Pasin Bilong Sori, Em i Save “Pasim Olgeta Wantaim”
“Pasin bilong sori em i winim olgeta arapela pasin, na em i save inapim olgeta gutpela pasin na pasim olgeta wantaim. Yupela i mas kisim dispela pasin bilong sori.”—KOLOSI 3:14.
1. Olsem wanem na long nau i hatwok long bihainim tok bilong Kolosi 3:14?
PASIN BIRUA i pulap long graun na ol manmeri i bruk lain nabaut. Ol i no pas wantaim. Ol i no i stap wanbel. Olsem na i hatwok long Ol Witnes Bilong Jehova i bihainim tok bilong God i stap long Baibel long Kolosi 3:14. Ating yu ting ol i no inap bihainim dispela tok God i givim long ol, olsem: “Pasin bilong sori em i … pasim olgeta wantaim. Yupela i mas kisim dispela pasin bilong sori.” Tasol ol i bihainim na dispela samting i litimapim nem bilong God.
2. Ating ol misin bilong Krisendom i wanbel long wanem samting? Dispela i makim ol i bilong wanem lain?
2 Pasin bilong sori i no pasim olgeta misin bilong Krisendom wantaim. Nogat. Krisendom i bruk bruk long planti handet misin ol i tok ol i Kristen, na ol i gat kain kain bilip na pasin bilong lotu. Tasol ating olgeta dispela misin i wanbel long wanpela samting, em olsem: Ol i no laikim Ol Witnes Bilong Jehova. Ol i birua long dispela lain Kristen ol i dediket na baptais. (Aisaia 43:10, 12) Dispela pasin birua i makim ol misin bilong Krisendom ol i bilong dispela graun. Ol i stap aninit long Seten, em i King na “god giaman bilong dispela graun.” (2 Korin 4:4) Krais Jisas yet i tok dispela samting bai kamap olsem. Taim man nogut Judas Iskeriot i go pinis, Jisas i givim laspela tok long ol gutpela aposel bilong em, na Jisas i tok: “Mi givim lo long yupela olsem: Yupela i mas laikim tru ol brata. Sapos ol manmeri bilong graun ol i birua long yupela, orait yupela i ken save, ol i bin birua long mi pastaim. Sapos tru yupela i man bilong dispela graun, orait bai ol manmeri bilong graun ol inap laikim yupela olsem lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela lusim pasin bilong dispela graun. Olsem na ol manmeri bilong graun ol i birua long yupela.”—Jon 15:17-19.
3. Jisas i tok ol manmeri bilong dispela graun bai birua long lain bilong em, olsem na yumi gat wanem askim?
3 Yumi tingim dispela tok bilong Jisas na yumi laik save, ol manmeri bilong dispela .graun na ol misin bilong Krisendom ol i birua long wanem lain bilong lotu long nau? Olgeta samting i bin kamap bihain long taim bilong Namba Wan Pait Bilong Olgeta Hap i helpim yumi na yumi inap save tru long dispela lain.
4. Tok bilong Pol long Kolosi 3:14 i stret long husat? Na husat i Papa long heven bilong ol dispela manmeri?
4 Ol Witnes Bilong Jehova i lukim namba wan tok long pas Pol i raitim long ol Kolosi na ol i save, tok bilong em long kisim “pasin bilong sori,” dispela tok i stret long ol yet. Long kirap bilong pas Po1 i raitim long ol Kolosi, Pol i tok: “Mi Pol, mi aposel bilong Krais Jisas. Long laik bilong em yet God i makim mi aposel. Mi wantaim brata Timoti mitupela i raitim dispela pas long yupela manmeri bilong God, yupela i stap long Kolosi, yupela brata i bilip long Krais. God Papa bilong yumi em i ken marimari long yupela na mekim bel bilong yupela i stap isi.” (Kolosi 1:1, 2) Orait, husat em i Papa long heven bilong ol Kristen bilong Kolosi? Em Papa bilong Hetman bilong ol, Krais Jisas, na dispela Papa em i “God Antap Tru,” em i save bosim “olgeta graun.” Nem bilong em Jehova.—Sam 83:18.
5. Ol manmeri Pol i raitim pas long ol, ol i man bilong lotuim husat? Olsem wanem Jisas na apose1 Jon i makim pasin ol i mas bihainim?
5 Olsem na ol dispela manmeri Pol i raitim pas long ol, ol i man bilong lotuim God Jehova olsem Krais Jisas yet i mekim! Taim Seten i traim Jisas long maunten, Jisas i no laik lotu long Seten na kisim olgeta kingdom bilong graun. Jisas i sakim Seten na em i tok: “Baibel i tok, ‘Yu mas lotu long [Jehova] tasol. Em i God bilong yu, na yu mas holim wok bilong em wanpela tasol.’” (Matyu 4:8-11; 4:8; Diuteronomi 6:4, 5, 13) Ol disaipel i mas bihainim pasin bilong Jisas lotu long dispela God Jisas i save lotu long Em oltaim, em God, Jehova. (Jon 20:17) Olsem na taim aposel Jon i brukim skru long wanpela ensel na i laik lotu long em, ensel i pasim em na i tok: “Yu mas lotu long God wanpela tasol. Yumi save, Holi Spirit i kirapim ol profet long autim tok bilong God, em i save helpim ol man i autim nem bilong Jisas.”—Revelesen 19:10; 1:1.
6. Ol Krisendom i mekim wanem na bihain ol manmeri i mas kirap bihainim kwik tok bilong Revelesen 18:4, 5 ? Husat ol i bin bihainim dispela tok? Na wanem samting i bin kamap?
6 Ol samting Bikpela Babilon, em olgeta lotu giaman, i mekim long taim bilong Namba Wan Pait Bilong Olgeta Hap i bagarapim tru nem bilong God. Olsem na bihain long dispela taim ol manmeri i mas kirap bihainim kwik tok bilong God i stap long Revelesen 18:4, 5. Ol i mas hariap moa yet long mekim, winim taim bilong Watchtower bilong 1880 na ol yia paslain long dispela.a Revelesen 18:4, 5 i tok: “Ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long sin bilong en. Na nogut bai yupela i poroman wantaim em long kisim pe nogut bilong sin. Sin bilong en i olsem bikpela hip tru, na i kamap inap long heven. Na God i tingim olgeta pasin nogut bilong dispela ples.” Ol manmeri i laik i stap ‘ol manmeri bilong God’ Jehova, ol i bihainim dispela tok na lusim Bikpela Babilon. Ol i bung wantaim bambai ol i ken i stap wanbel na ol i ken kisim dispela pasin bilong sori em i save “pasim olgeta wantaim.” Ol i tingim tru tok bilong aposel long 1 Korin 14:33: “God i no save paulim nabaut ol samting. Nogat. Em i save mekim yumi stap wanbel” Olsem na taim yumi lukim ol 43,000 samting kongrigesen bilong Ol Witnes Bilong Jehova, i stap long nau, yumi mas mekim tok olsem long Sam 133:
“Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut. Dispela pasin i olsem gutpela wel bilong diwai oliv ol i bin kapsaitim long het bilong Eron, na i go daun long gras bilong wasket, na i go inap long arere bilong longpela klos bilong en. Pasin bilong wanbel i olsem wara bilong nait i pundaun long maunten Hemon na ol maunten bilong Saion. Long dispela ples Bikpela i save mekim gut tru long ol man i stap wanbel. Em i givim ol laip i stap gut oltaim oltaim”—Sam 133:1-3.
7. Husat ol i mas wok strong long i stap wanbel long nau? Bilong wanem God i lukautim lain witnes bilong em long taim bilong Namba Wan Pait Bilong Olgeta Hap?
7 Kongrigesen bilong Kolosi long pastaim ol i mas wok strong bambai ol inap pas gut wantaim na i stap wanbel. Na yumi ol witnes bilong Jehova long nau tu, yumi mas wok strong long mekim olsem, long wanem yumi stap namel long ol manmeri i bruk nabaut na ol i no i stap wanbel. Em bikpela samting. Na em i bikpela samting moa bihain long taim bilong pait long yia 1914! Taim bilong “ol man bilong ol arapela lain” i pinis long yia 1914. (Luk 21:24) Namba wan pait bilong olgeta hap i laik bagarapim lain Kristen bilong Ol Witnes Bilong Jehova. Tasol Jehova, God I Gat Olgeta Strong, em i no larim ol birua long Krisendom na long ol lain haiden i bagarapim olgeta witnes bilong em, em spirit holi i bin makim ol. Em i lukautim ol bambai ol i ken autim dispela gutpela tok bilong kingdom long olgeta lain man. (Matyu 24:14; Mak 13:10) Long namba wan yia bihain long pait, em yia 1919 CE, God Jehova i helpim ol long lusim ol samting i kalabusim ol, na em i salim ol i go autim tok long olgeta lain man.
8. Seten i no inap brukim lain Kristen tru long rot bilong ol samting bilong ausait, olsem na em i kirap long mekim wanem?
8 Seten i no inap bagarapim Ol Witnes Bilong Jehova long rot bilong ol dispela samting na ol dispela lain bilong ausait. Olsem na em i wok long pasin hait, long rot bilong sampela man i stap insait long lain bilong Ol Witnes yet. Em i laik bai Ol Witnes i bruk lain nabaut na ol i no ken i stap wanbel moa. Revelesen 12:17 i stori long dispela samting, olsem: “Na dispela bikpela snek em i belhat long dispela meri, na em i go na i laik kirapim pait wantaim ol arapela pikinini bilong en. Em ol dispela manmeri i save bihainim olgeta lo bilong God, na ol i autim tok bilong Jisas na bihainim em.”
Gutpela Pasin Yumi Mas Wok long Kisim
9. Ol Witnes Bilong Jehova i mas was gut, nogut wanem kain “sik” i kisim ol? Sam 91 i tok wanem long dispela samting?
9 Ol manmeri nogut bilong dispela graun ol i lusim pinis pasin bilong sori. Pasin birua na bel nogut i pulap long graun. Krais Jisas i tok kain pasin olsem bai kamap taim ‘pasin bilong dispela graun i laik pinis.’ Em i tok: “Na bai planti giaman profet i kirap na i giamanim planti manmeri. Pasin nogut bai i kamap bikpela. olsem na planti man bai i lusim pasin bilong sori. Tasol man i stap strong inap long las de, em bai God i kisim bek.” (Matyu 24:3, 11-13) Dispela pasin i olsem wanpela “sik” i kalap long ol manmeri long nau, olsem na ol manmeri long lain bilong God Jehova ol tu i mas was gut, nogut dispela “sik” i kalap long ol. Ol i mas mekim wanem na bai ol inap was gut? Sam 91 i tok: “Man i go long God Antap Tru, bilong em i lukautim em, em i stap klostu long God I Gat Olgeta Strong, na God i karamapim em. Bai dispela man i tok long Bikpela olsem, ‘Yu save banisim mi na yu was gut long mi. Yu God bilong mi. Mi save bilip long yu.’ Long nait yu no inap pret long wanpela samting nogut. Na long san yu no ken pret long wanpela samting i kamap kwik tumas bilong bagarapim yu. Na bai yu no inap pret long bikpela sik i kamap long nait, na long samting nogut i kamap long biksan tu na i laik bagarapim yu. Sapos 1000 man i dai klostu long yu, na 10,000 i dai long han sut bilong yu, maski, samting nogut i no ken i kam klostu long yu. Bai yu yet i lukim God i bekim pasin nogut ol man nogut i bin mekim.”—Sam 91:1, 2, 5-8.
10. Olsem wanem yumi ken klia long pasin bilong ol manmeri bilong dispela graun? God i tingim dispela graun i olsem i dai pinis, tasol em i ting olsem wanem long yumi?
10 God i tok promis long lukautim yumi, tasol yumi mas i stap aninit long ol lo em i putim bilong lukautim yumi. Pasin nogut bilong dispela graun i olsem “bikpela sik” i laik kilim yumi i dai long spirit. Olsem na sapos yumi laik klia long dispela pasin, orait yumi no ken bihainim pasin olsem bilong ol manmeri bilong dispela graun. Yumi no ken birua o bel nogut long narapela man. Pasin bilong bel nogut i narapela kain tru long pasin bilong sori, pasin bilong laikim tumas God Jehova na Krais Jisas na ol brata sista Kristen bilong yumi. Sapos yumi kisim dispela pasin bilong sori bai yumi kisim pasin Pol i tok ol disaipel bilong Krais i mas kisim. Bai yumi “mekim tru pasin bilong givim bel … i no long maus tasol.” Na dispela gutpela pasin yumi mekim bai soim ol man yumi “stap wokman bilong God.” (2 Korin 6:4-10) God i as bilong dispela pasin bilong sori, na sapos yumi kisim dispela pasin bai yumi go klostu long God na i stap wanbel wantaim Em, na bai yumi givim baksait long pasin bilong dispela graun. Long ai bilong God dispela graun na ol manmeri i bihainim pasin bilong dispela graun i olsem i dai pinis. Tasol yumi ol disaipel bilong Krais i dediket na baptais, yumi stap laip long ai bilong God. Yumi stap laip insait long lain bilong Em, em dispela lain i gat dispela pasin bilong sori i stap long ol. Olsem na i stret 1 Jon 3:14 i tok: “Yumi save givim bel bilong yumi long ol brata, na long dispela yumi save, yumi lusim pinis pasin bilong i dai, na yumi kamap long laip. Man i no save givim bel bilong en long ol brata, em i stap yet long pasin bilong i dai.”
11. Pasin bilong sori i opim dua bilong yumi ken insait long wanem lain brata?
11 Olsem na pasin sori i opim dua bilong yumi ken i go insait long wanpela lain ol i stap brata brata, na Krais Pikinini bilong God, em i bikbrata bilong yumi. Yumi mas kisim dispela Kristen olsem hap laplap na pasim gut skin bilong yumi. Na dispela pasin i mas makim yumi i wanem kain man tru. Yumi no save giaman. Dispela pasin bilong sori em i nambawan gutpela pasin tok bilong God, em Baibel, i tok yumi mas wok long kisim na yumi mas bihainim.
12. Yumi mas mekim wanem bambai yumi inap kisim dispela pasin bilong sori? Na bihain yumi mas lusim ol dispela narapela pasin o olsem wanem?
12 Tasol i gat sampela samting gutpela disaipel bilong harim tok em i mas mekim bambai em inap kisim tru dispela kain pasin bilong sori. God i makim sampela manmeri bilong kisim laip long heven, na 2 pita 1:5-8 i tokim ol dispela manmeri: “Yupela i mas tingting long dispela na yupela i mas wok strong tru long mekim gutpela pasin na putim dispela i stap wantaim bilip bilong yupela. Na yupela i mas kisim save na putim dispela i stap wantaim gutpela pasin bilong yupela. Na yupela i mas bosim gut laik bilong bodi bilong yupela, na putim dispela pasin i stap wantaim save bilong yupela. Na yupela i mas kisim pasin bilong sanap strong na karim hevi, na putim dispela pasin i stap wantaim pasin bilong bosim bodi. Na yupela mas kisim pasin bilong litimapim nem bilong God, na putim dispela i stap wantaim pasin bilong sanap strong na karim hevi. Na kisim pasin bilong i stap pren long ol brata, na putim dispela i stap wantaim pasin bilong litimapim nem bilong God. Na yupela i mas kisim pasin bilong givim bel bilong yupela long ol brata, na putim dispela i stap wantaim pasin bilong i stap pren long ol brata. Yupela i save pinis long Jisas Krais, Bikpela bilong yumi. Olsem na sapos ol dispela kain pasin i stap long yupela na i kamap moa yet, orait bai save bilong yupela em i no inap i stap nating. Nogat. Bai em i karim planti kaikai.” Ol dispela narapela pasin yumi mas kisim, yumi no ken lusim taim yumi kisim pinis dispela nambawan gutpela pasin bilong sori. Taim yumi kisim pinis pasin bilong sori, olsem pasin bilong givim bel long ol brata, yumi mas holimpas yet bilip, na gutpela pasin, na save, na pasin bilong bosim gut laik bilong bodi, na pasin bilong sanap strong na karim hevi, na pasin bilong litimapim nem bilong God, na pasin bilong i stap pren long ol brata. Ol dispela pasin i mas pulap long yumi wantaim pasin bilong sori. Ol manmeri i gat ol dispela gutpela pasin i stap oltaim long ol, bihain bai God i givim prais long ol long taim em yet i makim.
13. Ol dispela pasin yumi mas kisim pastaim, long Kolosi 3:12-14 Pol i stori moa long ol olsem wanem?
13 Yumi mas kisim ol dispela gutpela pasin bambai yumi inap kisim prais. Pol i stori moa long ol dispela pasin yumi mas kisim olsem pasin tru bilong yumi. Pol i stori long dispela pasin i save pasim olgeta wantaim na pastaim em i tok: “God em i makim yupela pinis, na yupela i stap manmeri bilong em, na em i save marimari long yupela. Olsem na yupela i mas kisim kain pasin olsem: Yupela i mas sori tru long olgeta man na mekim gut ol. Yupela i mas daunim bel bilong yupela yet, na mekim pasin isi long ol man, na larim ol i mekim rong long yupela. Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong en. Bikpela em i lusim pinis sin bilong yupela, olsem tasol yupela tu i mas mekim. Pasin bilong sori em i winim olgeta arapela pasin, na em i save inapim olgeta gutpela pasin na pasim olgeta wantaim. Yupela i mas kisim dispela pasin bilong sori.”—Kolosi 3:12-14.
Ol i Narapela Kain long Ol Man i No i Stap Wanbel
14. Ol manmeri long kongrigesen Kristen, taim i no kirap yet bihainim tok bilong ol aposel, ol i wanem kain man?
14 Ol dispela tok bilong ol aposel i makim gutpela pasin ol Kristen i mas bihainim. Bipo ol i bilong dispela graun i gat pasin nogut bilong birua na givim baksait long God na ol pasin bilong Seten i stap long en. Long dispela taim bipo ol i stap wanem kain man? Ol i save bihainim wanem kain pasin? Long 1 Korin 6:9-11 Pol i tok: “Ol man i save mekim pasin nogut, bai ol i no kisim kingdom bilong God. Ating yupela i no save dispela? Nogut yupela i giamanim bel bilong yupela yet. Ol man i save mekim pasin pamuk, na ol man i save bihainim god giaman, na ol man i save bagarapim marit, na ol man i save laikim pasin olsem meri, na ol man i save mekim pasin i gat sem wantaim ol arapela man, na ol stilman, … olgeta dispela kain man bai ol i no kisim kingdom bilong God. Na bipo yupela sampela i stap kain man olsem. Tasol yupela i waswas pinis. God i makim yupela pinis bilong em. Yupela i kisim nem stretpela man pinis. God bilong yumi em i bin mekim olsem long nem bilong Bikpela Jisas Krais na long Spirit bilong God yet.”
15. Ol manmeri bilong dispela graun, bilong wanem ol i no gat dispela samting bilong “pasim olgeta wantaim” em i stap oltaim?
15 Ol man i bihainim ol kain pasin olsem bilong dispela graun ol i hatwok tru long kisim wanpela gutpela samting tru em inap pasim ol wantaim na i no ken bruk. Ol i no gat samting bilong “pasim olgeta wantaim.” Olsem na ol manmeri bilong ausait, ol manmeri bilong dispela graun, ol i no pas wantaim. Ating inap liklik taim ol i tingim wanpela samting em inap helpim olgeta wantaim na ol i wok wantaim. Tasol bihain dispela samting i pinis na narapela i no tingim moa narapela. Tru ol i mas i stap wantaim, long wanem ol i stap long graun, tasol ol i no pas wantaim.
16. I gat sampela samting i mekim na inap liklik taim ol manmeri bilong dispela graun i pas wantaim, tasol taim dispela samting i pinis, ol i save kirap bihainim gen wanem kain pasin? Bilong wanem i olsem?
16 Laikim lain bilong ol yet! Laikim ples bilong ol yet! Ol i bihainim lotu bilong ol yet! Ol i ting narapela lain, ating lain bilong ol yet, i winim ol narapela lain! Olgeta dispela kain tingting inap kirapim bel bilong ol na bai ol i pilim olsem i gat wok ol i mas mekim bilong helpim lain o ples samting bilong ol yet. Tasol ol i man bilong dispela graun na ol i save tingting tru long helpim skin bilong ol yet pastaim. Olsem na taim i no gat sampela wok ol i mas mekim na ol inap mekim ol samting ol yet i laik mekim, ol i save kamapim tingting tru na pasin tru bilong ol, ol i man bilong tingim skin bilong ol yet pastaim na mekim ol samting bilong helpim ol yet. Tru ating ol i mekim bikpela wok bilong helpim ol manmeri bilong dispela graun, o ol i givim bel long helpim wanpela wok bilong dispela graun, na ol man i litimapim nem bilong ol. Na ating ol man i tok, kain man olsem em inap tru long kisim laip na kisim bikpela nem na bikpela wok long heven. Tasol nogat. Sapos yumi skelim ol samting ol i mekim wantaim Baibel yumi ken save, ol i no inap insait long Kingdom bilong God Jehova long heven na wok king wantaim Krais.
17. Ol manmeri i wok long painim Kingdom bilong God pastaim, ol i mas mekim wanem? Wanem samting i helpim ol long mekim olsem?
17 Kingdom bilong God i no pas liklik wantaim dispela graun o ol manmeri i givim bel long dispela graun. Lain bilong dispela graun ol i stap aninit long Seten na ol i no i stap wanbel. Tasol ol Kristen i dediket na baptais pinis na ol i wok long painim kingdom bilong God na Krais pastaim, ol i mas i stap wanbel na ol i mas wok gut wantaim. God i sori long ol man na em i kamapim dispela kingdom. Pasin bilong sori em pasin tru bilong lain bilong dispela kingdom o gavman long heven. Ol i save laikim tumas God na ol i no laikim tru nambawan birua bilong God, em Seten, wantaim dispela graun Seten i stap “god” bilong en. Seten i mekim planti samting bilong pasim wok bilong sori bilong God, tasol em i no inap. Sori bilong God Jehova i wok yet long olgeta manmeri i pas long lain bilong em long graun na i “pasim olgeta wantaim.” Tru tumas, sori bilong God i wok yet long lain bilong Em long heven na long graun na i “pasim olgeta wantaim.”
[Futnot]
a Long pes 6 dispela Watchtower (tok Inglis) i stori long “Bikpela Babilon.”
Yu Tingim?
□ Ol Kristen tru i wanbel olsem wanem na ol i narapela kain long ol Krisendom?
□ Seten i wok olsem wanem long brukim lain bilong yumi bambai yumi no i stap wanbel moa?
□ Ol manmeri bilong dispela graun ol i stap birua birua na narapela i bel nogut long narapela, tasol olsem wanem yumi inap kisim “pasin bilong sori”?
□ Olsem wanem pasin bilong sori inap pasim yumi wantaim, winim ol samting bilong dispela graun i pasim ol wantaim?
[Piksa long pes 15]
Ol Kristen i insait long wanpela lain brata, em narapela i sori long narapela, na Krais em i bikbrata bilong ol