Askim

■ Wanem dispela “mirakel bilong Jona” em Matyu 16:4 i kolim?

Ol Farisi na Sadyusi i tokim Jisas long wokim wanpela mirakel ,tasol Jisas i bekim tok long ol na em i tok: “Yupela lain manmeri nogut, yupela i save hambak nabaut, yupela i singaut long mirakel. Tasol bai mi no wokim wanpela mirakel bilong yupela. Nogat. Bai yupela i ken lukim mirakel bilong Jona tasol.”—Matyu 16:1-4, NT.

Ating ol dispela bikpela bos bilong lotu ol i laik lukim wanpela mirakel bilong heven bambai ol i ken save, Jisas em i Krais o nogat. Ol i tingim wanpela tok long Danyel 7:13, 14, tasol ol i no save gut long insait bilong dispela tok. Ol i gat tingting bilong ol yet long Krais i mas mekim wanem ol wok, na ol i laik bai Jisas inapim ol dispela samting na bai ol i ken bilip long Jisas em i Krais tru o nogat. Ol i no laik bilip long ol bikpela samting Jisas i wok long mekim na ol i tok em i mekim. (Jon 4:25-29, 42; 7:31; 9:30-33) Olsem na Jisas i tokim ol dispela Farisi na Sadyusi ol i no ken lukim narapela mirakel; ol “i ken lukim mirakel bilong Jona tasol.”

Bipo, Jisas i bin toktok long “mirakel bilong Jona,” na dispela tok bilong em inap helpim yumi long save long dispela samting. Em i tok: “Olsem bipo Jona i stap tripela de na tripela nait insait long bel bilong bikpela pis, olsem tasol bai Pikinini Bilong Man i stap tripela de na tripela nait insait long graun.”—Matyu 12:38-40 NT.

Bikpela pis i bin daunim Jona na em i go daun insait long bel bilong pis na i olsem em i stap long matmat. (Jona 2:1, 2) Bihain em i lusim bel bilong pis na em i kam ausait. I olsem em i lusim matmat na i kirap bek na i stap laip. Em i kirap bek pinis na em i go long Niniva na mekim wok bilong em long autim tok profet. Dispela i wankain olsem Jisas i mekim.

Jisas i tok em bai dai, na long namba tri de em bai kirap bek na i stap laip. (Matyu 16:21; 20:17-19; Jon 2:19-21) Bihain em i dai, na long namba tri de em i kirap bek na i stap laip, na long dispela taim ol disaipel bilong em ol i tingim gen tok bipo em i bin mekim long em i mas i dai na kirap bek long namba tri de, olsem na ol i bilip strong long em. (Jon 2:22; 1 Korin 15:3-8) Sampela pris bilong ol Juda ol i harim ol dispela tok long “mirakel bilong Jona,” na ol i harim ol Kristen i autim tok, na nau ol “tu ol i bilip.” (Aposel 6:7, NT) Tasol ol i no planti. Planti bikpela bos bilong ol Juda ol i no laik bilip long ol bikpela wok Jisas i bin mekim na ol tok em i bin mekim taim em i stap namel long ol. Ol i stap bikhet yet. Ol i sakim “mirakel bilong Jona,” em i makim Jisas i dai na i kirap bek long namba tri de, tasol ol dispela Juda i sakim dispela samting.

■ Long Rom 1:25 Pol i tok long ol Juda o ol manmeri bilong ol narapela lain taim em i tok “ol i lotu long samting God i bin wokim, … na ol i givim baksait long em”?

Dispela tok inap makim ol Juda o ol manmeri bilong ol narapela lain, long wanem ol i gat asua long mekim dispela pasin nogut. Tasol ol tok bilong Pol long Rom sapta 1 i makim tru ol Isrel bilong bipo ol i bin lusim God Jehova.

Olgeta samting God i bin wokim i soim ol man God em i stap. Olsem na sapos ol manmeri bilong ol narapela lain i wokim piksa bilong animal samting na lotu long en, ol tu i no gat rot bilong haitim rong bilong ol na tok, ‘Mi no bin save.’ Tasol God i bin tambuim ol Isrel long mekim dispela pasin, olsem na sapos ol i givim baksait long God na lotu long samting Em i bin wokim, ol i gat bikpela rong moa.—Rom 1:18-23; Diuteronomi 4:15-19; 5:8, 9.

Tasol planti Isrel ol i sakim tok tru na ol i lotu long samting God i bin wokim. (Rom 1:24, 25) Ol i lotuim piksa bilong god meri Astoret (em piksa bilong wanpela meri i stap pui nating na i gat bikpela susu samting) na piksa bilong ol bulmakau gol. (1 King 11:5, 33; 12:26-28; 2 King 10:28, 29) Dispela samting i pulim ol long mekim kain kain pasin doti na pasin i gat sem. Ol dispela Isrel i save long “stretpela lo bilong God” long ol dispela pasin nogut, olsem na ol i gat bikpela asua moa na ol i mas bilip long ofa bilong Krais.—Rom 1:26-32, NT.