Sakim Ol Laik Nogut Bilong Dispela Graun!
1, 2. (a) Yumi mas lotuim Jehova long wanem kain pasin? (b) Olsem na ol witnes bilong Em i mas mekim wanem?
OLGETA manmeri i dediket long God Jehova, ol i mas lotuim em long pasin stret na i klin. Olgeta taim, olgeta toktok a pasin bilong yumi i mas litimapim nem bilong em. Yumi no ken kisim “spirit bilong dispela graun.” Yumi no ken bihainim pasin bilong sin bilong ol manmeri bilong dispela graun, em ol i save tingim ol yet tasol na mekim pasin i no stret. (1 Korin 2:12) Ol Witnes Bilong Jehova i wanpela lain bilong litimapim nem bilong God, olsem na ol i mas i stap narapela kain long o1 manmeri bilong dispela graun. Ol i mas givim bel olgeta long bihainim tok bilong god, em i tok ol i mas “lusim pasin bilong givim baksait long God, na lusim olgeta laik nogut bilong pasin bilong graun.” Ol i mas “tingting gut na wokabaut stret na bihainim pasin bilong God nau long dispela taim.”—Taitas 2:11-14.
2 Tasol sori tru, sampela manmeri ol i tok ol i laikim Jehova, ol i no litimapim nem bilong Em long olgeta taim. Ol i no senisim olgeta laik nogut bilong pasin bilong graun. Mipela harim tok olsem sampela Kristen man ol i dediket, ol i bin pasim bilas bilong meri na i go long wanpela pati. Yu ting dispela pasin i litimapim nem bilong Jehova o em i pasin bilong graun? Ol man i “no Bilong dispela graun” i no stret ol i mekim kain pasin olsem. (Jon 15:19) Man i pasim giaman gras olsem bilong meri na pasim klos bilong meri, ol narapela manmeri bai ting dispela man i laikim pasin olsem meri. Na ating sampela man bilong mekim pasin Sodom bai ol laik pilai nogut long em!—Diuteronomi 22:5.
3. I gat wanem ol askim long ol pasin na laik nogut bilong dispela graun?
3 Yumi ol witnes bilong Jehova, ating yumi tok yumi ‘no ken givim bel tumas long ol samting bilong graun,’ olsem yumi stori pinis. (1 Korin 7:31, The New Testament: A New Translation bilong Olaf W Norlie) Ating yumi pilim marimari bilong God, em i lainim yumi long sakim pasin bilong givim baksait long God na sakim olgeta laik nogut bilong pasin bilong graun. (Taitas 2:11, 12) Tasol olsem wanem long bel bilong yumi? Bel bilong yumi i laikim yet ol dispela samting? Orait, yumi ken mekim wanem na bai yumi strong long sakim ol laik nogut bilong dispela graun? Wanem samting inap helpim yumi?
Beten long God
4, 5. (a) Yumi ken beten askim God long wanem wanem samting? (b) Sapos yumi laik was gut long bel bilong yumi, sampela taim yumi mas beten olsem wanem?
4 Wanpela rot Bilong sakim ol laik nogut, bilong dispela graun, em olsem: Oltaim yumi mas beten strong na askim God long helpim yumi. God i “save harim beten bilong yumi. (Sam 65:2) Tasol sapos bel bilong yumi i laikim yet ol samting bilong graun, olsem wanem yumi ken beten long God?
5 Yumi ol witnes bilong Jehova, yumi mas ‘tokim God long olgeta samting yumi laikim.’ Sapos yumi bilip na yumi beten olsem, bai “bel isi God i save givim yumi” i was long bel na tingting bilong yumi. Jehova yet i tok: “Ol tingting bilong man i nogut yet, long taim em i yangpela” (Filipai 4:6, 7; Jenesis 8:21) Olsem na sampela taim yumi mas beten askim God bilong helpim yumi long senisim tingting bilong yumi na tanim bel. Olsem: Sapos aigris bilong graun i pulim bel bilong yumi, yumi mas beten askim Papa bilong yumi long heven long helpim yumi, bambai yumi rausim dispela laik nogut long bel na kamapim ol gutpela laik na tingting bilong spirit.
6. Sapos pasin bilong graun na aigris bilong en i laik pulim yumi, ating yumi ken beten olsem wanem?
6 Planti handet yia bipo, Devit i beten bilong God na em i tok: “God, yu skulim mi long pasin bilong yu, na soim mi long rot bilong yu. Lainim mi long bihainim tok tru bilong yu.” (Sam 25:4, 5) Jehova harim dispela beten bilong Devit na mekim olsem. Na Jehova inap helpim yumi olsem long nau. “Pasin” na”tok tru” bilong Jehova i no bilong dispela graun. Olsem na sapos pasin bilong graun i pulim yumi, yumi ken mekim beten wankain olsem bilong Devit, na dispela samting bai helpim yumi.
7. Sapos yumi laikim sampela amamas bilong graun, gutpela sapos yumi mekim wanem?
7 Tingting bilong ol manmeri bilong dispela graun i no stret na ol i mekim kain kain pasin nogut. Dispela samting i save kamap insait long musik na singsing na danis bilong ol, na long ol buk na nius na piksa wokabaut samting. Sapos ol dispela amamas nogut bilong dispela graun i laik pulim yumi ol Kristen i dediket long God, yumi mas mekim wanem? Pastaim yumi mas skelim gut dispela amamas wantaim tok bilong God long Baibel. Baibel i tok, yumi mas “givim baksait tru long pasin nogut” na “pas tru long gutpela pasin.” (Rom 12:9) Bihain yumi mas beten askim Jehova long helpim yumi bambai bel bilong yumi i no ken laikim moa ol dispela samting nogut. Sapos yumi bilip tru na yumi beten, God bilong yumi inap “wokim nupela klinpela bel” insait long yumi.—Sam 51:10.
Spirit Holi i Helpim Yumi
8. Maski nau yumi gat spirit holi, tasol wanem samting inap kamap, olsem Sam 51:11 i tok?
8 King Devit i trabel wantaim Batsiba; em i mekim bikpela rong. Taim em i pilim pinis dispela rong bilong em, em i beten strong long Jehova na em i tok: “Nogut yu rausim mi na mi stap longwe long yu. Nogut yu tekewe Holi Spirit long mi.” (Sam 51:11) God i harim dispela beten bilong Devit na em i no tekewe spirit holi long em. Tasol yu lukim? Spirit holi inap tekewe long yumi.
9. Wanem samting inap pulim yumi long bihainim pasin nogut bilong graun? Na wanem samting inap kamap?
9 Sapos yumi ol Kristen i dediket, yumi larim pasin bilong graun i pulim yumi i go bek long “pasin nogut” bilong ol manmeri bilong dispela graun, ating bai yumi bagarap olgeta long spirit. (1 Pita 4:4) Ating pastaim yumi laik save tasol long pasin bilong graun na traim amamas bilong en. Ating yumi kirap kaunim sampela buk nogut o lukim sampela piksa nogut na nau tingting bilong dispela graun i go insait long bel bilong yumi. Tasol Baibel i tok, “long pasin nogut [yumi] mas i stap olsem liklik pikinini.” Yumi no ken painim save long samting i no stret na long ol pasin nogut. Korin 14:20) Sapos yumi laik save liklik tasol, dispela inap pulim yumi i go insait tru long pasin nogut. Ating bai yumi ting yumi strong long spirit na yumi no inap pundaun. Ating bai yumi hambak na yumi no laik bai wanpela man—o God—i givim sampela tok long yumi long pasim yumi long mekim dispela samting yumi laik mekim. Sapos yumi bikhet olsem na sakim tok bilong God, samting nogut bai kamap. “Husat inap bikhet long [God] na em i no kisim hevi?” No gat wanpela!—Jop 9:1-4, NW.
10. (a) Sapos yumi no sakim ol laik nogut bilong pasin bilong graun, ating bai yumi mekim wanem long spirit holi? Na wanem samting inap painim yumi? (b) Olsem na wanem samting inap helpim yumi long sakim pasin bilong dispela graun na ol samting bilong en i laik pulim yumi?
10 Olsem na sapos yumi no sakim ol laik nogut bilong pasin bilong graun, bai ol dispela laik nogut i kirapim yumi long mekim pasin i no stret na bai yumi givim bel hevi long spirit bilong God. Long wanem yumi sakim gutpela rot em spirit bilong God i laik bringim yumi i go long en. Yumi larim ol laik nogut i pulim yumi go long narapela rot. Na sapos yumi sakim tok bilong Baibel, yumi sakim spirit bilong God na “givim bel hevi” long en. (Efesas 4:30; lukim tu Aposel 7:51-53.) Dispela pasin inap kirapim yumi long bikhet long spirit bilong Jehova na bai yumi tok bilas long spirit holi. Man i tok bilas long spirit holi, God i no ken tekewe dispela sin bilong em. (Matyu 12:31, 32. Mak 3:29; lukim tu Hibru 6:4-6; 10:26-31.) Olsem na yumi mas was gut, nogut yumi kirap bihainim laik bilong yumi yet, na yumi bihainim gen ol pasin nogut bilong dispela graun em Jehova i bin marimari long yumi na helpim yumi long lusim. Yumi mas beten askim God long givim spirit bilong em long yumi bilong helpim yumi, na oltaim yumi mas larim dispela spirit i stiaim tingting bilong yumi. Dispela samting bai helpim yumi long sakim ol laik nogut bilong pasin bilong graun.—Sam 143:10; Luk 11:13.
Baibel i Helpim Yumi
11. Nau yumi ken tingim wanem samting na em inap helpim yumi na bai yumi no “holim strong samting bilong graun”?
11 Wanpela gutpela samting tru spirit holi bilong God i bin kamapim, em Baibel. (2 Samyuel 23:2; 2 Timoti 3:16; 2 Pita 1:20, 21) Olgeta tok ol i bin raitim long Baibel em bilong “skulim yumi” na bilong “givim tingting long yumi man i stap nau long taim i klostu i laik pinis.” (Rom 15:4; 1 Korin 10:11) Orait, nau yumi laik save, sampela manmeri, em Baibel i stori long ol, ol i ting olsem wanem long pasin bilong graun?
12. Dimas em i husat? Sapos yumi skelim ol samting em i bin mekim, olsem wanem dispela inap helpim yumi?
12 Baibel i stori long sampela man ol i no makim gutpela pasin yumi ken bihainim. Tasol sapos yumi skelim pasin ol i bin mekim, dispela inap helpim yumi. Em inap helpim yumi long abrusim dispela pasin nogut. Olsem: Wanpela wanwok bilong Pol, em Dimas, em i lusim Pol. Em i “laikim tumas pasin bilong graun.” Yumi no save tru Dimas i mekim wanem, tasol ating em i laikim tumas ol amamas bilong graun na ol samting bilong skin, winim ol samting bilong spirit, na em i lusim Pol. Em inap mekim gutpela wok na strongim brata bilong em, Pol, tasol em i no mekim. (2 Timoti 4:10) Dispela samting i mas kirapim yumi long pas gut wantaim ol brata Kristen bilong yumi. Yumi no ken laikim pasin bilong graun na lusim ol!
13. Olsem wanem yumi ken save, Ebraham tupela Sera i no tingim tumas ol samting bilong graun?
13 Nau yumi gat Baibel olgeta bilong soim rot long yumi. Tasol ol bilipman bilong bipo, olsem Ebraham na Aisak na Jekop wantaim meri bilong ol, ol i no gat Baibel. Tasol ol i no “holim strong samting bilong graun.” Tingim Ebraham. God Jehova i tokim em long lusim ples Ur long Kaldia, em ples bilong ol gutpela haus na ples i gat planti samting. Tasol Ebraham na Sera i lusim ol dispela gutpela samting bilong skin. Ol i bihainim tok bilong God na i stap dripman long ol haus sel long wanpela graun God i bin tok promis long givim long lain bilong Ebraham. Aisak na Jekop tu i bihainim pasin bilong bilip. Ol i bilong “kisim dispela graun wantaim [Ebraham].” Ebraham i no save tingim ol samting bilong graun, em i ‘wetim taim bilong em i go insait long dispela taun God yet i wokim.’—Hibru 11:8-10.
14. (a) Olsem wanem yumi inap save Moses i no bin “holim strong samting bilong graun”? (b) Olsem wanem pasin bilong Moses inap helpim yumi na bai yumi tingim gut ol samting bilong spirit?
14 Moses tu i makim gutpela pasin yumi ken bihainim. Em i bilip tru long Jehova na sakim ol laik nogut bilong pasin bilong graun. Moses i bilip na em i laik kisim nogut wantaim lain bilong God. “Em i ting, sapos em i kisim sem long nem bilong Krais [long wanem God i makim em bilong mekim wok bilong em], dispela i winim tru olgeta mani na bilas samting bilong Isip.” (Hibru 11:24-27) Moses i tingting gut na maski i gat planti samting bilong graun inap pulim em, em i tingim ol samting bilong spirit pastaim. Yumi tu mas tingting gut olsem.—Matyu 6:33.
15. Wanem samting i bin painim ol Isrel na sapos yumi tingim, dispela inap kirapim yumi long sakim ol samting bilong dispela graun i laik pulim yumi long mekim pasin pamuk?
15 Wanpela samting bilong dispela graun nau bai i pinis, em “pasin bilong bel kirap.” Dispela pasin i kirapim ol man long mekim kain kain pasin, sampela pasin nogut tu. (1 Jon 2:15-17) I gat planti samting bilong dispela graun i laik pulim yumi long mekim pasin pamuk, na sampela taim dispela pasin i bin pundaunim planti manmeri ol i dediket long Jehova. Olsem long taim ol Isrel i lusim wok kalabus long Isip. Ol i pamuk wantaim ol meri Moap na planti tausen ol i dai. (Nambas sapta 25; Korin 10:8) Dispela samting i mas kirapim yumi long sakim tru ol samting bilong dispela graun i laik pulim yumi long mekim pasin pamuk!
16. (a) Taim wanpela meri i laik pulim Josep long mekim pasin pamuk, em i mekim wanem? (b) Pasin bilong em inap helpim yumi olsem wanem?
16 Tingim gutpela pasin bilong Josep, pikinini man bilong Jekop, em i mekim. Em i wok long wanpela Isip na planti taim meri bilong bos bilong em i laik pulim em long slip wantaim em. Tasol em i strong long sakim dispela meri. Baibel i no tok skin bilong dispela meri i nogut na bai man i no ken laikim em. Nogat. Tasol Josep i sakim dispela meri, long wanem em i no laik mekim rong long stretpela God bilong em, Jehova. (Jenesis 39:7-20) Olsem wanem? Yumi mas lusim sampela buk yumi save kaunim, sampela pasin bilong painim amamas, o .arapela samting bambai yumi no ken mekim rong long God? Orait, kwiktaim yumi mas lusim, olsem Josep i mekim.—1 Pita 2:11, 12.
17. (a) Tingting bilong dispela graun i save kirapim man long mekim wanem kain pasin? (b) Sampela meri Juda i hambak na ol i bilas olsem wanem? Wanem samting i bin painim ol yet wantaim bilas bilong ol?
17 Tingting bilong dispela graun i save kirapim man long mekim pasin bikhet na hambak. Em i kirapim ol manmeri long laikim tumas ol samting bilong skin, olsem bilas samting. Planti meri ol i save tingim tumas bilas. Ol i laik tumas long bilasim skin. Long Juda, long taim bilong Aisaia, ol meri i hambak ol i save pasim kain kain bilas long skin bilong ol. Ol save pasim ol liklik sen long lek bilong ol olsem paspas, na taim ol i wokabaut ol sen i pairap pairap. Ol dispela sen i mekim na meri i mas wokabaut narapela kain. olsem hariap hariap. Ating sampela i ting em gutpela pasin bilong meri i wokabaut. Tasol taim ol Babilon i daunim Juda long 607 B.C.E., ol dispela bilas bilong ol i pinis na ol i go kalabus.—Aisaia 3:16-24.
18. Baibel i tok wanem long bilas bilong ol meri?
18 I gat ol narapela narapela kain bilas bilong ol meri. Jesebel i bihainim pasin bilong graun na pasim klos i no stret. Tasol gutpela meri Esta i bihainim pasin bilong God na pasim klos i stret! (2 King 9:30; Esta 2:7; 5:1) Ol meri Kristen i laik bihainim pasin bilong Esta. Olsem na ol i save “putim gutpela klos samting, inap tasol long ol.” Ol i no tingting long bilasim skin, ol i tingting long “bilasim insait bilong bel. Dispela bilas em i no inap long bagarap. Em i pasin bilong bel í stap isi, na bel i malolo. Dispela em i gutpela tumas long ai bilong God.”—1 Timoti 2:9; 1 Pita 3:3-5.
19. Jisas i mekim wanem na em i makim gutpela pasin bilong sakim pasin bilong graun?
19 Krais Jisas i sakim tru pasin bilong graun. Em i nambawan gutpela piksa bilong yumi. Em i gutpela olgeta na em inap kisim planti samting long dispela graun, olsem biknem na mani kago, winim tru ol narapela man, tasol em i tingim ol samting bilong spirit i nambawan samting. Em i “no gat ples bilong slipim het bilong em.” Matyu 8:20) Pasin bilong dispela graun i no bagarapim pasin bilong Jisas. Baibel i tok, Jisas “em i holi, na i no gat wanpela rong i stap long em. Em i klin olgeta. Em i no olsem sinman liklik.” (Hibru 7:26) Tasol yumi sinman, olsem na yumi no inap bihainim gut olgeta pasin bilong Jisas. Tasol yumi mas wok strong long mekim na bai Jehova i helpim yumi.—1 Pita 2:21.
Wok Yet long Sakim Ol Laik Nogut Bilong Graun
20. Sapos yu man o meri bilong lotuim Jehova yu mas mekim wanem na bai yu inap sakim spirit bilong dispela graun?
20 Sapos yu stap long lain bilong Jehova, em ol i amamas na lotuim em, yu stap gutpela tru. Yu painim pinis gutpela samting. No gat wanpela samting bilong dispela graun i gutpela olsem. Pasin bilong graun i nogut na i laik pinis. Olsem na yu mas pas tru long trupela lotu na sakim spirit bilong dispela graun. Bilong helpim yu, planti taim yu mas beten askim God long helpim yu, na larim spirit bilong em i stiaim tingting bilong yu; oltaim yu mas bihainim Tok Bilong God, em Baibel, na yu no ken lusim lain bilong ol witnes bilong Jehova, em long bipo yet na long nau tu ol i stap gut long God.—Lukim Hibru 12:1-3.
21. Yumi mas tingting strong long mekim wanem long pasin bilong graun?
21 Yu mas tingting strong long sakim pasin bilong graun na i no ken holim, strong samting bilong graun. Yu mas givim bel na tingting olgeta long mekim laik bilong God. Sapos yu mekim olsem, Jehova i no ken lusim yu. ‘Han bilong God i stap oltaim bai holim yu.’ Oltaim bai em i sambai long yu. (Diuteronomi 33:27) Yu ken bilip tru olsem God bai helpim yu, olsem na yu mas tingting gut na wokabaut s tret na bihainim pasin bilong God. Yu mas sakim pasin bilong givim baksait long God na sakim ol laik nogut bilong pasin bilong graun.
Bai yu bekim wanem tok?
□ Sapos bel bilong yumi i laikim yet ol samting bilong graun, olsem wanem beten i ken helpim yumi?
□ Olsem wanem spirit holi inap helpim yumi long sakim pasin bilong graun na ol samting bilong en i laik pulim yumi?
□ Yumi ken skelim pasin bilong wanem wanem ol man na meri long Baibel na dispela bai helpim yumi long sakim ol pasin na laik nogut bilong dispela graun?
□ Olsem wanem yumi inap lusim spirit bilong dispela graun?
[Piksa long pes 24]
Nogut yu laik kisim save na dispela i pulim yu na yu insait long pasin nogut bilong graun
[Piksa long pes 26]
Josep i ranawe, nogut em i mekim rong. Yumi tu mas mekim kwik ol samting bilong abrusim pasin i no stret