Ol Man i Mekim Nogut Long Ol, Tasol Ol i Amamas!
“Ol man i bihainim stretpela pasin na long dispela ol i kisim hevi long ol man, em ol i ken amamas. Kingdom bilong heven em i bilong ol.”—MATYU 5:10
1. Empera Nero bilong Rom i kirapim ol man long mekim wanem pasin nogut long sampela man?
WANPELA man bilong raitim stori long ol samting i bin kamap long Rom long bipo, em i tok: “Ol i karamapim skin bilong abus long ol na ol dok i kaikaim ol na kilim ol i dai, o ol i nilim ol long ol kruse, o ol i kukim ol long paia olsem lait long nait.” Ol i mekim ol dispela pasin nogut long husat? Long ol Kristen—ol disaipel bilong Krais Jisas. Sampela man i tok Empera Nero i bin kirapim paia i kukim taun Rom (long yia 64 C.E.). Nero i laik putim asua i go long ol man i bihainim Jisas, olsem na em i kirapim ol man long mekim nogut long ol Kristen.—The Annals bilong Tacitus, Book XV, par. 44.
2. (a) Krais Jisas i tok wanem long ol man “i bihainim stretpela pasin na long dispela ol i kisim hevi long ol man”? (b) Ol Witnes Bilong Jehova i mas save long wanem samting na taim ol man i mekim nogut long ol, ol inap i stap amamas?
2 Olsem wanem ol Kristen bilong pastaim inap karim dispela bikpela hevi na sanap strong? Olsem wanem ol witnes bilong Jehova long bipo na long nau tu ol inap i stap amamas maski ol man i mekim nogut long ol na i laik pinisim lotu bilong ol? (2 Tesalonaika 1:3-5) Krais Jisas i tok: “Ol man i bihainim stretpela pasin na long dispela ol i kisim hevi long ol man, em ol i ken amamas. Kingdom bilong heven em i bilong ol.” (Matyu 5:10) Tasol i gat faipela samting Ol Witnes i mas save long en bambai ol inap i stap amamas taim ol man i mekim nogut long ol. Ol i mas save (1) bilong wanem Seten i kirapim ol man long mekim nogut long ol; (2) bilong wanem Jehova i larim dispela hevi i painim ol; (3) olsem wanem ol wokboi bilong God i ken amamas maski ol man i mekim nogut long ol; (4) olsem wanem ol i ken redi long karim kain hevi olsem; (5) olsem wanem ol inap karim dispela hevi na sanap strong.
Seten i Laik Mekim Wanem?
3, 4. (a) Husat tru i kirapim ol man long mekim nogut long Ol Witnes Bilong Jehova? (b) Jisas i tok wanem na em i makim dispela man em i as tru bilong dispela kain hevi?
3 Ol bos bilong Rom i no ken pret long ol Kristen. Ol Kristen i no man bilong pait; ol i laikim tru pasin bilong i stap bel isi. Ol dispela witnes bilong Jehova long bipo, ol i save daun long ol gavman, na ol i save ‘givim samting bilong Sisa long Sisa,’ tasol ol i save tingim lo bilong God i nambawan. Ol i ‘givim samting bilong God long God.’ (Rom 13:1-7; Matyu 22:21) Ol dispela bikpela bos bilong Rom i no save i gat wanpela man nogut i stap em i bin kirapim ol man long mekim nogut long ol witnes bilong Jehova kirap long taim bilong ‘stretpela man Ebel.’ (Matyu 23:33-36; Hibru 11:4, 32-40; 12:1) Dispela man nogut em Seten. Em i birua bilong God na birua bilong lain bilong God. Em i olsem “wanpela laion i krai strong. Em i save wokabaut i go, na i laik painim sampela man bilong kaikai.”—1 Pita 5:8.
4 Planti taim Jisas i tokim ol disaipel bilong em bai ol man i mekim nogut long ol. Wanpela taim em i tok: “Wokboi em i no antap long bikpela man bilong en. Ol i bin ranim mi [na ol i mekim tru] , olsem na bai ol i ranim yupela tu.” (Jon 15:20; 16:2; Matyu 10:22, 23) Na Krais i tok klia, Seten em i as bilong ol dispela hevi ol man i putim long ol Kristen. Krais i tokim wanpela bilong ol ‘7-pela kongrigesen’ olsem: “Harim! Seten em bai i kalabusim sampela man namel long yupela, bilong traim yupela.” (Revelesen 1:1, 4; 2:10) Tasol bilong wanem Seten i save mekim nogut long ol witnes bilong Jehova? Em i laik mekim wanem?
5. Seten i laik mekim wanem na em i kirapim ol man long mekim nogut long ol wokboi bilong Jehova?
5 Seten i laik pundaunim ol wokboi bilong Jehova na bai ol i lusim bilip. Ol i stap gut wantaim Papa bilong ol long heven na Seten i laik bagarapim dispela samting. Taim rong i kamap long pastaim, God Jehova i tok “Snek” wantaim lain bilong en bai ol birua long “meri” bilong God na long lain bilong em! (Jenesis 3:14, 15) Jisas i makim stret dispela snek em Seten. Em i tokim ol man i mekim nogut long Em, ol i “pikinini bilong papa bilong [ol], Seten.” Ol i lain bilong dispela birua. (Jon 8:31-59) Nau long “las taim” Seten i no gat bikpela hap taim moa na em i belhat moa yet. (2 Timoti 3:1-5; Revelesen 12:7-17) Olsem na pasin birua i stap yet namel long lain bilong Seten na lain bilong God. Olgeta man i mas i stap long lain bilong God o long lain bilong Seten. I gat dispela tupela lain tasol. (Skelim tok bilong 1 Jon 3:10.) Olsem na sapos wanpela man i stap gut long wok bilong Jehova em i mas save, ol man bai mekim nogut long em. Seten bai kirapim ol long mekim.—2 Timoti 3:12.
6. Seten i kamapim wanem bikpela tok? Na em i tok wanem long ol man?
6 Seten i kamapim bikpela tok long wok bilong God long bosim heven na graun. Na em i tok sapos em i putim traim long ol man, olgeta bai ol i lusim God. Seten i putim hevi long Jop bilong traim em, em bai stap gut long God o nogat. Meri bilong Jop na tripela poroman bilong em, ating ol i save, tasol ol i helpim dispela wok bilong Seten. (Jop 1:8-2:9; 16:2; 19:22, 28) Yumi tingim dispela samting i bin painim Jop na yumi save, Seten i sutim tok bilas long Jehova. Em i tok, sapos God i larim em i putim traim long ol man, i no gat wanpela bai stap gut long God. Olsem na Seten i save mekim nogut long ol witnes bilong Jehova bilong pundaunim ol na truim dispela tok bilong em.
7. Kristen i mekim wanem na em i lusim bilip? Tasol taim kain traim olsem i painim Jisas, Jisas i mekim wanem?
7 Seten i save, sapos Kristen i mekim wanpela samting tasol bilong “lotu” long em, dispela Kristen i lusim bilip, na em i helpim dispela tok Seten i bin sutim long God, olsem ol man i no ken i stap gut long God sapos traim na hevi i painim ol. Seten i soim “olgeta kingdom bilong dispela graun wantaim ol gutpela samting bilong ol” long Jisas. Soim pinis na nau dispela namba wan birua i tok wanem? Em i tok: “Sapos yu brukim skru na lindaun na lotu long mi, orait bai mi givim yu dispela olgeta samting.” Tasol Jisas i no laik mekim. Nogat tru,. Em i stap gut long God Jehova. Na long dispela rot em i soim olsem Seten em i man bilong giaman.—Matyu 4:8-11.
8, 9. (a) Ol Kristen bilong pastaim i mekim wanem na ol i soim olsem ol i no laik mekim wanpela samting bilong lotu bilong Seten? (b) Olsem wanem wankain traim i bin painim sampela Kristen nau long taim bilong yumi? Tasol ol i mekim wanem?
8 Olsem na ol Kristen bilong pastaim ol i no laik mekim wanpela samting bilong “lotu” long Seten. Ol i no laik helpim tok bilong Seten liklik! Ol gutpela disaipel bilong Krais long bipo ol i no save wokim smok smel bilong litimapim nem bilong empera bilong Rom maski ol man i kilim ol i dai tu. Daniel P. Mannix i stori long dispela samting, olsem: ‘Wan wan Kristen tasol i pundaun na lusim bilip maski ol i putim alta i stap klostu long ol i gat paia long en. Kristen i stap kalabus em i mas tromoi long paia liklik paura bilong mekim smok smel, em tasol, na bai ol i givim Pas long em bilong makim em i bin mekim dispela ofa, na em i ken lusim kalabus. Ol i save tokim em, sapos em i mekim dispela samting i no olsem em i lotuim empera; nogat; tasol dispela samting em i bilong makim em i save empera em i olsem wanpela god, long wanem em i bos bilong ples. Tasol ol Kristen i no save mekim.’ (Those about to Die, pes 137) Sapos ol i mekim wanpela liklik samting olsem, bai i olsem ol i “lotu” long Seten, na bai Seten i amamas.
9 Kain traim olsem i bin painim sampela Kristen long taim bilong yumi tu. Taim ol Natsi i holim Ol Witnes long Jemani na taim ol i stap long kalabus tu, ol i wok strong long kirapim Ol Witnes long lusim Jehova na lain bilong Em. Ol i redim wanpela pepa na sapos Ol Witnes i sainim nem bilong ol long en, ol i ken lusim kalabus. Ol i mas sainim nem; em tasol. Tasol ol Witnes i no mekim dispela samting; wan wan tasol.
10. Sapos yumi lusim lo bilong God liklik, long wanem yumi ting long dispela rot bai yumi inap i stap fri na autim tok, olsem wanem na yumi no bihainim gutpela tingting?
10 Yumi save bilong wanem Seten i kirapim ol man long mekim nogut long ol witnes bilong Jehova, olsem na oltaim yumi mas was gut. Nogut yumi laik abrusim hevi na yumi pundaun long traim bilong Seten na yumi lusim lo bilong Jehova liklik. Nogut yumi popaia na yumi ting, ‘Em liklik samting tasol. Na long dispela rot bai mi inap lusim kwik kalabus na kirap gen mekim wok bilong autim tok.’ Nogat. Yumi no ken ting olsem. Sapos yumi lusim lo bilong God liklik yumi inap pundaun olgeta. (Skelim tok bilong Matyu 13:21 na Galesia 6:12.) Sapos yumi pundaun na mekim wanpela samting bilong “lotu,” yumi no inap moa long wok bilong Kingdom bilong Jehova. Sapos yumi mekim wanpela samting tasol na lusim lo bilong God liklik tasol, bai Seten i amamas, na yumi no laik mekim Seten i amamas, a? Nogat. Yumi laik mekim Jehova i amamas. Yumi laik holimpas lo bilong Jehova bambai em inap bekim tok long dispela man i sutim tok long em, em Seten.—Provep 27:11.
Bilong Wanem Jehova i Larim Ol Man i Mekim Nogut Long Yumi?
11. Wanem samting i olsem nambawan bikpela samting na Jehova i larim ol man i mekim nogut long lain bilong em?
11 Papa bilong yumi long heven em inap pasim ol man na bai ol i no ken mekim nogut long lain bilong em. Tasol em i no save mekim olsem. Em i larim ol i putim hevi long yumi. Sapos yumi save bilong wanem em i larim ol i mekim olsem, dispela bai helpim yumi long i stap amamas maski ol man i mekim nogut long yumi. Nambawan samting na God i larim ol man i mekim nogut long yumi, em olsem: Dispela samting inap stretim dispela tok Seten i kamapim long wok bilong God long bosim heven na graun. Olgeta Witnes i holimpas lo bilong Jehova long taim bilong traim, ol i soim olsem Seten em i man bilong giaman. Long wanem, maski yumi no gutpela olgeta, tasol yumi inap karim ol bikpela bikpela hevi Seten i putim long yumi na sanap strong. Man i stap gut long God em i helpim God long dispela tok bilong Seten, na i soim olsem i stret God Jehova i stap bos o Nambawan King bilong heven na graun. Sapos yumi helpim ol man long save, Jehova i stap “nambawan king,” yumi ken amamas tru!—Sam 47:9.
12, 13. I gat wanem narapela samting na Jehova i larim ol man i mekim nogut long ol Kristen? Namel long ol, God bai orait long husat na ol i ken i stap oltaim?
12 Na Jehova i save larim ol man i mekim nogut long yumi bambai yumi ken kamapim bel bilong yumi, yumi givim bel tru long em olsem yumi tok taim yumi dediket long em o nogat. Em i bungim “lain manmeri bilong em” bambai ol dispela manmeri, em spirit holi i makim ol, ol i ken “telimautim olgeta gutpela pasin em i bin mekim.” (1 Pita 2:9) Na God i wok long ‘seksekim olgeta lain man’ bambai ‘ol samting em i laikim’—olsem ol man em i orait long ol—ol i ken i kam long “haus” bilong em bilong lotu long em, na bai biknem bilong em i pulap long dispela haus. (Hagai 2:7; skelim wantaim tok bilong Sekaraia 8:23.) Olsem na ol manmeri i bilong kisim laip long heven, na ol manmeri i wet long kisim laip oltaim long Paradais long graun, ol i dediket long God Jehova na ol i kamap witnes bilong em.—Luk 23:43; Revelesen 7:1-17.
13 Tasol long dispela olgeta Kristen i dediket, husat husat tru bai ol i go insait long “nupela skai” na “nupela graun”? (Revelesen 21:1) I no olgeta. (Sam 15:1-5; Matyu 22:14) Ol manmeri i stap gut long God, ol tasol inap i go insait. Ol man i lusim God ol i no ken i stap oltaim. Olsem na Jehova i no kirapim ol man long mekim nogut long yumi, tasol em i larim ol i mekim, bambai ol manmeri long lain bilong em ol i ken kamapim bel bilong ol, ol i givim bel tru long em o nogat. Em i save rausim ol manmeri i no stap gut long Em. Tasol em i save lukautim ol manmeri i givim bel tru long em na ol i stap gut long em. (Matyu 22:37, 38; 25:31-33; 2 Korin 13:5) Yumi mas karim ol hevi na sanap strong na bai yumi inap “holim wok bilong em, na yumi no ken pret. Olgeta taim yumi stap laip, orait yumi ken holim wok bilong em long pasin i holi, na long pasin i stret”—i go inap long olgeta taim bihain.—Luk 1:68, 69, 74, 75.
Olsem Wanem na Yumi Stap Amamas Maski Ol i Mekim Nogut Long Yumi?
14. Jisas i kolim wanem samting olsem as bilong i stap amamas maski ol man i mekim nogut long yumi?
14 Yumi tingim Kingdom na wetim i stap. Jisas i tok long dispela samting taim em i tok: “Ol man i bihainim stretpela pasin na long dispela ol i kisim hevi long ol man, em ol i ken amamas. Kingdom bilong heven em i bilong ol.” (Matyu 5:10) Ol disaipel bilong Jisas, em spirit holi i makim ol na ol i sanap strong long traim, ol i ken amamas, long wanem ol bai wok wantaim Krais long Kingdom bilong heven. Em gutpela prais tru ol bai kisim. (Luk 12:32; Revelesen 2:10; 14:1; 20:6) Na ol narapela witnes bilong Jehova, em ol i stap gut long wok bilong God, ol tu i gat gutpela prais—bai ol inap kisim laip i stap oltaim long Paradais long graun. (Luk 23:43; Jon 10:16; 17:3; Revelesen 7:9, 10, 14) Tru tumas, sapos yumi tingim Kingdom na wetim i stap, bai yumi inap i stap amamas maski ol man i mekim nogut long yumi.—Rom 12:12.
15. Olsem wanem wok king bilong Jehova i samting bilong Kingdom? Na olsem wanem ol dispela samting inap helpim yumi na taim ol man i mekim nogut long yumi, yumi ken amamas?
15 Na yumi mas tingim wok king bilong Jehova, em bikpela samting bilong dispela Kingdom. Long wanem, long rot bilong Kingdom bai God i stretim bek nem holi bilong em. Yumi ol manmeri i stap gut long wok bilong Em na autim tok bilong Kingdom, yumi helpim wok king bilong em. Olsem na maski hevi i painim yumi, yumi inap i stap amamas. (Aisaia 43:10-12; Matyu 6:9, 10) God i save helpim yumi, olsem na yumi mas holimpas lo bilong Em, na long dispela rot bai yumi soim olsem Seten em i man bilong tok giaman. Em i tok, i no gat wanpela man bai stap gut long Jehova long taim bilong traim. Tasol dispela tok i no stret. (Jop 27:5) Ol Kristen i helpim Jehova long bekim tok long Seten, ol i ken amamas tru!—Skelim tok bilong Aposel 4:24.
16. Olsem wanem na sapos bel bilong yumi i no gat tok, dispela samting inap helpim yumi long i stap amamas taim ol man i mekim nogut long yumi?
16 Bel i no gat tok, dispela samting tu inap helpim yumi long i stap amamas taim ol man i mekim nogut long yumi. Man i tok em i wanpela Kristen na em i kisim hevi long wanem em i mekim rong, em i no ken amamas. Em bai sem na bel bilong em bai kotim em. Tasol Kristen i mekim stretpela pasin, olsem wanpela witnes bilong Jehova na Krais Jisas, na long dispela em i kisim hevi long han bilong ol man, dispela Kristen i ken amamas. Olsem na taim ol man i paitim ol aposel long bipo, “ol aposel ol i lusim kaunsil na i go insait. Na ol i amamas long God i tingim ol inap long kisim sem long nem bilong Jisas.” (Aposel 5:40, 41) Na taim ol man i paitim na kalabusim Pol tupela Sailas long Filipai, tupela i no bel hevi na bel bilong ol i no gat tok, long wanem ol i save ol i no bin mekim rong. Long biknait tupela ‘i beten na i mekim song long God.’ (Aposel 16:22-25) Olsem na wanpela witnes bilong Jehova i no ken kilim man i dai, o stil, o mekim pasin nogut, o lukluk nabaut long ol samting bilong ol narapela man, na bai em i gat asua, na ating bel bilong em i gat tok long dispela pasin em i mekim, na em i mas kisim strafe. Tasol sapos wanpela Kristen i mekim stretpela pasin na long dispela em i kisim hevi long han bilong ol man, orait, dispela Kristen i ken amamas.—1 Pita 2:11, 12; 3:13, 14; 4:15, 16.
17. Wanem samting tru em inap helpim yumi long i stap amamas taim yumi mekim wok bilong Kingdom na ol man i mekim nogut long yumi?
17 Bihainim laik bilong Jehova na litimapim nem bilong em, dispela samting bai helpim yumi long i stap amamas taim yumi mekim wok bilong Kingdom na ol man i mekim nogut long yumi. Maski ol i putim bikpela hevi tru long yumi, tasol yumi mas “bihainim laik bilong God” bambai yumi inap mekim wok bilong Em na i stap amamas oltaim. (1 Tesalonaika 4:1) Yumi Kristen, na sapos long dispela yumi karim pen, maski, “‘long dispela nem Kristen, [yumi] mas litimapim nem bilong God.” Yu tingim: Taim ol man i mekim nogut long yumi, sapos yumi karim dispela hevi na sanap strong, yumi “litimapim nem bilong God.” (1 Pita 4:16) Yumi amamas long dispela samting na dispela samting i kirapim yumi long karim hevi na sanap strong. Yumi no pret!
Yupela Ol Man i Holimpas Bilip, Wok i Go Yet
18. Ol Witnes Bilong Jehova i mas ting olsem wanem long i stap gut long God na holimpas lo bilong Em?
18 Tru tumas, i gat planti samting i olsem samting tru na Ol Witnes Bilong Jehova inap i stap amamas maski ol man i mekim nogut long ol. God i save helpim yumi na yumi mas tingting strong olsem Devit, em i tok: “Tasol mi yet mi save mekim stretpela pasin.”—Sam 26:11.
19. I gat wanem ol askim yumi mas tingim?
19 Yumi ol Kristen i stap gut long God, yumi ken amamas taim ol man i mekim nogut long yumi, long wanem yumi save long ol samting Seten i laik mekim na em i kirapim ol long mekim nogut long yumi. Na yumi save long ol samting God i laik mekim na em i larim ol i mekim nogut long lain bilong em. I gat ol dispela samting na yumi ken amamas maski ol man i mekim nogut long yumi, tasol olsem wanem yumi ken redi long karim dispela kain hevi? Na olsem wanem sapos ol man i mekim nogut tru long yumi o ol i laik bagarapim skin bilong yumi? Olsem wanem yumi inap karim dispela kain hevi na sanap strong?
Sampela Askim
□ Seten i laik mekim wanem na em i kirapim ol man long mekim nogut long ol witnes bilong Jehova?
□ Seten i kamapim wanem bikpela tok? Na em i sutim wanem tok long ol man?
□ Bilong wanem Jehova i larim Ol man i mekim nogut long lain bilong em?
□ Krais Jisas i kolim wanem samting i olsem as bilong i stap amamas taim yumi mekim stretpela pasin na long dispela yumi kisim hevi long han bilong ol man’?
□ Wanem samting i helpim yumi long i stap amamas taim yumi mekim wok bilong Jehova na ol man i mekim nogut long yumi?
[Piksa long pes 13]
Seten i traim Jisas, tasol Jisas i no laik lotu long Seten
[Piksa long pes 14]
Sapos yumi tingim Kingdom, bai yumi inap i stap amamas maski ol man i mekim nogut long yumi