Taim Kingdom i Bosim Graun Bai Ol Man i Stap Fri Tru
“Bambai God i tekewe olgeta samting long dispela kalabus bilong bagarap nau ol i stap long en, na bai olgeta samting i stap gut tumas wantaim yumi pikinini bilong God.”—ROM 8:21.
1. Husat tasol inap tekewe hevi bilong ol man na bai ol i ken i stap gutpela? Bilong wanem em wanpela tasol inap mekim olsem?
INAP planti tausen yia pinis ol man bilong graun i bin karim kain kain bikpela hevi, na ol dispela hevi i kalabusim ol. Ol i wok long painim rot bilong lusim dispela kalabus na bai ol i ken i stap gutpela. Tasol long bipo yet na i kam inap long nau ol i traim traim nogat. Olsem na yumi save, ol man bilong graun i no inap tru long tekewe ol dispela hevi na bai ol man i stap gutpela tru na i stap fri. Baibel i tok: “Man i save tingting long mekim planti kain samting. Tasol samting Bikpela i tingting long mekim, dispela tasol bai kamap.” (Provep 19:21) Dispela samting Jehova i “tingting long mekim” em i tokaut pinis long en, em i tok: “Bai em i mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen.” (Revelesen 21:4) Em i gutpela samting tru yumi ken wetim i stap! Na em i stret wantaim ol samting Baibel i tok Jehova bai mekim bilong helpim ol man long i stap fri tru: “Bambai God i tekewe olgeta samting long dispela kalabus bilong bagarap nau ol i stap long en, na bai olgeta samting i stap gut tumas wantaim yumi pikinini bilong God.”—Rom 8:21.
2. Jehova bai mekim dispela gutpela samting long wanem rot?
2 Jehova bai mekim ol dispela gutpela samting long wanem rot? Em bai kamapim wanpela gavman bilong bosim olgeta hap bilong graun. Dispela gavman em Kingdom bilong God long heven. Dispela gavman bai kamapim laik bilong God ‘long graun olsem i stap long heven.’ (Matyu 6:10) Em dispela Kingdom o Gavman tasol liklik taim em “bai bagarapim na pinisim ol dispela narapela kingdom [ol i stap nau long long taim bilong yumi], na em wanpela bai stap inap long taim bihain bihain.”—Danyel 2:44, NW.
3. Sapos ol man i tok ol inap stretim ol hevi bilong graun, bilong wanem yumi no ken bilipim dispela tok bilong ol?
3 God i no laik senisim pasin bilong dispela graun. Nogat. Pasin bilong dispela graun i nogut olgeta. Olsem na sapos wanpela man i tok, ‘Sapos ol man i mekim olsem olsem, bai ol inap stretim ol hevi bilong graun,’ yu no ken bilipim tok bilong dispela man. Inap 6,000 yia pinis ol man yet i bosim graun na ol man bilong graun i bin karim bikpela hevi na ol i stap nogut tru. Na Baibel i tokaut pinis, nau yumi stap long “las taim” bilong en.—2 Timoti 3:1-5, 13.
Wanpela Gavman Tasol
4. Taim gavman bilong God tasol i bosim graun, dispela bai helpim ol man olsem wanem?
4 Taim Kingdom bilong God i bosim graun bai i gat wanpela gavman tasol i bosim olgeta hap bilong graun. Na nambawan man bilong bosim dispela gavman em King Krais Jisas. Na i gat wanpela liklik lain wokboi God i kisim ol long graun na ol bai stap king wantaim Krais Jisas na bosim graun. Yumi tingim dispela samting: Wanpela gavman tasol bai stap, na em bai bihainim ol lo God yet i makim bilong bosim graun. Em i gutpela tru, a? Gutpela taim tru bai kamap long graun! Bai ol man i no bruk moa long ol narapela lain, na bai i no gat ol mak bilong graun moa bilong brukim ol na ol i stap birua birua. Nogat. Olgeta lain bai stap wanbel tru olsem wanpela bikpela famili. Na wanem wanem hap ol i laik i go long en, ol i ken i go, na i no gat wanpela samting bilong pasim ol. Bai i no gat ol paspot na pepa samting o visa na ol kain kain tambu, na i no gat ol man bilong was long ol boda.—Filipai 2:9, 10; Revelesen 14:4; 20:6.
5. Sampela man i tok wanem long wanpela gavman tasol bilong bosim graun?
5 Longtaim pinis sampela man i save i mas i gat wanpela gavman tasol i bosim graun na bai ol samting i ken kamap gutpela. Long wanpela nius bilong Filapin, (em Bulletin Today) wanpela man, em Gwynn Dyer i tok: ‘Wanpela saveman bilong skelim ol samting i bin kamap bipo, em A. J. P. Taylor, em i tokim mi, i gat wanpela rot tasol bilong yumi ken abrusim narapela bikpela pait i laik kamap na bagarapim olgeta man bilong graun. Ol i mas kamapim wanpela gavman bilong bosim olgeta hap bilong graun. … Yumi mas lusim dispela pasin nau yumi stap long en, olsem yumi bruk bruk long planti gavman [olsem 150 samting]—na olgeta i holim pinis planti samting nogut bilong pait, na olgeta inap kisim bagarap—na yumi olgeta i mas i stap aninit long wanpela gavman tasol i bosim olgeta hap bilong graun … Na yumi mas mekim hariap. Yumi no ken lusim taim. Yumi lukim pinis pasin bilong Yunaitet Nesen, em i no gat strong na em tu i bruk bruk long ol narapela narapela lain na ol i no stap wanbel. . . . Olsem na wanpela tok ol i bin mekim long 1950 samting em i stret yet long yumi ken mekim, olsem: Yumi mas bung long wanpela lain tasol, na sapos nogat, bai yumi olgeta i bagarap.’
6. Taim Kingdom i bosim graun em bai mekim wanem kain wok?
6 Samting olsem bai kamap. Olgeta man bilong graun bai stap olsem wanpela lain tasol aninit long wanpela gavman, em gavman bilong God yet. Dispela gavman bai mekim gut tru long olgeta man, na em bai mekim stretpela pasin long ol na bosim ol long stretpela lo; na em i no ken ting long nem o long lain bilong man. Nogat. Em bai laikim olgeta man! Baibel i stori long gutpela wok bilong dispela King Krais Jisas na i tok: “Ol man i stap daun, em bai skelim ol long stretpela pasin, na long stretpela pasin em bai givim tok bilong helpim ol man i gat pasin daun.” (Aisaia 11:3, 4, NW) Krais bai mekim pasin i stret tasol. Taim em i stap long graun em i bin mekim gutpela pasin olsem. Em i autim tok i tru na em i kamapim ples klia ol pasin giaman bilong sampela lain. Em i sori long ol man i stap tarangu na i stap nogut na em i helpim ol. Em i no wok long amamasim ol man i gat bikpela mani kago na ol man i gat bikpela nem na namba. Nogat. Tasol em i no sakim ol tu—em i mekim wankain gutpela pasin long olgeta man. Dispela gutpela Hetman bai wok aninit long Jehova na mekim gutpela wok tru long bosim graun, olsem na Baibel i tok: “Long graun bai ol manmeri i bihainim tru Bikpela, na bai God long heven i mekim ol i kamap stretpela.”—Sam 85:11, 12.
Gutaim Tru Bai Kamap
7. Ol manmeri God i lukautim ol na ol i go insait long Nupela Taim, ol i lain pinis long mekim wanem?
7 Bai yumi no ken i stap moa aninit long ol narapela narapela gavman bilong dispela graun, na i no gat ol bikpela ami moa bilong ol lain na ol i wok long kirapim pait. Nogat. Olsem na bai yumi stap amamas tru! Ol i no ken pinisim nating bikpela mani na kisim ol gutpela gutpela samting bilong graun bilong wokim ol samting nogut bilong bagarapim man. Gavman bilong God bai mekim gutpela wok long ol dispela gutpela samting bilong helpim sindaun bilong ol man. Olgeta man God i lukautim ol na ol i no bagarap taim dispela pasin bilong nau i pinis, ol i lain pinis long bihainim tok bilong Maika 4:3, em i tok: “Ol i mas wokim bainat bilong ol i kamap samting bilong wokim gaden, na ol i mas wokim spia bilong ol i kamap sisis bilong katim han bilong diwai. Ol i no ken holim moa bainat bilong paitim narapela lain, na ol i no ken lain moa long pait.” Long olgeta lain man nau ol i stap long graun, husat ol i kirap pinis long bihainim dispela tok bilong Baibel? Sapos yumi skelim ol samting i kamap nau long taim bilong yumi yet, yumi ken tok, em lain Witnes Bilong Jehova tasol. Ol i stap long olgeta hap bilong graun, tasol ol i stap wanbel tru na ol i stap brata brata. Olsem na yumi ken save tru, taim God i bosim graun lain bilong em long olgeta hap bai ol i stap wanbel tru, long wanem, nau long dispela taim yet dispela pasin sekan i stap pinis namel long ol!
8, 9. Taim Kingdom i bosim graun, bel isi na gutpela sindaun bai kamap long sampela hap tasol o olsem wanem?
8 Long Nupela Taim God bai kamapim, gutaim bai kamap long olgeta hap bilong graun, na bai i no gat pait moa. Aisaia 32:17, 18 i stori long “gutpela sindaun na bel isi inap long taim bihain bihain,” na i tok: “Lain bilong mi i mas i stap long ples bilong bel isi, na ol i ken malolo long ples i no gat samting bilong bagarapim sindaun bilong ol, na ol i no ken pret.” Em i gutpela tru, a? Bai yu no ken lokim dua moa! Na long san na long nait yu ken wokabaut long wanem wanem hap yu laik wokabaut long en na yu no ken pret long ol man nogut i raun bilong paitim man o stil o bilong holim na bagarapim ol meri. Olsem na Baibel i tok: “Bai ol i sindaun gutpela tumas na amamas i stap.”—Sam 37:11.
9 Nau long dispela taim planti milion milion man meri pikinini ol i save dai long hangre long olgeta yia. Tasol long Nupela Taim bihain bai i no gat hangre moa. Olgeta manmeri bai i gat kaikai na ol narapela samting inap tru long ol, na bai ol i gat gutpela sindaun. Taim Jisas i stap long graun em i bin kisim sampela liklik Bret na pis na em i wokim mirakel na i givim kaikai long planti tausen manmeri. Olsem na taim Kingdom bilong em i bosim graun, em inap tru long helpim olgeta manmeri bilong graun na bai ol i no ken sot long kaikai. Dispela bai truim tok bilong Sam 72:16, i tok: “Planti kon na wit samting i ken kamap long gaden bilong ol manmeri.” Na Kingdom bilong God bai pinisim ol wok politik i save pasim ol narapela lain long kisim ol samting, na em bai pinisim pasin mangal bilong ol bikpela man bilong bisnis na pasin bilong ol long tromoi nating na bagarapim nating ol gutpela kaikai na ol narapela samting bilong graun. Ol dispela samting bai pinis, olsem na kaikai bai pulap tru long olgeta hap, na bai olgeta manmeri bilong olgeta hap ol inap kisim ol dispela planti planti kaikai bai kamap long graun, na bai olgeta wantaim ol inap kisim. Bai yumi no ken lukim moa ol pikinini i lus olgeta long kaikai na ol i bun nating na bel bilong ol i solap. Dispela samting bai pinis olgeta na i no ken kamap moa.
Ol Gutpela Wok
10. Wok bilong ol man long Nupela Taim em bai narapela kain olsem wanem long wok bilong ol man long nau?
10 Long nau planti man ol i no amamas long wok mani ol i mas mekim. Na planti milion man moa ol i no gat wok na ol i stap nating. Tasol long Nupela Taim God bai kamapim, olgeta manmeri bai i gat wok na ol bai amamas long mekim dispela wok na ol i no ken les long en. Na i no gat wanpela samting i kamap bilong bagarapim wok bilong ol, olsem hevi bilong mani o bikpela pait samting. Nogat. Bai ol i lukim gutpela samting i kamap long wok bilong ol. Baibel i tok: “Bai ol i wokim ol haus na sindaun long en; ol bai planim gaden wain na ol bai kaikai long en. Ol i no ken wokim haus na narapela man i sindaun long en; ol i no ken planim kaikai na narapela man i kisim na kaikai. … Lain bilong mi bai kisim gutpela samting long wok bilong han bilong ol. Wok bilong ol i no ken lus nating.”—Aisaia 65:21-23, NW.
11. Ol manmeri i stap aninit long Kingdom bilong God ol bai mekim wanem ol gutpela wok bilong helpim graun na ol samting i stap long en?
11 Yumi tingim ol dispela gutpela samting bai kamap: Ol manmeri i stap aninit long Kingdom bai ol i gat gutpela wok, na narapela bai laikim tru narapela. Olsem na dispela graun bai kamap gutpela ples tru na olgeta manmeri bai kisim gutpela sindaun moa yet. I no gat wanpela man bilong graun i bin kisim kain gutpela sindaun olsem. Nogat tru. Olsem na Jisas i bin kolim dispela Nupela Taim olsem Paradais. (Luk 23:43) Na Aisaia i bin tok profet long dispela nupela Paradais, em i tok: “Ples nating na ples i no gat wara, ol bai amamas, na ples i gat wesan tasol em bai amamas; em bai kamap gutpela ples tru olsem Ol Maunten Bilong Lebanon na ol gutpela gaden bilong Kamel na Saron. … Long ples nating i no gat wara, em bai wara i kamap long dispela ples, na long ples i gat wesan tasol, bai wara i ran. … Bai ol i stap amamas oltaim oltaim, no gat hevi moa.”—Aisaia 35:2, 6, 7, 10, ol i kisim long Baibel Today’s English Version.
Ol i No Ken Sik o i Dai
12. Jisas i bin mekim wanem na yumi ken save, taim em i bosim graun em bai oraitim bek skin bilong olgeta man?
12 Tasol sapos yumi kisim ol dispela gutpela samting na bihain yumi gat sik na yumi go lapun na yumi dai, em nogut, a? Tasol taim kingdom bilong God i bosim graun, em bai mekim ol samting ol dokta na ol saveman bilong nau ol i no inap mekim. God yet i wokim skin na tingting bilong ol man. Olsem na em i save long rot bilong stretim ol sik na bai skin bilong ol man i ken kamap gutpela olgeta. Taim Jisas i stap long graun God i givim strong long em na em i oraitim sik bilong plantiman. Orait long Nupela Taim em bai mekim bikpela wok long dispela strong bilong oraitim sik bilong olgeta man. Baibel i stori long dispela wok Jisas i bin mekim bipo, olsem: “Na planti lain manmeri ol i kam bung long em. Na ol i bringim ol lek nogut, na ol aipas, na ol bun krungut, na ol mauspas, na planti arapela sikman tu, na ol i putim klostu long lek bilong Jisas. Na em i oraitim ol. Olsem na ol manmeri ol i tingting planti. Long wanem ol i lukim ol mauspas i toktok, na ol bun krungut i orait nau, na ol lek nogut i wokabaut, na ol aipas i lukluk.” (Matyu 15:30, 31) Na taim ol manmeri i kamap gutpela olgeta aninit long lo bilong Kingdom, ‘dai bai pinis olgeta.’ (Aisaia 25:8) Tasol Jehova i gat bikpela sori tu long ol manmeri longtaim ol i dai pinis. Olsem na ol bai kirap bek na i stap laip gen na bai ol tu inap kisim ol dispela gutpela samting long Nupela Taim bihain. Bikpela amamas moa yet bai kamap long dispela taim bilong kirapim bek ol manmeri i dai pinis! Bipo tu, taim Jisas i kirapim bek wanpela pikinini meri, ol manmeri i lukim dispela samting ol i “kirap nogut tru” long en na ol i amamas moa yet.—Mak 5:41, 42; Jon 5:28, 29.
13. Long Nupela Taim wanem sampela samting ating ol manmeri bai laik long mekim?
13 Sapos yu stap long Nupela Taim i gat stretpela pasin tasol i stap long en, na yu wantaim olgeta man i stap wanbel na yu gat gutpela sindaun na yu gat olgeta samting inap tru long yu, na skin wantaim tingting bilong yu i gutpela olgeta, na yu inap i stap oltaim oltaim na yu no ken i dai, bai yu inap mekim planti samting, a? Tingim ol samting nau yu laik mekim, tasol yu no gat taim o yu no gat mani inap long mekim ol dispela samting! Long dispela gutpela taim bilong bihain bai yu inap raun na i go lukim ol bikpela maunten na yu ken wokabaut insait long bus i gat ol bikpela diwai long en na lukim ol gutpela gutpela plaua na ol gutpela gaden. Na yu ken lukim ol kain kain animal, na ol gutpela wara i ran na ol raunwara tu, na wara bilong en i klin tru na i no gat pipia long en, na yu ken traim kaikai bilong ol man bilong ol narapela narapela hap na pilim swit bilong ol dispela kaikai. Na tingim ol samting ol manmeri bai lain long mekim. Bai ol inap wokim ol kain kain gutpela samting na gutpela gutpela haus na stretim gut graun na planim ol gutpela samting bilong bilasim gut graun, na bilasim haus na wokim ol gutpela piksa na gutpela musik samting. Na ol inap save gut long dispela Man em i As bilong ol dispela gutpela samting, em God Jehova. Na taim ol i kisim save moa long ol bikpela lain sta na ol narapela samting bilong antap, bai ol i kirap nogut tru long ol dispela bikpela samting Jehova i bin wokim. Ol samting bai kamap olsem Baibel i tok: “Bambai God i tekewe olgeta samting long dispela kalabus bilong bagarap nau ol i stap long en, na bai olgeta samting i stap gut tumas wantaim yumi pikinini bilong God.”—Rom 8:21.
Bilip long Tok i Tru
14. Bilong wanem yumi ken bilip tru long olgeta tok promis bilong Jehova?
14 Tasol olsem wanem? Yu inap bilip tru long ol dispela tok promis bilong God? Yu inap. Bel bilong yu Inap pilim tru ol dispela tok promis olsem Josua i bin mekim. Josua em i man bilong lotuim God na em i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long yupela. Olgeta samting em i bin promis i kamap pinis, i no gat wanpela promis i popaia.” (Josua 23:14) Tru tumas, yu ken bilip tru long ol tok promis bilong God, long wanem, em i save tok tru tasol, na olgeta samting em i tok long mekim bai em i mekim tru. Tok bilong em i no inap lus nating.—Aisaia 46:9-11.
15. Ol wokboi bilong God i save sakim wanem kain tingting bilong dispela graun?
15 Baibel i soim yumi i gat tok i tru i stap, na Baibel i soim yumi wanem dispela tok i tru, na tok i tru i stap we, na husat i holim tok i tru. Ol dispela samting i stap long Baibel. Olsem na yumi olgeta wan wan i mas askim skin bilong yumi: ‘Mi laik tru long save long tok i tru?’ Ating bai yu tok, ‘Olgeta man i laik save long tok i tru.’ Tasol nogat. Planti ol i no laik save. Olsem na Jisas i tok, rot i go long laip em i liklik na i no planti manmeri ol i wokabaut long en. (Matyu 7:13, 14) Planti planti manmeri bilong nau ol i mekim pasin olsem Baibel i stori long en long Jop 21:14-16, (NW) em i tok: “Ol i save tokim God tru, ‘Yu lusim mipela! Mipela i no amamas long kisim save long ol pasin bilong yu. Nambawan Strongpela Man em i husat na bai mipela i mas mekim wok bilong em? Na sapos mipela i save long em, dispela bai helpim mipela olsem wanem?’” Tasol Jop i tok, “Mi no ken bihainim tingting bilong ol man nogut.” Tok i tru i no as bilong dispela kain tingting bilong ol. As bilong tingting bilong ol em tok giaman bilong Seten, em i bin tok, sapos ol man i bosim wokabaut bilong ol yet na ol i no i stap aninit long God, bai ol i stap gutpela.
16. Olsem wanem yumi ken save, sapos wanpela man i laik tru long painim tok i tru, em bai painim?
16 Sapos wanpela man o meri i laik tru long kisim save long tok i tru na em i beten askim God long helpim em long painim dispela tok i tru, orait God bai helpim em long painim tru. Maski em i stap long wanem wanem hap bilong graun, o em i stap olsem wanem, em bai kisim tok i tru. Long wanem, dispela wok bilong painim ol man i laik save long tok i tru, em i no wok bilong man tasol. Nogat. Jehova i givim dispela wok long ol boi bilong em long graun, tasol King Krais Jisas wantaim bikpela lain ensel bilong em ol i bosim wok bilong autim dispela gutpela tok bilong Kingdom, na nau dispela wok i go bikpela tru long olgeta hap na i wok long kamap strong moa yet.—Matyu 25:31, 32; Revelesen 14:6, 7.
17. Sapos man i laik tru long save long tok i tru, em i mas mekim wanem?
17 Pasin bilong dispela graun i laik pinis nau. Olgeta liklik hap bilong en bai pinis olgeta. Orait, sapos yu laik tru long kisim save long tok i tru na yu laik i stap laip na yu no laik bagarap, yu mas kamapim dispela laik bilong yu long God na long ol man tu. Yu mas mekim wanem? Yu mas wok long kisim save long tok bilong God long Baibel. Na yu mas bung wantaim lain bilong em. Baibel i tok, yu mas “wok pastaim long painim kingdom bilong God wantaim stretpela pasin bilong em.”—Matyu 6:33; Jon 17:3; Hibru 10:24, 25.
18. Ol manmeri i save bihainim tok i tru, dispela i save helpim ol nau olsem wanem?
18 Taim yu wok long mekim olsem, dispela bai helpim yu tru long nau. Ol manmeri i kisim save long tok i tru na ol i bihainim dispela tok, tingting na bel bilong ol i stap isi na ol i stap gutpela, long wanem, ol i save pinis long as bilong ol hevi na pasin nogut i kamap long nau, na ol i save long ol gutpela samting bai kamap bihain. Ol i no kalabus moa long bihainim pasin bilong ol manmeri bilong dispela graun ol i wok long kisim planti samting bilong skin tasol ol dispela samting bilong ol bai lus olgeta taim pasin bilong dispela graun i pinis. (1 Jon 2:15-17) Na ol man i save long tok i tru ol i no kalabus moa long lotu giaman na ol bilip giaman.
19. Sapos yu laikim tru tok i tru, bai yu mekim wanem?
19 Olsem wanem: Yu laikim tru tok i tru? Sapos olsem, orait bai yu laikim tru God bilong tok i tru. Bai yu laikim tru ol gutpela tok i tru bilong Kingdom nau em i kamapim. Bai yu laikim tru ol tok promis bilong em long ol gutpela samting Kingdom bai mekim long dispela graun. Bai yu laikim tru lain bilong God ol i stap long graun, nau em i wok long bungim ol insait long ogenaisesen bilong em bambai ol i ken winim taim bilong bikpela bagarap na ol bai stap laip. (Aisaia 2:2-4) Bai yu no larim wanpela samting, bilong heven o bilong graun, i pasim yu long mekim wok bilong dispela God bilong tok i tru em inap mekim yu i kamap fri long rot bilong tok i tru bilong em!—Jon 8:31, 32.
Yu inap bekim ol dispela askim?
□ Jehova bai mekim wanem na ol man bai stap fri tru na i stap gutpela?
□ Taim wanpela gavman tasol i bosim olgeta hap bilong graun, dispela bai helpim ol man olsem wanem?
□ Wanem samting i kamap long nau na yumi ken save taim Kingdom i bosim graun olgeta man bai stap wanbel tru na i no gat pait moa i ken kamap?
□ Ol wok ol man i mekim nau long dispela taim i narapela kain olsem wanem long wok ol man bai mekim long Nupela Taim?
□ Olsem wanem yumi save, ol man i laik tru long painim tok i tru, bai ol inap painim?
[Piksa long pes 23]
Olgeta man i no bagarap taim pasin bilong dispela graun i pinis, ol i lain pinis long “wokim bainat bilong ol i kamap samting bilong wokim gaden”
[Piksa long pes 25]
Long Nupela Taim God bai kamapim, ol manmeri bai amamas long mekim ol gutpela wok