Taim i No Gat Moa Sik Long Graun

“Olgeta kantri i mas wok gut wantaim bilong helpim olgeta man long kisim ol samting bilong lukautim helt bilong ol bikos taim ol man bilong wanpela kantri i kisim gutpela helt dispela i save helpim ol man i stap long ol arapela kantri.”​—ALMA-ATA DEKLERESEN, SEPTEMBA 12, 1978.

INAP 25 yia i go pinis, sampela i ting olgeta man long graun inap kisim ol samting bilong lukautim helt bilong ol. Long wanpela bikpela miting, em International Conference on Primary Health Care, long Alma-Ata, long kantri nau ol i kolim Kasakstan, ol man i bin bung i tokaut olsem ol i laik bai olgeta man long graun i mas kisim ol imunaisesen sut bilong ol bikpela sik paslain long yia 2000. Na tu, ol i laik paslain long dispela yia olgeta man long graun i gat gutpela toilet samting na gutpela wara. Olgeta kantri i memba bilong Wol Helt Oganaisesen (WHO) i bin sainim dispela dekleresen.

Mak ol i bin putim em i gutpela, tasol wok ol i bin mekim long winim dispela mak i no gutpela tumas. Ol man long olgeta hap i no kisim ol samting bilong lukautim gut helt bilong ol, na ol sik nogut i givim bikpela hevi yet long planti bilion pipel. Ol dispela sik nogut i save kilim i dai ol pikinini na ol manmeri i stap yangpela yet.

Maski dispela tripela bikpela sik i stap, em AIDS, TB na malaria, dispela i no kirapim ol kantri long “wok gut wantaim.” Nupela program ol i kamapim, Global Fund to Fight AIDS, Tuberculosis and Malaria, i bin askim ol gavman long givim 13 bilion dola long helpim ol long daunim ol dispela sik. Tasol i kam inap long Julai 2002 samting, ol i bin givim samting olsem 2 bilion dola tasol​—long dispela seim yia ol gavman i bin tromoi 700 bilion dola long ol samting bilong pait! Sori tru, long nau ol man i bruk bruk, na wan wan bikpela hevi tasol inap kirapim ol long wok bung wantaim bilong helpim olgeta man.

Maski ol dipatmen bilong helt i gat gutpela laik, ol i no gat planti samting ol inap mekim bilong daunim ol bikpela sik. Mani ol gavman i save givim em i no inap bilong daunim ol sik. Ol jem bektiria i kisim strong na i sakim ol marasin, na ol manmeri i strong long bihainim ol pasin i save opim rot long ol sik i ken kamap na i go bikpela. Na tu, ol bikpela hevi olsem stap rabis, woa, na bikpela hangre i save opim rot long ol sik i ken kisim planti milion manmeri.

God i Save Tingim Helt Bilong Yumi

I gat rot bilong stretim ol dispela hevi. Yumi inap skelim ol samting i kamapim klia olsem God Jehova i save tingim helt bilong olgeta man. Pasin bilong bodi bilong yumi long pait wantaim ol sik i soim olsem Jehova i tingim yumi. Planti lo Jehova i bin givim long lain Israel bilong bipo i soim olsem em i laik lukautim ol na ol i no ken kisim ol sik nogut.a

Jisas Krais, husat i makim stret pasin bilong Papa bilong em long heven, i save sori long ol sikman. Gutnius Mak i Raitim i stori long taim Jisas i bin bungim man i gat sik lepra. Lepraman i tok: “Sapos yu laik, yu inap long mekim mi i kamap klin.” Jisas i sori tru long dispela man taim em i luksave long pen dispela man i wok long karim. Jisas i bekim tok long em: “Mi laik. Yu kamap klin.”​—Mak 1:40, 41.

Jisas i no wokim mirakel bilong oraitim sik bilong wan wan man tasol. Matyu, man bilong raitim Gutnius, i tok Jisas “i go raun long olgeta hap bilong distrik Galili . . . na skulim ol manmeri. Em i autim gutnius bilong kingdom bilong God, na em i mekim orait olgeta sik na olgeta samting i bagarapim bodi bilong ol manmeri.” (Matyu 4:23) Taim em i oraitim ol sik dispela i no helpim ol pipel bilong Judia na Galili tasol. Pasin bilong em long oraitim ol sik i helpim yumi long save olsem taim Kingdom Bilong God i bosim ol man, em dispela Kingdom Jisas i bin autim tok long en, olgeta kain kain sik bai pinis.

Gutpela Helt Long Olgeta Hap i No Driman Nating

Baibel i strongim yumi long bilip olsem gutpela helt long olgeta hap i no wanpela driman nating. Aposel Jon i tok profet long taim ‘haus bilong God bai i stap wantaim ol manmeri.’ Long rot bilong dispela samting God i mekim, “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Yu ting dispela samting inap kamap tru tru? Long neks ves, God yet i tok: “Dispela tok em i tru olgeta, inap olgeta man i ken bilip tru long en.”​—KTH 21:​3-5.

Tasol bilong pinisim ol sik ol samting olsem hangre, stap rabis, na woa i mas pinis bikos ol dispela samting i save wok bung wantaim ol jem i save givim sik long ol man. Olsem na Jehova i givim dispela bikpela wok long Kingdom bilong em, em wanpela gavman i stap long heven long han bilong Krais. Bilong bekim planti milion prea, dispela gavman bai kam, na em bai kamapim laik bilong God hia long graun.​—Matyu 6:9, 10.

Kingdom Bilong God bai kam long wanem taim? Bilong bekim dispela askim Jisas i bin tok profet long sampela bikpela samting bai kamap long graun na ol dispela samting bai i stap olsem mak i soim olsem klostu dispela Kingdom bai kirap mekim wok. Wanpela samting em i kolim em ‘long sampela hap bai i gat taim bilong bikpela sik.’ (Luk 21:10, 11; Matyu 24:3, 7) Tok Grik ol i tanim olsem “bikpela sik” i stori long “ol kain bikpela sik i save kilim i dai man.” Long taim bilong yumi planti bikpela sik nogut i bin kamap maski ol saientis i painim ol nupela marasin.​—Lukim blok “Ol Man i Dai Long Ol Bikpela Sik Kirap Long 1914 na i Kam.”

Wanpela tok profet long Buk Kamapim Tok Hait i wankain olsem tok Jisas i mekim long ol Gutnius. Tok profet i stori long sampela hos na ol man i sindaun long ol i raun wantaim Jisas Krais taim em i kisim wok king long heven. Hos bilong namba foa man em “yelopela,” na em i “mekim ol bikpela sik i kamap na kilim ol [man] i dai.” (KTH 6:2, 4, 5, 8) Taim yumi lukim namba bilong ol man i bin i dai long ol bikpela sik kirap long 1914 na i kam, dispela i kamapim klia olsem dispela hos na man i sindaun long en i bin raun. Ol pen na hevi i kamap long ‘ol bikpela sik i kilim ol man i dai’ i soim olsem Kingdom Bilong God i kam klostu pinis.b​—Mak 13:29.

Tru inap sampela yia saiens i bin daunim sampela bikpela sik i save kalap long ol man, tasol ol nupela sik i wok long kamap. Samting i stap ples klia i olsem, yumi mas i gat samting i winim strong bilong ol man bilong pinisim dispela hevi long olgeta taim bihain. Man Bilong Wokim yumi i promis long mekim olsem. Profet Aisaia i toksave long yumi olsem aninit long Kingdom Bilong God “bai i no gat wanpela man i tok: ‘Mi gat sik.’ ” Na em i tok moa: “[God] bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” (Aisaia 25:8; 33:22, 24, NW ) Taim ol dispela samting i kamap, ol sik bai i pinis olgeta long olgeta taim bihain.

[Ol Futnot]

[Blok long pes 12]

Ol Man i Dai Long Ol Bikpela Sik Kirap Long 1914 na i Kam

Ol dispela namba i makim hamas man ol i ting i bin i dai; namba tru tru ol i no save. Tasol ol dispela namba i soim bikpela hevi ol bikpela sik i bin kamapim kirap long 1914 na i kam inap nau.

▪ Smolpoks (300 milion i go inap 500 milion) Ol i no bin painim marasin bilong helpim gut man i kisim pinis dispela sik. Ol i kamapim program bilong givim imunaisesen sut long ol man bilong olgeta hap na ol i pinisim dispela sik long 1980.

▪ TB (100 milion i go inap 150 milion) Long nau TB i save kilim i dai 2 milion manmeri long olgeta wan wan yia, na klostu 33 pesen bilong olgeta manmeri bilong graun i gat bektiria bilong TB insait long bodi bilong ol.

▪ Malaria (80 milion i go inap 120 milion) Long 1900 i go inap 1950 samting, malaria i kilim i dai 2 milion manmeri long olgeta wan wan yia. Long nau hap we planti man i dai long dispela sik em long sauten Afrika, we moa long wan milion manmeri i dai long malaria long olgeta wan wan yia.

▪ Bikpela sik kus bilong Spen (20 milion i go inap 30 milion) Sampela saveman i tok namba bilong ol man i bin i dai long dispela sik i bikpela moa. Dispela sik nogut i bin kamap bihain long Wol Woa 1 long yia 1918 na 1919. Buk Man and Microbes i tok: “Blak Det i no bin kilim planti man hariap tru olsem dispela sik i bin mekim.”

▪ Taifas (20 milion samting) Long taim bilong woa planti man tru i save kisim sik taifas; bihain long Wol Woa 1 sik taifas i bin mekim save long planti man long ol kantri long Isten Yurop.

▪ AIDS (winim 20 milion) Dispela bikpela sik bilong nau i wok long kilim i dai 3 milion man long olgeta wan wan yia. Yunaitet Nesen AIDS program i tok “sapos ol i no mekim sampela bikpela samting bilong pasim dispela sik, samting olsem 68 milion manmeri bai i dai . . . long ol yia namel long 2000 na 2020.”

[Ol Piksa long pes 11]

Aninit long Kingdom Bilong God, ol kain sik olsem bai i pinis

AIDS

Malaria

Sik TB

[Ol Kredit Lain]

AIDS: CDC; malaria: CDC/Dr. Melvin; TB: © 2003 Dennis Kunkel Microscopy, Inc.

[Piksa long pes 13]

Jisas i bin oraitim olgeta kain sik