Wetim Gutaim!

“God em i as bilong bilip bilong yumi, . . . em i ken mekim bikpela amamas na bel isi i kamap na i pulap long yupela. Na yupela i ken kisim strong bilong Holi Spirit, na pasin bilong bilip na wetim gutaim bilong God na dispela i ken pulap moa long yupela.”—ROM 15:13.

1, 2. (a) I gat wanem as na yumi ken wetim gutaim i kamap, olsem Pol i tok? (b) Tok profet bilong Aisaia i makim dispela samting olsem wanem?

WETIM gutaim? Planti pasin nogut i stap, pasin nogut bilong stil na pasin pamuk; na bikpela lain manmeri, winim wan bilion, ol i hangre, na ol lain man i hipim ol bom nogut nogut inap long bagarapim yumi olgeta, olsem na i gat wanem as na yumi ken wetim gutaim i kamap? Long Rom 15:12 Pol i kolim as bilong dispela samting. Yumi ken wetim gutaim i kamap, long wanem: “Bambai wanpela man i kamap . . . Na dispela man bai i stap king . . . Bai ol arapela lain ol i bilip long em na wetim em i mekim gut ol.”

² Pol i kamapim tok bilong Aisaia 11:1-10. Dispela tok i makim ol dispela lain ol i bilip long Jisas. King Devit bilong lain bilong Jesi em i olsem piksa bilong King Krais Jisas. Matyu i raitim gutnius na em i stori long dispela King; em tu i kamapim sampela tok bilong Aisaia, olsem: “Dispela em i wokman bilong mi, mi makim em pinis. Mi laikim em tumas, na bel bilong mi em i gutpela long em. Bai mi putim Spirit bilong mi long em, na bai em i autim tok bilong stretpela pasin long ol man . . . bai ol i bilip long em na wetim em.”—Matyu 12:18-21; Aisaia 42:1, 4.

3, 4. (a) Nau Jisas i gat wanem “nem”? Olsem wanem em i kisim dispela “nem”? (b) Wanem as bilong tok bilong Revelesen 19:10, 11?

³ Bilong wanem ol man i mas bilip long Jisas? Long wanem, Jisas i kisim “nem” olsem man bilong holimpas lo bilong God. Taim em i stap long graun, ol man i mekim nogut long em, na semim em, na givim pen long em—tasol em i no lusim God. Em i bihainim laik bilong God i go inap long em i dai. Olsem na Pol i tok: “Bilong dispela tasol God i litimapim em na putim em antap tru. Na God i givim em wanpela nem i winim olgeta arapela nem. Em i givim dispela nem long Jisas, bai olgeta man long heven na long graun na aninit long graun ol i ken kolim nem bilong Jisas na brukim skru long em. Na olgeta man i mas tokaut olsem: ‘Jisas Krais em i Bikpela.’ Na bai nem bilong God Papa em i stap antap tru.”—Filipai 2:9-11.

⁴ Nau nem bilong Jisas i makim bikpela namba na bikpela wok God i givim long em. God i litimapim em na putim em i stap Hetpris na King. “Em i sindaun pinis long han sut bilong sia bilong Namba Wan King long heven.” Em i kisim nem olsem: “Man i lukautim gut wok bilong en,” na “Man i save mekim pasin tru tasol.” Olgeta tok bilong ol profet i makim em bai kam, olsem na “Holi Spirit . . . i save helpim ol man i autim nem bilong Jisas.”—Hibru 8:1 Revelesen 19:10, 11.

5. Yumi mas bilip na wetim gutaim i kamap, tasol bilong wanem dispela i mas “pulap moa” long yumi long nau?

⁵ Yumi mas bilip na wetim gutaim kamap, tasol bilong wanem dispela i mas “pulap moa” long yumi? Long wanem, tok bilong ol profet i soim yumi, liklik taim na bai dispela Jisas i pinisim ol hevi na samting nogut rong bilong Adam i bin kamapim long ol man. “Wanpela man i bin sakim tok, na long dispela pasin bilong em planti man i kamap sinman. Olsem tasol, wanpela man i bihainim tok, na long dispela pasin bilong em planti man bai i kamap stretpela man.” (Rom 5:19) Jisas em i Hetpris bilong God long heven na em bai mekim wok long gutpela ofa bilong em. Bai em i helpim olgeta manmeri i harim tok, na bikpela lain ol bai kirap bek long matmat, na bai skin na tingting bilong ol i kamap gutpela olgeta na bai ol inap i stap oltaim oltaim long Paradais long graun na i stap amamas. Jisas bai “i stap king, i go inap long em i daunim olgeta birua na pinisim ol. Em i rausim pinis, olgeta arapela birua, orait bai em i pinisim dai tu.” Bai olgeta manmeri i amamas long i stap gutpela olgeta long gutaim long dispela Paradais.—1 Korin 15:25, 26; Sam 72:3, 7; Aisaia 33:24.

Tingting long Bihain

6. (a) Long wanem rot tasol yumi inap save long ol samting God i laik mekim long bihain? (b) Dispela inap helpim yumi olsem wanem?

⁶ Long rot bilong Baibel tasol yumi inap save long as bilong i stap bilong yumi. God tasol, long rot bilong Baibel, inap tokim yumi yumi kamap olsem wanem, na yumi stap bilong mekim wanem, na wanem ol samting bai painim yumi long bihain. (Aisaia 46:9, 10; 2 Timoti 3:16) Baibel i tokim yumi long ol samting God i laik mekim na ol dispela samting bai kamap long bihain. Na Baibel i tokim yumi long ol samting nau yumi mas mekim bilong bihainim laik bilong God na bai yumi inap bihainim long olgeta taim bihain!—Sam 37:31, 34.

7. Ol samting Jisas i kolim olsem “mak,” ol dispela samting i kamap tru olsem wanem?

⁷ Taim Jisas inapim pinis wok bilong em long graun, em i mekim wanpela tok profet na kolim wanpela “mak.” Ol samting i kamap pinis olsem Jisas i kolim. Olsem na yumi save, em i sindaun long sia king bilong em long heven, na em i wok long skelim ol manmeri na putim ol long tupela lain, “olsem wanem i save tilim ol sipsip i go long hap na ol meme i go long hap.” Ol “brata” bilong Krais olsem ol witnes bilong Jehova em spirit holi i bin makim ol na ol i mekim yet wok bilong God hia long graun, ol i autim dispela tok bilong Kingdom. Ol samting ol man i mekim long dispela tok i makim ol i sipsip o meme. (Matyu 24:3-14; 25:31-40, 46) Tasol olsem wanem? Yu ting Jisas i gat bikpela nem olsem Papa bilong em? O yu ting em i winim Papa bilong em?

8. (a) Bilong wanem Jehova i putim Jisas i stap King wantaim em? (b) Jisas bai mekim wanem na em i soim olsem em i stap aninit long Papa?

⁸ Nogat, long wanem Baibel i tok: “Het bilong Krais em God.” God em i King bilong olgeta taim.” Em i King bilong olgeta samting em i bin wokim. (1Korin 11:3; 1 Timoti 1:17; Revelesen 4:11). Taim ol man i bikhet long Paradais long Iden, nau Jehova i tok em bai kamapim wanpela man bilong i stap King wantaim em—em dispela ‘pikinini’ God i tok promis long em—“bilong bagarapim na rausim wok bilong Seten.” (Jenesis 3:15; 1 Jon 3:8) Tasol taim Jisas i stretim bek nem bilong Jehova, em i King, na em i helpim ol manmeri long kamap gutpela olgeta long Paradais long graun, bai Krais i “putim kingdom long han Bilong God Papa.” Pikinini i aninit long God.—1 Korin 15:24-28.

9. (a) Aisaia i tok wanem long Jehova i Bikpela King? (b) Baibel i tok wanem long rot bilong kisim bek yumi?

⁹ Profet Aisaia i toktok long “Bikpela King, Jehova,” na em i tok: “Jehova em i Jas bilong yumi, Jehova em i Man bilong givim lo long yumi, Jehova em i King bilong yumi.” Jehova i kisim bek yumi long rot bilong Krais Jisas. Olgeta manmeri i laik kisim laip, ol i mas bilip long dispela tok i tru. (Aisaia 33:21, 22, NW; 12:2; Aposel 2:21; 4:12; Rom 10:13; Revelesen 7:10) Profet Aisaia i tok, Jehova em i Bikpela King bilong olgeta samting, na bihain Aisaia i stori long rot bilong Jehova bilong kisim bek ol man i laikim tumas Em, na bilong wanem em i kisim bek ol.

“De Bilong Bekim Pe Nogut”

10. Aisaia 34:1-4 i kolim wanem strafe bilong ol lain man? Bilong wanem dispela samting bai painim ol?

¹⁰ Ol lain bilong dispela graun ol i no bin bosim gut dispela graun. Na ol i sakim stretpela Kingdom bilong God i stap long han bilong Krais. Olsem na profet Aisaia i tokim ol: “Kam klostu, yupela ol lain man, na harim tok; yupela ol lain man, putim gut yau. Graun na ol samting i stap long en, yu harim, yu graun i kamapim kaikai wantaim olgeta kaikai yu kamapim. Long wanem, Jehova i kros long olgeta lain man, na em i belhat long ami bilong ol. Na em i mas bagarapim ol; em i mas kilim ol i dai. Na ol bai tromoi skin bilong ol ausait na bai smel nogut i kamap; na blut bilong ol bai mekim ol maunten i kamap olsem wara. Na olgeta samting bilong ples antap bai i sting na i pinis. Skai [ol gavman bilong graun i no mekim gut wok] bai pinis olsem wanpela buk ol i raunim i go na pasim; bai ol sta samting i pundaun olsem lip bilong rop wain i drai na i pundaun, na olsem kaikai bilong diwai fik i drai na i pundaun.”—Aisaia 34:1-4, NW.

11. (a) Long Aisaia 34:5-7 Jehova i tok wanem long Idom? (b) Ol Idom ol i husat? Ol i makim husat long nau?

¹¹ Em strongpela tok! Na bihain Jehova yet i kolim bikpela strafe em bai painim ol Idom: “Bainat bilong mi bai waswas long heven. Harim! Em bai kam daun long Idom, long dispela lain mi bin mekim stretpela kot long ol, na mi mas bagarapim ol.” (Aisaia 34:5-7, NW) Ol Idom i kamap long lain bilong Iso, em brata bilong Jekop. Inap longtaim pinis ol Idom i birua long lain bilong Jekop, em ol Isrel. Na i gat wanpela lain long nau em Idom i olsem piksa bilong ol. Orait, husat long nau ol i mekim pasin wankain olsem ol Idom long bipo? Husat ol i save birua long lain Isrel bilong spirit? Em ol Krisendom, long rot bilong ol pris pasto bilong ol! Taim ol lain man i mekim Namba Wan na Namba Tu Pait Bilong Olgeta Hap, ol pris pasto bilong olgeta dispela lain ol i givim bel long helpim pait. Ol i gat bikpela asua long blut. Na ol i gat bikpela asua moa, long wanem ol i kirapim ol gavman long tambuim wok bilong ol Witnes Bilong Jehova na kilim sampela i dai, em ol dispela Witnes i olsem maus bilong Jerusalem o Saion bilong heven hia long graun.

12. (a) Olsem wanem Jehova i bekim pe nogut long “Idom”? (b) Long wanem wanem rot ol Witnes Bilong Jehova i klia long ol misin bilong Krisendom?

¹² Olsem na profet bilong God i tok: “Jehova i gat de bilong bekim pe nogut, wanpela yia bilong bekim pe nogut na stretim kot bilong Saion.” (Aisaia 34:8 NW) Dispela i mekim wanem long “Idom” bilong nau? Ol i bagarap, olsem Aisaia 34:9-17 i tok. Kirap long yia 1919, ol i bagarap long spirit. Long ai bilong Nambawan Bikpela King Jehova ol i dai pinis. Ol i bikpela hap bilong “Bikpela taun Babilon,” em olgeta lotu giaman ol i gat asua long blut, na ol i bagarap long spirit taim Namba Wan Pait Bilong Olgeta Hap i pinis. Ol i kot long ai bilong Jehova na ol i lus long kot. Ol Witnes Bilong Jehova i klia long dispela “Idom” i dai pinis long spirit. Ol i no insait long wok bilong en bilong bungim ol misin wantaim, na ol i no insait long ol wok politik bilong en, na ol i no insait long ol bilaspasin bilong dispela graun olsem em. Liklik taim tasol na dispela lain ol i bin lusim God bai ol i bagarap tru. Bai ol i bagarap olgeta long de bilong Jehova, em “de bilong bekim pe nogut,” em bai painim olgeta manmeri long olgeta hap bilong graun.—Revelesen 14:8; 18:2, 4, 24; 19:11-21.

Stap Gut long “Paradais”

13. Aisaia i stori olsem wanem long lain bilong Jehova i lusim “Bikpela taun Babilon”?

¹³ Aisaia sapta 35 i stori gut long lain remnan bilong Isrel bilong spirit ol i lusim kalabus long “Bikpela taun Babilon.” Na long ves 10 (NW) Aisaia i tok: “Ol man-meri Jehova i bin baim bek ol, bai ol i kam bek, bai ol i kam long Saion na bai ol i singaut na amamas; amamas bilong taim bihain bihain bai stap long het bilong o1. Ol bai i stap amamas, na krai na hevi i mas pinis.” Dispela tok i makim paradais bilong spirit, olsem Aisaia 51:3 (NW) i tok: “Jehova bai mekim gut bel bilong Saion. Em bai mekim gut olgeta hap bilong en i bagarap, em bai mekim ples nating bilong en i kamap olsem Iden na em bai mekim ples wesan bilong en i kamap olsem gaden [“paradais,” Baibel Septuagint] bilong Jehova.”

14. (a) Pol i stori long wanem kain paradais? (b) Aisaia 35:1-7 i stori olsem wanem long dispela paradais? Husat ol i stap long dispela paradais?

¹⁴ Lain bilong Jehova long nau, em spirit i bin makim ol, ol i stap long paradais bilong spirit! Aisaia 35:1-7 i stori gut long dispela samting! I wankain olsem samting aposel Pol i stori long en long 2 Korin 12:3, 4. Em i stori long samting i bin painim em yet na em i tok: “Mi save long dispela man. God i kisim em i go long [paradais]. Ating em i stap long bodi, o i ting em i lusim bodi, mi no save. God i save. Long [paradais] em i harim kain tok man i no inap long autim, na i tambu tu long man i autim.” Tasol long nau i no tambu long autim tok long paradais bilong spirit i stap namel long lain remnan na ol manmeri bilong ‘bikpela lain’ ol i bin kam insait long en. Gutpela pasin tru i stap namel long ol dispela Witnes Bilong Jehova. Ol i stap olsem wanpela lain tasol na ol i pas gut wantaim long pasin sori, ol i gat wankain laik na wankain wok. Em paradais bilong spirit!

15. (a) Sam 91 i tok wanem long dispela paradais bilong spirit? (b) Yumi gat wanem askim long ol manmeri bilong ‘bikpela lain’? Bilong wanem yumi askim olsem?

¹⁵ Ol i mas lukautim gut dispela paradais bilong spirit na bai ol spia bilong Seten i no ken bagarapim ol. (Sam 91:1-11) Long nau ol samting i painim lain remnan bilong Isrel bilong spirit olsem ol gutpela tok profet bilong Aisaia i makim. Tasol dispela lain i go liklik. Long nau i gat 9,000 samting tasol ol i stap—em inap olsem 0.4 pesen tasol bilong olgeta Witnes Bilong Jehova. I gat 45,000 kongrigesen bilong ol Witnes Bilong Jehova long olgeta hap na planti ol i no gat wanpela man o meri bilong lain remnan i stap long kongrigesen. Orait, olsem wanem long ol planti tausen tausen manmeri bilong ‘bikpela lain’? Tru, ol i insait long paradais bilong spirit na ol i kisim ol amamas bilong en wantaim lain remnan. Tasol ol dispela tok profet i makim Paradais long graun ol bai stap long en bihain, o olsem wanem?

Graun i Kamap Gutpela Ples Tru

16. (a) Laik bilong God i mas kamap we? na olsem wanem? (b) Yumi mas mekim wanem na long dispela rot tasol bai yumi inap kisim laip long Paradais? (c) Olsem wanem Paradais inap kamap bek long graun?

¹⁶ Namba wan Paradais long Iden i stap hia long graun. Dispela Paradais i lus. Olsem na Paradais i mas kamap bek long graun bambai laik bilong God bilong pastaim i ken kamap. (Jenesis 1:27, 28) Long Paradais bilong Iden, ol man na ol animal i sindaun gut wantaim na i gutpela ples tru. Tasol i gat narapela gutpela samting bilong dispela Paradais, em olsem: God i wokim man i kain olsem em na pasin bilong man i stret na i mas i stap olsem bambai man i ken i stap long lain bilong God inap long olgeta taim. Em i mas bihainim tok bilong Man bilong wokim em bambai em i ken i stap gutpela olgeta, no gat sik, no gat tingting kranki, na em i no ken i dai. Adam i no bihainim tok. Em i mekim sin. Olsem na ol man i mas kamap gutpela gen long rot bilong ofa bilong Krais na bai Paradais i ken kamap bek long graun.—Rom 5:12, 18.

17. (a) Olsem wanem ‘bikpela lain’ inap insait long paradais bilong spirit? (b) Olsem wanem ol i redi bilong kisim laip oltaim, olsem Baibel i tok? Bai ol i kisim we?

¹⁷ Long nau graun i no stap olsem gutpela ples o paradais. Nogat. Tasol ‘bikpela lain’ bilong ol “arapela sipsip” ol i stap long paradais bilong spirit. (Revelesen 7:9; Jon 10:16) Olsem wanem ol i stap long dispela paradais? Long wanem ol i dediket long Jehova, na ol i mekim ol samting em i tok ol i mas mekim, na ol i bung wantaim lain remnan, em ol i bin i stap long paradais bilong spirit kirap long yia 1919. (Lukim Esikiel 38:8-16.) Insait long dispela paradais ol i lain na ol i redi bilong i stap long Paradais long graun bihain long Amagedon. Taim Paradais i kamap bek long graun, em bai stap oltaim oltaim, na dispela samting bai litimapim nem bilong God. King Devit i tok profet long dispela samting, olsem: “Ol manmeri i daunim nem bilong ol yet bai ol i stap gut long graun. Bai ol i sindaun gutpela tumas na amamas i stap.” Na Jisas i tok: “Ol man i no save hambak na bikhet, em ol i ken amamas. Bai God i givim olgeta graun long ol.”—Sam 37:11; Matyu 5:5.

18. Olsem wanem bai yumi lukim “biknem bilong Jehova” long Paradais long graun?

¹⁸ Long dispela Paradais long graun, olgeta manmeri (ol manmeri i kirap bek tu) i bihainim tok na mekim ol samting bambai ofa bilong Krais i ken helpim ol, Ol bai kisim ol gutpela blesing Aisaia na ol narapela profet i kolim bilong Isrel bilong spirit. Tok promis Jisas i bin mekim long man nogut em i hangamap long diwai long dispela ples ol i kolim Bun Bilong Het, dispela tok promis bai kamap tru. (Luk 23:43) Bai yumi lukim tru “biknem bilong Jehova, na strong bilong God bilong yumi,” long wanem ol plaua bai kamap long ples nating na long ples drai, na em bai oraitim bek ol aipas na yaupas na lek nogut na mauspas. Gutaim bai kamap long olgeta hap bilong graun na “laion bai kaikai gras olsem bulmakau,” olsem ol i bin mekim long Iden na long sip bilong Noa. No gat wanpela man bai “mekim nogut o bagarapim wanpela samting” long Paradais.—Jenesis 1:29, 30; Aisaia 11:6-9, NW; 35:1-7, NW; 65:25.

19. (a) Tok bilong Aisaia 25:6-8 i kamap tru olsem wanem long pastaim? (b) Olsem wanem em bai kamap tru long ol manmeri i kisim laip long graun?

¹⁹ Aisaia 25:6-8 (NW) i soim yumi; paradais bilong spirit i kamap pastaim na paradais tru long graun bai kamap bihain. Ol samting bilong spirit i kamap nau long paradais bilong spirit i truim dispela tok profet. Long dispela paradais bilong spirit, lain bilong Jehova i kisim “bikpela kaikai.” (Lukim Esikiel 37:1-6.) Ol i bilip, olsem na amamas na bel isi i pulap long ol na ol i wetim gutaim bilong Kingdom i kamap. (Rom 15:13) Aisaia i tok profet olsem: “Bikpela King Jehova bai klinim ai wara i stap long pes bilong olgeta man.” Dispela samting i kamap pinis long lain remnan, nau paslain long Amagedon, taim ol i lusim “Bikpela taun Babilon.” Na Revelesen 7:17 i mekim wankain tok na i tok dispela samting bai painim ol manmeri bilong ‘bikpela lain’ long nau. Revelesen 21:3, 4 i kamapim tok bilong Aisaia na i stori long “nupela graun” olsem: “Harim! Nau haus bilong God i stap wantaim ol man! . . . Bai em i mekim drai olgeta wara i stap long ai bilong ol.” Long “nupela graun,” long Paradais hia long graun, God bai truim dispela gutpela tok promis.

20. Bilong wanem olgeta wokboi bilong God i ken bilip na wetim gutaim i kamap na dispela i ken “pulap moa” long ol long nau?

²⁰ Tru tumas lain remnan wantaim ‘bikpela lain’ ol i ken bilip na wetim gutaim i kamap. Dispela samting i ken “pulap moa” long ol, long wanem ol i lukim ol samting i kamap olsem God i bin tok profet pinis. Bai God inapim tru olgeta gutpela tok promis em i bin mekim. Dispela samting i ken strongim tru bel bilong yumi, “bel bilong yumi i ken holimpas ol samting God i tokim yumi long wetim i stap.”—Rom 15:13; Hibru 6:18.

Yu tingim?

□ Olsem wanem long nem bilong Jisas na yumi ken bilip na wetim gutaim i kamap?

□ Olsem wanem long bikpela nem bilong Jisas na bikpela nem bilong Jehova?

□ Aisaia sapta 34 i tok wanem long de bilong Jehova “bilong bekim pe nogut”?

□ Aisaia sapta 35 na 25:6-8 i lainim yumi olsem wanem long “paradais”?

[Piksa long pes 29]

Paradais bilong spirit i lukautim yumi na ol “sik” bilong ol man bilong nau i no ken bagarap yumi

[Rait long pes 31]

MITING BILONG OL MEMBA BILONG INTERNATIONAL BIBLE STUDENTS ASSOCIATION OF PAPUA NEW GUINEA, INC.

Long Oktoba 1, 1984 ol memba bilong International Bible Students Association of Papua New Guinea, Inc. bai bung long 6 klok apinun long Haus Kibung long Hohola, Port Moresby, Papua New Guinea.