Insait Bilong Ol Tok i Kam Long Olgeta Hap
“Ol Man i Lusim Tingting Pinis long God”
Wanpela man bilong Rasia, em i man bilong raitim ol buk na ol i bin rausim em long Rasia, nem bilong Alexander Solzhenitsyn, em i bin kisim Nobel Prais na long 1983 em i kisim wanpela prais long Englan ol i kolim Templeton Award. Taim em i go long haus bilong Kwin bilong Englan bilong kisim dispela prais, em i mekim wanpela tok i kamapim as bilong pasin bilong ol manmeri long nau, em ol i no save tingim moa ol samting bilong spirit. Em i tok: “Sapos ol i tokim mi long kolim wanpela samting i olsem mak bilong ol manmeri bilong ol manmeri bilong dispela taim nau, bai mi tok olsem: ‘Ol man i lusim tingting pinis long God’ Ol i no tingim moa God na dispela samting i as bilong olgeta bikpela rong i bin kamap long dispela taim. Nambawan bikpela rong i bin kamap em Namba Wan Pait Bilong Olgeta Hap. Dispela samting i as bilong planti hevi i painim yumi long nau.”
Solzhenitsyn i lukim dispela pasin kranki i stap yet long ol man kirap long taim bilong Namba Tu Pait na i kamap long inap long nau, na em i tok: “Sapos yumi bin tokim ol manmeri bilong bipo long ol samting nau i kamap long graun, bai ol i kirap na tok: ‘Em i olsem Revelesen long Baibel i tok!’”
Kirap long taim bilong Namba wan Pait Bilong Olgeta Hap na i kam inap long nau, yumi stap long dispela taim Baibel i kolim olsem “las taim.” Baibel i tok, long “las taim” bai ol man “i bihainim pasin bilong God long skin tasol na bai ol i givim baksait long strong bilong pasin bilong God.” (2 Timoti 3:1, 5) Na wanem samting bai kamap? Bipo God i bin tokim ol manmeri bilong Jerusalem: “Yupela i lusim tingting long mi na yupela i bihainim ol tok giaman.” Jerusalem bilong bipo i lusim tingting long God na ol i bagarap. Na olsem tasol long nau, bagarap i laik painim ol lain bilong Krisendom wantaim ol narapela manmeri bilong dispela graun, em ol i givim baksait long God.—Jeremaia 13:25, NW.
Yu Wanpela “Pren”?
Wanpela profesa bilong Loyola Yunivesiti long Sikago, nem bilong em Eugene Kennedy, em i bin raitim planti buk i stori long pasin na tingting bilong ol man. Dispela profesa i tok: ‘Planti manmeri ol i gat tingting kranki long pasin bilong i stap pren wantaim ol narapela manmeri. Ol i ting dispela pasin i kamap nating. Ol i ting ol yet i no ken mekim wanpela samting, tasol bai ol narapela man i pren gut wantaim ol.’ Wanpela nius i kamapim dispela tok bilong em (U.S. News & World Report) na i tok moa olsem: ‘Planti manmeri ol i no save long rot bilong pren gut wantaim ol narapela man, long wanem ol manmeri bilong nau i bin lainim ol long ting olsem, pasin bilong inapim laik bilong ol yet em rot bilong i stap amamas.’
Tasol Jisas i tok: “Amamas bilong man i givim samting long arapela man, dispela i winim amamas bilong man i kisim samting bilong em yet.” (Aposel 20:35) Sapos yu no tingim laik bilong yu yet, tasol yu givim ol samting bilong yu na taim na tingting bilong yu bilong helpim ol narapela man, na sapos yu mekim ol wok Kristen bilong helpim ol narapela man, bai yu kamap pren tru bilong ol. Bai yu gat planti gutpela pren, na bai ol i “pasgut” long yu, winim brata wanblut.—Provep 18:24.
Planti Sik
Wanpela nius (Washington Post) i tok, ol dokta i daunim pinis sik diptiria na smolpoks na polio, na nau ol man i ting ol nupela marasin inap pinisim ol narapela bikpela sik.
Tru ol marasin i pinisim ol sik? Dispela nius i tok moa, em i tok, long nau ol nupela sik nogut i kamap na i go bikpela. Long olgeta yia wanpela kain helt senta ol i kolim CDC (Centers for Disease Control long Atlanta, Jojia) i skelim 1,000 nupela sik, olsem AIDS samting.
Na nius i tok, ol man yet i as bilong planti sik. Long wanem, kain kain samting ol i bin wokim, olsem masin bilong kolwin samting, ol dispela samting i mekim na ol jem inap kamap planti. Ol jem i olsem ol samting bilong givim sik long man. Na nius i tok, long nau i gat ol balus na ol samting ol man i ken raun long en, na planti man i karim jem bilong ol sik i go long ol narapela narapela ples. Na nius i tok, long nau planti man i save mekim pasin pamuk na dispela i mekim ol sik bilong pamuk i go bikpela, olsem sik AIDS.
Ol dokta i painim pinis ol nupela kain marasin, tasol ol sik i wok long i go bikpela bikpela. Na i no sik tasol i go bikpela. Long nau pait na hangre na pasin nogut na bagarapim man, ol dispela samting tu i go bikpela. Dispela i truim tok bilong Krais, em i bin tok profet long taim “dispela graun i laik pinis,” olsem long las taim. Em i tok, “long sampela hap bai ol i gat . . . bikpela sik.”—Matyu 24:3; Luk 21:10, 11.