting i bin kamap long ol [Isrel], em i olsem piksa bilong man i lukim. Na dispela ol stori i stap long Baibel bilong givim tingting long yumi man i stap nau long taim i klostu i laik pinis.” (1 Korin 10:11) Yumi tu yumi ken tingim ol samting i bin kamap long ol wokboi bilong God long bipo na dispela inap helpim yumi. Olsem: Yumi bin tingim ol samting i bin kamap insait long kongrigesen bilong Korin long bipo. Taim yumi tingim dispela kongrigesen na ol samting yumi bai mekim sapos yumi bin i stap long en, dispela i helpim yumi long tingting gut long nau.
Alis i lusim kongrigesen inap 13 yia na insait long dispela 13 yia em i no amamas liklik. Bihain em i kam bek insait long kongrigesen na em i stori long namba wan miting em i go long en long Haus Kingdom, em i tok: “Mi pret long toktok, nogut mi krai. Mi pilim olsem mi kam bek long haus bilong Papa na bel bilong mi i sori gen.” Olsem na yu mas tingting strong olsem: Maski wanem wanem kain hevi i kamap, yu mas tingting gut na yu no ken lusim oganaisesen bilong Jehova! Taim yu bung wantaim lain bilong God yu kisim planti blesing. Na ol dispela blesing i no ken pinis.—Provep 2:10-15, 20, 21.