Gutpela Samting Bilong Wetim
KLOSTU 2,000 yia i go pinis, ol i sutim tok giaman long Jisas long kot na makim em bilong i dai. Planti man i save kolim Jisas olsem nambawan man tru i winim olgeta narapela man. Taim em i hangamap long pos, wanpela man nogut i stap klostu long em, em i tok bilas olsem: “Yu man God i makim, a? Orait yu helpim yu yet, na yu helpim mitupela wantaim.”
Narapela man nogut ol i laik kilim em i dai, em i krosim namba wan man olsem: “Yu tu yu kisim wankain hevi olsem dispela man, na yu no pret long God, a? Ol i kilim mitupela i dai, em ol i mekim stretpela pasin tasol. Mitupela i kisim hevi inap stret long ol pasin mitupela i bin mekim. Tasol dispela man hia em i no bin mekim wanpela rong.” Na em i tokim Jisas olsem: “Jisas, taim yu kamap king, yu ken tingting long mi.”
Jisas i tokim em: “Mi tok tru long yu nau, bai yu stap wantaim mi long Paradais.”—Luk 23:39-43, NW.
Jisas i gat gutpela samting tru bilong wetim i kamap. Aposel Pol i stori long olsem wanem dispela gutpela samting Jisas i wet long en i bin helpim em. Em i tok: “Em i tingting long dispela na em i stap strong, na em i karim pen na i dai long diwai [pos].”—Hibru 12:2.
Wanpela samting Jisas i “amamas” long wet long en i olsem: Em i ken stap gen wantaim Papa bilong em long heven, na bihain em i kamap King bilong Kingdom bilong God. Na tu, em bai tok amamas long ol gutpela disaipel bilong em ol i kam long heven na wok king wantaim em na bosim graun. (Jon 14:2, 3; Filipai 2:7-11; KTH 20:5, 6) Tasol taim Jisas i tokim dispela man nogut i tanim bel olsem em bai stap long Paradais, wanem insait bilong dispela tok?
Wanem Gutpela Samting Inap Painim Man Nogut?
Dispela man i no inap mekim wok king wantaim Jisas long heven. Em i no wanpela bilong ol dispela man em Jisas i tok long ol olsem: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela.” (Luk 22:28, 29) Tasol Jisas i tokim dispela man nogut olsem em bai stap wantaim em long Paradais. Dispela tok promis bai kamap tru olsem wanem?
Jehova i putim namba wan man na meri, em Adam tupela Iv, long Paradais, em wanpela gaden bilong amamas ol i kolim Iden. (Stat 2:8, 15) Iden i stap long graun, na God i laik graun olgeta em i kamap wanpela paradais. Tasol Adam na Iv i no bihainim tok bilong God, na God i rausim tupela long gutpela ples bilong ol. (Stat 3:23, 24) Tasol Jisas i kamapim klia olsem Paradais bai kamap gen na em bai stap long olgeta hap bilong graun.
Taim aposel Pita i askim Jisas long wanem gutpela samting em na ol narapela aposel bai kisim taim ol i bihainim em, Jisas i tok promis olsem: “Taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia.” (Matyu 19:27, 28) Luk tu i raitim dispela toktok bilong Jisas na Pita, tasol em i no raitim tok “taim olgeta samting i kamap nupela.” Gutnius Luk i raitim i kamapim olsem Jisas i tok, “taim i laik kamap bihain.”— Luk 18:28-30.
Olsem na taim Krais Jisas i sindaun long sia king bilong em long heven wantaim ol man em ol bai mekim wok king wantaim em, em bai kamapim nupela taim i gat stretpela pasin tasol long en. (2 Timoti 2:11, 12; KTH 5:10; 14:1, 3) Long rot bilong wok king bilong Krais, laik bilong God long pastaim tru bai kamap na graun olgeta bai kamap wanpela paradais!
Taim Kingdom i bosim graun, Krais bai truim tok promis bilong em long dispela man nogut i bin dai klostu long em. Em bai kirapim em long matmat, na dispela man bai stap long graun em Jisas i bosim. Long dispela taim rot bai op long dispela man nogut long bihainim ol lo bilong God, na long stap oltaim aninit long wok bos bilong Kingdom. Yumi ken amamas tru long wet long kisim laip oltaim long Paradais long graun!
Laip i Gat As Bilong En
Taim yumi wet long kisim ol dispela gutpela samting, i stap bilong yumi bai i gat as bilong en. Em i ken lukautim tingting bilong yumi na ol tingting nogut i no kirapim yumi long mekim samting nogut long yumi yet. Aposel Pol i tok, dispela gutpela samting yumi wet long en, em i wanpela bikpela samting bilong klos pait. Em i tok, yumi mas ‘putim hat kapa olsem pasin bilong wetim God i kisim bek yumi.’—1 Tesalonaika 5:8; Song 37:29; KTH 21:3, 4.
Dispela gutpela samting bilong wetim i strongim yumi long stap laip. Long nupela Paradais ol man bai no stap wanpis, nogat; na aiwara bilong amamas bai pundaun taim God i “kirapim bek ol man i dai pinis.” (2 Korin 1:9) Long dispela taim ol man i no tingim moa kain kain hevi bilong skin, na pen ol i bin karim, long wanem, “ol lek nogut bai ol i kalap olsem ol dia.” Na “bodi bilong dispela man bai i kamap gutpela na strongpela gen,” na em bai kamap “wankain olsem em i bin i stap long taim em i yangpela man.”—Aisaia 35:6; Jop 33:25.
Long dispela taim ‘i no gat wanpela man i tok: “Mi gat sik.” ’ Ol man i no tingim moa bel hevi bilong ol em bikpela sik i as bilong en. (Aisaia 33:24, NW ) Ol man i no bel hevi moa, tasol bai “ol i amamas moa yet, na dispela amamas bilong ol bai i no inap pinis.” (Aisaia 35:10) Bikpela bel hevi em sik nogut i save kamapim bai pinis wantaim indai, em dispela birua bilong ol manmeri bilong bipo yet.—1 Korin 15:26.
[Ol Piksa long pes 8, 9]
Tingting long nupela taim God bai kamapim