Sik—Bihain Bai I Pinis?
SAPOS 10-pela yia bipo sik kensa bilong bun i bin kisim yu, ating bai yu dai. Nesenel Kensa Institut i tok, 10-pela yia bipo ol yangpela manmeri i gat dispela sik kensa, planti (inap 80%) ol i save dai insait long 3-pela yia. Tasol nau ol saveman bilong saiens na ol dokta i kisim sampela save moa na ol inap helpim ol manmeri i gat dispela kain sik na pinisim long skin bilong ol insait long 3-pela yia.
Ol i kisim save long rot bilong stretim sampela narapela sik tu. Long 1979 Wol Helt Ogenaisesen i tokaut, olsem: Wanpela sik nogut ol i kolim smolpoks em i pinis long graun. Na sik tibi (T.B.) i save kilim i dai 3 milion manmeri long olgeta yia, tasol nius World Health i tok: “Mipela i kisim pinis olgeta samting bilong pinisim sik tibi. Mipela i sot tasol long mani na laik bilong gavman na bai mipela inap pinisim dispela sik nau na inap long olgeta taim bihain.”
Tru tumas, ol saveman bilong saiens na ol dokta i bin kisim bikpela save long rot bilong stretim ol sik. Tasol ol i no inap daunim olgeta. Long ol hap i gat planti wok bisnis long en, sik bilong klok i save kilim kwik planti man. Na i gat ol narapela sik tu ol dokta i no save long rot bilong stretim, olsem sik kensa, sik Chagas’, kus, sik lupus, snel-fiva, sik malaria, sik bilong pamuk.
Kain kain sik i save painim ol man na kilim ol i dai; ol sik bilong bipo i stap yet na kain kain nupela sik i kamap. Olsem na ol saveman bilong saiens na ol dokta i mekim bikpela wok bilong helpim yumi na yumi pilim gutpela wok ol i mekim, tasol ol i no inap pinisim olgeta kain kain sik. Nogat. Orait, olsem wanem long bihain?
As Bilong Wetim Gutpela Samting i Kamap
Yumi ken bilip tru na wetim olgeta kain kain sik i pinis olgeta. I no gutpela wok bilong ol man bilong saiens na ol dokta bai pinisim. Nogat. Wanpela Bikpela Man bilong antap em bai pinisim.
Bilong pinisim sik olgeta i mas i gat tupela samting, olsem: (1) Strong inap long pinisim na (2) laik bilong pinisim. I mas i gat dispela tupela samting wantaim. Yu tingim tok bilong dispela nius World Health? Dispela nius i tok ol man inap pinisim sik tibi olgeta, tasol ol i sot long “mani na laik bilong gavman.”
I gat wanpela Man tasol em i gat strong inap long em i pinisim olgeta kain kain sik inap long olgeta taim bihain, na em i laik pinisim. Dispela man em God yet! Krais Jisas i makim stret ol gutpela pasin bilong Papa bilong em na taim em i stap long graun em i kamapim tru strong bilong God long pinisim sik.—Jon 14:9.
Tru tumas, long “bikpela strong bilong God” Krais Jisas em inap pinisim sik. (Luk 9:43) Jisas em i oraitim tru planti manmeri ol i gat kain kain sik. Em i mekim orait ol lek nogut, na ol aipas, na ol bun krungut (Matyu 15:30, 31), ol man i save pundaun na guria nogut na ol man bun bilong ol i dai olgeta (Matyu 4:24), ol lepraman (Luk 17:12-14), wanpela meri em i save karim blut oltaim (Mak 5:25-29), wanpela man han bilong em i nogut (Mak 3:3-5), wanpela man skin bilong em i solap nogut (Luk 14:2-4), ol manmeri i gat “kain kain sik.” (Luk 4:40) Na Jisas i kirapim bek tripela man i dai pinis! (Luk 7:11-15; 8:49-56; Jon 11:38-44) Wantu tasol em i oraitim bek skin bilong ol dispela man, ol i no malolo liklik pastaim na skin bilong ol isi isi i wok long kamap strong gen. Nogat.
Na Jisas i laik helpim ol man na pinisim sik bilong ol. Wanpela stori bilong Baibel i kamapim tru dispela laik bilong Jisas:
Jisas i harim tok olsem ol i kilim pinis Jon Bilong Baptais na em i kisim bot i go long wanpela hap i no gat man. Tasol ol manmeri i lukim em i go na ol i save em i laik i go we. Olsem na ol i wokabaut i go wetim em long dispela hap. Taim Jisas i sua pinis na em i lukim dispela bikpela lain manmeri ol i wetim em, em i mekim wanem? Yu ting em i bel nogut? o kros? Nogat. Baibel i stori, olsem:
“Bihain Jisas i go sua na em i lukim bikpela lain manmeri i stap. Na em i sori long ol, na i mekim orait ol sikman bilong ol.” (Matyu 14:13, 14) Wanpela saveman bilong tok bilong Baibel em i stori long tok Grik ol i tanim olsem “sori” long dispela ves na em i tok: ‘Dispela tok Grik i makim man i gat bikpela sori tru. Ol i kisim dispela tok long tok splagchna, em olsem bel bilong man. Olsem na dispela tok i makim sori man i pilim tru long bel.’ Jisas i sori tru long ol man na em i no laik bai ol i karim pen, olsem na em i oraitim sik bilong ol.—Luk 5:12-14.
Tru tumas, long strong bilong God Jisas em inap pinisim sik bilong ol man na em i laik mekim. Em i holim yet wankain strong na wankain laik! (Hibru 13:8) Wok em i mekim long graun bilong oraitim sik bilong ol man i makim gutpela wok em bai mekim taim Kingdom bilong God i bosim graun. Tasol ating yu laik save wanem taim bai dispela samting i kamap.
Liklik Taim Bai Sik i Pinis!
Planti taim Wastaua i kolim ol hap bilong “mak,” na sik i wanpela hap bilong en. Ol hap bilong dispela “mak” i bin kamap tru long graun kirap long 1914 na bihain long dispela taim. Sapos yu yet yu skelim dispela samting bai yu save tru, olgeta samting i bin kamap olsem Jisas i tok profet pinis. Planti sik i kamap long nau i truim tok profet bilong Jisas long Matyu 24:3-7 na Luk 21:10, 11. Olsem na yumi stap long ‘taim bilong pinis’!
Liklik taim bai Kingdom bilong God i pinisim dispela pasin nogut bilong nau na kamapim stretpela Nupela Pasin. (2 Pita 3:13) Na taim Kingdom i bosim graun sik i no ken bagarapim moa skin bilong yumi o kilim yumi i dai. Yumi tenkyu tru long Papa bilong yumi long heven, long wanem em inap pinisim sik olgeta na em i laik mekim olsem!—Revelesen 21:3, 4.
Yu laik kisim sampela save moa long ol dispela gutpela samting God i tok promis long mekim na olsem wanem em inap helpim yu? Ol Witnes Bilong Jehova i laik helpim yu long kisim dispela save. Gutpela sapos yu toktok wantaim Ol Witnes i stap long hap bilong yu, o yu ken salim pas long ol man bilong wokim dispela nius.
[Piksa long pes 6]
Jisas em inap pinisim sik na em i laik mekim