Sik—Em Wanpela Mak bilong Las Taim?
OL SAVEMAN bilong saiens i kisim save nau long ol dispela liklik samting long skin bilong ol manmeri, ol i kolim jin (gene), i save makim skin na gras na pes samting bilong yumi i kamap wanem kain. Ol i laik save olsem wanem ol jin bilong yu i mekim na sampela sik i save kisim yu. Ol i tok, liklik taim bai ol i kisim save long rot bilong senisim ol jin long skin bilong yu na oraitim sik bilong yu.
Dokta W. French Anderson (bilong Nesenel Institus ov Helt) i tok: ‘Taim ol dokta i save pinis long rot bilong putim sampela narapela jin long skin bilong man bilong stretim sik bilong em, orait, ating bai ol inap tu long putim bilong mekim skin i kamap gutpela moa.’ Na em i tok moa olsem: ‘Ating bai yumi inap mekim olsem na senisim nabaut pasin bilong yumi.’ Em, dispela dokta i tok olsem. Tasol yu ting dispela makim ol saveman bilong saiens na ol dokta i winim pinis pait bilong daunim ol sik?
Inap 1,900 yia bipo Krais Jisas i tok, ol sik bai kamap planti na dispela em wanpela hap bilong “mak” bilong “las taim” o ‘pinis bilong dispela pasin.’ Jisas i tok: “Long sampela hap bai ol i gat … bikpela sik. “Wanpela saveman bilong Baibel, em Albert Barnes, em i tok ol dispela “bikpela sik” i olsem ol sik nogut i save kalap long planti man.—Matyu 24:3-7; 2 Timoti 3:1; Luk 21:10, 11.
Tasol ating yu ting olsem: ‘Bipo tu i gat ol bikpela sik i bin kamap.’ Tru, tasol i gat tupela narapela samting yu mas tingim long tok bilong Jisas.
Namba wan em olsem: Jisas i no tok sik tasol i olsem “mak.” Nogat. Jisas i kolim planti samting bai kamap wantaim olsem “mak.” Yu yet yu ken kaunim ol tok bilong Jisas long ol dispela planti samting long Matyu sapta 24 na 25, na Mak sapta 13, na Luk sapta 21. Olsem na dispela “mak” i gat planti hap bilong en na olgeta dispela samting i mas kamap wantaim. Jisas i tok, ol manmeri bilong wanpela taim ol bai lukim olgeta dispela samting i kamap long taim bilong ol na ol i ken save, ol i lukim dispela “mak” Jisas i bin kolim.—Matyu 24:32-34.
Na namba tu samting yumi mas tingim, em olsem: Sapos ol samting i kamap long nau olsem Jisas i tok profet bai yumi kirap nogut. Long wanem em i tok, bikpela sik bai kamap, tasol long nau ol saveman bilong saiens na ol dokta i kisim pinis bikpela save long ol marasin na long rot bilong stretim ol sik, na yumi gat ol gutpela haus sik i stap. Bipo i no olsem.
Orait, olsem wanem? Ol samting i kamap tru olsem Jisas i tok? Em bikpela samting yumi mas save long dispela samting, long wanem sapos ol samting i kamap long dispela taim nau olsem Jisas i bin tok profet, orait yumi stap long nambawan bikpela taim bilong ol man.