Pasin Bilong Sori Em i Nambawan Gutpela Samting Bilong “Pasim Olgeta Wantaim”
1. Jehova i wokim wanem samting i pasim ol man wantaim? Olsem wanem olgeta lain bilong graun i kisim nem long God?
GOD JEHOVA em i Man bilong wokim ol samting. Em i God I Gat Olgeta Strong. Olsem na em inap tru long wokim wanpela samting bilong “Pasim olgeta wantaim” na bai dispela samting i stap strong oltaim. Ol man bilong wanpela lain o famili ol i save pas wantaim; sampela ol i save pas tru wantaim. Na God em i Man bilong wokim ol dispela famili. “Olgeta lain man bilong heven na bilong graun, [ol i] kisim nem” long God Jehova. (Efesas 3:14, 15) Bihain long taim bilong bikpela Tait Wara olgeta lain bilong graun ol i kamap long lain bilong Noa. Noa em i gutpela man. Em i stap gut long God, olsem na God i lukautim em wantaim lain bilong em na ol i no bagarap long dispela Tait i bagarapim olgeta narapela manmeri. Olsem na olgeta lain o famili i stap nau long graun ol i “kisim nem” long Noa. Long rot bilong Noa ol i kamap long graun na ol i stap. Bipo God i bin givim nem long sampela man bilong graun, olsem kolim nem bilong ol, tasol em i no mekim olsem long olgeta wan wan lain o famili. Tasol olgeta dispela famili i kisim nem long Em, long wanem em i givim laip long ol na ol i stap. Em i As bilong laip.—Jenesis 5:1, 2, 32.
2. Dispela ensel i bikhet long lain bilong God, olsem wanem em i kamap olsem papa na em i gat lain bilong em? Olsem na i stret yumi olgeta i mas givim wanem askim long skin bilong yumi yet?
2 Tasol sampela man bilong graun ol i lusim lain o famili bilong dispela Papa long heven. Wanpela ensel bilong lain bilong God long heven em i pulim ol na ol i lusim. Dispela ensel i bikhet. Ol i kolim em Seten. Seten i pulim sampela ensel bilong heven na ol i bihainim em. Long dispela rot em i kamap olsem wanpela papa; em i gat lain bilong em. Tasol i no pasin bilong sori i pasim lain bilong em wantaim. Nogat. Wanpela taim, Krais Jisas, em nambawan gutpela pikinini bilong God Jehova, em i tokim ol birua bilong em bilong lain Juda, olsem: “Sapos i tru God em i Papa bilong yupela, bai yupela i laikim mi. Long wanem mi stap wantaim God na mi kam. … Yupela i pikinini bilong papa bilong yupela, Seten. Na yupela i strong long bihainim laik bilong bel bilong papa bilong yupela. Bipo yet em i man bilong kilim man i dai. Na em i no bihainim pasin i tru. Long wanem pasin i tru em i no i stap long em. Tok giaman em i mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:42, 44) Olsem na long nau yumi olgeta wan wan i mas askim skin bilong yumi yet, olsem: Husat i “papa” bilong mi?
3. Samting i painim Seten bihain long yia 1914, olsem wanem dispela i narapela kain long bipo? I gat wanem beten God i mas harim nau bilong helpim olgeta manmeri i stap gut long lain bilong Em?
3 Taim Seten i bikhet, God i rausim em long lain o famili bilong Em. Na em i rausim tu ol spirit nogut i kamap lain bilong Seten. Long Gaden Iden Seten i traim ol man, na bihain tu em inap raun long graun mekim ol wok nogut bilong em na birua long tok i tru. (Jop 1:7; 2:2) Tasol nau ol i rausim pinis Seten na ol spirit nogut long heven. Long yia 1914 taim bilong “ol arapela lain” i pinis na Kingdom bilong God i kamap long heven. Long dispela taim ol i rausim Seten wantaim ol spirit nogut i kam daun long graun. Ol i no inap bung moa wantaim ol gutpela ensel long heven. Ol i no ken tru i go bek gen insait long dispela lain ensel bilong heven. Olsem na yumi inap save bilong wanem Seten i save birua long lain bilong Jehova long heven na long graun. (Revelesen 12:1-12; Luk 21:24) Olsem na long dispela taim nau God i mas harim gutpela beten bilong aposel Pol long Kolosi 1:2 na helpim ol manmeri i stap gut long lain bilong Em hia long graun. Pol i beten olsem: “God Papa bilong yumi em i ken marimari long yupela na mekim bel bilong yupela i stap isi.” Sapos ol i no i stap wanbel, God i no inap harim dispela beten na mekim bel bilong ol i stap isi. Ol i mas pas gut wantaim na i stap wanbel wantaim bambai God bilong givim bel isi em i ken mekim lain bilong ol i stap bel isi.
4. Ol witnes bilong Jehova i stap wanbel na ol i tenkyu long God long wanem samting? Ol i mas wokabaut yet long wanem samting?
4 Long nau lain Witnes Bilong Jehova i stap wanbel wantaim na ol i stap bel isi. Dispela samting i makim ol i narapela kain long ol narapela lain. Olsem na ol i ken “tenkyu long Papa” olsem Pol i tok ol Kristen long Kolosi ol i mas mekim. Pol i tok, Yupela i mas “tenkyu long Papa. Em i bin mekim yupela inap long kisim ol samting em i bin makim bilong yupela. Bai yupela i kisim wantaim olgeta manmeri bilong God yumi stap long lait.” (Kolosi 1:12) Oltaim dispela “lait” i save kamap bikpela moa na yumi mas wokabaut long en. Tasol yumi stap long “las taim” bilong dispela pasin nogut bilong nau, olsem na yumi mas wok strong bambai yumi “inap long” kisim dispela “lait” na kisim ol samting God i bin makim bilong yumi long nupela taim bihain.—2 Timoti 3:1.
Ol i Pas Wantaim Olsem “Wanpela Lain Sipsip Tasol”
5. Olsem wanem long Ol Witnes Bilong Jehova long nau? Tasol olsem wanem dispela “wanpela lain sipsip tasol” inap pas wantaim?
5 Ol Witnes Bilong Jehova long nau ol i bilong ol narapela narapela lain. Ol i kam long planti lain tru, winim ol Kristen bilong pastaim, na ol i bung wantaim. Ol i bilong olgeta lain na olgeta kain skin na olgeta kain sindaun. Dispela samting inap mekim na bai lain bilong ol i bruk na ol i no pas gut wantaim. Tasol nogat! Ol i save, maski ol i bilong wanem lain o wanem kain skin o tok ples, maski ol i maniman o rabisman, tasol God em i As bilong laip bilong ol na em i givim lait bilong tok i tru long ol. Long lain Witnes Bilong Jehova long nau i gat liklik lain i stap em spirit bilong God i bin makim ol bilong kisim laip long heven, na i gat ‘bikpela lain manmeri’ i stap, em Gutpela Wasman bilong Sipsip, Krais Jisas, i kolim ol olsem ol “arapela sipsip” bilong em. (Jon 10:16; Revelesen 7:9-17; Matyu 25:31-46) Longtaim bipo Krais Jisas i tok: “Bambai i gat wanpela lain sipsip tasol na wanpela wasman tasol bilong ol sipsip.” Na ol samting i kamap olsem tasol. Dispela Gutpela Wasman Bilong Sipsip em i mekim gut wok bilong em. Em i lukautim gut ol disaipel bilong em ol i laikim pasin bilong i stap wanbel na ol i no bruk lain nabaut. Maski sampela i gat tingting long kisim laip long heven na sampela i gat tingting long kisim laip long graun, tasol ol i pas gut wantaim, olsem “wanpela lain sipsip tasol.” Olgeta ol i wanbel long laikim tumas dispela “wanpela wasman tasol,” em i bin lusim laip bilong em bilong helpim ol. Ol i stap gut long em.
6. Lain remnan i wet long kisim laip long heven, tasol bilong wanem ol i no surik long autim tok i tru bilong Baibel i makim ol “arapela sipsip”?
6 Olgeta sipsip long nau ol i laikim tumas “tok tru” bilong Baibel. Dispela tok i stori planti long dispela Paradais ‘bikpela lain’ bilong ol “arapela sipsip” ol i wetim i kamap. Long olgeta taim dispela lain i wok long i go bikpela bikpela. Liklik lain, olsem lain remnan, ol i laikim tumas olgeta “tok tru” bilong God long Baibel, olsem na ol i no bel nogut long ol “arapela sipsip” na pasim sampela samting em inap long helpim ol. Long pasin .bilong sori ol i bin tokaut long ol gutpela samting bai kamap long graun. Na bihain long yia 1935 ol i wok strong moa long mekim. Lain remnan i save, nau ol i stap long “dispela taim bai God i mekim olgeta samting i kamap nupela gen, olsem bipo yet em i tok long maus bilong ol profet holi bilong en.” (Aposel 3:21) Lain remnan i tingim dispela tok i tru ol i bin kisim save long en na ol i amamas. Ol i pilim olsem ol i kisim wanpela samting ‘God i bin makim ol bilong kisim wantaim olgeta manmeri bilong God i stap long lait.’ Ol i kirap pastaim long wokim nius Wastaua long Julai 1879, na i kam inap long nau God i bin mekim wok long dispela nius bilong kirapim tingting bilong ol man na ol i ken wetim dispela gutpela Paradais em bai kamap. Ol narapela buk to bilong Sosaiti Was Taua i strongim dispela bilip long ol samting ‘bikpela lain’ bilong ol “arapela sipsip” i wetim i kamap. Ol i amamas long dispela samting, na ol i tenkyu long lain remnan.
7. Long 1935 lain remnan i bihainim pasin sori na ol i tokaut long wanem lain ol inap kisim laip long graun? Ol man i wet long kisim dispela samting, bilong wanem lain remnan i no gat tok long ol i kisim baptais?
7 Kirap long yia 1935 ol witnes bilong Jehova i dediket na baptais ol i bilip tru na “wetim wanpela samting tasol,” olsem Efesas 4:4-6 i tok: “I gat wanpela bodi tasol, na i gat wanpela Spirit tasol. Olsem tasol God i singautim yupela bilong yupela i pasim tingting long wetim wanpela samting tasol. I gat wanpela Bikpela tasol, na wanpela bilip tasol, na wanpela baptais tasol. I gat wanpela God, em i Papa bilong yumi olgeta.” Long yia 1935, long kibung bilong Ol Witnes long Wosington, long Amerika, ol i kisim save olsem dispela “planti tumas manmeri” bilong Revelesen 7:9-17 ol i olsem ol “arapela sipsip” bilong Gutpela Wasman em Jon 10:16 i stori long ol. Lain remnan i “wetim wanpela samting tasol”; ol i wet yet, tasol ol i amamas tru long dispela nupela save o “lait” ol i kisim. Na ol i kirap givim bel long bungim ol dispela “arapela sipsip.” Ol i no pilim olsem i no stret ol “arapela sipsip” tu i kisim dispela “wanpela baptais” ol yet i save kisim, long wanem ol i save, ol dispela “arapela sipsip” tu ol i dediket long God Jehova long rot bilong Krais Jisas wankain olsem ol yet. Pasin sori ol i kisim pinis nau i go bikpela na ol i givim bel long ol dispela “arapela sipsip” bilong Gutpela Wasman bilong ol yet.
8. Pasin sori i pasim lain remnan na bikpela lain wantaim olsem “wanpela lain sipsip tasol,” dispela kain pasin bilong sori i stap namel long husat long Isrel bipo?
8 Pasin bilong sori i kamap strong namel long olgeta “sipsip” bilong dispela “wanpela lain sipsip tasol” ol i stap aninit long Bikpela Devit Krais Jisas. Narapela i laikim tru narapela. Dispela pasin bilong sori i pasim ol wantaim em i wankain olsem strongpela pasin sori i stap namel long Devit na Jonatan long bipo. God i makim Devit bilong kisim wok king, tasol long dispela taim papa bilong Jonatan, em Sol, em i stap king. (2 Samyuel 1:25-27) Paslain liklik long taim tupela i tok gutbai long laspela taim, “Jonatan i tok tru antap gen long Devit, long wanem em i laikim tumas em; em i laikim em olsem em i laikim em yet.” (1 Samyuel 20:17, NW) Bihain Devit i harim tok olsem Jonatan wantaim papa bilong em tupela i bagarap long pait na i dai pinis. Devit i hevi na em i mekim singsing sori na em i tok: “Mi hevi long yu, brata bilong mi, Jonatan, long wanem mi bin laikim yu tumas. Yu laikim mi tru na mi pilim dispela samting i winim tru pasin bilong meri i laikim man.” (2 Samyuel 1:26, NW) Narapela i laikim tru narapela na dispela pasin bilong sori i ‘pasim tupela wantaim.’ I dai tasol i brukim tupela.
9. Husat i olsem piksa na i makim ol “arapela sipsip”? Olsem wanem bai wanpela lain sipsip i lusim narapela lain, tasol i laikim yet ol?
9 Jonatan i olsem piksa na em i makim ol “arapela sipsip” long nau. Na Devit i makim lain remnan. Taim Amagedon, “bikpela de bilong God I Gat Olgeta Strong,” i pinis, bihain bai lain remnan i lusim dispela lain Jonatan i makim ol. (Revelesen 16:14, 16) Long wanem lain remnan bai i dai, na bai i olsem “Bikpela i kisim [ol] i go antap long klaut,” na bai ol i stap wantaim Bikpela oltaim oltaim.” Taim ol i dai wantu tasol bai ol i kirap bek olsem spirit. (1 Tesalonaika 4:17) Maski ol i lusim pinis ol “arapela sipsip” i stap long graun, tasol bai ol i laikim yet ol. Na bai ol inap kamapim strong moa dispela pasin bilong sori.
“Namba Wan Pasin Bilong Dispela Tripela, Em Pasin Bilong Givim Bel Bilong Yumi long Arapela Man”
10, 11. Olsem wanem pasin bilong givim bel bilong yumi long arapela man i namba wan pasin, winim pasim bilong bilip na pasin bilong wetim God olsem 1 Korin 13:13 i tok?
10 Dispela i kirapim yumi long tingim gutpela tok long pasin bilong sori Pol i mekim long 1 Korin sapta 13. Long pinis bilong dispela sapta Pol i tok: “Na nau pasin bilong bilip na pasin bilong wetim God na pasin bilong givim bel bilong yumi long arapela man, dispela tripela samting i stap [yet]. Tasol namba wan pasin bilong dispela tripela, em pasin bilong givim bel bilong yumi long arapela man.” (1 Korin 13:13) Olsem wanem na dispela pasin i namba wan pasin? Orait, pastaim yumi ken tingim tok i stap long Hibru 11:1 “Pasin bilong bilip em i olsem: Bel bilong yumi em i holimpas pinis ol samting yumi wet long God i givim yumi. Na ol samting ai bilong yumi i no lukim, em bel bilong yumi i save tru long dispela i stap.” Taim “ai bilong yumi i no lukim” yet ol dispela samting, orait yumi wet long kisim. Tasol taim yumi kisim pinis, yumi no wet moa long kisim. Pinis, yumi no wet moa long kisim. Olsem Ebraham. Ebraham i bilip tru long God Jehova na em i bilip olsem God inap kirapim bek man i dai pinis. Olsem na em i wet long kisim ol samting ai bilong em i no lukim taim em i stap laip yet. Olsem tasol Ol Witnes Bilong Jehova long nau ol i gat strongpela bilip, olsem na ol i bilip tru long ol samting ai bilong ol i no inap lukim na ol i wet long en. Bihain, taim ol i lukim pinis “ol samting yumi wet long God i givim yumi,” bai ol i no wet moa. Long wanem ol i kisim pinis dispela samting ol i bilip na wet long en. God inapim tru. Pol i tok olsem long Rom 8:24, 25:
11 “God i bin kisim bek yumi, na nau yumi bilip na wetim em inapim tru dispela gutpela samting. Tasol samting yumi bin wetim na bihain lukim pinis, yumi no save wetim em moa. Sapos man i lukim pinis wanpela samting, bilong wanem em i wetim moa? Tasol samting yumi no lukim yet, yumi bilip tru long yumi bai kisim, orait yumi save tingting strong long dispela samting na wetim i stap.”
12. Olsem wanem Ol Witnes Bilong Jehova i bin lukim “dispela taim bai God i mekim olgeta samting i kamap nupela gen”olsem Aposel 3:21 i tok? Olsem na bihain bai wanem pasin i tok pinis? Tasol wanem pasin i no ken pinis?
12 Bihain long yia 1919 Ol Witnes Bilong Jehova i lukim “dispela taim bai God i mekim olgeta samting i kamap nupela gen, olsem bipo yet em i tok long maus bilong ol profet holi bilong en.” Ol i lukim lain bilong Jehova i kamap strong gen bihain long taim bilong Namba Wan Pait Bilong Olgeta Hap. Ol i kirap gen long lotuim God Jehova na ol i stap long paradais bilong spirit hia long graun. (Aisaia sapta 35) Ol i lusim pinis kalabus long Bikpela Babilon, em olgeta lotu giaman. (Revelesen 18:1-4) Planti samting hap bilong Revelesen long Baibel i stori long en, ol dispela samting i kamap pinis, o nau i wok long kamap. Olsem na bilip bilong ol na ol samting ol i wet long en i no lus nating. Tasol taim ol dispela samting i kamap pinis, ol i no bilip na wet moa long en. Tasol olsem wanem long pasin bilong sori, olsem pasin bilong givim bel bilong yumi long narapela man? Dispela pasin i stap yet na i no ken pinis. Ol manmeri bilong dispela graun ol i bruk bruk, na olgeta samting bilong graun i laik bagarap olsem paia i kukim na i pinis. Tasol dispela pasin bilong sori i “pasim olgeta wantaim,” em God i kamapim, em i no ken pinis. Em i pasim God wantaim lain bilong em, na lain remnan wantaim ‘bikpela lain’ bilong ol “arapela sipsip.” Dispela pasin em i “namba wan pasin.” Em i nambawan gutpela samting bilong “pasim olgeta wantaim.” Dispela pasin bilong sori em wanpela pasin spirit bilong God i save kamapim.
13. Bilong wanem pasin bilong sori i no ken i dai?
13 God em i As bilong pasin bilong sori. God yet em i no ken i dai, olsem na dispela pasin tu i no ken i dai. I stret Baibel i tok: “God i save laikim yumi tru.”
14. I gat wanem tok i tru long strong bilong pasin sori bilong “pasim olgeta wantaim”?
14 Pasin bilong sori i gat strong bilong pasim ol man wantaim bambai ol i stap wanbel wantaim. Olsem na tok i tru i stap long 1 Jon 4:8, 16 i stret na em inap yumi kolim planti taim: “God em i as bilong pasin bilong laikim tru ol manmeri. Na man i save laikim tru ol brata, em i stap wantaim God, na God i stap wantaim em.”
15. Wanem samting i kirapim God na em i wokim ol man? Olsem wanem man inap pilim dispela samting?
15 Olsem na taim God i wokim namba wan man long graun, pasin bilong sori i kirapim em long mekim. Olsem Jenesis 1:27 i tok: “Orait God i wokim man na em i kamap olsem God.” God i no wokim skin bilong man i kamap olsem bilong Em yet. Nogat. Tasol em i putim ol pasin i stap long skin bilong man kain olsem bilong Em yet. Ol dispela pasin bilong tingting na bel i makim man i narapela kain long ol animal. Olsem na man inap pilim sori bilong God. Em i save God i laikim tru em, na dispela samting i kirapim em long laikim tru God, olsem pikinini i laikim papa. Em i pas wantaim Papa bilong em long heven, olsem wanpela lain o famili, long wanem narapela i save toktok wantaim narapela, maski man i no inap lukim dispela Papa bilong em. Long wanem sapos wanpela man i lukim God bai em i dai. Bihain God i tokim Moses olsem: “Yu no inap lukim pes bilong mi, long wanem sapos wanpela man i lukim pes bilong mi bai em i dai.” (Eksodas 33:20) Dispela lo i no senis na 1,500 yia bihain aposel Jon i tokim ol brata Kristen bilong em: “I no gat wanpela man i bin lukim God liklik. Nogat tru. Dispela wanpela Pikinini Bilong God, em i stap klostu tru long Papa, em wanpela tasol i soim God long yumi.”—Jon 1:18.
16. Jon na ol brata Kristen bilong em ol i pilim pasin sori bilong God Papa na ol i mekim wanem? Olsem wanem long pasin bilong sori na lain remnan wantaim ol “arapela sipsip”?
16 Spirit holi i kamapim aposel Jon i stap pikinini bilong God, olsem na aposel Jon i stap insait long lain o famili bilong God Jehova na “Pikinini Bilong God,” em Krais Jisas. Jon na ol brata Kristen bilong em ol i pilim tru sori bilong God. Ol i save God i laikim ol tru, olsem na ol i givim bel long God olsem pikinini i givim bel long papa. Dispela pasin bilong sori i pasim ol wantaim God. Na i pasim ol dispela brata sista Kristen yet wantaim, em spirit i bin kamapim ol i stap pikinini spirit bilong God. Taim yumi skelim dispela samting bilong “pasim olgeta wantaim” long nau, yumi save em i nambawan gutpela samting bilong “pasim olgeta wantaim.” Long wanem ol brata sista long lain remnan ol i pas tru wantaim na ol i wanbel long lotuim God Jehova na autim tok bilong em. Narapela i laikim tru narapela na dispela pasin bilong sori i pasim ol i stap insait long lain o famili bilong God na long lain brata Kristen. Na ol wanlotu bilong ol long tempel bilong God, em ‘bikpela lain’ bilong ol “arapela sipsip” bilong Krais, ol tu i pas wantaim. Ol i kamapim dispela pasin bilong sori i no inap i dai. Dispela pasin i pasim Ol Witnes Bilong Jehova wantaim long nau. Em nambawan gutpela samting bilong pasim ol wantaim. Yumi mas tingting strong long kisim bilip wankain olsem bilong aposel Pol, em i tok: “I no gat wanpela samting em inap long tekewe yumi long sori bilong God. … Dispela sori yumi kisim long Krais Jisas, Bikpela bilong yumi.”—Rom 8:38, 39.
Yu Bekim Tok Olsem Wanem?
□ Olsem wanem olgeta lain o famili i kisim nem long God?
□ Dispela samting i mas mekim wanem long yumi olgeta long kongrigesen Kristen?
□ Jonatan i olsem piksa na em i makim wanem lain?
□ Olsem wanem pasin bilong sori i namba wan pasin, winim pasin bilong bilip na pasin bilong wetim God?
□ Olsem wanem dispela pasin bilong sori i pasim yumi wantaim God?
[Piksa long pes 21]
Pasin sori i tru i stap namel long Devit na Jonatan i makim pasin sori i stap namel long lain remnan na ol “arapela sipsip”—narapela i laikim tru narapela