Autim Gutpela Tok—Mekim Wok Long Buk Stap Oltaim
1 Long dispela mun, taim yumi autim tok bai yumi mekim wok long buk Stap Oltaim. Yumi olgeta i amamas long mekim wok long dispela buk. Long Papua Niugini, dispela buk i bin helpim planti manmeri. Yumi save mekim planti Baibel-stadi long dispela buk, na buk hia i bin helpim planti nupela manmeri long laikim tok i tru. Em i gutpela buk tru bilong tilim na i stret wantaim Stori Bilong Mun, “Bilong Wanem Yumi Mas Stadi Long Baibel?”
2 Taim yu autim tok long ol haus, na yu tok “moning” pinis na kamapim nem bilong yu, yu ken mekim tok olsem: “Ating yu pilim olsem ol man i no inap i stap amamas tru long olgeta taim long graun, long wanem planti hevi i save painim yumi, olsem sik, lapun, hangre, pasin nogut, na ol man i tingting planti long sindaun bilong ol. [Larim man bilong haus i bekim tok.] Tasol i gat ol gutpela as na yumi ken bilip olsem yumi inap i stap amamas na stap laip oltaim long graun. Wanpela as na yumi ken bilip olsem, em God yet i tok promis long kamapim dispela samting. Lukim dispela tok long Song 37:29. [Kaunim dispela ves.] Tasol olsem wanem long ol dispela hevi yumi kolim pinis na ol man i no i stap amamas? Long Kamapim Tok Hait 21:4, God i tok promis long pinisim ol dispela hevi. [Kaunim dispela ves.] Ating yu laik kisim sampela save moa, na bilong helpim yu long mekim olsem, mi laik soim dispela buk long yu.” Soim buk Stap Oltaim long em.
3 Yu save pinis long ol tok i stap long dispela buk. Taim yu autim tok yu bin mekim wok long dispela buk na ating yu stadi wantaim man long en. Olsem na taim yu laik tilim dispela buk long man bilong haus, ating yu inap kamapim sampela gutpela tok long en. Yu ken kaunim sampela tok long paragraf 9 long pes 10, na nau opim buk long pes 8 na 9 i gat ol piksa bilong ol hevi i kamap long graun na stori long olsem wanem ol i narapela kain long ol piksa bilong Paradais i stap long pes 11-13. Sapos hap taim i stap, yu ken opim buk na kolim het-tok bilong sampela sapta yu ting man bilong haus bai amamas long kisim save long en.
4 Taim kongrigesen i tilim dispela buk bipo, planti pablisa i bungim ol man i tok ol i laik kisim buk Stap Oltaim, tasol ol i no gat mani. Taim ol pablisa i go bek lukim ol, sampela i bin kisim buk, tasol sampela ol i no gat laik moa long harim tok na ol i no kisim buk. Nogut ol i no gat samting bilong kaunim, olsem na gutpela sapos yumi givim wanpela liklik nius long ol i stret long ol, na yumi stori liklik long sampela tok long en em inap kirapim tingting bilong ol. Planti man sapos ol i sot long mani na ol i no inap kisim buk, bai ol i kisim wanpela liklik nius. Yumi ken tilim liklik nius o yumi ken tilim ol nupela magasin long ol na bai ol i gat samting bilong kaunim em inap kirapim tingting bilong ol na bai ol i gat laik long kisim sampela save moa.
5 Em gutpela samting tru ol man inap i stap amamas na stap laip oltaim long graun, na rot bilong kisim dispela samting i op long bikpela lain manmeri em man i no inap kaunim namba bilong ol. (KTH 7:9) Olsem na yumi mas wok strong na bai yumi inap helpim ol narapela tu long wetim dispela gutpela samting. Yumi mas tingim dispela samting taim yumi autim tok na tilim buk Stap Oltaim, na wok long kirapim Baibel-stadi wantaim olgeta man i amamas long dispela promis God i mekim long ol man i givim bel long em.
[Ol Askim]
1. Taim yumi go long haus bilong ol man na autim tok long dispela mun, bilong wanem bai yumi amamas long tilim buk Stap Oltaim?
4. (a) Yumi ken mekim wanem sapos man bilong haus i laik kisim buk, tasol em i no gat mani? (b) Sapos em i no kisim buk, yumi ken tilim wanem samting long em?
5. Bilong wanem yumi laik tilim buk Stap Oltaim?
This article is repeated in km 7/95.