Ol Kristen i Karim Hevi na Sanap Strong
1, 2. Ol gutpela witnes bilong Jehova i save ting olsem wanem taim ol man i mekim nogut long ol? Tasol yumi gat wanem askim?
OL WITNES BILONG JEHOVA i no laik bai ol man i kilim ol i dai. Tasol ol i save, “olgeta man i laik pas wantaim Krais Jisas na i bihainim pasin bilong God, bai ol birua i mekim nogut long ol.” (2 Timoti 3:12) Tasol yu ting ol i bel hevi long dispela samting?
2 Nogat, long wanem ol Kristen i stap gut long God, ol i save karim hevi na sanap strong. “Ol i save mekim nogut long mipela, na mipela i save larim ol i mekim olsem.” (1 Korin 4:12) Tasol olsem wanem yumi inap redi pastaim na taim kain hevi olsem i painim yumi, yumi inap long sanap strong?
Redi long Karim Hevi
3. Kolim sampela samting yumi ken mekim na bai yumi redi long karim ol hevi ol man i putim long yumi?
3 Yumi stori pinis long sampela samting yumi ken mekim bilong karim hevi ol man i putim long yumi. Olsem: Yumi mas tingim ol samting Seten i laik mekim—em i laik pundaunim yumi na bai yumi no pas moa wantaim Jehova. Tasol God i mas marimari long yumi na yumi no ken larim Seten i mekim olsem! Yumi inap redi long karim ol hevi sapos yumi tingim ol samting God i laik mekim na em i larim ol man i mekim nogut long yumi. Em i save larim dispela kain hevi i painim yumi bilong stretim dispela tok long wok king bilong em, na bai yumi inap kamapim bel bilong yumi, yumi givim bel tru long Em o nogat. Olsem na taim hevi i no painim yet yumi, yumi mas tingting strong olsem: Taim ol man i mekim nogut long yumi, God bai helpim yumi na yumi bai holimpas lo bilong Jehova. Na sapos long bel bilong yumi yumi save tingim Kingdom na wetim i stap, bai yumi inap redi long karim hevi.
4, 5. Taim yumi laik redi long karim hevi, yumi ken mekim wanem bilong strongim bilip bilong yumi?
4 Taim yumi laik redi long dispela samting, long olgeta de yumi mas wok long strongim bilip bilong yumi, na strongim bel bilong yumi bambai yumi no ken pret. Sapos yumi laik bilip tru, yumi mas givim bel tru long Jehova, na yumi mas kisim stretpela save long ol tok bilong Jehova long Baibel bambai yumi ken givim bel tru long Em. Na oltaim yumi mas kaunim Baibel na ol buk bilong Baibel na lainim tok bilong en bambai yumi ken kisim dispela stretpela save. Na oltaim yumi mas bung wantaim ol brata Kristen bilong lotuim Jehova na mekim wok bilong em bambai bilip bilong yumi i ken strong.—Hibru 10:23-25; 12:28; Revelesen 7:9, 10, 15.
5 Na bilong redi long karim hevi, oltaim yumi mas “wokabaut long pasin bilong tok tru.” Tok i tru i mas bosim olgeta samting yumi mekim. (3 Jon 3, 4) Yumi mas larim God i soim rot long yumi long ol liklik traim i save painim yumi long olgeta de, na dispela samting bai strongim bilip bilong yumi, bai yumi bilip tru long Jehova na long pasin bilong em. Na dispela samting bai kirapim yumi long bihainim tok i tru taim ol man i mekim nogut long yumi. Bai yumi larim tok i tru i stiaim tingting bilong yumi.
6. Beten inap helpim yumi olsem wanem na bai yumi redi long karim ol hevi ol man i putim long yumi?
6 Sapos long olgeta taim yumi save beten long Jehova, bai yumi pas gut wantaim em, na dispela samting tu bai helpim yumi long redi long karim hevi. Sapos oltaim yumi beten long Papa bilong yumi long heven, bai yumi bilip tru long em na wetim em i helpim yumi. (2 Korin 1:8-10) Bai yumi pas tru wantaim God na bai i no gat wanpela birua, wanpela man o wanpela spirit nogut, em inap bagarapim dispela samting na mekim yumi lusim God.—Lukim tu Sam 9:1-6 na 1 Jon 2:12-14.
Sanap Strong
7. Taim ol man i mekim nogut long yumi, sapos strong bilong yumi yet i pinis, God inap mekim wanem?
7 Taim ol man i kirap mekim nogut long yumi, na sapos ol i mekim nogut tru long yumi o i laik bagarapim skin bilong yumi, yumi ken mekim wanem na bai yumi inap karim dispela hevi na sanap strong? Yumi mas kisim strong bilong Jehova, em bikpela samting! Olsem Pol, yumi mas kisim “dispela bikpela strong em i strong bilong God. Em i no bilong mipela.” Yumi mas beten askim God long givim dispela strong long yumi. (2 Korin 4:7-12) Na yumi ken bilip tru long Papa bilong yumi long heven, olsem Pol i mekim, em Pol i tok: “Long strong bilong [God Jehova] mi inap mekim olgeta samting.” (Filipai 4:13) Maski strong bilong skin bilong yumi i pinis, tasol strong bilong Jehova i no inap pinis. Em inap givim strong long lain bilong em na em i save mekim olsem. (Aisaia 40:28-31; 45:22-25) Sapos yumi wetim Jehova, bai em i strongim yumi long taim bilong hevi. Maski strong bilong yumi yet i no inap, tasol Jehova bai givim strong long yumi. Yumi no ken pret. Maski ol man i kilim yumi i dai, tasol Jehova i gat strong bilong kirapim bek yumi na givim laip gen long yumi.—Sam 46:1, 2; Luk 12:4-7; Jon 5:28, 29.
8. Bilong wanem beten i bikpela samting bilong helpim yumi long karim hevi na sanap strong?
8 Na yumi mas beten long Jehova, em bikpela samting bilong helpim yumi long karim hevi na sanap strong. Jisas i karim planti pen na hevi, tasol oltaim em i save beten long Papa bilong em. Baibel i tok: “Bipo Jisas i stap man long graun, long dispela taim em i mekim prea na beten long God. God em inap long kisim bek em long dai, olsem na em i beten long em wantaim bikpela singaut, na em i krai planti. Em i save daunim laik bilong em yet na i aninit long God, olsem na God i harim beten bilong em.” (Hibru 5:7) Tru tumas, sapos yumi aninit long God, em i “save harim beten bilong mipela.” (Sam 65:2) Taim ol man i mekim nogut long yumi, yumi mas “beten long olgeta taim,” yes, yumi mas “beten oltaim oltaim” na “mekim prea oltaim.” Em bikpela samting tru. (Rom 12:12; 1 Tesalonaika 5:17; 1 Pita 4:7) Sapos yumi no mekim olsem, ating bai yumi tingim tasol pen na hevi yumi karim long skin na yumi laik painim rot bilong abrusim. Ating bai laik bilong skin i kirapim yumi long lusim lo bilong God liklik.
9, 10. (a) Taim ol man i mekim nogut long yumi, olsem wanem “bel isi God i save givim yumi” em inap helpim yumi? (b) Bel isi bilong Stiven taim ol man i mekim nogut long em, dispela i lainim yumi long wanem samting?
9 Taim ol man i mekim nogut long yumi na putim hevi long yumi, yumi mas wok long kisim “bel isi God i save givim yumi.” Sapos yumi save beten long Jehova long olgeta de, yumi bihainim gutpela pasin, na long taim bilong hevi na traim tu oltaim yumi mas beten. I stret yumi ken beten askim God long kisim dispela “bel isi God i save givim yumi, em i winim olgeta save bilong man.” Dispela kain bel isi bai ‘was gut long bel bilong yumi wantaim tingting bilong yumi’ i go inap long yumi dai tu.—Filipai 4:6, 7.
10 Maski ol man i mekim nogut long yumi, tasol yumi inap kisim dispela gutpela bel isi olsem Stiven i bin kisim. Stiven em i namba wan Kristen ol i kilim em i dai, na taim spirit holi i kirapim em long autim laspela tok bilong em, Baibel i stori olsem: “Olgeta man i sindaun long kaunsil, ol i lukluk strong long Stiven, na ol i lukim pes bilong em i olsem pes bilong ensel.” (Aposel 6:15) Pes bilong em i no olsem bilong man i bel hevi, long wanem em i bin mekim rong. Nogat. Pes bilong em i Tait olsem bilong wanpela ensel, wanpela wailis bilong God, long wanem em i save God i sambai long em. Stiven i no pret. Em i stap bel isi. (Skelim tok bilong Jon 14:27.) Stiven i kamapim rong bilong ol kaunsil; em i tok ol i gat asua long kilim i dai Krais Jisas. “Ol i harim dispela tok, na em i sutim tru bel bilong ol. Ol i kaikaim tit bilong ol na ol i belhat tru long Stiven.” Tasol “Holi Spirit i pulap long Stiven, na em i lukluk strong tru long heven. Em i lukim gutpela lait na bilas bilong God long heven, na i lukim Jisas i sanap i stap long han sut bilong God.” Dispela samting i strongim Stiven na em i no pret long ol dispela man i mekim pasin i no stret. Em i save, em i mekim laik bilong God na God bai sambai long em. (Aposel 7:52-56) Ol Kristen long nau i save, ol i no inap lukim kain samting olsem, tasol ol inap kisim dispela bel isi God i save givim long yumi. Na taim ol man i mekim nogut long ol, ol i no ken pret; ol i ken i stap bel isi na karim dispela hevi na sanap strong.
11. Lain bilong Jehova i mas tingim wanem samting na dispela bai helpim ol long karim hevi na sanap strong?
11 Tingim tok bilong Jehova, na ol samting em i bin mekim, na laik bilong em. Maski yu no gat Baibel, o sampela buk o nius bilong Baibel, tasol yu ken tingim ol tok bilong Jehova long Baibel, em yu bin lainim. Long san, na long nait taim yu no inap slip, tingim sampela tok bilong Baibel. (Skelim tok bilong Sam 77:2, 6, 11, 12.) Tingim ol gutpela samting Jehova i bin mekim long bipo bilong helpim lain bilong em taim ol man i mekim nogut long ol o putim hevi long ol. Olsem: Em i helpim ol Isrel long lusim kalabus long Isip; em i strongim Danyel na tripela poroman bilong em; em i lukautim ol Juda long taim bilong Modekai na Esta; em i sambai long ol aposel na ol narapela Kristen bilong pastaim taim ol i bihainim stretpela pasin na long dispela ol i kisim hevi long han bilong ol man. (Eksodas 12:1-15:21; Danyel 3:1-30; 6:1-28; Esta 3:1-9:32; Apose14:1-5:42; 12:1-17; 14:1-7, 19, 20; 16:16-40; 18:12-17; 19:23-41; 21:26-26:32) Na yu ken tingim tu ol samting Jehova i mekim bilong helpim ol wokboi bilong em long nau, em ol i bin i stap long ol banis kalabus nogut long taim bilong Hitler, na ol i stap long kalabus long ol ples komyunis. Taim ol man i mekim nogut long ol man i lotuim Jehova, ol dispela wokboi bilong Jehova i pilim tru olsem Jehova i holim ol long “han” bilong em na sanapim ol i stap strong.—Diuteronomi 33:27.
12. Taim ol man i givim hevi long yumi, yumi mas ting olsem wanem long dispela hevi? Na yumi mas bilip long wanem samting?
12 Dispela hevi bai pinis. Sapos yumi tingim dispela samting, dispela tu bai helpim yumi long karim hevi na sanap strong. Na tu, ‘God bai bekim hevi long ol man i save givim hevi long yumi,’ na bai em i tekewe dispela hevi nau yumi karim. (2 Tesalonaika 1:6-10) Olsem na taim yumi karim hevi, long wanem yumi witnes bilong Jehova, oltaim yumi mas tingting long bihain. Yumi mas save, bihain bai ol dispela hevi i pinis, na sapos yumi stap gut long God, bihain bai em i givim gutpela pe long yumi. Sapos yumi stap kalabus, ating bihain bai yumi inap lusim kalabus na kirap gen long mekim wok bilong Papa bilong yumi long heven na autim tok bilong Kingdom. Maski dispela samting i no kamap kwiktaim, tasol dispela hevi bilong yumi i no ken i stap oltaim. Sapos yumi bilip tru long Jehova na long ol promis bilong em long ol gutpela samting bilong Nupela Taim bihain, bai yumi inap karim dispela hevi na sanap strong.—Revelesen 21:1-4; lukim tu 2 Korin 1:19, 20.
13. Taim ol man i mekim nogut long yumi, olsem wanem tok bilong 1 Korin 10:13 inap strongim bel bilong yumi?
13 God i no ken larim wanpela traim i winim strong bilong yumi. Aposel Pol i tok olsem, em i tok: “Traim i bin kamap long yupela, em i no narakain. Nogat. Em i wankain olsem traim i save kamap long olgeta man. Na God i save bihainim promis bilong em, bai em i no larim wanpela traim i winim strong bilong yupela. Nogat. Sapos traim i kamap long yupela, bai God i wokim rot bilong helpim yupela. Dispela rot em i olsem: Bai em i strongim yupela na yupela inap sanap strong long traim.” (1 Korin 10:13) I no wankain hevi na traim i painim olgeta Kristen. Olsem na yumi no ken pret na ting hevi nogut tru bilong bagarapim skin bilong yumi em bai painim yumi olgeta wan wan. Nogat. Jehova i no ken lusim yumi; em i tok promis pinis na long strong bilong em na spirit holi bilong em yumi inap winim olgeta traim em i larim ol i painim yumi. Tasol yumi mas bilip tru long em na long Tok bilong em na wetim em i helpim yumi. Sapos yumi bilip tru long Jehova yumi inap karim hevi na sanap strong.—Sam 9:9, 10.
Wok Birua Bilong Seten i Lus Nating
14, 15. Wanem samting i mekim na Seten i no inap daunim lain bilong Jehova long rot bilong mekim nogut long ol?
14 God i gat olgeta strong em i save helpim ol gutpela wokboi bilong em na soim rot long ol. Olsem na Seten na lain bilong em ol i no inap daunim ol dispela Kristen tru. Planti taim Seten i kirapim ol man long mekim nogut long lain bilong Jehova na em i laik daunim ol olgeta, tasol em i no inap. Wok bilong em i lus nating. Seten i birua long Jehova na long lain bilong Em, tasol planti taim ol samting nogut Seten i mekim i kikbek long em yet, na laik bilong Jehova i kamap.
15 Bilong truim dispela tok tingim ol samting i bin kamap taim ol man i kilim pinis Stiven. Bihain “ol i stat long mekim nogut tru” long kongrigesen Kristen long Jerusalem. Baibel i tok: “Olgeta manmeri bilong [kongrigesen] i ranawe i go nabaut long o hap bilong Judia na Samaria. Tasol ol aposel i stap yet long Jerusalem.” Tasol ol dispela disaipel i ranawe nabaut, ol i “go long ol arapela arapela ples na ol i telimautim gutnius.” God i blesim wok bilong ol. Planti manmeri long Samaria ol i harim tok na ol i bilip. (Aposel 8:1-8) Na sampela disaipel ol i go long Finisia na Saipras na Antiok long Siria, na ol i autim tok. Long Antiok, “strong bilong Bikpela i stap long ol, olsem na planti manmeri ol i bilip na i tanim bel i go long Bikpela” (Aposel 11:19-21) Man bilong mekim gut long ol Kristen, em i no amamas long dispela samting!—Lukim tu Filipai 1:12-14.
16. Olsem wanem long sampela man i mekim nogut long yumi?
16 Long olgeta taim wanpela witnes bilong Jehova i karim hevi ol man i putim long em na em i sanap strong, em i semim Seten na soim olsem Seten em i man bilong tok giaman. Na taim wanpela man bipo em i man bilong mekim nogut long ol Kristen em i kamap Kristen, na em i karim hevi na i stap gut long God na Krais, dispela samting i semim tru Seten. Seten i lus tru. Em i no amamas taim Sol bilong Tasas i kamap Kristen na em i wok strong long autim gutpela tok maski ol man i mekim nogut long em na givim pen na hevi long em.—2 Korin 11:23-27; 1 Timoti 1:12-16.
17. Ol witnes bilong Jehova i karim hevi ol i mas ting olsem wanem long ol man i mekim nogut long ol?
17 Olsem na i bikpela samting ol witnes bilong Jehova i mas i gat stretpela tingting long ol man i mekim nogut long ol! Stiven i no bel nogut long ol man i mekim nogut long em. Taim ol i tromoi ston long em ‘bilong kilim em i dai, em i brukim skru na em i beten, olsem: “Bikpela, yu no ken bekim dispela sin long ol.” (Aposel 7:57-60) Na Jisas i tok: “Yupela i mas laikim birua bilong yupela, na yupela i mas beten bai God i helpim ol man i save mekim pasin nogut long yupela.”—Matyu 5:44; Rom 12:14; 1 Korin 4:11-13.
Man Bilong Wokim Yumi Em i No Ken Lusim Yumi
18. Taim Seten i mekim bikpela pait bilong em long lain bilong Jehova, wanem samting bai kamap?
18 Yumi stap long taim bilong planti hevi. Em i taim bilong traim, na taim bilong skelim ol man i tok ol i Kristen. (Lukim tok bilong Luk 22:31, 32 na 1 Pita 4:16, 17.) Seten i no gat bikpela hap taim moa. Liklik taim na bai em i kirapim bikpela pait long lain bilong Jehova. Tasol God bai mekim na bai ol inap karim dispela hevi na sanap strong. Bai ol i winim pait. Seten (olsem Gok bilong Megok) bai lus. Na long dispela taim, taim God i helpim lain bilong em, ‘bai em i litimapim nem bilong em na mekim nem bilong em i stap holi, na olgeta lain man bai save long em, em i Jehova.’ Seten i no laik tru bai dispela samting i kamap.—Esikiel 38:14-39:7; Revelesen 12:12.
19. God bai helpim ol na ol witnes bilong Jehova i karim hevi bai ol i mekim wanem?
19 Yumi ol witnes bilong Jehova i dediket long em, yumi save Seten i laik bagarapim bilip bilong yumi na bai yumi no pas moa wantaim Jehova. Tasol long marimari bilong God bai yumi no lusim bilip. Bai yumi tingim strong dispela bikpela tok Seten i bin sutim long Jehova, na bai yumi wok strong long i stap gut long Bikpela King Jehova. Sapos yumi bilip tru long Kingdom, bai yumi inap karim hevi na sanap strong. Yumi redi long karim hevi, long wanem yumi bilip tru long dispela Man em “strong bilong em i save wok long bel bilong yumi. Dispela strong em inap long winim olgeta prea na tingting bilong yumi, na i mekim bikpela wok moa.”—Efesas 3:20, 21.
20. Yumi ken bilip tru olsem wanem long Man bilong wokim yumi?
20 Olsem na yumi no ken pret long ol birua. Yumi mas sanap strong na holimpas lo bilong God. Long dispela rot bai yumi litimapim nem bilong God na bai God i kisim bek yumi. Yumi mas “bilip long Bikpela na prea long em, na bihainim pasin em.” (Sam 37:34) Yumi mas karim hevi na sanap strong na bihainim tingting olsem Pita i kamapim, em Pita i tok: “Olsem na sapos long laik bilong God sampela man ol i karim pen, dispela ol man ol i mas wokabaut stret tasol na putim laip bilong ol i stap long han bilong God. Em i bin wokim yumi, na oltaim em i save lukautim yumi gut tumas” (1 Pita 4:19) Gutpela Man bilong wokim yumi, em i no ken lusim yumi. Long strong bilong em yumi inap i stap amamas maski ol man i mekim nogut long yumi, na yumi inap karim dispela hevi na sanap strong.
Sampela Askim Bilong Rivyu
□ Ol witnes bilong Jehova i ken mekim wanem na bai ol i redi long karim hevi ol man i putim long ol?
□ Taim ol man i mekim nogut long yumi, olsem wanem beten em i bikpela samting?
□ “Bel isi God i save givim yumi,” olsem wanem dispela samting inap helpim yumi taim ol man i mekim nogut long yumi?
□ Olsem wanem tok bilong 1 Korin 10:13 inap strongim bel bilong yumi?
□ Ol witnes bilong Jehova i save ting olsem wanem long ol man i mekim nogut long ol? Bilong wanem ol i save ting olsem?
[Piksa long pes 21]
Stiven i no bel nogut long ol man i mekim nogut long em, na ol witnes bilong Jehova long nau, ol i no save bel nogut long ol man i birua long ol. Sampela birua bihain ol i kamap witnes