Yumi Mekim Stretpela Pasin na Ol Man i Mekim Nogut Long Yumi

“Ol manmeri i save bihainim stretpela pasin na long dispela as ol i kisim hevi long ol arapela.”​​—⁠Matyu 5:​10.

1. Bilong wanem Jisas i sanap long ai bilong Pontius Pailat? Jisas i bin tok wanem?

“MAMA i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37) Taim Jisas i mekim dispela tok, em i bin sanap long ai bilong Pontius Pailat, em gavena bilong Rom i bosim Judia. I no long laik bilong Jisas yet na em i stap long dispela hap, na tu, i no olsem Pailat i singautim em. Em i sanap long ai bilong Pailat, long wanem, ol hetman bilong lotu Juda i giaman na tok Jisas em i man nogut na i stret em i mas i dai.​​—⁠Jon 18:​29-​31.

2. Jisas i mekim wanem? Wanem samting i kamap long dispela?

² Jisas i save Pailat i gat namba long lusim em o long kilim em i dai. (Jon 19:10) Tasol dispela i no pasim em long tokaut long Kingdom long Pailat. Bagarap inap painim Jisas, tasol em i autim tok long nambawan bikman bilong gavman i bosim dispela hap. Maski em i mekim olsem, ol i kotim em na kilim em i dai. Em i karim bikpela pen na i dai long pos olsem man i holimpas bilip.​​—⁠Matyu 27:​24-​26; Mak 15:15; Luk 23:​24, 25; Jon 19:​13-​16.

Man Bilong Autim Tok o Man i Dai Bilong Holimpas Bilip?

3. Long taim ol i bin raitim Baibel, wanem mining bilong dispela tok Grik marʹtys? Na wanem mining bilong dispela tok long nau?

³ Long tingting bilong planti man long nau, wanpela man i dai bilong holimpas bilip i olsem wanpela man i save strong tumas long bihainim tingting bilong em. Ol man i redi long i dai bilong holimpas bilip bilong ol, na moa yet ol bilip bilong lotu, planti taim ol man i ting ol i olsem teroris o ol i man i laik mekim nogut long ol narapela. Tasol dispela tok man i dai bilong holimpas bilip i kam long wanpela tok Grik (marʹtys) na long taim ol i bin raitim Baibel dispela tok i makim wanpela “witnes,” olsem man i autim tok long ol samting em i bilip long en, ating taim em i sanap long kot. Bihain tasol dispela tok i makim tu wanpela “man i dai bilong holimpas bilip” o man i dai bilong kamapim bilip bilong em.

4. Olsem wanem dispela tok marʹtys i stret long Jisas?

⁴ Jisas i stap olsem marʹtys, olsem man i autim tok i tru long ol samting em i bilip long en. Olsem em i tokim Pailat, em i kam bilong “autim tok tru.” Wok autim tok bilong em i mekim kain kain samting long bel bilong ol man. Bel bilong sampela man nating i kirap tru long ol samting ol i harim na lukim na ol i bilip long Jisas. (Jon 2:​23; 8:​30) Ol bikpela lain manmeri na moa yet ol hetman bilong lotu ol i kros tru long samting em i autim. Jisas i tokim ol famili bilong em i no bilip: “Ol manmeri bilong graun ol i no inap birua long yupela. Tasol ol i birua long mi, long wanem, mi save autim tok long ol pasin nogut ol i save mekim.” (Jon 7:⁠7) Jisas i autim tok i tru, na dispela i kirapim ol bikman bilong Israel long belhat long em, na bihain ol i kilim em i dai. Tru tumas, em i man i save “autim stret olgeta tok bilong God (marʹtys).”​​—⁠KTH 3:​14.

“Olgeta Man Bai i Bel Nogut Tru Long Yupela”

5. Long taim Jisas i kirapim wok bilong em long autim tok, em i tok wanem long pasin bilong ol birua long mekim nogut long ol disaipel?

⁵ Ol birua i mekim nogut tru long Jisas, na tu, em i givim tok lukaut long ol disaipel bilong em olsem wankain samting bai painim ol. Taim em i kirapim wok bilong em long autim tok, Jisas i tokim ol man i harim tok bilong em antap long maunten: “Ol manmeri i save bihainim stretpela pasin na long dispela as ol i kisim hevi long ol arapela, em ol i ken amamas. Kingdom bilong heven em i bilong ol. Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven.”​​—⁠Matyu 5:​10-​12.

6. Jisas i givim wanem tok lukaut taim em i salim ol 12-pela aposel i go autim tok?

⁶ Bihain, taim em i salim 12-pela aposel i go autim tok, Jisas i tokim ol: “Yupela lukaut long ol man. Ol bai i kotim yupela long ol kaunsil bilong ol, na ol bai i wipim yupela insait long ol haus lotu bilong ol. Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” Tasol i no ol hetman bilong lotu tasol ol bai mekim nogut long ol disaipel, nogat. Jisas i tok moa: “Man bai i kotim brata bilong en, na tokim ol long kilim dispela brata i dai. Na ol papa bai i mekim wankain pasin long ol pikinini bilong ol. Na ol pikinini bai i birua long papamama bilong ol na tokim ol man long kilim ol i dai. Na olgeta man bai i bel nogut tru long yupela, long wanem, nem bilong mi em i stap long yupela. Tasol ol manmeri i stap strong inap long las de, God bai i kisim bek ol.” (Matyu 10:​17, 18, 21, 22) Ol samting i painim ol Kristen long taim bilong ol aposel i kamapim olsem dispela tok em i tru.

Ol i Stap Gut Long God na Sanap Strong

7. Wanem samting i kamap na Stiven i dai bilong autim tok i tru?

⁷ Bihain liklik long Jisas i dai, Stiven i kamap namba wan Kristen i dai, long wanem, em i autim tok i tru. “God i helpim tru Stiven na givim strong long em, olsem na Stiven i save wokim ol kain kain bikpela mirakel namel long ol manmeri. Na Holi Spirit i givim gutpela save tru long Stiven.” Olsem na ol bikman bilong lotu “i no inap winim tok bilong em.” (Aposel 6:​8, 10) Ol i bel nogut tru long Stiven, olsem na ol i kisim em i go long kaunsil, em nambawan kot bilong ol Juda, na ol man i sutim tok giaman long em na em i autim strong tok. Tasol bihain ol birua i kilim i dai dispela strongpela witnes.​​—⁠Aposel 7:​59, 60.

8. Bihain long ol birua i kilim i dai Stiven, ol disaipel long Jerusalem i mekim wanem taim ol man i mekim nogut long ol?

⁸ Bihain long ol birua i kilim i dai Stiven, “ol i stat long mekim nogut tru long ol manmeri bilong sios i stap long Jerusalem. Olsem na olgeta manmeri bilong sios i ranawe i go nabaut long olgeta hap bilong distrik Judia na Samaria. Tasol ol aposel i stap yet long Jerusalem.” (Aposel 8:⁠1) Olsem wanem? Pasin bilong mekim nogut long ol Kristen i stopim wok bilong autim tok? Nogat tru! Baibel i tok “ol dispela manmeri i bin ranawe i go nabaut long olgeta hap, ol i autim gutnius long ol ples ol i stap long en.” (Aposel 8:⁠4) Ating ol i gat wankain tingting olsem aposel Pita i kamapim paslain long dispela, olsem: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:​29) Maski ol man i mekim nogut long ol, ol dispela gutpela disaipel i gat strongpela bel ol i mekim yet wok bilong autim tok i tru, maski ol i save dispela bai kamapim sampela hevi moa long ol.​​—⁠Aposel 11:​19-​21.

9. Ol man i mekim wanem ol pasin nogut long ol disaipel bilong Jisas?

⁹ Tru tumas, i no gat malolo long pasin bilong mekim nogut long ol disaipel. Pastaim, yumi kisim save olsem Sol​​—⁠em i man i bin orait long tromoi ston long Stiven na kilim em i dai​​—⁠em i “strong yet long bagarapim ol disaipel bilong Bikpela na kilim ol i dai. Olsem na em i go long hetpris, na i askim hetpris long raitim ol pas long ol hetman bilong ol haus lotu bilong ol Juda i stap long taun Damaskus. Orait hetpris i raitim ol pas na em i givim long Sol. Ol pas i gat tok olsem, ‘Sapos Sol i lukim sampela man o sampela meri i bihainim rot bilong Jisas, orait em i ken kalabusim ol na bringim ol i kam long Jerusalem.’ ” (Aposel 9:​1, 2) Bihain, long yia 44 C.E. samting, “King Herot i bagarapim sampela man bilong sios. Em i tok, na ol i kilim i dai Jems, em brata bilong Jon, long bainat.”​​—⁠Aposel 12:​1, 2.

10. Buk Aposel na Buk Kamapim Tok Hait i stori long wanem ol pasin bilong mekim nogut long ol gutpela wokman bilong God?

¹⁰ Ol narapela stori long Buk Aposel i toktok long ol bikpela hevi, kalabus, na pasin bilong ol man long mekim nogut long ol gutpela wokman bilong God olsem Pol, em man bipo i bin mekim nogut long ol disaipel bilong Jisas na bihain em i kamap aposel. Ating long 65 C.E. samting King bilong Rom, em Niro, i kilim em i dai na em i kamap man i dai bilong autim tok i tru. (2 Korin 11:​23-​27; 2 Timoti 4:​6-8) Bihain, long Buk Kamapim Tok Hait, em Jon i raitim long 96 C.E., yumi lukim olsem lapun aposel Jon i stap kalabus long ailan Patmos, long wanem, em i ‘autim tok bilong God, na em i autim tok olsem em i bilip long Jisas.’ Na tu, Buk Kamapim Tok Hait i stori long ‘Antipas, em man bilong autim tok bilong God na ol i kilim em i dai’ long Pergamum.​​—⁠KTH 1:9; 2:​13.

11. Olsem wanem ol samting i painim ol Kristen bilong bipo i truim tok bilong Jisas olsem ol man bai mekim nogut long ol?

¹¹ Ol dispela samting i kamap i truim tok Jisas i mekim long ol disaipel, em i tok: “Sapos ol i bin mekim nogut long mi, orait ol bai i mekim nogut long yupela tu.” (Jon 15:20) Ol gutpela Kristen long taim bilong ol aposel i redi long karim nambawan bikpela traim, em indai; maski ol man i givim pen nogut tru long ol, na tromoi ol i go long ol wel animal, na mekim ol narapela samting nogut tru long ol, ol i redi long karim ol dispela traim bilong mekim wok ol i kisim long Bikpela Jisas Krais: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”​​—⁠Aposel 1:⁠8.

12. Bilong wanem yumi ken tok pasin bilong mekim nogut long ol Kristen i no bin kamap long bipo tasol?

¹² Sapos wanpela man i ting kain pasin nogut i painim ol disaipel bilong Jisas em i kamap long bipo tasol, tingting bilong dispela man i rong tru. Pol, em man i bin karim planti hevi, em i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:​12) Long pasin bilong mekim nogut long narapela, Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:​21) I kam inap long “taim bilong las de” bilong dispela pasin nogut bilong nau, ol man i bel nogut na mekim nogut long lain bilong Jehova. (2 Timoti 3:⁠1) Long olgeta hap bilong graun, aninit long ol gavman dikteta na ol gavman demokratik, ol man i bin mekim nogut long Witnes Bilong Jehova; ol i mekim nogut long ol Witnes olsem wanpela lain olgeta, na tu, long ol wan wan bilong ol.

Bilong Wanem Ol i Bel Nogut na Mekim Nogut Long Ol?

13. Ol wokman bilong Jehova long nau ol i mas save tru long wanem samting?

¹³ Tru planti bilong yumi long nau i stap fri long mekim wok autim tok na bung wantaim, tasol yumi mas tingim tok bilong Baibel olsem “pasin bilong dispela graun i save senis.” (1 Korin 7:​31, NW ) Wantu ol samting inap senis, na sapos yumi no redim tingting na bel bilong yumi na stap gut long ol samting bilong spirit, yumi inap pundaun. Olsem na yumi inap mekim wanem bilong lukautim yumi? Wanpela bikpela samting tru bilong helpim yumi, em yumi mas save tru long as na ol man i bel nogut tru na mekim nogut long ol Kristen em ol i save laikim tru pasin bilong i stap isi na bihainim ol lo.

14. Pita i tok i gat wanem as na ol man i bin mekim nogut long ol Kristen?

¹⁴ Aposel Pita i toktok long dispela samting long namba wan pas bilong em, em i bin raitim long 62-​64 C.E. samting, taim ol Kristen long ol hap em Gavman Rom i bin bosim i kisim planti hevi na ol man i mekim nogut long ol. Em i tok: “Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat.” Bilong kamapim gut tingting bilong em, Pita i tok moa: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela. Tasol sapos man em i Kristen, na long dispela as em i karim pen, orait em i no ken sem. Nogat. Em i mas amamas long dispela nem Kristen, na litimapim nem bilong God.” Pita i tokim ol olsem ol i no mekim pasin nogut na long dispela as ol i kisim pen na hevi, nogat; ol i kisim hevi, long wanem, ol i Kristen. Sapos ol i mekim wankain “pasin nogut” olsem ol man em ol i stap namel long ol, ol dispela man bai amamas long ol. Tasol ol i kisim pen na hevi, long wanem, ol i laik bihainim ol pasin i stret long ol disaipel bilong Krais. Wankain samting i painim ol trupela Kristen long nau.​​—⁠1 Pita 4:​4, 12, 15, 16.

15. Ol man i mekim wanem tupela pasin long ol Witnes Bilong Jehova long nau?

¹⁵ Long planti hap bilong graun, ol man i litimapim nem bilong ol Witnes Bilong Jehova, long wanem, ol i stap wanbel na wok gut wantaim long ol kibung bilong ol na long taim ol i wokim ol Haus Kingdom samting, na ol i no giaman na ol i save wok strong, na ol i bihainim stretpela pasin na famili bilong ol i stap gut, na tu, ol i bilas gut na mekim gutpela pasin.a Tasol long nau, ol gavman i pasim o tambuim wok bilong ol Witnes long 28 kantri, na planti i kisim sampela bagarap long skin na ol samting bilong ol i lus, long wanem, ol i holimpas bilip bilong ol. Bilong wanem sampela man i mekim gutpela tok long ol Witnes, na sampela i mekim nogut long ol? Na bilong wanem God i larim ol dispela samting i kamap?

16. Wanem nambawan bikpela as na God i larim ol man i mekim nogut long lain bilong em?

¹⁶ Nambawan bikpela samting yumi laik tingim em ol tok bilong Sindaun 27:11: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Yes, as na God i larim ol dispela hevi em dispela tok bilong bipo yet olsem husat i mas i stap nambawan bos. Maski long bipo yet na i kam inap long nau planti man tru i kamapim klia olsem ol i stap gut long Jehova, Satan i sutim yet tok long Jehova olsem em i bin mekim long taim bilong stretpela man Jop. (Jop 1:​9-​11; 2:​4, 5) Long nau Kingdom i kamap pinis long heven na long olgeta hap bilong graun i gat ol wokman i stap aninit long en, olsem na yumi save Satan i wok strong moa yet bilong kamapim olsem tok bilong em i tru. Olsem wanem? Ol dispela wokman bai stap gut long God, maski wanem ol hevi na traim bai painim ol? Dispela em i wanpela askim em olgeta wan wan wokman bilong Jehova yet i mas bekim.​​—⁠KTH 12:​12, 17.

17. Wanem mining bilong dispela tok bilong Jisas olsem “dispela bai i stap olsem rot bilong yupela i ken autim gutnius long ol”?

¹⁷ Taim Jisas i tokim ol disaipel bilong em long ol samting bai kamap long taim pasin bilong “dispela graun i laik pinis,” Jisas i kamapim narapela as na Jehova i larim ol man i mekim nogut long ol wokman bilong em. Em i tokim ol: “Ol bai i ting long daunim nem bilong mi, na ol bai i bringim yupela i go sanap long pes bilong ol king na ol gavman. Na dispela bai i stap olsem rot bilong yupela i ken autim gutnius long ol.” (Matyu 24:​3, 9; Luk 21:​12, 13) Jisas yet i bin autim tok long ai bilong Herot na Pontius Pailat. Na ol i bin bringim aposel Pol “i go sanap long pes bilong ol king na ol gavman.” Bikpela Jisas Krais i bin stiaim tingting bilong Pol na em i laik autim tok long nambawan bikman long taim bilong em, em i tok: “Mi laik bai Sisar yet i mas harim kot bilong mi.” (Aposel 23:11; 25:​8-​12) Long nau tu, sampela hevi i bin mekim na planti taim dispela i bin opim rot bilong autim gut tok long ol bikman bilong gavman na ol manmeri.b

18, 19. (a) Olsem wanem pasin bilong karim hevi inap helpim yumi? (b) Bai yumi toktok long wanem ol askim long stori i kamap bihain long dispela?

¹⁸ Na tu, pasin bilong karim kain kain hevi inap helpim yumi yet. Em inap helpim yumi olsem wanem? Disaipel Jems i tokim ol wanwok Kristen: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” Tru tumas, taim ol man i mekim nogut long yumi, dispela inap strongim bilip na pasin bilong yumi long sanap strong. Olsem na yumi no pret long ol hevi i kamap, na yumi no mekim samting i no stret wantaim tok bilong Baibel bilong abrusim o pinisim hevi. Tasol yumi bihainim tok bilong Jems: “Oltaim yupela i mas sanap strong na karim hevi, bai dispela pasin i ken kamap strong tru long yupela. Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.”​​—⁠Jems 1:​2-4.

¹⁹ Tru, Tok Bilong God i helpim yumi long save bilong wanem ol man i mekim nogut long ol gutpela wokman bilong God na bilong wanem Jehova i larim ol long mekim olsem, tasol dispela i no mekim na i isi long karim dispela hevi bilong ol man i mekim nogut long yumi. Wanem samting inap strongim bel bilong yumi long sanap strong? Yumi inap mekim wanem taim ol man i mekim nogut long yumi? Yumi bai toktok long dispela bikpela samting long stori i kamap bihain long dispela.

[Ol Futnot]

Yu Inap Stori Long Dispela?

• Olsem wanem dispela tok marʹtys i stret long Jisas?

• Taim ol man i mekim nogut long ol Kristen long taim bilong ol aposel dispela i mekim wanem long ol?

• Olsem Pita i kamapim, bilong wanem ol man i bin mekim nogut long ol Kristen bilong bipo?

• I gat wanem ol as na Jehova i larim ol man i mekim nogut long ol wokman bilong em?

[Ol Piksa long pes 10, 11]

Ol Kristen long taim bilong ol aposel i no mekim pasin nogut na ol i karim hevi, nogat; ol i karim hevi, long wanem, ol i Kristen

POL

JON

ANTIPAS

JEMS

STIVEN