Taim Poroman i Bagarapim Marit

Meri i hevi nogut tru. Em i yangpela meri marit. Em i gat wanpela liklik pikinini na em i gat bel long namba tu pikinini. Tasol em i save man bilong em i no bin i stap gut long em. Man i bin mekim pasin pamuk na bagarapim marit! Bel bilong meri i bagarap tru long dispela hevi na em i tingting planti. Bai em i mekim wanem?

Long nau dispela kain hevi i save kamap planti taim. Long ol narapela narapela kantri planti marit ol i no i stap gut long poroman bilong ol. Ol i pamuk na dispela samting i kamapim bikpela hevi insait long marit bilong ol. Tasol sapos poroman bilong Kristen i mekim dispela kain pasin, Kristen i mas mekim wanem?

Em i ken tingim tok bilong Jisas, em i tok: “Sapos meri bilong wanpela man em bin brukim marit, na man i rausim em i maritim narapela meri, dispela man em i bagarapim marit.”(Matyu 19:9) Wanem insait bilong dispela tok? I olsem: pasin pamuk (olsem bagarapim marit o pasin sem, olsem pasin Sodom samting), dispela samting tasol i as bilong katim marit. Sapos poroman bilong Kristen i pamuk na bagarapim marit na Kristen i laik katim marit na maritim narapela poroman, em inap mekim olsem. Dispela i stret wantaim lo bilong Baibel na bai em i no gat rong long ai bilong God.

Tasol yu ting em i mas katim marit?

Pasin Bilong God

Wanpela samting i bin kamap long Isrel long bipo inap helpim yumi long bekim dispela askim. Wanpela profet bilong God, nem bilong em Hosea, em i maritim wanpela meri, nem bilong em Goma, na tupela i kamapim wanpela pikinini man. Tasol Goma i no stap gut long man bilong em. Em i pamuk wantaim sampela man na kamapim tupela pikinini moa. Bihain em i lusim Hosea na i go bihainim ol dispela man i bin prenim em. Tasol Hosea i mekim gutpela pasin marimari. Bihain em i kisim bek Goma maski em i mas tromoi mani bilong baim bek em. (Ating ol pren bilong em i bin lusim em na em i stap rabis tru na em i kamap slev, olsem na Hosea i mas baim bek em.) I stret Hosea i ken rausim meri bilong em, tasol em i no mekim. Em i sori long meri bilong em na mekim pasin marimari.

Baibel i stori long dispela pasin marimari bilong Hosea bilong makim bikpela i marimari God Jehova i mekim long Isrel. Ol Isrel i stap lain bilong God na mas pas gut long em olsem meri i pas gut long man bilong em. Wanpela taim Jehova i tok: “I olsem mi maritim ol na stap man bilong ol.” (Jeremaia 31:32, NW) Tasol olsem meri bilong Hosea, ol Isrel i no stap gut long “man” bilong ol. Ol i lusim Jehova. Planti taim ol i kirap lotuim ol god giaman. Ol i mekim pasin pamuk bilong spirit. (Hosea 6:10; 7:4) I stret long lo bilong God yet long God i rausim ol, olsem “katim marit,” tasol em i mekim wanem?

Olsem Hosea, em i mekim pasin marimari. Em i tok, sapos ol i lusim dispela pasin nogut ol i mekim bai em i kisim bek Em i wetim ol i “kam bek na wok long painim Jehova em God bilong ol na Devit em king bilong ol; na bai ol i guria na ol i kam long Jehova, na bai em i mekim gut long ol long taim bilong pinis.”—Hosea 3:5, NW.

Olsem wanem? Kristen inap mekim wankain pasin marimari? Taim poroman bilong em i mekim rong na bagarapim marit, em inap lusim tingting long dispela rong poroman i mekim?

Bilong Wanem Ol i Mekim Pasin Marimari

Kristen inap mekim pasin marimari olsem, na planti ol i bin mekim. Ol marit i mekim pasin pamuk, ol samting i painim ol long bihain i stap long han bilong poroman bilong ol. Na planti taim ol dispela poroman i sori long ol na lusim tingting long rong bilong ol. Bilong wanem ol i mekim pasin marimari olsem?

Wanpela samting em olsem: Ol i tingim gut marit, em presen God i givim, na ol i no ken pinisim nating. Na ol i tingim bikpela pasin marimari God i bin mekim long yumi olgeta. Na ol i save, taim yumi mekim pasin marimari long narapela man, God i save amamas long dispela pasin. Jisas i tok: “Ol man i save marimari long arapela man, em ol i ken amamas. Bai God i marimari long ol.”—Matyu 5:7.

Man i mekim rong, sapos em i pilim tru asua bilong em na em i hevi tru long rong em i bin mekim, i no hatwok long mekim pasin marimari long em. Ating poroman bilong em bai pilim olsem em i no ken tingim bikpela hevi em i bin givim long em, tasol em i laik helpim em long tanim bel. Sapos Kristen i mekim gutpela pasin sori olsem, ating dispela inap helpim poroman bilong em long pilim tru marit bilong em i gutpela samting na bai em i no laik bagarapim gen.

Na sampela taim i gat hevi long marit na nau wanpela i mekim pasin pamuk na bagarapim marit. Tasol man o meri i bagarapim marit, em i no ken kolim dispela samting bilong haitim rong bilong em. Nogat. I no stret tru em i mekim pasin pamuk na bagarapim marit. Tasol sapos poroman bilong em i tingim dispela hevi i stap long marit, ating dispela bai helpim poroman long save long ol samting em i ken mekim bambai dispela rong i no ken kamap gen.

Olsem: Ating man marit i save lusim planti aua long mekim wok mani o long mekim wanpela gutpela wok. Em i amamas long mekim dispela wok. Tasol olsem wanem long meri bilong em? Em i save lusim meri i stap wanpela tasol long haus na em i go mekim dispela wok. Em i no poromanim gut meri bilong em.

O olsem wanem long man marit em i go long wok na taim em i kam bek long haus, skin bilong em i les, tasol em i lukim haus i stap nating. Meri bilong em i no i stap, em i no bin redim kaikai o wasim klos o stretim haus liklik. Meri i go mekim sampela narapela wok, ating i no wok nogut. Tasol em i no tingim man bilong em o lukautim em gut. Man i les long dispela pasin bilong meri bilong em na em painim narapela meri. Taim dispela samting em i mekim i kamap ples klia, em i tokim meri bilong em: “Plis, lusim tingting long rong bilong mi. Mi no ken mekim gen dispela rong.” Tasol meri bilong em i laik katim marit, na i stret em i ken mekim olsem, long wanem man bilong em i mekim bikpela rong. Tasol yu ting dispela meri i no gat asua liklik long dispela hevi i kamap insait long marit bilong tupela?

Olsem wanem na taim poroman bilong Kristen i mekim rong na bagarapim marit, i gat kain kain samting Kristen i ken tingim na ating bai em i bihainim pasin bilong God na marimari long poroman bilong em. Sapos em i mekim olsem, planti gutpela samting inap kamap. Wanem ol gutpela samting?

Ol Gutpela Blesing Bilong Pasin Marimari

Namba wan em olsem: Planti man na meri ol i bin lusim tingting long rong bilong poroman bilong ol, ol i bin helpim marit bilong ol na nau tupela i pas tru na marit bilong ol i wok gut Man na meri na ol pikinini ol i stap amamas gen. Em wanpela gutpela samting inap kamap.

Na man o meri marit i lusim tingting rong bilong poroman bilong em, dispela samting inap kirapim poroman bilong em long laikim em moa yet na pilim tru gutpela pasin daun na pasin sori em i mekim maski em i bin kisim bikpela pen na hevi.

Dispela samting i painim yangpela meri marit, em mipela i bel hevi tru taim em i save man bilong em i bin mekim pasin pamuk. I stret long lo bilong Baibel long em i ken rausim man bilong em na katim marit. Tasol sapos em i mekim olsem, bai ol pikinini bilong em i no gat papa na bai meri yet i stap wanpis.

Olsem na dispela yangpela meri i tingim ol pikinini bilong em. Na em i tingim bikpela hevi man bilong em i pilim long dispela rong em i bin mekim. Na em i tingim gutpela pasin sori i bin i stap namel long tupela taim tupela i marit nupela, em narapela i laikim tru narapela. Em i tingim ol dispela samting na em i bihainim pasin bilong Jehova na mekim pasin marimari. Em i lusim tingting long rong bilong man bilong em, long wanem man i hevi tru long dispela rong em i bin mekim na em i tanim bel. Man bilong em i pilim tru dispela gutpela pasin meri bilong em i mekim. Meri bilong em i sori long em na wok long helpim em na nau em i kisim bek stretpela tingting na gutnem bilong em long ai bilong famili na ol poroman bilong em. Dispela hevi i pinis nau. Dispela famili i pas gut wantaim na i stap amamas. Ol i wok gut wantaim bambai ol inap i stap wantaim long bihain tu.

Beten na Tingting Gut

Man i kalapim lo bilong God em i mekim bikpela rong. Man o meri i bagarapim marit, em i gat asua long ai bilong God Jehova, em i As bilong marit. Sapos marit bilong ol i bagarap na ol i no inap i stap moa wantaim famili bilong ol, ol i mas save, em asua bilong ol yet na dispela hevi i painim ol. Sapos ol i laik pas gen wantaim God na wetim ol gutpela samting em i tok promis long en, ol i mas tanim bel. Ol i mas senisim tru tingting na pasin bilong ol. Ol i no ken mekim moa dispela pasin i no stret. Maski poroman bilong ol i lusim tingting long rong bilong ol o nogat, tasol sapos ol i laik i stap gut long ai bilong God, ol i mas mekim ol dispela samting.

Sapos poroman bilong yu i pamuk na bagarapim marit, yu no ken ting yu mas katim marit. Hosea i bin lusim tingting long rong bilong Goma, na planti taim Jehova i lusim tingting long rong bilong ol Isrel, em ol i mekim pasin pamuk bilong spirit. Olsem na sapos poroman bilong yu i mekim rong yu ken tingting long mekim ol samting bambai marit bilong yupela i no ken pinis. Yu ken beten na tingting gut. Olsem bai yu tingim gut dispela Man em i As bilong marit, na ating bai yu opim rot bambai yu wantaim poroman bilong yutupela inap i stap amamas gen.