Sapta 28
Narapela i Mas Laikim Tru Narapela
1. (a) Yu mas mekim wanem na bai yu inap insait long lain bilong God? (b) Taim yu insait pinis long dispela lain, yu mas bihainim wanem tok?
TAIM yu wok long kisim save long God Jehova na long laik bilong em na yu bilip, bai yu laik bung oltaim wantaim ol manmeri i gat wankain bilip. Na bai yu insait long lain bilong God, ol i lain Kristen tru i stap olsem brata brata. Na nau yu mas bihainim dispela tok: “Givim bel. . . . long ol Kristen brata.”—1 Pita 2:17; 5:8, 9.
2. (a) Jisas i givim wanem nupela lo long ol disaipel bilong em? (b) Yumi lukim dispela tok “ol brata” na yumi save long wanem samting? (c) Pasin bilong sori em i bikpela samting o nogat?
2 Pasin bilong laikim ol brata Kristen, em i bikpela samting. Krais Jisas i tok: “Mi givim nupela lo long yupela: Yupela i mas laikim tru ol brata. . . . Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:34, 35) Yumi lukim dispela tok “ol brata” na yumi save, olgeta Kristen tru bai stap olsem brata brata, olsem wanpela lain tasol. (Rom 12:5; Efesas 4:25) Na olgeta man bai save long dispela lain, long wanem narapela i laikim tru narapela. Sapos man i no gat pasin bilong sori, olgeta narapela samting em i mekim i no inap helpim em liklik.—1 Korin 13:1-3.
3. Baibel i tok wanem na yumi save pasin bilong sori long ol brata na mekim gut long ol em i bikpela samting?
3 Olsem na planti taim ol aposel i givim tok long ol Kristen, olsem: “Yupela i mas givim bel . . . long ol brata na laikim ol tru.” “Kisim ol brata na i stap wanbel wantaim ol.” “Stap wokboi bilong ol [brata].” “Mekim pasin isi long ol brata.” “Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong en.” “Givim gutpela tok long ol brata na strongim bel bilong ol.” “Stap wanbel wantaim ol brata.” “Holim strong pasin bilong sori long ol brata.”—Rom 12:10; 15:7; Galesia 5:13; Efesas 4:32; Kolosi 3:13, 14; 1 Tesalonaika 5:11, 13; 1 Pita 4:8; 1 Jon 3:23; 4:7, 11.
4. (a) Olsem wanem yumi save, ol Kristen i mas laikim ol brata na ol narapela man tu? (b) Ol Kristen i mas strong tru long mekim gutpela pasin long husat?
4 Tasol i no olsem ol Kristen tru i mas laikim ol brata tasol. Nogat. Ol i mas sori long ol narapela man tu. Baibel i kirapim ol long mekim pasin bilong sori i pulap moa yet long ol. Baibel i tok: “Givim bel bilong yupela long ol brata, na long olgeta man tu.” (1 Tesalonaika 3:12; 5:15) Pol i kamapim stretpela tingting long dispela samting, em i tok: “Yumi mas mekim gutpela pasin long olgeta man. Tasol yumi mas strong tru long mekim gutpela pasin long ol brata i bilip long Bikpela.” (Galesia 6:10) Olsem na ol Kristen i mas laikim olgeta man, ol birua tu, tasol ol i mas laikim moa yet ol brata sista Kristen bilong ol.—Matyu 5:44.
5. Olsem wanem yumi save ol narapela man i lukim gutpela pasin sori bilong ol Kristen long bipo na long nau tu?
5 Long taim bilong ol Kristen bilong pastaim, olgeta man i save long dispela gutpela pasin sori bilong ol. Wanpela, em Tetulian, em i tok ol manmeri i save tok long ol Kristen olsem: ‘Narapela i laikim tru narapela na i redi long i dai tu bilong helpim em.’ Dispela kain pasin i stap tu long ol Kristen tru bilong nau. Tasol olsem wanem? Ating i no gat sampela hevi i kamap namel long ol Kristen tru long sampela taim?
HEVI BILONG SIN
6. Olsem wanem na sampela taim ol Kristen tru i mekim pasin kranki na hevi i kamap namel long ol?
6 Yu lainim tok bilong Baibel na yu save, yumi olgeta yumi kisim sin long Adam tupela Iv. (Rom 5:12) Olsem na long olgeta taim yumi save popaia. Baibel i tok: “Planti taim yumi olgeta i save popaia.” (Jems 3:2; Rom 3:23) Na yu mas save, ol manmeri long lain bilong God ol tu i gat sin, na sampela taim ol i mekim pasin kranki. Olsem na sampela taim kros o hevi i kamap namel long ol Kristen tru.
7. (a) Bilong wanem Pol i tokim Yuodia na Sintiki “yutupela i mas kamap wanbel”? (b) Olsem wanem yumi save tupela i gutpela meri Kristen?
7 Kain samting olsem i kamap namel long tupela meri Kristen long bipo, em Yuodia na Sintiki bilong kongrigesen long Filipai. Aposel Pol i rait pas long kongrigesen na em i tok: “Yu Yuodia, na yu Sintiki, yutupela harim: Yutupela i mas kamap wanbel long Bikpela.” Bilong wanem Pol i tok olsem? Em yumi save, hevi i bin kamap namel long tupela. Baibel i no kamapim dispela hevi. Ating narapela i tingting nogut liklik long narapela. Tasol tupela i gutpela meri. Yumi save tupela i bin i stap longtaim liklik long lain Kristen, long wanem sampela yia bipo ol i bin poroman wantaim Pol long wok autim tok. Olsem na Pol i kirapim kongrigesen long “helpim dispela tupela meri.”—Filipai 4:1-3.
8. (a) Wanem hevi i kamap namel long Pol tupela Banabas? (b) Sapos yu bin lukim dispela pasin tupela i mekim, ating bai yu ting olsem wanem?
8 Na wanpela taim hevi i kamap namel long Pol na poroman bilong em Banabas. Taim tupela i laik mekim namba tu raun bilong ol, Banabas i laik kisim kasenbrata bilong em Mak i go wantaim tupela. Tasol Pol i no laik bai Mak i go, long wanem taim tupela i mekim namba wan raun bilong ol, Mak i bin lusim ol i go bek long ples. (Aposel 13:13) Baibel i tok: “Tupela i tok kros planti long dispela samting. Olsem na tupela i no moa wok wantaim.” (Aposel 15:37-40) Olaman! Sapos yu bin lukim Pol tupela Banabas i tok kros planti, bai yu ting tupela i no Kristen tru?
9. (a) Pita i mekim wanem pasin kranki? Wanem samting i kirapim em long mekim olsem? (b) Taim Pol i lukim dispela pasin bilong Pita, Pol i mekim wanem?
9 Na wanpela taim aposel Pita i mekim pasin kranki. Em i surik long ol Kristen ol i no bilong lain Juda, long wanem em i pret long ol Kristen bilong lain Juda ol tu i save surik long ol dispela brata bilong narapela lain. (Galesia 2:11-14) Taim Pol i lukim samting Pita i mekim, em i kamapim rong bilong Pita long ai bilong ol brata. Yu ting Pita i ting olsem wanem long Pol?—Hibru 12:11.
STRETIM HEVI LONG PASIN SORI
10. (a) Taim Pol i stretim Pita, Pita i mekim wanem? (b) Pasin daun bilong Pita i lainim yumi olsem wanem?
10 Pita inap belhat long Pol. O em inap bel hevi; long wanem Pol i stretim em long ai bilong ol brata. Tasol nogat. (Eklisiastis 7:9) Pita i gat pasin daun. Em i no bikhet long tok bilong Pol o bel nogut long Pol. (1 Pita 3:8, 9) Bihain Pita i stori long Pol olsem: “God i bin givim gutpela save long brata tru bilong yumi Pol.” (2 Pita 3:15) Pita i larim pasin bilong sori i karamapim dispela hevi i kamap long pasin kranki bilong em yet.—Provep 10:12.
11. (a) Pol tupela Banabas i “tok kros,” tasol bihain tupela i mekim wanem na yumi save ol i Kristen tru? (b) Gutpela pasin bilong tupela inap helpim yumi olsem wanem?
11 Olsem wanem long hevi i kamap namel long Pol tupela Banabas? Dispela hevi tu ol i stretim long pasin sori. Long wanem bihain Pol i rait pas long kongrigesen Korin na em i stori long Banabas i wok wantaim em. (1 Korin 9:5, 6) Na tru, pastaim Pol i ting Mak i no gutpela bilong raun wantaim ol, tasol bihain dispela yangpela man i kamap strongpela Kristen na Pol i tokim Timoti: “Yu mas kisim Mak na bringim em i kam wantaim yu. Em i gutpela bilong helpim mi long wok.” (2 Timoti 4:11) Yumi tu yumi mas stretim ol hevi long gutpela pasin sori olsem.
12. (a) I gat wanem samting na ating Yuodia na Sintiki i bin stretim hevi i kamap namel long tupela? (b) Olsem Galesia 5:13-15 i tok, bilong wanem i bikpela samting ol Kristen i mas wok long stretim ol hevi long pasin sori?
12 Orait, olsem wanem long Yuodia na Sintiki? Tupela i stretim hevi? Tupela i larim pasin sori i karamapim rong ating narapela i bin mekim long narapela? Baibel i no stori long dispela. Tasol tupela i gutpela meri na tupela i bin poroman wantaim Pol long mekim wok Kristen, olsem na yumi save tupela i no bikhet long tok ol i kisim bilong stretim ol. Taim kongrigesen i kisim pinis pas bilong Pol, ating kwiktaim Yuodia na Sintiki i bung wantaim na stretim hevi bilong ol long pasin sori.—Galesia 5:13-15.
13. God Jehova i makim wanem gutpela pasin bilong sori?
13 Ating yu tu yu hatwok long i stap wanbel wantaim sampela brata o sista long kongrigesen. Tru, ating ol i sot long sampela gutpela pasin Kristen, tasol yu tingting: God i save wetim ol manmeri i lusim olgeta pasin kranki bilong ol pastaim na bihain em i kirap laikim ol? Nogat, a? Baibel i tok: “Yumi stap sinman yet na Krais i dai bilong helpim yumi. Long dispela pasin God i soim yumi, em i givim bel bilong em long yumi.” (Rom 5:8) Yumi mas bihainim pasin bilong God na sori long ol manmeri i mekim pasin kranki na pasin longlong.—Efesas 5:1, 2; 1 Jon 4:9-11; Sam 103:10.
14. Jisas i mekim wanem gutpela tok long yumi no ken kros kros long ol liklik pasin kranki bilong ol brata?
14 Yumi olgeta yumi gat sampela pasin kranki, olsem na Jisas i tok yumi no ken kros kros long ol liklik pasin kranki bilong ol narapela brata. Tru, ol i gat sampela pasin kranki, tasol yumi tu i gat. Jisas i tok: “Bilong wanem yu lukim liklik pipia i stap long ai bilong brata bilong yu, tasol yu no tingim bikpela plang i stap long ai bilong yu yet?” (Matyu 7:1-5) Em gutpela tok bilong helpim yumi long i stap wanbel wantaim ol brata.
15. (a) Maski ol brata i gat asua, tasol bilong wanem i bikpela samting yumi mas lusim rong bilong ol? (b) Long Matyu sapta 18 Jisas i tok piksa olsem wanem na yumi save, pasin bilong lusim rong bilong narapela man em bikpela samting?
15 Yumi mas lusim tingting long rong bilong ol brata. Tru, ating wanpela brata o sista i bin mekim rong long yu, tasol Baibel i tok: “Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong em.” Tasol sapos brata i gat asua, bilong wanem yu mas lusim tingting long rong bilong em? Long wanem, “Bikpela em i lusim pinis sin bilong yupela.” (Kolosi 3:13) Jisas i tok, yumi mas lusim ol rong bilong narapela man bambai God i ken lusim rong bilong yumi. (Matyu 6:9-12, 14, 15) Jehova, olsem dispela king long tok piksa bilong Jisas, em i bin lusim ol planti planti rong bilong yumi. Olsem na yumi inap lusim tingting long ol wan wan rong ol brata i mekim long yumi, a?—Matyu 18:21-35; Provep 19:11.
16. (a) Olsem 1 Jon 4:20, 21 i tok, sapos yumi laikim tumas God bilong wanem yumi mas laikim tumas ol brata tu? (b) Sapos brata bilong yu i gat tok long yu, orait yu mas mekim wanem?
16 Sapos yumi pasim bel na yumi no sori long ol brata na lusim rong bilong ol, yumi no ken tok, ‘Mi bihainim tok i tru.’ (1 Jon 4:20, 21; 3:14-16) Olsem na sapos wanpela liklik hevi i kamap namel long yu na wanpela brata Kristen, yu no ken bel nogut long em na givim baksait long em. Nogat. Yu mas wok long stretim dispela hevi long pasin sori. Na sapos yu rongim wanpela brata, orait yu mas tok sori long em na askim em long lusim dispela rong bilong yu.—Matyu 5:23, 24.
17. Sapos wanpela man i mekim rong long yu, i stret yu mas mekim wanem?
17 Tasol olsem wanem sapos wanpela brata i tok nogut long yu o mekim nogut long yu? Baibel i tok: “Yu no ken tok olsem, ‘Nau bai mi . . . mekim wankain pasin long em olsem em i bin mekim long mi.’ ” (Provep 24:29; Rom 12:17, 18) Na Krais Jisas i tok: “Sapos wanpela man i solapim wanpela wasket bilong yu, orait yu mas tanim arapela wasket tu i go long em.” (Matyu 5:39) Sapos wanpela man i solapim yu, em i no laik bagarapim yu, em i laik kirapim bel bilong yu na bai yu belhat na bekim pait. Olsem na Jisas i laik lainim ol disaipel, olsem: ol i no ken bekim pait o bekim tok pait. Sapos ol man i mekim nogut long yumi o tok nogut long yumi, yumi “no ken bekim.” Yumi mas “wok long kamap wanbel wantaim ol arapela man.”—1 Pita 3:9, 11; Rom 12:14. 18 Yumi mas “givim bel. . . long ol Kristen brata,” a? (1 Pita 2:17) God Jehova yet i makim gutpela pasin yumi mas bihainim. Em i no save tingim nem o lain bilong man. (Aposel 10:34, 35; 17:26) Ol manmeri God bai lukautim ol na ol bai winim taim bilong “bikpela hevi tru,” ol i bilong “olgeta lain man, . . . na bilong olgeta kain skin.” (Revelesen 7:9, 14-17) Olsem na yumi mas bihainim pasin bilong God. Yumi no ken tingim skin o lain o nem bilong man. Nogat. Yumi mas laikim tru olgeta man.
19. (a) Yumi mas ting olsem wanem long ol brata na mekim wanem kain pasin long ol? (b) Bihain wanem gutpela samting tru inap painim yumi?
19 Yu mas save gut long olgeta brata sista long kongrigesen na bai yu laikim tru ol na pilim gutpela pasin bilong ol. Mekim gut long ol lapun olsem ol i papa o mama bilong yu. Mekim gut long ol yangpela olsem ol i brata susa bilong yu. (1 Timoti 5:1, 2) Em gutpela samting tru yumi inap insait long lain bilong God, ol i stap olsem brata brata na narapela i laikim tru narapela. Na bihain bai yumi inap i stap oltaim wantaim ol long paradais long graun!—1 Korin 13:4-8.
18. God i laikim olgeta lain man na dispela i lainim yumi long wanem samting?
[Piksa long pes 233]
Hevi i kamap namel long Yuodia na Sintiki i lainim yumi long wanem samting?
[Piksa long pes 235]
Pol tupela Banabas i tok kros, tasol yu ting tupela i no Kristen tru?
[Piksa long pes 236]
Ol Kristen tru i save lusim tingting long rong narapela man i mekim long ol
[Piksa long pes 237]
Yumi mas laikim tru olgeta brata Kristen bilong yumi