Bilong Opim Rot i Go Bek Long Paradais
“[Jisas] i tokim em olsem, ‘Mi tok tru long yu, . . . bai yu stap wantaim mi long [Paradais].’ ”—LUK 23:43.
1, 2. (a) Wanem insait bilong dispela tok “paradais”? Gaden Iden em i kain olsem wanem samting? (b) Hap tok Hibru yumi tanim olsem “gaden,” long Nupela Testamen long tok Grik ol i raitim olsem wanem?
NAMBA WAN man i bin kamap long Paradais. Namba wan hap bilong Baibel i stori long God i wokim man na i tok: “[Jehova] i kisim graun na em i wokim man long en. Na em i winim win bilong laip i go insait long nus bilong man, na man i kisim laip. Orait God, Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim.” (Stat 2:7, 8) Insait bilong dispela nem “Iden” i olsem “Amamas.” Olsem na dispela gaden i stap long Iden em i gutpela ples, olsem ples bilong amamas. Em i kain olsem wanpela bikpela pak, na i gat kain kain gutpela samting long en.
2 Dispela tok “paradais” ol i kisim long tok Grik na i makim wanpela gutpela ples o gaden. I gat wanpela tok Hibru (gan) yumi tanim olsem “gaden” na long tok Grik ol i raitim olsem pa·raʹdei·sos. Ol tok bilong Nupela Testamen, em hap bilong Matyu i go inap long Kamapim Tok Hait, ol i bin raitim pastaim long tok Grik, na ol i mekim wok long dispela tok pa·raʹdei·sos bilong stori long ol tok Jisas i bin mekim taim ol birua i laik kilim em i dai na ol i nilim em long pos long Golgota long Naisan 14 long yia 33.
Tok Promis Bilong Paradais Jisas i Mekim long Man Nogut
3. (a) Wanpela man nogut i bilip long Jisas na em i tok wanem long Jisas? (b) Tok bilong dispela man nogut i makim em i bilip olsem wanem long Jisas?
3 Ol i nilim tupela man nogut long tupela pos klostu long Jisas. Wanpela bilong dispela tupela man nogut i wok long tok bilas long Jisas, tasol wanpela i sori long Jisas na em i no mekim moa dispela kain tok. Em i tok: “Jisas, taim yu kamap king, yu ken tingting long mi.” Em i kamapim bilip bilong em, em i bilip olsem bihain bai Jisas i kamap king na kisim wanpela kingdom, maski nau Jisas i hangamap long pos klostu long em. (Luk 23:42; Mak 15:32) Bel bilong Jisas i amamas tru! Dispela man nogut i bilip olsem Jisas i no gat asua na i no stret ol i nilim em long pos na semim em long ai bilong ol man na i laik kilim em i dai. (Luk 23:41) Tok dispela man i mekim i kamapim bilip bilong em, em i bilip olsem Jisas bai kirap bek na bai em i kamap king. Na em i bilip tu olsem em yet inap kirap bek, na Jisas em i Man bilong kirapim em na givim laip gen long em long graun.
4. Jisas i bekim wanem tok long dispela man nogut? Dispela tok bilong Jisas i makim wanem samting?
4 Jisas i tokim em: “Mi tok tru long yu tude, bai yu stap wantaim mi long Paradais.” Dispela tok bilong Jisas i makim olsem dispela man nogut i bilip long Jisas em bai kirap bek. Dispela tok i mas mekim gut tru bel bilong dispela man nogut. Tasol Jisas i mas kirap bek pastaim bambai dispela man i ken kirap bek. Na taim Jisas i kirap bek pinis bai em i mekim wok long strong God i givim long em bilong kirapim bek ol man i dai pinis, na long taim bilong kirapim bek olgeta manmeri bai em i kirapim bek dispela man nogut.—Luk 23:43, NW; Jon 5:28, 29; 1 Korin 15:20, 23; Hibru 9:15.
5, 6. (a) Pailat i tokim ol man long raitim wanem tok na nilim long pos Jisas i hangamap long en? (b) Taim Jisas i toktok wantaim dispela man nogut, ating em i mekim wanem tok ples?
5 Jisas i kolim dispela tok promis long wanem tok ples? Long dispela taim bipo, long hap Jisas i stap long en, ol i mekim wok long 3-pela tok ples. Olsem na taim Pailat i tokim ol man long raitim wanpela tok na putim long pos ol i nilim Krais Jisas long en bambai ol man i ken lukim na ol i ken save long em, ol i raitim dispela tok long 3-pela tok ples. Long Jon 19:19, 20 Baibel i tok, “Pailat i tok na ol i raitim wanpela tok na putim long diwai [pos]. Dispela tok i olsem, ‘Jisas bilong Nasaret, king bilong ol Juda.’ Pailat i tokim ol long raitim dispela tok long tok Hibru na long tok Rom na long tok Grik. Ples ol i hangamapim Jisas long diwai [pos], em i stap klostu long taun, olsem na planti Juda i kam lukim na ol i ritim dispela tok.”
6 Mama bilong Jisas, em Maria, em i karim Jisas long Betlehem na Jisas em i bilong lain Juda o lain Hibru. Olsem na taim em i raun inap 3-pela yia hap na autim tok, ating em i mekim tok ples bilong ol Juda, em tok Hibru. Olsem na taim em i mekim dispela gutpela tok long man nogut i bilip long em, ating em i mekim tok Hibru. Olsem na taim em i tok long Paradais,—em i kolim dispela tok Hibru gan (“gaden”) olsem i stap long Stat 2:8. Taim ol i wokim Baibel Grik (ol i kolim Septuagint) ol i tanim dispela tok Hibru gan olsem pa·raʹdei·sos.
7. Taim Jisas i kirap bek, olsem wanem em i kisim bikpela nem moa?
7 Ol i kilim Jisas i dai na long namba tri de, olsem long Naisan 16 long kalenda Hibru, God i kirapim bek em. Fopela ten de bihain em i go bek long heven, em ples em i bin stap long en long pastaim, tasol nau em i kisim bikpela nem moa. (Aposel 5:30, 31; Filipai 2:9) Nau em i kisim laip wankain olsem bilong Papa bilong em, olsem em i no inap i dai moa. Pastaim God Jehova wanpela tasol i gat dispela kain laip bilong i stap oltaim. Tasol taim Jisas i kirap bek long Sande Naisan 16, em tu i kisim dispela kain laip.—Rom 6:9; 1 Timoti 6:15, 16.
Ofa Bilong Baim Bek Ol Man i Opim Rot
8. Long pastaim tru God i laik bai olgeta hap graun i stap olsem wanem? I gat wanem samting na yumi save, em i holim yet dispela laik bilong em?
8 Olgeta dispela samting em ol wok God i mekim bilong kamapim laik bilong em, olsem em i laik bai olgeta hap bilong graun i kamap gutpela ples paradais. (Stat 1:28; Aisaia 55:10, 11) Long 1 Korin 15:45, aposel Pol i kolim Jisas olsem “narapela Adam i kamap bihain tru.” Dispela i makim olsem God i holim yet laik bilong em bilong pastaim long dispela graun, na bai i gat wanpela man bilong kamapim ol samting em namba wan man Adam i no bin kamapim.
9. Jisas i mekim wanem bilong opim rot i go bek long Paradais?
9 Pol i tok, Jisas “i bin givim laip bilong em yet bilong baim bek olgeta manmeri.” (1 Timoti 2:6) Na Krais Jisas yet i tok: “Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” Nau rot i op na olgeta manmeri i bilip long Krais Jisas ol inap kisim laip i stap oltaim.—Matyu 20:28; Jon 3:16.
10. (a) God i laik mekim wanem long sampela manmeri, em ol i liklik lain? (b) Wanem taim wok i kirap long makim ol manmeri bilong dispela “liklik lain”? Husat i makim ol?
10 Taim Jisas i kirap bek na i go antap long heven, em inap givim pe bilong ofa bilong em long God bilong baim bek ol manmeri. Tasol Papa bilong em long heven, em God Jehova, em i laik kisim sampela manmeri namel long olgeta lain bilong graun na putim nem bilong em long ol na bai ol i kamap “lain bilong em yet.” (Aposel 15:14) Kamapim Tok Hait 7:4 na 14:1-4 i tok, dispela lain em inap olsem 144,000 tasol, ol i “liklik lain sipsip,” na God i singautim ol bilong i stap long Kingdom bilong em long heven. (Luk 12:32) Wok bilong makim ol manmeri bilong dispela lain bilong God i kirap taim Krais Jisas i makim ol 12-pela aposel bilong em. (Matyu 10:2-4; Aposel 1:23-26) Jisas i tokim dispela ol as pos bilong kongrigesen bilong em, olsem: “Yupela i no bin makim mi bilong i stap wantaim yupela. Nogat. Mi makim yupela bilong i stap ol lain bilong mi.” (Jon 15:16) Ol dispela manmeri i mas i go pas long wok bilong autim tok bilong Paradais i laik kamap long olgeta hap bilong graun taim Kingdom i bosim graun.
Kingdom i Mas Kamap
11. Wanem taim Kingdom bilong God long han bilong Krais i mas kamap?
11 Long nem bilong Bikpela bilong yumi, Krais Jisas, long nau yumi save beten long Jehova na yumi tok, “Kingdom bilong yu i mas i kam.” (Matyu 6:9, 10; Jon 14:13, 14) Kingdom bilong God long han bilong Krais i mas kamap long pinis bilong taim bilong “ol man bilong ol arapela lain.” (Luk 21:24) Dispela hap taim i pinis long yia 1914 long taim bilong yumi.a
12. Jisas i bin kolim ol narapela kain samting i mas kamap bilong makim em i kam bek pinis i stap, maski ol man i no inap lukim em, na wanem samting i bin kamap long yia 1914 olsem dispela tok profet i makim?
12 Long dispela yia namba wan pait bilong olgeta hap bilong graun i bin kamap. Dispela samting i kamap stret olsem Jisas i bin tok profet long en taim em i kolim ol narapela kain samting i mas kamap long graun bilong makim olsem em i stap King pinis long heven, maski yumi no inap lukim em. Ol disaipel i bin givim askim long em na ol i tok: “Yu tokim mipela, wanem taim ol dispela samting bai i kamap? Wanem mak bai i kamap pastaim, na mipela i ken save, yu . . . kam bek na [pasin bilong] dispela graun i laik pinis?” Jisas i bekim tok long ol na em i tok: “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king. Long sampela hap ol bai i gat taim bilong bikpela hangre, na graun bai i guria. Dispela ol samting em i olsem pen i save kamap pastaim long meri i laik karim pikinini. Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:3, 7, 8, 14; Mak 13:10.
13. (a) Olsem wanem tok bilong Kingdom bilong God em i gutpela tok? (b) Inap hamas yia ol man i bin beten long God na tok, “Kingdom bilong yu i mas i kam”? Ol witnes bilong em long graun i les long mekim dispela beten o olsem wanem?
13 Long nau ol i autim dispela gutpela tok bilong Kingdom long planti kantri, winim 200, na ol i wok strong long kisim dispela tok i go long sampela hap moa. Dispela tok em i no bilong wanpela kingdom bihain bai em i kamap na bosim graun. Nogat. Em tok bilong wanpela kingdom i kamap pinis na i kisim strong pinis bilong bosim graun. Dispela Kingdom i bin kamap long yia 1914. Na nau rot i op bilong God i ken mekim ol samting Jisas i bin lainim ol man long beten askim God long en kirap long 1,900 yia bipo. Kirap long taim King bilong dispela Kingdom o gavman i bin lainim ol disaipel long beten long God na tok, “Kingdom bilong yu i mas i kam,” na inap long nau, ol man i bin mekim dispela beten long Man bilong kamapim dispela Kingdom. Olsem na inap longtaim pinis God i bin harim dispela beten. Em i amamas long harim ol witnes bilong em long graun ol i mekim dispela beten i kam inap long nau, long wanem dispela i makim olsem ol i holimpas bilip olsem dispela Kingdom bai kam. Ol i no les long mekim dispela beten long ‘Papa bilong ol long heven.’ Ol i no les long wetim dispela Kingdom.—Matyu 6:9, 10.
14. Bilong wanem ol Witnes Bilong Jehova i wok yet long autim gutpela tok bilong Kingdom bilong God?
14 Ol Witnes Bilong Jehova i bilip na tokaut olsem dispela Kingdom i kamap pinis long heven long yia 1914, tasol ol i wok yet long autim gutpela tok bilong dispela Kingdom. Ol i save mekim olsem, long wanem dispela Kingdom i no kirap yet long pinisim ol narapela kingdom na bai dispela Kingdom tasol i bosim graun. Em i larim ol kingdom o gavman bilong dispela graun i stap na ol i wok yet long bosim olgeta lain man bilong olgeta kain skin. (Rom 13:1) Olsem na dispela kingdom bai kam tru taim em wanpela tasol i bosim olgeta hap bilong graun.—Daniel 2:44.
15. Kirap long Pentikos long yia 33 na i kam inap long nau, wanem wok i bin kamap na dispela i winim wok bilong makim ol king bilong Israel?
15 God i makim Jisas bilong i stap King bilong dispela Kingdom, tasol i gat sampela ol bai mekim wok king wantaim em. God Jehova i makim 144,000 disaipel bilong King Krais Jisas bilong mekim wok king wantaim Krais long Kingdom bilong God. (Daniel 7:27) Long Israel bipo, hetpris i save kapsaitim wel long het bilong man bilong makim em i kamap king. Tasol kirap long de Pentikos long yia 33, God Jehova i bin kapsaitim spirit bilong em long 144,000 manmeri bilong makim ol i kamap king wantaim Krais long heven. Long dispela rot ol i kamap pikinini spirit bilong God na ol i kisim laip long heven wantaim “King bilong olgeta king, na Bikpela bilong olgeta bikman.”—Kamapim Tok Hait 19:16; lukim tu 1 King 1:39.
“Adam i Kamap Bihain Tru” Bai Kamapim Bek Paradais
16. Taim ol i nilim Jisas long pos, olsem wanem long Kingdom? Tasol olsem wanem em i no bin autim tok kranki?
16 Taim ol i nilim Jisas long pos long yia 33 i olsem bai em i no inap kamap king na kisim wanpela kingdom. Tasol taim em i autim tok bilong Kingdom bilong God em i no bin autim tok i kranki. Em i dai pinis, na 3-pela de bihain Man bilong kamapim dispela Kingdom i mekim wanpela samting bambai ol disaipel bilong Jisas i no ken beten nating na askim em long kamapim wanpela kingdom o gavman i no inap kamap. Jehova i kirapim bek dispela Man em i makim bilong i stap King long dispela Kingdom bilong Em na em i givim laip i stap oltaim long em—em i no ken i dai moa.
17, 18. (a) Baibel i kolim Jisas olsem “Adam i kamap bihain tru” na dispela i makim wanem samting? (b) Ol samting i bin kamap long graun kirap long yia 1914 i makim wanem samting?
17 Jisas i save, Man bilong wokim namba wan Paradais bai givim wok long em bilong kamapim bek Paradais long olgeta hap bilong graun na putim ol manmeri i stap long en. Long 1 Korin 15:45, 47, Baibel i tok: “Buk bilong God i tok olsem, ‘Namba wan man, Adam, i bin kisim laip.’ Tasol narapela Adam i kamap bihain tru, em i bin kamap spirit bilong givim laip long man. Namba wan Adam em i bilong graun. God i bin wokim em long graun tasol. Namba tu Adam em i bilong heven.” Namba tu Adam i bin lusim heven na i kam daun long graun na Jehova i givim wok long dispela Adam bilong kamapim bek Paradais hia long graun. Long dispela as Bikpela bilong yumi, Jisas, i bin tokim man nogut i sori long em, olsem: ‘Bai yu stap wantaim mi long Paradais.’ (Luk 23:43) Ol tok bilong Jisas na dispela man nogut i kamapim long ples klia olsem Paradais bai kamap bek long graun taim Kingdom bilong heven long han bilong Krais Jisas, em “Adam i kamap bihain tru,” i bosim dispela graun.
18 Olgeta samting i bin kamap long graun kirap long yia 1914 i kamap stret olsem Krais Jisas i bin tok profet long en, na i makim olsem Jisas i bin kamap king long dispela yia. Ol manmeri bilong dispela taim nau, em ol i bin i stap laip long 1914 i kam inap long nau, winim 70 yia pinis ol i bin lukim ol samting i kamap long graun stret olsem Jisas i bin tok profet long en long Matyu sapta 24. Olsem na dispela hap taim i laik pinis nau—klostu nau bai Paradais i kamap bek long graun.—Matyu 24:32-35; lukim tu Buk Song 90:10.
Gutpela Nupela Taim i Klostu Pinis
19, 20. (a) Taim Armagedon i pinis, Jehova bai kamapim wanem kain taim bilong ol manmeri i laikim tumas em? (b) Taim Armagedon i pinis, kwiktaim ol i mas kirap mekim wanem wok?
19 Long Armagedon, taim Jehova i stretim bek nem bilong em, olsem em i King tru bilong heven na graun, bai em i kamapim nupela taim bilong ol manmeri i laikim tumas em—bai ol i no ken les long dispela nupela taim; bai ol i stap amamas tasol. Taim Pikinini bilong God, em King Krais Jisas, i bosim dispela graun, bai gutpela nupela taim i kamap. Bai i gat bikpela wok bilong helpim ol manmeri! Olgeta mak nogut bilong bikpela pait i bin kamap namel long ol ami bilong Jehova na lain bilong Satan i mas pinis. Bai i tekewe olgeta na i no gat wanpela samting nogut i stap.
20 Tasol olsem wanem long ol samting bilong pait bilong ol lain bilong graun? Ating bai planti samting tru i stap, long wanem Baibel i kolim bikpela hap taim bilong pinisim ol hap bilong en em yumi inap kukim long paia. (Esekiel 39:8-10) Na ol manmeri i abrusim bagarap long Armagedon, ating bai ol inap mekim wok long ol narapela hap bilong ol dispela samting bilong mekim gutpela wok.—Aisaia 2:2-4.
21. Bihain long Armagedon ol manmeri i bin abrusim bagarap bai lukim graun i stap olsem wanem na i wankain olsem long taim Tait i pinis? Tasol wanem samting bai i no wankain?
21 Ol manmeri i abrusim bagarap olsem Noa wantaim lain bilong em i bin abrusim bagarap long Bikpela Tait, bihain long Armagedon bai ol dispela manmeri i lukim graun i stap olsem long taim Tait i bin bagarapim. Tasol long dispela taim bai Satan na ol spirit nogut i no i stap moa na mekim ol wok nogut bilong ol long ples spirit klostu long graun. Bai ol i stap kalabus inap 1,000 yia. (Kamapim Tok Hait 20:1-3) Ol manmeri i abrusim bagarap long Armagedon bai ol i gat bikpela wok bilong stretim ol samting em dispela pait bilong “bikpela de bilong God I Gat Olgeta Strong” i bin mekim long graun.—Kamapim Tok Hait 16:14.
22. Ol manmeri i bin abrusim bagarap long Armagedon bai ting olsem wanem long bikpela wok bilong mekim olgeta hap bilong graun i kamap gutpela ples Paradais?
22 Ol dispela manmeri i abrusim bagarap long Armagedon ol i no bikpela lain tumas, olsem na inap ol i tingting planti long mekim dispela bikpela wok bilong kamapim bek Paradais long graun. Tasol nogat. Bai ol i amamas tru long mekim dispela wok, na bai ol i bihainim tok na kirap long mekim, na bai ol i wok strong long mekim. Ol i save, long tok piksa dispela graun i olsem ples bilong God i putim lek antap long en na ol i laik graun i kamap gutpela ples tru inap long God i putim lek bilong em antap long en.
23. Husat bai helpim ol manmeri i abrusim bagarap long Armagedon na ol i ken save, wok bilong ol bai kamap gutpela?
23 Na taim ol i kirap long mekim dispela gutpela wok long graun em God i bin givim long ol man long pastaim, ol i save God i no ken lusim ol i stap nating na bai ol yet tasol i mas mekim dispela wok. Dispela save i mekim ol i amamas na ol i strongim bel bilong ol. (Lukim Aisaia 65:17, 21-24.) Krais Jisas bai helpim ol, em Man i bin mekim tok promis olsem Paradais bai kamap bek long graun na taim em i laik go antap long heven em i bin tok, “God i givim mi bikpela namba na strong bilong bosim olgeta samting long heven na long graun.” (Matyu 28:18) Em i holim yet dispela bikpela namba na strong, na bai em i truim tok promis em i bin mekim long man nogut i sori long em. Bilong save long dispela samting, yu ken kaunim tok i kamap bihain long dispela.
[Futnot]
a Bilong kisim sampela save moa long dispela, lukim buk Yu Inap i Stap Oltaim long Paradais long Graun, pes 138-141. Sosaiti Was Taua bilong Nu Yok i wokim dispela buk. Na lukim tu Esekiel 21:27.
Ol Askim Bilong Kamapim Gen Ol Bikpela Tok
◻ Tok promis bilong Jisas long Golgota i makim wanem samting bilong ol manmeri na bilong wanpela man nogut?
◻ I mas i gat wanem samting olsem as bilong opim rot i go bek long Paradais?
◻ Namba wan Adam i no bin mekim wanem? Tasol “Adam i kamap bihain tru” bai mekim wanem?
◻ Taim Armagedon i pinis, Jehova bai kamapim wanem kain taim bilong ol manmeri i laikim em tumas?
[Piksa long pes 14]
Nius “The World Magazine” bilong Ogas 30, 1914 i stori long ol Witnes (“Millennial Dawners”) i tokaut olsem Kingdom i kamap long 1914