Kisim Pasin Bilong Sori na Bihainim Oltaim
1. Yumi mas kisim wanem kain pasin? Na wanem taim bai bikpela traim i painim yumi long dispela?
PASIN bilong sori i save “pasim olgeta wantaim”olsem na em i namba wan pasin yumi mas kisim. Oltaim yumi mas bihainim pasin bilong sori, na yumi no ken giaman long bihainim bilong haitim pasin tru bilong yumi. Nogat. Spirit bilong God i kamapim gutpela tok bilong yumi long nau, olsem: “Yupela i givim bel bilong yupela long brata, orait yupela i mas givim tru. Yupela i no ken giaman. … Yupela i mas givim bel bilong yupela long ol brata na laikim ol tru.” (Rom 12:9, 10) Liklik taim tasol na bai bikpela traim i painim yumi long dispela samting—yumi bihainim tru dispela pasin bilong sori i save “pasim olgeta wantaim” o nogat.
2. Yumi inap kisim nating pasin bilong sori o i gat sampela pasin yumi mas kisim pastaim?
2 Olsem na nau yumi mas wok long kisim dispela pasin bilong sori. Tasol i gat sampela samting yumi mas mekim pastaim na bai yumi inap kisim. Pol i stori long “olgeta arapela pasin” ol disaipel bilong Krais i dediket ol i mas kisim, na bihain em i tok: “Pasin bilong sori em i winim olgeta arapela pasin, na em i save inapim olgeta gutpela pasin na pasim olgeta wantaim. Yupela i mas kisim dispela pasin bilong sori” (Kolosi 3:14) Orait, wanem dispela “olgeta arapela pasin” yumi mas kisim wantaim pasin bilong sori?
Winim Ol Samting i Laik Brukim Lain
3. Yumi mas kisim wanem ol pasin pastaim na bai yumi inap kisim dispela kain pasin bilong sori, olsem Kolosi 3:9-13 i tok?
3 Long taim bilong aposel Pol na aposel Jon i gat sampela samting em inap brukim lain Kristen. Tasol ol dispela samting bipo ol i tingim em i bikpela samting na ol i bruk bruk, taim ol i kamap Kristen ol i mas tingim ol dispela samting i samting nating tasol. Ol i Kristen na ol i stap wanpela lain tasol, wanpela kongrigesen. Olgeta ol i olsem wanpela bodi aninit long wanpela Het, em Krais Jisas. Olgeta samting bilong skin, bipo i mekim na ol i bruk bruk, nau ol i mas sakim. Ol i mas tingim ol samting bilong spirit pastaim em inap pasim ol wantaim. Olsem na aposel Pol i tok: “Long bel bilong yupela, yupela i rausim pinis olgeta pasin bilong olpela man, na yupela i kamap nupela man pinis. God i bin wokim dispela nupela man. Na oltaim em i givim save long yupela, na em i mekim yupela i kamap nupela na i stap wankain olsem God yet. Olsem na long nupela pasin ol Grik na ol Juda, na pasin bilong katim skin, na pasin bilong man i no katim skin, na kain kain tok ples na kain kain man, na slev, na friman, em olgeta i samting nating. Krais em i mekim olgeta kain pasin i kamap wankain, na Krais em i stap insait long olgeta kain man. God em i makim yupela pinis, na yupela i stap manmeri bilong em, na em i save marimari long yupela. Olsem na yupela i mas kisim kain pasin olsem: Yupela i mas sori tru long olgeta man na mekim gut ol. Yupela i mas daunim bel bilong yupela yet, na mekim pasin isi long ol man, na larim ol i mekim rong long yupela. Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong en. Bikpela em i lusim pinis sin bilong yupela, olsem tasol yupela tu i mas mekim.”—Kolosi 3:9-13.
4. Long taim bilong ol Kristen bilong pastaim, bilong wanem i hatwok liklik long ol i sindaun gut wantaim? Tasol ating sampela man i gat wanem kain tingting na ol i no tingim tumas ol dispela samting?
4 Long kongrigesen Kristen bilong bipo i gat Grik na Juda, slev na friman, kain kain man bilong kain kain tok ples na kain kain skin, olsem na i hatwok liklik long ol i sindaun gut wantaim. Olgeta wantaim i mas bihainim pasin bilong sori na narapela i mas lusim rong bilong narapela. Ol dispela samting ol man i save tingim i bikpela samting, olsem nem bilong man o lain o skin bilong em, God na Krais i no save tingim. Krais i dai bilong helpim olgeta manmeri maski ol i bruk pinis long narapela narapela lain. Tru, ating sampela man i save laikim olgeta man na ol i no save tingim tumas ol dispela samting, olsem nem bilong man o skin bilong em o lotu bilong em. Ating ol i gat gutpela tingting, na ol i save mekim gut long ol narapela man. Tasol ating ol i no save sori tru long ol narapela man. Ating ol i no gat dispela pasin bilong sori i stret olgeta na i save kirapim man long sakim skin bilong em yet na laik bilong em yet bambai em inap helpim narapela man.
5. Taim Ol Witnes i sakim ol samting i laik brukim ol man i stap narapela narapela lain, ol i no ken mekim wanem? O1 i mas mekim wanem? Na bai ol man i save ol i stap wanbel wantaim husat?
5 Olsem na yumi ol manmeri i dediket na baptais na yumi save bihainim dispela Man em i bin givim laip bilong em yet bilong helpim olgeta kain man, yumi no ken mekim nating sampela gutpela pasin bilong helpim ol narapela man. Nogat. Yumi mas laikim tru ol. Yumi no ken tingim skin bilong yumi yet o laik bilong yumi yet, yumi mas tingting tru long helpim narapela man. Yumi mas sori tru long ol. Spirit bilong God Jehova i save kamapim dispela kain pasin bilong sori. Man i gat dispela kain pasin bilong sori em i amamas long mekim ol samting bambai narapela man i ken i stap gutpela long spirit na i stap amamas. Sapos yumi gat dispela kain pasin bilong sori bai ol man inap save yumi stap wanbel wantaim God, em i As bilong dispela pasin bilong sori. Dispela kain pasin bilong sori i save kirapim yumi long mekim wankain pasin. Olsem na 1 Jon 4:19 i tok: “Yumi save laikim ol brata, long wanem God i bin laikim tru yumi pastaim.”
6. Wanem samting i pulim ol manmeri bilong dispela “wanpela lain sipsip tasol” na ol i pas wantaim? Pasin sori spirit bilong God i save kamapim i no olsem wanem kain pasin?
6 Olsem na olgeta kain kain man i stap insait long dispela “wanpela lain sipsip tasol,” narapela i save sori tru long narapela. Dispela samting i pulim ol na ol i pas tru wantaim maski ol i bilong ol narapela narapela lain o skin samting. Narapela i laikim tru narapela, long wanem ol i bin kisim pasin bilong “nupela man.” Olgeta i gat dispela “wanpela Spirit tasol” i kam long God, em i Man bilong givim laip long olgeta. Dispela gutpela pasin spirit bilong God i save kamapim em pasin sori tru. I no olsem dispela pasin i save kamap namel long man na meri taim narapela i laikim skin bilong narapela na bel i kirap. Nogat. As bilong dispela gutpela pasin sori bilong ol Kristen, em olsem: Ol i bihainim ol gutpela pasin bilong God, ol i kamap “nupela man,” na narapela i pilim tru long bel gutpela pasin narapela i mekim. Dispela kain pasin bilong sori tasol inap “pasim olgeta wantaim,” na bai olgeta i stap wanbel wantaim na wok gut wantaim.
Ol i Wok Gut Wantaim Bilong Mekim Wanpela Wok
7. Kirap long yia 1914 Ol Witnes Bilong Jehova i mas mekim wanem? Ol i mas mekim olsem, long wanem ol i gat wanem wok?
7 Taim bilong ‘pinis bilong dispela taim nau’ i kirap long yia 1914 na i laik pinis nau. Olsem na Ol Witnes Bilong Jehova, em ol i no bilong dispela graun, i mas wok gut wantaim. Ol i gat wok long autim tok long nambawan bikpela samting i laik painim ol man. Ol i mas autim dispela tok long olgeta hap bilong graun. (Matyu 24:14; Mak 13:10) Ol i mas mekim dispela wok olsem long taim bilong Pol, em Pol i tok: “Yupela i mas holimpas bilip na sanap strong tru. Nogut wanpela samting i pulim yupela, na yupela i kisim pasin bilong bilip strong long dispela gutnius yupela i bin harim. Mi Pol mi bin kamap wokman bilong dispela gutnius, na mipela i autim long olgeta manmeri i stap long graun.” (Kolosi 1:23) Orait, yupela olgeta man bilong autim tok bilong God long nau, olsem wanem long wok bilong autim dispela gutnius long olgeta manmeri i stap long graun nau long taim bilong yumi?
8. Long nau yumi lukim wanem samting i kamap olsem aposel Jon i bin stori long en long Revelesen 14:6-12?
8 Long nau yumi lukim ol samting i kamap tru olsem aposel Jon i bin stori long en long Revelesen 14:6-12, olsem: “Na mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long olgeta lain man bilong olgeta graun, na bilong olgeta tok ples, na bilong olgeta kain skin. Em i singaut strong olsem, ‘Taim i kamap pinis bilong God i skelim olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.’ Narapela ensel em bihainim namba wan ensel na i kam. Dispela namba tu ensel i tok, ‘Bikpela taun Babilon em i bagarap pinis! Yes, em i bagarap pinis! Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong em. Dispela em i olsem em i givim strongpela wain long ol na ol i dringim.’ Na narapela ensel i bihainim tupela na i kam. Dispela namba tri ensel em i singaut strong olsem, ‘Sapos wanpela man i lotu long dispela wel abus na long piksa bilong en, na i kisim mak long pes na long han bilong en, orait bai em i dringim wanpela wain. Dispela wain em i belhat bilong God. God i no abusim wara wantaim dispela wain pastaim. Nogat. Bai em i kapsaitim belhat bilong en long kap bilong bekim pe nogut, na dispela man i mas dringim. Na bai dispela man i kisim pen nogut long hatpela paia i lait long ston salfa, long ai bilong ol ensel holi, na long ai bilong Pikinini Sipsip. Na smok i kamap long dispela paia i givim pen long ol, dispela bai i go antap oltaim oltaim. Ol dispela man i save lotu long wel abus na long piksa bilong en, na i kisim mak bilong nem bilong en, bai ol i no kisim malolo long san na long nait.’ Sapos dispela kain pasin i kamap, orait ol manmeri bilong God ol i ken sanap strong. Em ol manmeri i save bihainim lo bilong God na holimpas bilip long Jisas.”
9. Kirap long wanem taim Ol Witnes Bilong Jehova i bin lukim ol samting i kamap olsem aposel Jon i stori long en? Olsem wanem ol i kamap fri na ol inap autim dispela gutnius long olgeta hap bilong graun?
9 Aposel Jon i makim lain remnan long nau na olsem wanem? Lain remnan i bin lukim wok dispela ensel i mekim, em i gat wok long autim “gutnius bilong i stap oltaim oltaim” long olgeta manmeri i stap long graun, yes, long olgeta lain man bilong olgeta graun, na bilong olgeta tok ples, na bilong olgeta kain skin? Tru tumas ol i bin lukim. Kirap long yia 1919 na i kam inap long nau ol i bin lukim, long wanem long dispela yia ol i kirap long bihainim tok bilong Jisas long Matyu 24:14. Na olsem wanem? Long dispela taim lain remnan i gat “gutnius bilong i stap oltaim oltaim” na ol i ken autim long olgeta manmeri i stap long graun? Ol i gat! Ol inap autim gutpela tok olsem: Kingdom bilong God long han bilong Krais i kamap pinis long heven long yia 1914. Na dispela liklik hap lain bilong ol Isrel bilong spirit ol i amamas tru long lukim ol samting i kamap i makim birua bilong ol Bikpela Babilon i bagarap pinis. Em i bagarap pinis, long wanem em i no gat strong moa long pasim Ol Witnes Bilong Jehova! Nau Ol Witnes i fri na ol inap autim dispela nambawan gutpela tok long olgeta manmeri i kalabus yet long ol lotu giaman. Ol i tokim ol long lusim Bikpela Babilon na ol i helpim ol long mekim olsem.—Revelesen 18:4.
10. Ol manmeri i lusim pinis Bikpela Babilon ol i go bung wantaim husat? Na nau ol i kam insait long wanem samting em inap “pasim olgeta wantaim”?
10 ‘Bikpela lain manmeri’ ol i laik tumas long i stap fri, ol i harim “gutnius bilong i stap oltaim oltaim” na ol i bihainim. Ol i lusim Bikpela Babilon, em olgeta lotu giaman. Na ol i go bung wantaim lain remnan bilong ol Isrel bilong spirit. Ol i bung wantaim lain bilong Jehova long graun na ol yet i kamap Ol Witnes Bilong Jehova, Ol i kam insait long dispela pasin bilong sori i save “pasim olgeta wantaim.” Spirit bilong God Jehova i save kamapim dispela pasin bilong sori.—Kolosi 3:14; Galesia 5:22.
11. Ol Krisendom i laikim husat? Wanem taim bai Ol Witnes i kirap mekim tok olsem i stap long Revelesen 19:1, 2?
11 Bikpela hap bilong Bikpela Babilon em ol lain ol i kolim Kristen, olsem Krisendom. Maski ol i gat nem Kristen tasol ol i no save bihainim pasin Kristen tru. Dispela pasin bilong sori i save “pasim olgeta wantaim” em i no pasim wantaim ol planti milion manmeri i bihainim ol dispela lotu. Lain bilong Krisendom ol i bruk bruk. Ol i no pas wantaim. I gat planti handet lotu ol i kolim Kristen. Ol Krisendom ol i no bihainim pasin sori tru. Ol i laikim ol gavman samting bilong dispela graun. Ol i laikim ol pren bilong Bikpela Babilon, em i bin mekim pasin pamuk bilong spirit wantaim ol. Taim Bikpela Babilon na Krisendom tu wantaim i bagarap olgeta, long taim God i makim bilong bekim pe nogut long ol, bai lain bilong God i amamas tru. Bai ol i mekim tok olsem i stap long Revelesen 19:1, 2: “Yumi litimapim nem bilong God! God bilong yumi em wanpela tasol i bin kisim bek yumi. Em i gat biknem na strong. Long kot God i save skelim ol man long pasin i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin - pamuk bilong en. Olsem na God i bekim pe nogut long em. Dispela meri em kilim i dai ol wokboi bilong God, olsem na God i bekim dispela asua bilong em. “Bai i olsem paia i kukim em; bai em i pinis olgeta, inap “oltaim oltaim.”—Revelesen 19:3.
12. Tasol taim bilong Bikpela Babilon i bagarap olgeta i no yet, olsem na Ol Witnes Bilong Jehova i mas mekim wanem? Ol i mas sanap strong olsem wanem na sakim ol samting i birua long lait?
12 Tasol taim bilong God i bekim pe nogut long Bikpela Babilon i no yet, olsem na ol manmeri “i save bihainim lo bilong God na holimpas bilip long Jisas” ol i mas “sanap strong.” (Revelesen 14:12) Tok Jisas i mekim taim em i tok profet long ‘pinis bilong dispela taim nau’ i stret long ol. Long Matyu 24:13 Jisas i tok: “Tasol man i stap strong inap long las de, em bai God i kisim bek.” Na long ves 12, em i tok: “Pasin nogut bai i kamap bikpela, olsem na planti man bai i lusim pasin bilong sori.” (Matyu 24:12) Ol Witnes Bilong Jehova i mas i gat dispela pasin bilong sori bambai ol i ken stap strong i go inap long taim olpela pasin bilong nau i pinis. Narapela i mas sori tru long narapela, na ol i mas laikim tru ol manmeri nau ol i wok long painim Jehova, na bai ol i pas tru wantaim. Olsem na kirap yupela ol witnes bilong Jehova! Yupela i mas wok strong i go mekim wok bilong autim tok bilong Kingdom long ol 205 hap nau yupela i save autim tok long en, na long ol narapela hap tu! Nau em i taim bilong pas tru wantaim bambai yumi inap sanap strong na sakim ol birua. Narapela i mas i go klostu tru long narapela na sanap strong wantaim, na bai yumi inap sakim ol samting bilong tudak bilong dispela graun.
13. God i bin mekim wok long wanem samting na i stret yumi mas i stap gut long dispela samting na helpim wok bilong en?
13 Inap wan handet yia nau Jehova i bin givim wok long Sosaiti Was Taua bilong Pensilvenia, long Amerika, na ol i bin helpim lain witnes bilong Em long pas gut wantaim. Em strongpela samting dispela lain ol i olsem ‘gutpela wokboi’ ol i bin mekim wok long en bilong givim kaikai bilong spirit long Ol Witnes Bilong Jehova “long taim bilong en.” (Matyu 24:45-47) Jehova i blesim wok bilong dispela Sosaiti, long wanem i gat 95 brens-ofis i stap long ol narapela narapela hap bilong graun. Olsem na i stret yumi mas i stap gut long en na wok gut wantaim en long olgeta taim Jehova i laik mekim wok long en. Tru tumas, dispela samting Jehova i mekim wok long en em i bin helpim tru yumi!
Pas Gut Wantaim long Pasin Bilong Sori
14. Yumi mas kisim na bihainim wanem kain pasin? Lain bilong Jehova i mas i gat wanem pasin na bai ol manmeri i ken save, ol i witnes tru bilong Jehova?
14 Seten wantaim lain bilong em ol i birua long yumi na ol i laik brukim lain bilong yumi. Tasol dispela pasin bilong sori spirit bilong God i save kamapim em bai wok strong yet long ‘pasim yumi olgeta wantaim.’ Taim yumi kamap “nupela man,” na yumi kisim dispela pasin bilong sori olsem Pol i tok yumi mas mekim, oltaim yumi mas bihainim. Dispela pasin em i pasin bilong God yet. Taim Pikinini bilong God i givim laspela tok long ol disaipel bilong em, em i tok: “Mi givim nupela lo long yupela: Yupela i mas laikim tru ol brata. Mi bin laikim yupela tru. Olsem tasol yupela i mas laikim tru ol brata. Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:34, 35) I stret tru Pikinini bilong God i mekim tok olsem, long wanem Papa bilong em, God Jehova, em i As bilong pasin bilong sori. Yumi mas wok strong long kisim dispela pasin bilong sori spirit bilong God i save kamapim, na bai olgeta manmeri i ken save yumi witnes tru bilong God, yumi man bilong autim tok bilong Em!
15. Ol Witnes Bilong Jehova i save laikim tumas God, olsem na ol i mas laikim husat tru?
15 Sapos yumi laikim tru Jehova, orait yumi mas laikim tru ol brata bilong yumi. Tok bilong 1 Jon 4:20, 21 i kirapim yumi long tingim dispela samting, olsem: “Sapos wanpela man i tok, ‘Mi givim bel bilong mi long God,’ na sapos em i bel nogut long brata, orait dispela man em i giaman. I no gat wanpela man i bin lukim God. Man i lukim brata bilong en na i no save laikim em, dispela man em i no inap laikim God.”
16. Olsem wanem na Ol Witnes Bilong Jehova i no inap pasim bel, narapela i mas laikim tru narapela? Olsem wanem na pasin bilong sori i no inap pinis long graun?
16 Ol Witnes Bilong Jehova long nau ol i save bihainim dispela tok bilong stiaim tingting bilong yumi. Maski ol i bilong dispela lain ol bai wok king wantaim Krais Jisas long heven, o ol i bilong ‘bikpela lain’ bilong ol “arapela sipsip” na ol i wet long kisim laip long Paradais long graun, tasol narapela i save laikim tru narapela. Yumi no inap pasim bel bilong yumi, a? Yumi pilim olsem yumi mas laikim ol manmeri i laikim tumas God Jehova na Pikinini bilong Em, Krais Jisas, a? Na yumi save laikim ol tru. Dispela samting i pasim yumi wantaim. Seten wantaim ol ensel nogut na ol man nogut ol i wok long bagarapim dispela pasin bilong sori i stap namel long yumi, tasol ol i no inap mekim. Dispela gutpela pasin spirit bilong God i save kamapim em i no ken pinis long graun. Long wanem ol manmeri i kisim dispela pasin na ol i bihainim i go inap long taim pasin nogut bilong Seten i pinis, God bai lukautim ol na ol i no ken bagarap long taim bilong “bikpela hevi tru” i winim olgeta narapela taim bilong hevi i bin kamap long bipo. (Matyu 24:21; Galesia 5:22) Olsem na ol manmeri i laikim tumas God na lain bilong em, ol tasol inap winim dispela taim bilong hevi na i stap laip long gutpela ples Paradais long graun. Dispela Paradais i no ken pinis. Inap long olgeta taim bihain ol manmeri i bihainim tru pasin bilong sori bai ol i stap long en. Pasin bilong sori bai win tru na dispela bai litimapim nem bilong God Jehova, em i As bilong pasin bilong sori.
Yu Tingim?
□ Maski ol Kristen bilong pastaim i bilong kain kain lain na skin, tasol olsem wanem ol inap pas gut wantaim?
□ I gat tupela lain insait long dispela “wanpela lain sipsip” long nau na pasin bilong sori i mekim wanem long ol?
□ Olsem wanem ol samting i kamap long nau olsem Revelesen 14:6-12 i tok?
□ God i bin mekim wok long wanem samting bilong helpim lain bilong em?
□ Yumi mas tingting tok bilong Kolosi 3:14 na yumi mas tingting strong long mekim wanem?
[Piksa long pes 26]
Ol ensel i bosim . . .
[Piksa long pes 27]
. . . wok bilong Ol Witnes Bilong Jehova long nau bilong autim “gutnius bilong i stap oltaim oltaim”