Yu Inap i Stap Oltaim Long Paradais Long Graun—Tasol Olsem Wanem Yu Inap Mekim Olsem?
‘DISPELA tok long man i stap laip oltaim long graun, em i olsem wanpela driman nating tasol. I no inap man i mekim olsem.’
Ating yu bin harim sampela man i tok olsem a? Tasol yu save, pastaim tru God i laik bai ol man bilong bihainim tok ol i ken i stap laip oltaim long Paradais long graun. Na olgeta taim God i save kamapim bilong em! (Jenesis 1:28; Aisaia 55:11) Baibel i tok klia olsem: “Ol stretpela bai i kisim graun God i givim ol, na stap oltaim long en.”—Sam 37:29.
Taim ol Witnes Bilong Jehova i go lukim ol man long haus bilong ol, ol Witnes i bringim dispela gutpela tok long ol. Krais Jisas bai stap Nambawan Bos long Kingdom, na dispela Kingdom bai mekim laik bilong God i kamap. Kingdom bai bosim stret ol man, na Kingdom bai mekim wanpela gutpela Paradais i kamap long graun. Tasol i no olgeta man i ken i stap laip long Paradais long graun long dispela taim bihain. Man i mas winim sampela mak pastaim bambai em i ken i stap long paradais.—Matyu 6:10.
Yu tingim dispela: Sapos yu papa bilong wanpela gutpela haus, na yu gat gutpela kem na gaden plaua, bai yu larim man nating i go sindaun long dispela gutpela kem? Nogat, a? Tasol sapos yu save long wanpela gutpela man i gat gutpela lo, ating bai yu larim i stap long gutpela kem bilong yu. Na God tu i olsem. God i laikim wanem kain man i ken i stap laip oltaim long Paradais bilong God long graun? Yumi ken stori long 4-pela mak man i mas winim bambai em inap i stap long dispela Paradais.
Fopela Mak
Taim Krais Jisas i beten long Papa bilong em Jisas i kolim namba wan mak. Em i tok: “Laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.” (Jon 17:3) Yumi mas kisim save long God na Krais Jisas. Yumi mas save long ol samting God i laik mekim long dispela graun, na yumi mas save long wok Krais bai mekim, olsem nupela King bilong graun. Olsem wanem? Bai yu Stadi long Baibel na kisim ol dispela save?
Planti man i hatwok long bihainim namba tu mak. Namba tu mak em i olsem: Yumi mas bihainim ol lo bilong God. Yumi mas bihainim ol dispela lo bilong God olsem Baibel i kolim. Yumi mas klia long olgeta pasin nogut na pasin sem.—1 Korin 6:9, 10;1 Pita 4:3, 4.
Namba tri mak em olsem: Yumi mas bung wantaim oganaisesen bilong God. Long olgeta taim bipo God i bin mekim wok long oganaisesen bilong em. Long taim bilong Noa ol man i stap insait long sip God i orait long dispela lain tasol na ol i no bagarap long Tait Wara. Na long taim bilong ol aposel ol man i stap insait long kongrigesen Kristen ol tasol God i bin orait long ol. (Aposel 4:12) Na long nau tu Jehova i mekim wok long wanpela oganaisesen ol bilong mekim kamapim laik bilong em. Sapos yumi laik i stap laip long Paradais long graun yumi mas bung long dispela oganaisesen na mekim wok bilong God.
Na namba foa mak, em yumi mas givim bel olgeta long autim tok bilong Kingdom long ol man. Sapos yumi laik i stap aninit long dispela Kingdom o gavman bilong God, yumi mas mekim wok bilong en. God i laik bai yumi mekim olsem. Krais Jisas i tok: “Bai ol i autim dispela gutnius bilong kingdom long olgeta hap graun.” (Matyu 24:14) Olsem wanem? Bai yu bihainim dispela mak na autim tok bilong Kingdom bilong God long ol man?
Ating yu save long ol dispela mak, tasol planti man i no save. Ol i no save ol samting God i laik mekim, na ol i save long ol lo bilong God ol i mas bihainim. Tasol nau yumi kisim wanpela gutpela samting bilong helpim o1 man long kisim dispela save. Em wanpela buk, nem bilong en Yu Inap i Stap Oltaim long Paradais long Graun. Olsem wanem? Yu bin mekim wok long dispela buk bilong helpim ol man long lain long ol samting God i laik bai ol i mekim?
Gutpela Bilong Skulim Man
Dispela nupela buk Stap Oltaim i ken givim save long man, na sapos em i bihainim, em inap i stap laip oltaim. Buk i stori long ol bikpela as tok bilong Baibel, na ol man i mas save long dispela bambai i ken givim laip bilong ol i go long God Jehova na ol i ken mekim stret wok bilong em. Wanpela Witnes long Ohaío, long Amerika, em i amamas long dispela buk em i tok:
“Long mun Jun mi no gat wanpela Baibel-stadi. Nau mi gat 3-pela, na mi laik kirapim namba foa. Mi stadi wantaim ol long dispela buk. Ol i amamas, na mi tu. Buk i gat bekim bilong ol askim bilong sumatin na tok bilong buk em i klia. Mi tenkyu tru. Nau i no hatwok long wokim Baibel-stadi. Buk i kamapim olgeta tok inap long sumatin i mas save long en na bai em i ken save gut long Jehova na oganaisesen bilong em.”
Na narapela i raitim pas na i tok: “Mi mekim wok long dispela buk na mi kirapim 3-pela Baibel-stadi. Mi pilim dispela buk i gutpela long stadi long ol yangpela na ol olpela tu. Mi save stadi long wanpela lapun meri em i gat 83 krismas, na mi stadi long tupela pikinini meri ol i gat 11-pela krismas, na mi stadi long wanpela meri i gat 50 krismas. Mi amamas long stap insait long wanpela oganaisesen i save long ol samting ol man i mas lain long en na bai ol i ken save long Jehova na long ol samting em i laik mekim long graun na long ol man.
Buk i Kirapim Man long Bihainim Tok i Tru
Dispela buk i gutpela bilong givim save long yumi bilong helpim yumi long i stap laip, na em i ken lainim yumi long ol lo bilong God em yumi mas bihainim na bai yumi ken i stap laip oltaim long Paradais long graun. Dispela buk Stap Oltaim i helpim ol man long mekim olsem. Buk i kolim klia ol pasin nogut, na em i lainim yumi long olsem wanem yumi ken abrusim ol dispela pasin nogut. Na buk i givim gutpela tok long yumi bilong kirapim yumi long bihainim stretpela pasin. Na buk i kamapim pasin bilong Seten long giamanim yumi, na em i stori long hatwok bilong Kristen long bihainim stretpela pasin.
Wanpela misineri bilong ol Witnes Bilong Jehova long Panama i stori long wanpela yangpela man i stadi long Baibel, na misineri i tok: “Long laspela wik bilong Julai dispela man i kisim buk Yu Inap i Stap Oltaim long Paradais long Graun. Mama bilong em i bin kisim long wanpela kibung long Hawaii na i givim long em. Long Miting Bilong Wok long Fonde Julai 29 em i tokim mi em i lusim pinis smok, long wanem em i bin kaunim sampela hap tok bilong dispela buk “Long Fraide mi stadi wantaim em long haus bilong em na mi askim em, ‵Wanem samting i bin kirapim yu long bihainim gutpela pasin?’ Na em i makim dispela piksa i stap long pes 131 em i piksa bilong ol samting God i tambuim na yumi mas klia long en sapos yumi laik i stap aninit long gavman bilong God. Na em i tok: ‘Lukim! Sigaret i kisim tupela hap piksa!’ Na nau em i makim piksa i stap long pes 227 na ol rait i stap long pes 226 em i tok taim yumi laik smok yumi mas beten askim God long helpim yumi bambai yumi ken abrusim smok. Na em i tok, ‘Mi lukim ol dispela samting, na nau mi tokim Sunshine [em pikinini meri bilong em] long tromoi ol sigaret bilong mi!’ Em i bin smok inap 17 yia na nau em i pinis long smok! Long dispela de stret mi kirap long stadi wantaim em long dispela buk. Gutpela buk olsem, nogut em i stap nating. Yumi mas mekim wok long en.”
Na narapela i raitim pas na i tok: “Mi laik tenkyu long yupela long dispela buk Yu Inap i Stap Oltaim long Paradais long Graun. Klostu mi mekim wanpela bikpela rong, tasol mi kaunim dispela buk na mi no mekim dispela rong.
“Wanpela wanwok i bin singautim mi long i go mekim sampela amamas wantaim em. Mi save pinis long samting em i laik mekim, na mi kirap nogut, tasol mi gat hap laik long i go. Tasol mi no bekim tok long em. Em i tok, ‘Bai mi bungim yu long 4 klok.’
“Long 3 klok mi gat tupela tingting, bai mi go o nogat. Mi save, sapos mi go, mi no inap i stap gut moa long ai bilong Jehova. Tasol mi tingting yet long i go; mi no rausim dispela tingting. Olsem na nau klostu mi laik pundaun na mekim rong.
“Asde mi bin kaunim buk Stap Oltaim na mi tingim wanpela sapta em ‘Yumi Gat Pait long Mekim Pasin i Stret’ na narapela sapta em i toktok long ‘Beten.’ Em i tok,yumi mas beten askim Jehova long strongim yumi bai yumi no ken mekim rong, tasol nogut yumi mekim rong pinis na nau yumi beten; sapos traim i painim yumi, yumi mas beten long Jehova long dispela taim stret, em taim yumi no mekim yet rong. Olsem na i no 4 k1ok yet na mi beten long Jehova long helpim mi na bai mi no ken mekim dispela rong. Man hia i kam painim mi na mi tokim em, mi no laik mekim dispela samting. Strongpela beten bilong mi i bin strongim mi. Bihain dispela wanwok i bungim mi gen, tasol mi bihainim pasin Kristen na mi sakim em, na mi autim tok long em. Mi tenkyu long gutpela tok bilong dispela buk.”
Buk i Helpim Nupela Man long Painim Oganaisesen
Na dispela buk i save helpim ol man long save long oganaisesen bilong God long graun na bai ol i ken i kam insait long en. Wanpela wasman bilong ol Witnes Bilong Jehova, em i save raun, na em i tok, “Inap 25 yia yumi bin wok long helpim ol Baibel-stadi long kisim save long oganaisesen bilong Jehova. Nau yumi kisim dispela buk, na insait long en i gat ol tok bilong lainim man long dispela oganaisesen. Em i gutpela tru!”
Sapta 23, em “Lain Bilong God long Graun,” em i stori long ol samting Jehova i bin mekim long ol man bilong bipo, na em i bin mekim long rot bilong oganaisesen bilong em. Dispela buk Stap Oltaim em i stori long oganaisesen bilong God long nau, na dispela oganaisesen i wok olsem wanem, na buk i helpim ol man long kam insait long dispela oganaisesen bambai ol i no ken bagarap. Na buk i stori long 5-pela miting bilong ol Witnes Bilong Jehova ol i kamap long olgeta wik, na em i stori tu long kibung sekit na ol bikpela kibung.
Buk i Stori long Wok Bilong Autim Tok Bilong Kingdom
Sapos man i save long tok i tru bilong Paradais bai kamap long graun, na em save bihainim gutpela pasin, na em i save bung wantaim oganaisesen bilong God, na em tasol, sori, em i sot yet; ating em no inap i stap laip long nupela taim God bai kamapim. Wanem samting moa em mas mekim na bai em inap? Em i mas kamapim tok i tru long ol man. Em i mas autim tok bilong Kingdom! Dispela buk Stap Oltaim em i kamapim gut tok long dispela wok autim tok. Long sapta 15 long liklik het-tok “Stap Gut long Gavman Bilong God,” em i tok:
“God Jehova i tok ol manmeri bilong em ol i mas givim bel long Kingdom o gavman bilong em na i stap gut long en. Ol gavman bilong graun tu i tok lain bilong ol i mas mekim olsem long ol. Tasol God i laik bai yumi mekim wanem yumi stap gut long gavman bilong em? Yu ting em i laik bai yumi holim gan samting na mekim pait bilong helpim kingdom bilong em? Nogat. Yumi mas bihainim Jisas wantaim ol Kristen pastaim na yumi mas autim tok long kingdom bilong God na stap gut long gutpela tok. (Matyu 4:17; 10:5-7; 24:14). Jehova i laik bai olgeta manmeri i ken save long kingdom bilong em na olsem wanem dispela kingdom inap stretim ol hevi. Olsem wanem? Yu bin tokim ol wanblut na wantok samting long ol tok bilong Baibel yu lain pinis long en? God i laik bai yu mekim olsem.”
Mekim Wok long En Bilong Helpim Ol Narapela Man
Buk i wankain olsem ol narapela buk bilong Was Taua: Em i givim tok i tru long ol man, bilong helpim ol na bai ol i ken i stap laip long Paradais long graun. I gutpela sapos yu kaunim gut na stadi gut long en. Na yu ken mekim wok long en bilong helpim ol narapela man long bihainim gutpela pasin na bai ol i ken i stap laip long oltaim long Paradais long graun.
Sapos yu toktok wantaim sampela man o meri, olsem sampela wokman, o man o meri i stap klostu long yu, o ol i kam lukim yu, yu Ken soim wanpela buk long ol. Long taim bilong kibung distrik, planti man i lukim ol Witnes Bilong Jehova i holim dispela buk, na ol i askim ol Witnes long olsem wanem ol i ken kisim wanpela. Ol i lukim em i gutpela buk, na ol i lukim nem bilong en Yu Inap i Stap Oltaim long Paradais long Graun, na ol i laikim. Olsem na yu ken putim sampela i stap, na sapos yu bungim man na em i laikim wanpela, em nau yu ken givim long em. Ating sampela famili bilong yu i mas laikim. Yu ken givim wanpela long olgeta wan wan.
Taim ol Witnes Bilong Jehova i raun autim tok ol bai karim dispela buk Stap Oltaim. Na taim ol i bung long Haus Kingdom na mekim Miting Bilong Wok ol bai toktok long olsem wanem ol i ken mekim wok long dispela buk na helpim ol man long painim rot bilong kisim laip long Paradais long graun. Yu ken bung wantaim ol na yu ken lain long mekim dispela wok.