God i Kirap na Pasim Ol Hevi—Em Bai Mekim Olsem Wanem?
INAP 700 yia samting paslain long Krais, King Hesekia bilong Juda, em i gat 39 krismas, em i kisim save olsem em i gat wanpela sik nogut bilong i dai. Bel bilong Hesekia i bagarap tru long dispela, na em i beten long God long oraitim sik bilong em. Long maus bilong profet bilong em God i tokim Hesekia: ‘Mi harim pinis beten bilong yu na mi lukim yu i krai moa yet. Olsem na bai mi larim yu i stap 15 yia moa na bihain bai yu dai.’—Aisaia 38:1-5.
Bilong wanem God i pasim sik nogut bilong Hesekia long dispela taim? Planti yia paslain long dispela, God i tok promis long stretpela man King Devit: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” Na God i tokaut tu olsem Mesaia bai kamap long lain bilong Devit. (2 Samuel 7:16; Song 89:20, 26-29; Aisaia 11:1) Taim sik i painim Hesekia, em i no gat wanpela pikinini man. Olsem na nogut lain bilong Devit bai i pinis na i no gat ol king moa i kamap long en. Em nau, taim God i kirap mekim sampela samting bilong helpim Hesekia, dispela i mekim na i gat ol lain bilong Devit i wok long kamap na bihain Mesaia i kamap long dispela lain.
Bilong truim ol tok promis bilong em, planti taim Jehova i kirap na mekim ol samting bilong helpim ol manmeri bilong em i bin stap paslain long taim bilong ol Kristen. Moses i stori long taim God i bin kisim bek ol Israel long wok kalabus long Isip, na em i tokaut olsem: “Bikpela i laikim yupela tumas na em i laik bihainim dispela promis em i bin mekim long ol tumbuna bilong yumi. Long dispela as tasol, na em i bin helpim yupela long bikpela strong bilong em.”—Lo 7:8.
Long taim bilong ol aposel tu God i kirap mekim sampela samting bilong kamapim laik bilong em. Olsem: Long rot i go long Damaskus, wanpela Juda nem bilong em Sol em i kisim wanpela piksa olsem driman bilong pasim em na bai em i no ken mekim nogut long ol disaipel bilong Krais. Dispela man em bihain em i kamap aposel Pol, taim em i tanim bel na kamap Kristen, dispela i mekim bikpela wok bilong bringim gutnius i go long ol manmeri bilong ol narapela lain.—Aposel 9:1-16; Rom 11:13.
Oltaim God i Save Pasim Ol Hevi?
Olsem wanem? Planti taim God i bin pasim rot na bai ol hevi i no ken painim lain bilong em, o wan wan taim tasol em i bin mekim olsem? Baibel i soim yumi klia, God i no bin mekim olsem long olgeta taim. Tru, God i bin kisim bek 3-pela yangpela Hibru na ol i no kisim bagarap long bikpela paia, na em i kisim bek Daniel long hul bilong ol laion, tasol em i no mekim ol samting bilong helpim sampela profet long abrusim bagarap. (2 Stori 24:20, 21; Daniel 3:21-27; 6:16-22; Hibru 11:37) Long rot bilong mirakel God i kisim bek Pita long haus kalabus em Herot Agripa Namba Wan i bin kalabusim em long en. Tasol dispela king i bin kilim i dai aposel Jems, na God i no mekim sampela samting bilong pasim king long mekim olsem. (Aposel 12:1-11) Na God i bin givim strong long ol aposel long oraitim ol sikman na kirapim bek ol man i dai pinis, tasol em i no orait long rausim dispela “samting olsem nil,” ating em i wanpela sik bilong skin long aposel Pol.—2 Korin 12:7-9; Aposel 9:32-41; 1 Korin 12:28.
God i no bin mekim sampela samting bilong pasim ol man long mekim nogut long ol disaipel bilong Krais, em King Niro bilong Rom i bin kirapim ol long mekim. Ol i bin givim bikpela pen nogut tru long ol Kristen, na kukim ol long paia taim ol i stap laip yet, na tromoi ol i go long ol wel animal nogut. Tasol ol Kristen bilong pastaim i no kirap nogut long dispela pasin birua ol man i mekim long ol, na dispela pasin i no bagarapim bilip bilong ol long God em i stap tru. Long wanem, Jisas i bin toksave long ol disaipel olsem ol man bai kotim ol long ol kaunsil na ol i mas redi long karim pen na i dai tu bilong holimpas bilip bilong ol.—Matyu 10:17-22.
Olsem God i bin mekim long bipo, long nau tu em inap kisim bek ol wokman bilong em na bai ol i no ken kisim bagarap, na sapos sampela i pilim olsem em i bin lukautim ol olsem, yumi no ken sutim tok long ol. Tasol i hatwok long save tru tru olsem God i bin helpim ol long abrusim bagarap o nogat. Sampela gutpela wokman bilong Jehova i bin kisim hap bagarap taim paia i kamap long wanpela haus faktori long Toulouse, na planti tausen gutpela Kristen ol i bin i dai long ol banis kalabus bilong ol Natsi na Komiunis na long ol narapela samting i bin kamap, na God i no bin pasim ol dispela hevi. Bilong wanem God i no save helpim olgeta man em i orait long ol na bai ol i no ken kisim bagarap?—Daniel 3:17, 18.
“Taim Nogut i Save Painim Yumi Olgeta”
Taim wanpela bikpela guria o bikpela win ren samting i kamap, olgeta man inap kisim nogut long en, na maski man i stap gut long God, dispela i no makim olsem em bai abrusim hevi, nogat. Taim dispela bagarap i kamap long Toulouse, Alain na Liliane ol i abrusim bagarap, tasol 30 manmeri ol i dai na planti ol i kisim hap bagarap long skin, maski em i no asua bilong ol na dispela bagarap i kamap. Na planti tausen manmeri ol i save kisim nogut long ol raskol, o long ol draiva nogut, o ol pait, na yumi no ken tok em asua bilong God na ol i kisim ol dispela hevi. Baibel i tok “taim nogut i save painim yumi olgeta.”—Saveman 9:11.
Na narapela samting tu, em sik, lapun, na indai i save painim yumi ol man. Sampela man i bin ting God i wokim mirakel na helpim ol long abrusim bagarap o ol i tok em i bin helpim ol na sik nogut bilong ol i pinis. Tasol bihain ol dispela man i dai. Wok bilong God long rausim sik na indai na ‘mekim drai wara i stap long ai bilong ol man,’ em bai mekim bihain.—KTH 21:1-4.
Bilong dispela samting i ken kamap, i gat wanpela bikpela samting tru God i mas mekim long olgeta hap, na i no long wan wan man tasol. Baibel i stori long wanpela samting bai kamap, em i kolim olsem “De bilong Bikpela.” (Sefanaia 1:14) Long dispela taim bilong God long kirap na helpim ol man bilong olgeta hap, em bai pinisim olgeta pasin nogut. Em bai givim rot long ol man na bai ol inap i stap oltaim oltaim long gutpela taim tru i no gat hevi long en, na “ol man bai i no inap tingim moa ol samting i bin kamap bipo.” (Aisaia 65:17) Na ol man i dai pinis ol bai kirap bek, na long dispela rot nambawan bikpela hevi tru bilong ol man—em indai—em bai pinis. (Jon 5:28, 29) Long dispela taim bihain, long bikpela sori na gutpela pasin bilong em God bai stretim olgeta hevi bilong ol man na i no ken kamap moa.
Samting God i Mekim Long Nau
Tasol long nau, i no olsem God i save lukluk nating long ol man i karim bikpela pen na hevi, nogat. Nau long dispela taim God i givim rot long olgeta man, maski ol i bilong wanem lain o skin, long ol inap kisim save long em na kisim pasin bilong pas gut wantaim em. (1 Timoti 2:3, 4) Jisas i stori long dispela samting na em i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Ol man i gat stretpela bel, God i save bringim ol i kam long em long rot bilong tok bilong Kingdom ol wokman bilong em i save autim long olgeta hap.
Na tu, God i save mekim sampela samting long i stap bilong ol man em ol i laik bai em i soim rot long ol. Long rot bilong holi spirit bilong em, God i save ‘tanim bel bilong ol’ na bai ol inap save long laik bilong em na mekim ol samting em i laik bai ol i mas mekim. (Aposel 16:14) Em nau, God i givim rot long ol man long kisim save long em, na long Tok bilong em, na ol samting em i tingting pinis long mekim, na long dispela rot em i kamapim klia olsem em i save sori na tingim yumi olgeta wan wan.—Jon 17:3.
Na tu, God i save helpim ol wokman bilong em long nau, tasol em i no save wokim mirakel na kisim bek ol, nogat; em i save givim holi spirit long ol na ‘dispela bikpela strong, em i strong bilong God,’ bambai ol i ken karim olgeta kain hevi i painim ol. (2 Korin 4:7) Aposel Pol i tok: “[God, NW ] i save strongim mi, na long strong bilong em mi inap mekim olgeta samting.”—Filipai 4:13.
Olsem na i gat as tru na yumi ken tenkyu long God long olgeta de long laip yumi holim na yumi inap bilip na wet long kisim laip i stap oltaim oltaim na i no gat pen na hevi moa. Man bilong raitim song i askim olsem: “Bikpela i bin mekim gut tru long mi. Olsem na bai mi givim wanem samting long em? Bai mi bringim wanpela . . . ofa i soim olsem God i kisim bek mi pinis. Mi mekim olsem bilong tok tenkyu long Bikpela.” (Song 116:12, 13) Sapos yu ritim dispela nius oltaim, dispela bai helpim yu long kisim save long ol samting God i bin mekim, na ol samting em i mekim long nau, na ol samting em bai mekim bihain, na dispela bai helpim yu long i stap amamas long nau na yu inap bilip na wetim gutpela taim bai kamap bihain.—1 Timoti 4:8.
[Rait long pes 6]
“Ol man bai i no inap tingim moa ol samting i bin kamap bipo.” —Aisaia 65:17
[Ol Piksa long pes 5]
Long taim bilong ol man i bin raitim Baibel, Jehova i no bin pasim ol man long tromoi ston long Sekaraia . . .
o pasim Herot long kilim i dai planti pikinini
[Piksa long pes 7]
Klostu nau na olgeta pen na hevi bai pinis, na ol man i dai pinis ol bai i stap laip gen