Ripot Long Wok Bilong Kingdom
“Man, Dispela Tok i Opim Tru Ai Bilong Mi!”
DOROTA, em wanpela Witnes Bilong Jehova long Polan i save autim tok fultaim, i go wantaim pikinini man bilong em i gat 14 krismas long klinik bilong skul bilong dokta i sekim pikinini, ol i save mekim olsem olgeta taim. Taim em i wok long sekim pikinini, dokta, em Janina,a i askim Dorota long pikinini i save mekim wanem ol wok long haus.
Dorota i tok: “Pikinini man bilong mi i save redim kaikai bilong apinun, bilong mipela sikspela long famili, taim mi no inap mekim. Em i save klinim haus na helpim long stretim ol samting bilong haus. Em i laikim pasin bilong rit. Em i wanpela mangi i save mekim gut wok bilong em.”
Janina i tok: “Man! Em narapela kain stret. Mi bin wok inap 12-pela yia long dispela hap, na mi no bin harim wanpela kain samting olsem.”
Dorota i lukim olsem rot i op long em i autim tok, em i tok: “Planti papamama long nau i no mekim wok bilong skulim gut ol pikinini bilong ol. Olsem na planti taim ol pikinini i no save amamas long ol yet.”
Janina i askim em: “Olsem wanem yu save long olgeta dispela samting? Planti papamama i no gat wanpela save liklik long ol dispela samting.”
Dorota i tok: “Baibel em i as bilong ol dispela gutpela tok. Olsem, Lo 6:6-9 i tok, yumi mas skulim yumi yet pastaim long yumi kirap skulim ol pikinini bilong yumi. Yumi mas putim long bel na tingting bilong yumi yet pastaim ol bikpela samting em yumi laik skulim ol pikinini bilong yumi long en, a?”
Janina i tok: “Man! Dispela em narapela kain samting!” Na em i askim Dorota long olsem wanem Baibel i bin helpim em long mekim bikpela long ol pikinini bilong em na skulim ol.
Dorota i tok: “Mipela save stadi wantaim ol pikinini long Baibel long olgeta wik. Mipela stadi long wanpela buk, nem bilong en Sampela Askim Bilong Ol Yangpela—Ol Gutpela Bekim.”b Na em i stori gut long dispela buk na kolim sampela tok buk i stori long en.
Janina i tok: “Man, dispela tok i opim tru ai bilong mi! Inap mi lukim dispela buk?”
Wanpela aua bihain, Dorota i kam bek wantaim buk.
Taim Janina i wok long skelim buk, em i askim: “Yu bilong wanem lotu?”
“Mi wanpela Witnes Bilong Jehova.”
“Ol Witnes Bilong Jehova i save mekim wanem kain pasin long ol man bilong narapela lotu?”
“Pasin olsem mi mekim long yu—rispek long ol.” Dorota i tok moa: “ Na tu, mipela i laik bai ol i kisim save long tok i tru bilong Baibel.”
Janina i tok: “Man! Mi pilim gutpela pinis.”
Taim ol i stori pinis, Dorota i strongim Janina long ritim Baibel. “Em bai mekim na i stap bilong yu i gat as bilong en na i helpim yu long wok bilong yu.”
Janina i tokaut olsem: “Yu bin kirapim mi pinis long mekim olsem.”
Long gutpela savepasin na pasin bilong strongim bel, Dorota i mekim gutpela wok bilong autim tok long dispela raun bilong em long lukim dokta.—1 Pita 3:15.
[Ol Futnot]
a I no nem tru bilong em.
b Ol Witnes Bilong Jehova i wokim.