Tok Bilong God i Gat Laip
Taim Olgeta Samting i Kamap Nupela
LONG dispela piksa aposel Pita i tokim Jisas: “Lukim, mipela i bin lusim olgeta samting na bihainim yu. Bai mipela i kisim wanem samting?” Jisas i bekim tok olsem: ‘Mi tok tru long yupela: Long taim olgeta samting i kamap nupela, Pikinini Bilong Man i gat biknem na i sindaun long sia king, long dispela taim yupela ol man i bin bihainim mi bai yupela tu i sindaun long 12-pela sia.”—Matyu 19:27, 28.
Olsem na Jisas i tok, Pita na ol narapela aposel ol bai wok king wantaim em. Ol bai sindaun long sia king wantaim em. Tasol long wanem taim? Jisas i tok: “Long taim olgeta samting i kamap nupela.” Wanem taim bai OLGETA SAMTING I KAMAP NUPELA?
Luk tu i stori long dispela tok bilong Jisas na tok bilong Luk inap helpim yumi long save long dispela samting. “Pita i tok, ‘Harim, mipela i lusim pinis ples wantaim ol samting bilong mipela, na mipela i bihainim yu.’ Na Jisas i tokim ol, ‘Mi tok tru long yupela: Olgeta man i bin ting long kingdom bilong God na i lusim haus na meri na brata na papamama na pikinini, . . . long taim i laik kamap bihain, bai ol i kisim laip i stap gut oltaim oltaim.’”—Luk 18:28-30.
Olsem na dispela “taim olgeta samting i kamap nupela” em dispela “taim i laik kamap bihain.” Taim Krais i sindaun long sia king bilong em long heven na ol wanwok bilong em tu wantaim, bihain bai olgeta samting i kamap nupela. Nupela taim bai kamap na stretpela pasin wantaim. (2 Timoti 2:11, 12; Revelesen 5:10; 14:1, 3) Sapos yumi skelim gutpela sindaun God i bin givim long namba wan man na meri long Iden, dispela bai helpim yumi long save long ol samting bai kamap taim olgeta samting i kamap nupela.
God Jehova i wokim namba wan man na meri, Adam tupela Iv, i gutpela olgeta na em i putim tupela long Iden. Dispela ples Iden i gutpela ples tru, olsem Paradais. Em i ples bilong amamas. God Jehova i laik bai ol manmeri i ken i stap oltaim long graun na i stap bel isi na amamas, olsem yu lukim long dispela piksa hia. Tasol pasin bikhet i kamap na bagarapim dispela paradais bilong pastaim. Pasin nogut i kamap long graun na i stap inap long nau.
Olsem wanem? Laik bilong God i no ken kamap? O bihain bai graun i kamap gutpela ples paradais? Laik bilong God i mas kamap. Krais yet i tok promis olsem: Stretpela pasin bai kamap gen long graun wankain olsem long pastaim. Bai olgeta hap graun i kamap gutpela ples kain olsem Iden. Man bilong wokim olgeta samting bai kamapim laik bilong em bilong pastaim. Stretpela pasin bai kamap long graun na em bai i stap oltaim. Yumi ken amamas tru long dispela gutpela tok promis bilong Baibel!—Sam 37:29; Revelesen 21:3, 4.