Insait Bilong Ol Tok i Kam Long Olgeta Hap

Bilip i No Strong

Wanpela nius bilong Jemani (Die Welt) i kamapim wanpela askim olsem: “Ol man i Kristen Olsem wanem?” Em i stori long ol holide bilong Ista, olsem Paska. Na dispela nius i tok, ol man bilong nau ol i bin insait wanpela misin na ol i save givim takis long misin, tasol ol i no gat save long bilip bilong misin bilong ol; wanem wanem samting i stret long laik bilong ol, ol i bilip long dispela, na em i olsem lotu bilong ol na ol i kolim lotu Kristen.

Na narapela nius (The New York Times) i tok, ol Amerika i no bilip tumas long Krais Jisas; ol i tok ol i bilip long em, tasol ol i bilip long ol narapela samting i no stret wantaim tok bilong Krais Jisas; ol i gat liklik save tasol long ol tok bilong Baibel, na planti, olsem 43 pesen, ol i no inap kolim nem bilong sampela hap bilong Nupela Testamen, na 60 pesen i no save Jisas i bin mekim wanpela bikpela Tok long Maunten.

Tasol bilip bilong ol Kristen tru i no olsem! Tok bilong aposel Pol long Hibru 11:1 i tok: “Pasin bilong bilip em i olsem: Bel bilong yumi em i holimpas pinis ol samting yumi wet long God i givim yumi. Na ol samting ai bilong yumi i no lukim, em bel bilong yumi i save tru long dispela i stap.” Kristen i no bilip tasol long ol samting i stret long laik bilong ol yet. Nogat. Pol i tok: “Yumi harim tok bilong God na dispela i kirapim bilip. Na dispela tok yumi harim, em i kamap long maus bilong Krais.” (Rom 10:17) Sapos yumi wok strong long kisim save i stap long Baibel, bai yumi kisim bilip em inap helpim yumi long i stap laip oltaim.—Jon 17:3.