Laip Oltaim Long Rot Bilong Jisas
‘HARIM! I gat wanpela king bai i kamap, na dispela king bai bihainim stretpela pasin tasol.’ Kain gutpela tok promis olsem long wok bilong Jisas long bosim Kingdom, em wanpela bikpela tok bilong Baibel. Narapela promis olsem i tok: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. . . . Em i save laikim ol tumas na em i mekim olsem.”—Aisaia 32:1; Song 72:12-14.
Ating ol man long olgeta hap bai i tok olsem yumi mas i gat kain stretpela man bilong bosim graun. Jisas i tokim ol disaipel long tingim gut Kingdom Bilong God. Em i lainim ol long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
Ol Samting i Soim Olsem Kingdom Bilong God i Klostu Pinis
Olsem wanem yumi ken save wanem taim dispela Kingdom bai kam? Ol disaipel bilong Jisas long bipo i laik save na ol i askim em: “Wanem mak bai i kamap pastaim, na mipela i ken save, yu laik i kam bek [olsem King i bosim ol samting] na dispela graun i laik pinis?” Jisas i bekim tok olsem: “Ol man bilong sampela lain bai i kirapim pait long ol narapela narapela lain. . . . Long sampela hap ol bai i gat taim bilong bikpela hangre, na graun bai i guria. Dispela ol samting em i olsem pen i save kamap pastaim long meri i laik karim pikinini.” Em i mekim tok lukaut tu: “Pasin nogut bai i kamap bikpela, olsem na planti man bai i lusim pasin bilong laikim ol arapela.”—Matyu 24:3-12.
Narapela tok profet bilong Baibel i tok olsem ‘long taim bilong las de planti hevi nogut tru bai i kamap. Ol man i laikim ol yet tasol, laikim tumas long kisim mani, litimapim nem bilong ol yet na hambak nabaut, tok kros na tok nogut long ol arapela, sakim tok bilong papamama, i no tok tenkyu long ol manmeri i mekim gutpela pasin long ol, givim baksait long ol pasin bilong God, i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol i tok nogut long ol arapela, i no bosim laik bilong bodi bilong ol, pait na bagarapim ol man nabaut, birua long olgeta gutpela pasin, mekim nogut long ol pren bilong ol, na bihainim kwik olgeta kranki tingting bilong ol yet. Ol i tingim ol yet i bikpela man tru, laikim tumas ol kain kain pasin bilong amamas bilong dispela graun, na i no laikim God. Ol i bihainim pasin bilong God long skin tasol na i no save liklik long bikpela strong i stap long pasin tru bilong God.’—2 Timoti 3:1-5.
Ating yu wanbel long tok olsem dispela tok i makim “taim bilong las de” na i stret wantaim taim bilong yumi. Planti samting i soim olsem nau em i taim we truim bilong dispela tok profet bilong Baibel i kamap. Em i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.
Wok king bilong “King bilong kamapim gutpela sindaun na bel isi” bai i rausim olgeta samting inap bagarapim bel isi bilong ol man i abrusim bagarap taim pasin nogut bilong dispela graun i pinis. (Aisaia 9:6) Tok profet bilong Baibel i tok promis olsem: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:17) Pinis bilong pasin nogut bilong dispela graun bai i opim rot long ol man i bihainim laik bilong God, long ol i ken kisim ol samting ol manmeri i bin lus long kisim, taim tupela tumbuna bilong yumi bilong pastaim, Adam na Iv, i bikhet long God.
Laip Oltaim Klostu Nau Bai Yumi Kisim
Jisas i tok ‘taim olgeta samting i kamap nupela, Pikinini Bilong Man bai i gat biknem na i sindaun long sia king bilong en.’ (Matyu 19:28) Wanem mining bilong dispela tok “taim olgeta samting i kamap nupela”? Narapela hap bilong Baibel i stori long wankain samting na i kolim olsem “taim i laik kamap bihain.” (Luk 18:30) Long dispela taim Jisas bai mekim wok long namba God i bin givim long em olsem King bilong kamapim gutpela sindaun na bel isi, na em bai givim laip oltaim long olgeta man husat i bilip long ofa bilong em bilong baim bek ol man.—Jon 5:21.
Long nupela taim God bai kamapim, ol manmeri bai i kisim dispela kain laip God i bin givim long Adam tupela Iv taim em i putim tupela long Paradais. Tingim, God i bin tokim tupela long kamapim ol pikinini, em nau, ol i mas “kamap planti na i go sindaun long olgeta hap bilong graun na bosim olgeta samting i stap long en.” Ol i kisim wok bilong skruim Paradais long Iden i go long olgeta hap bilong graun! (Stat 1:28) Na olsem tasol, taim olgeta samting i kamap nupela, graun bai i pulap long ol manmeri i abrusim bagarap long pinis bilong pasin nogut bilong dispela graun, na ol pikinini bilong ol, na ol manmeri i dai pinis na i kirap bek. Ol dispela lain bai i gat wok long mekim graun i kamap wanpela paradais, olsem God i bin tingting pinis long en long pastaim.
Tingim sampela blesing Baibel i tok ol manmeri bai kisim long nupela taim.—2 Pita 3:13.
Ating i hatwok long bilip long ol tok promis ol piksa bilong ol dispela pes i kamapim, tasol ol bai kamap tru long “taim i laik kamap bihain.” Jisas i beten long God na i kolim ol samting ol manmeri i mas mekim bilong kisim ol dispela gutpela samting. Em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Gutpela sapos yu wanpela bilong ol man i daunim ol yet na i painim dispela save i givim laip.
[Rait long pes 7]
“Em bai i gat ol dispela nem . . . ‘King bilong kamapim gutpela sindaun na bel isi.’. . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”—Aisaia 9:6, 7
[Blok/Ol Piksa long pes 8, 9]
Olgeta Bai i Gat Haus na Wok
“Ol manmeri bilong mi bai i wokim ol haus na stap long ol. . . . Ol birua bai i no inap kam moa na . . . kisim ol gaden wain bilong ol na wokim wain na dring.”—Aisaia 65:21, 22.
Planti Kaikai Inap Long Olgeta Man
“Planti gutpela kaikai i kamap pinis long graun.” “Planti rais na wit samting i ken kamap long ol gaden bilong ol manmeri.”—Song 67:6; 72:16.
Ol Man na Ol Animal Bai Stap Bel Isi
“Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. . . . Na ol liklik mangi bai i was long ol.”—Aisaia 11:6.
Pait Bai Pinis, Bel Isi Bai i Stap Oltaim
“Olgeta lain manmeri bai i no ken pait moa, na bai ol i no skul moa long pait.” “Bai i no gat pait na ol manmeri bai i sindaun gut oltaim.”—Aisaia 2:4; 9:7.
Famili i Dai Pinis Bai Kirap Bek
“Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29.
Sik na Dai Bai Pinis
‘I no gat man bai i tok olsem, “Mi gat sik.” ’ “Ol manmeri bai i no i dai moa, . . . Ol dispela samting bilong bipo ol i pinis olgeta.”—Aisaia 33:24; KTH 21:3, 4.