Tok Bilong God i Gat Laip

Tupela Meri i Gat Hevi

DISPELA man i autim tok, em aposel Pol. Na dispela tupela meri em Yuodia na Sintiki, ol i bilong kongrigesen Kristen bilong pastaim i stap long Filipai.

Sampela yia bihain, taim Pol i stap long Rom, em i raitim pas long kongrigesen i stap long Filipai na em i tok: “Yu mas helpim dispela tupela meri. Tupela i bin poroman tru wantaim mi long wok bilong gutnius.” (Filipai 4:3) Bilong wanem Pol i raitim tok olsem long Yuodia na Sintiki?

Pol i bin harim tok olsem hevi i kamap namel long tupela. Tupela i no i stap wanbel. Olsem na em i tok: “Yu Yuodia, na yu Sintiki, yutupela harim: Yutupela i mas kamap wanbel long Bikpela.” (Filipai 4:2) Baibel i no tok wanem hevi i bin kamap namel long tupela, tasol em i bikpela hevi, long wanem Pol i stap longwe long ol, long Rom, na em i harim tok long dispela. Ating narapela i tingting nogut long narapela. O ating tupela i bin kros na tok pait olsem yu lukim hia long piksa na nau tupela i no save toktok wantaim. Tasol maski wanem hevi i bin kamap namel long tupela, Pol i givim tok long tupela long wanpela pas em i raitim i go long kongrigesen olgeta.—Filipai 1:1.

Olsem wanem? Yuodia na Sintiki i bihainim dispela tok na stretim dispela hevi? Baibel i no tok. Tasol tupela i gutpela Kristen. Tupela i bin wok wantaim Pol long autim gutnius. Olsem na taim ol brata i kaunim dispela pas long kongrigesen, ating bihain tupela i bung na stretim i dispela hevi long pasin sori. O ating dispela tok Pol i bin givim long ol, i bin mekim bel bilong ol i strong. Ating tupela i ting olsem: ‘I no stret Pol i kamapim hevi bilong mipela long kongrigesen olgeta.’ Olsem na ating ol i no stretim dispela kros na hevi i go bikpela. Sapos kain samting olsem i bin kamap, bai olsem wanem?

Pol i raitim dispela pas i go long ol Filipai long yia 60 C.E. Sampela yia bihain ol man i kirap mekim nogut tru long ol Kristin long Rome. Olsem wanem sapos dispela hevi i go kamap long Filipai tu na ol i kalabusim Yuodia tupela Sintiki, olsem ol i bin kalabusim Pol tupela Sailas long bipo? (Aposel 16:19-34) Olsem wanem sapos tupela i stap kalabus wantaim?

Sapos tupela i no i stap wanbel, na dispela kros i bin kamap i mekim narapela i bel nogut long narapela, bai olsem wanem? Ating narapela i no ken strongim narapela na bai tupela i bagarap long spirit na i no i stap gut wantaim Jehova. Em bai nogut tru! Nau tu, sapos yumi no laikim tru ol brata, na yumi kros long ol na bel nogut long ol, bai olsem wanem long taim bilong “bikpela hevi tru”? Sori tru!—Matyu 24:21.

[Piksa long pes 29]

“Pasin bilong sori em i winim olgeta arapela pasin, na em i save inapim olgeta gutpela pasin na pasin olgeta wantaim. Yupela i mas kisim dispela pasin bilong sori.”—Kolosi 3:14.