Tok Bilong God i Gat Laip
Posin Samting i No Inap Mekim Nogut Long Yu
YU WANKAIN olsem dispela man? Em i pret, nogut wanpela man i wokim posin o papait long em. Olsem wanem? I stret yumi mas pret long dispela samting?
Nogat, yumi no ken pret long posin o papait samting. Tru, em i bin nogutim sampela man, tasol em i no ken mekim olsem long ol man i bihainim tok bilong Jehova. Baibel i tok: “Bikpela i olsem wanpela strongpela haus. Ol stretpela man i ken ran i go long en na stap gut.”—Provep 18:10.
God i no laik tru long pasin bilong sanguma na marila na posin samting. Baibel i tok: “Yupela i no ken larim sampela man i stap insait long lain bilong yupela, olsem man i save . . . wokim wanpela samting bilong kamapim save, man bilong wokim majik, o man bilong painimaut ol samting i laik kamap bihain, o man bilong wokim posin, o man bilong wokim marila, o man bilong singautim wailis bilong spirit, o glasman, o man bilong singautim man i dai pinis.”—Diuteronomi 18:10, 11, NW.
Baibel i stori long wanpela man bilong mekim dispela kain wok, nem bilong em Balam. Em i wok bilong kisim save long ol samting bai kamap bihain o long samting i stap hait, olsem ol glasman i save mekim, na ol spirit nogut i helpim em. Wanpela taim em i wokabaut long donki i go bilong mekim nogut long lain bilong God, tasol wanpela ensel bilong God i sanap na pasim rot, na donki i slip long graun.—Nambas 22:7, 20-35.
Jehova i pinisim strong bilong dispela papait o posin Belam i laik wokim, na dispela samting i no wok. Nau Belam i kirap na i tok: “I no inap wokim posin long Jekop, na i no inap wokim papait long Isrel.”—Nambas 23:23, NW.
Jehova i save winim na daunim ol man bilong wokim marila na posin samting, na ol i no inap mekim wanpela samting nogut long man i bihainim tok bilong em. Lukim dispela posinman hia. Em i laik mekim nogut long ol witnes bilong Jehova, tasol em i no inap. Wok bilong em i lus. Ol Witnes i tokim em: “Jehova em i God bilong mipela, na bai yu lukim strong bilong em i winim strong bilong yu!” Ol i sanap strong, na nau dispela man i pundaun na i slip long graun.
Tru tumas, “ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” (Sam 34:7) Sapos yumi bilip long Jehova na yumi pasim olgeta klos pait em i givim long yumi, bai Jehova i daunim olgeta man i laik wokim papait o posin samting bilong bagarapim yumi.—Efesas 6:10-18.