Ranawe—I Gat Liklik Hap Taim i Stap Yet!
TAIM Jisas i tok profet long pinis bilong lotu samting bilong ol Juda long dispela taim bipo, em i tingim narapela samting tu em bai pinis. Em i save ol samting i kamap long dispela taim bipo i makim ol bikpela samting tru bai kamap long “las taim” bilong dispela pasin bilong nau.—2 Timoti 3:1-5; Matyu 24:3.
Olsem wanem yumi inap save tru, ol dispela samting i bin kamap long bipo i makim sampela samting i mas kamap long nau? Yumi inap save olsem, long wanem taim Jisas i mekim dispela tok profet em i tok long taim em bai kam wantaim “bikpela strong na bikpela lait.” Na taim em i kam olsem bai “olgeta lain man bilong graun ol i krai,” long wanem bai bagarap i painim ol. (Matyu 24:30) Ol dispela samting i no kamap taim Jerusalem na Judia i bagarap long yia 70 CE. Nogat. Na taim Luk i stori long dispela tok profet Jisas i mekim, Luk i tok Jisas i tok olsem: “Lek bilong ol man bilong ol arapela lain bai i krungutim Jerusalem, inap dispela lain man i pinis.”—Luk 21:24.
Wanem dispela “Jerusalem”? Dispela taim bilong “ol man bilong ol arapela lain” em i pinis long wanem taim?
Dispela “Ples Holi” na Dispela “Samting Nogut Tru”
Wanpela kingdom bilong God em i piksa bilong kingdom tru bilong Em i bosim Jerusalem namel long yia 1070 na 607 BCE. Dispela kingdom i makim wok king bilong God long graun. Ol king bilong dispela kingdom ol i bilong lain bilong Devit, tasol ol Babilon i pinisim dispela lain king. No gat wanpela kingdom i kamap gen long Jerusalem i kam inap long nau. Tasol lek bilong ol man i no krungutim moa Jerusalem, long wanem nau God i mekim wok king bilong em long rot bilong “Jerusalem i stap long heven.” Ol yia Baibel i makim na ol tok profet i kamap tru na tok bilong ol man bilong raitim stori long ol samting i bin kamap long bipo, olgeta dispela samting i makim taim bilong “ol man bilong ol arapela lain” i pinis long yia 1914 CE. Na taim bilong ‘olgeta lain man i pret’ em i kirap.—Hibru 12:22; Luk 21:24-26; Revelesen 11:15.
Dispela “Jerusalem i stap long heven” i gat lain bilong en long graun, em ol Kristen spirit holi i bin makim ol na ol i stap gut long God. Nau dispela “Jerusalem” i stap long “ples holi.” Tasol yu ting ol lain man i tingim dispela samting? Nogat tru! Long yia 1919 ol putim tok long kamapim Lig ov Nesen, na sampela pris pasto i gat nem ol i tok dispela gavman politik i olsem “kingdom bilong God i kamap long graun.” Long yia 1945 ol i kamapim Yunaitet Nesen, olsem senis bilong Lig ov Nesen, na ol bikpela man bilong lotu i tok, dispela samting tasol inap kamapim pasin sekan na gutaim long graun bilong i stap oltaim. Ol i tok dispela gavman bilong graun inap mekim dispela wok kingdom bilong God tasol inap mekim. I olsem ol i laik putim dispela samting ol man i bin kamapim i sanap long “ples holi” bilong kingdom bilong God. Em “samting nogut tru” long ai bilong God na olgeta man i laikim tumas stretpela pasin!
Tasol nau yumi stap.klostu long taim God i laik pinisim dispela pasin nogut bilong nau, na Yunaitet Nesen inap bagarapim ol lotu. Olsem wanem? Long wanem sampela strongpela lain insait long Yunaitet Nesen, olsem ol lain Komyunis, ol i go insait pinis long ol samting ol lotu i bosim, olsem long “ples” bilong ol. Ol dispela lain i no bilip long God na ol i laik pasim wok bilong ol misin bilong Krisendom, olsem long hap bilong Saina na Rasia na long ol hap bilong Yurop long Is. Ol lain bilong Yunaitet Nesen, em ol i laik kisim bikpela strong bilong bosim planti hap, nau ol i birua long ol misin bilong Krisendom. Ol i laik kisim “ples holi” bilong ol. Dispela “ples holi” i olsem olgeta samting ol misin bilong Krisendom i ting em i holi, olsem ples ol i mekim wok long en, ol ogenaisesen bilong ol, ol haus lotu bilong ol na ol narapela mani kago samting bilong ol, na wok bilong ol long bosim sindaun na wokabaut bilong lain bilong ol em ol i tok i stret ol i ken bosim ol olsem. Orait, ol dispela lain na ol misin i birua i stap na bihain bai wanem samting i kamap?
Baibel i tok, dispela ‘samting i save bagarapim ples’ long nau, em Yunaitet Nesen, olsem dispela wel abus i gat 7-pela het na 10-pela kom,’ em bai ‘tekewe olgeta samting’ bilong ol lotu giaman na “bagarapim em tru” na “kukim em olgeta long paia.” (Revelesen 17:3, 16) I no olsem ol i laikim tumas God na ol i mekim. Nogat. Olsem ol Rom bilong bipo ol i no laikim tumas God. Dispela “samting nogut tru” bilong nau i gat planti lain insait long en, em ol i no laikim God, na ol i no laikim kingdom bilong Em, na ol i no laikim ol manmeri i holim nem bilong Em, em Jehova. Seten i bosim dispela samting bilong nau “i save bagarapim ples.”—Luk 4:5-8; 2 Korin 4:4; Matyu 6:9, 10.
“Ranawe i Go long Maunten”
Taim Yunaitet Nesen i kamap long 1945, olsem senis bilong Lig ov Nesen, long dispela taim i gat sampela lain insait long en ol i birua long God. Olsem na mak i kamap strong moa na ol manmeri i gat stretpela bel ol i mas tingim toksave bilong Jisas na kirap long “ranawe i go long maunten.”—Matyu 24:16; Revelesen 7:9, 10; 18:4.
Dispela “maunten” i makim wanem samting long nau? Em ples hait God i givim long lain bilong em bilong lukautim ol hia long graun long taim bilong “bikpela hevi tru.” (Revelesen 7:1, 14) Em samting bilong ogenaisesen bilong Jehova, na dispela ogenaisesen i gat lain bilong en long graun long nau, em kongrigesen Kristen tru. (1 Timoti 3:15) Long “taim bilong bihain tru” dispela kongrigesen i paslain long mekim lotu tru long “maunten bilong haus bilong Jehova.” (Aisaia 2:2, 3, NW) Na long Provep 18:10 Baibel i tok: “Bikpela i olsem wanpela strongpela haus. Ol stretpela man i ken ran i go long en na stap gut.”
Man i laik ranawe i go long lain bilong Jehova na long lotu tru bilong Em, dispela man i mas lusim ol lotu giaman bilong dispela graun. Em i mas lusim olgeta. Em i mas kamap wanpela wokboi tru bilong Jehova, wanpela disaipel bilong Krais Jisas.
No Ken Lusim Taim
Yumi mas ranawe kwiktaim; yumi no ken lusim taim. Yumi no ken ting bai i gat liklik hap taim moa bilong ranawe olsem long taim ol ami bilong Rom i lusim Jerusalem long yia 66 CE. Nogat. Kain samting olsem i no ken kamap long nau, long wanem yumi no ken ranawe i go long wanpela ples tru bilong graun. Taim Lig ov Nesen i kamap bihain long Namba Wan Pait Bilong Olgeta Hap na dispela “wel abus” i kam antap gen long 1945, olsem Yunaitet Nesen, dispela em i mak na ol man i tingim gut ol inap save em taim bilong ranawe i go long maunten.
No gat bikpela hap taim moa, olsem na nau yumi mas hariap na ranawe. Liklik taim tasol na bai dispela “samting nogut tru” i bagarapim “ples holi” bilong ol misin bilong Krisendom na bai taim bilong “bikpela hevi tru” i kirap.
Ol man ol inap winim taim bilong “bikpela hevi tru,” yumi mas painim ol pastaim, olsem na Jehova i no ken larim ‘ol ami i banisim ples’ longtaim. Tru, olsem Jisas i tok, dispela taim em i taim bilong bikpela hevi tru, winim olgeta taim bipo. Tasol God bai “sotim” dispela taim, olsem em i mekim taim ol ami i banisim Jerusalem, long wanem ‘ol manmeri em i makim ol’ ol i ranawe pinis.
Long 1 Jon 2:17 Baibel i tok: “Pasin bilong graun bai i pinis, na aigris bilong en tu wantaim. Tasol man i bihainim tok bilong God, em bai i stap oltaim.” Olsem na ol manmeri i “bihainim tok bilong God” na i lotu long Em long pasin i stret, ol i no ken lus long taim bilong dispela bikpela hevi tru. Sapos God i no sotim dispela taim bai “olgeta manmeri” i lus, tasol ol dispela “manmeri” i no lus. Olsem Revelesen 7:9-17 i tok, ol i olsem ‘bikpela lain manmeri’ bilong olgeta lain na tok ples.
Tasol olsem wanem long ol man i no bihainim dispela toksave na ol i no ranawe? Tok profet bilong 2 Tesalonaika 1:7-9 i tok klia, olsem: “Taim Bikpela Jisas wantaim olgeta strongpela ensel bilong en i lusim heven na i kamap ples klia wantaim bikpela paia. Long dispela taim bai em i bekim pe nogut long ol man i no save long God na i no bihainim gutnius bilong Bikpela bilong yumi Jisas. Ol dispela man bai ol i kisim pe nogut olsem: Bai ol i … lus olgeta.”
Tru tumas, yumi mas tingim gut dispela wok God i kirapim lain bilong em long mekim long nau bilong toksave long ol man. Dispela wok i truim tok bilong Matyu 24:14, olsem: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” Ol manmeri i tingim gut na ol i ranawe bai ol i stap oltaim na inap long olgeta taim bihain bai ol i makim tok promis bilong Baibel i tru, em i tok: “Bikpela i no inap lusim ol manmeri bilong en.” (Sam 94:14) Na Jisas i tok: “Man i stap strong inap long las de, em bai God i kisim bek.”—Matyu 24:13.
Taim bilong God bilong bekim pe nogut long Krisendom na “ples holi” bilong en em i klostu pinis. Liklik taim bai samting “i save bagarapim ples” em i mekim wok bilong en na bai i no gat taim moa bilong ranawe. Olsem wanem? Yu ranawe pinis i go long dispela samting “maunten” i makim? Sapos nogat, yu no ken lusim taim. Nogut yu bagarap.—Sefanaia 1:14-18; 2:3.
[Piksa long pes 32]
“Ol kom” bilong dispela “wel abus,” em Yunaitet Nesen, nau ol i laik kirapim pait long narapela “ples holi”—em olsem olgeta samting ol misin bilong Krisendom i ting em wok bilong ol long bosim