Autim Gutpela Tok Long Samting i Moa Gutpela
“Kirap, kirap, O Saion, na kisim strong!”—AISAIA 52:1, NW.
1. (a) Ol nius i no tokim ol man long wanem samting? (b) Dispela Man em i As bilong ol gutpela tok, em i tok wanem?
LONG taim bilong yumi dispela singaut i bin kamap. Bilong wanem i kamap long taim bilong yumi? Long wanem nau em i taim bilong autim gutpela tok long ol gutpela samting moa bai painim ol man. Olsem wanem? Dispela gutpela tok i stap long ol niuspepa? Nogat tru! Ol dispela nius i laik stori tasol long ol pasin nogut na pasin sem i kamap long graun. Ol i no tokim ol man long rot bilong stretim ol dispela hevi. Long nau planti manmeri ol i pret. Ol i ting bihain bai ol man i tromoi ol bom nogut bilong nuklia ol i bin wokim na bagarapim dispela graun. God bai bekim pe nogut long ol man nogut. (Sam 110:5, 6) Dispela man i tok tu long gutpela taim bilong 1,000 yia em bai kamap, na bai dispela graun na ol manmeri i stap long en i kamap gutpela tru. Dispela tok em gutpela tok tru!—Revelesen 20:6; Sam 72:16, 18, 19; Rom 8:21.
2. Wanem singaut i kamap nau? Ol man i harim ol i mas mekim wanem?
2 Aisaia i singaut olsem: ‘Kirap, kirap!’ Bilong wanem ol i mas hariap na kirap? Long wanem, ol samting i bin kamap kirap long yia 1914 na i truim tok profet bilong Baibel i soim yumi, Kingdom bilong God long han bilong Krais Jisas i kamap pinis long heven na i wok i stap. Dispela Kingdom em i “biktaun bilong God,” em “Jerusalem i stap long heven.” Saion i makim oganaisesen bilong God long heven na dispela Saion i gat lain bilong en long graun. Nau ol i mas kirap, ol i mas wok strong. Long strong God i save givim long ol man i bihainim tok bilong em, ol i mas autim dispela gutpela tok.—Hibru 12:22; Aposel 5:32.
3. Aisaia i toktok long husat? Em i tokim em long mekim wanem?
3 Asaia i tok moa, olsem: “O Jerusalem, taun holi, pasim gutpela bilas bilong yu! Ol man i no bin katim skin na ol man i no klin, ol i no ken i kam insait moa long yu. O Jerusalem, lusim das bilong graun, na kirap, sindaun. O pikinini meri bilong Saion, yu stap kalabus, lusim ol samting i pas long nek bilong yu.”—Aisaia 52:1, 2, NW.
4. Dispela tok profet i kamap tru olsem wanem nau long taim bilong yumi?
4 Dispela tok profet i kamap tru long nau long taim bilong yumi! Long taim bilong Bikpela Pait bilong 1914-1918 ol Kristen, em spirit holi i bin makim ol, ol i stap kalabus long spirit. Sampela, na ol ofisa bilong Sosaiti Was Taua tu, ol i stap long kalabus tru. Tasol long 1919 ol i lusim kalabus. Ol dispela Kristen, ol i lain bilong Saion bilong heven, ol i kirap na “pasim gutpela bilas,” dispela bilas i gutpela long ai bilong God. Dispela bilas i olsem ol samting i makim ol ol i wokboi bilong Nambawan Bikpela bilong heven na graun. Ol i klia long olgeta pasin doti bilong skin na bilong spirit.—Lukim 2 Korin 6:17, long dispela ves Pol i kamapim tok bilong Aisaia 52:11.
5. Lain bilong God ol i mekim wanem na ol i bihainim singaut bilong Aisaia na pasin bilong Jisas?
5 Olsem na lain bilong God ol i lusim olgeta tok giaman na pasin giaman bilong lotu. Ol i bihainim pasin bilong Jisas na ol i tok, ol i “no bilong dispela graun.” Ol i no save insait long ol wok politik nogut bilong dispela graun o long pasin pait bilong en. (Jon 18:36; Revelesen 18:2, 4) Pastaim ol i stap daun, olsem long das bilong graun, tasol nau ol i kirap sanap na ol i stap gut long ai bilong God. Tasol sapos ol i laik bihainim tru lek bilong Bikpela bilong ol, i gat narapela samting ol i mas mekim na nau yumi ken stori long dispela samting.—1 Pita 2:21.
“God Bilong Yu i Kamap King Pinis!”
6. “Lek” bilong husat i bringim gutpela tok i kam? Em i kam bilong mekim wanem nau?
6 Putim gut yau long ol narapela tok dispela profet i mekim, olsem: “Man i wokabaut long ol maunten na bringim gutpela tok, lek bilong em i gutpela tru, em dispela man i autim tok long pasin sekan, na em i autim tok bilong wanpela samting i moa gutpela, na em i autim tok na tokim ol man long God bai kisim bek ol, na em i tokim Sion: ‘God bilong yu i kamap king pinis!’” (Aisaia 52:7, NW) Dispela Man i bringim tok bilong pasin sekan, em King Krais Jisas. Taim em i stap long graun, spirit bilong God i makim em bilong autim gutpela tok long ol man i bagarap tru long wok kalabus. Tasol nau long 1914, taim bilong “ol man bilong ol arapela lain” i pinis, na em i “kam bek olsem king, na olgeta ensel wantaim em.” Em i kamap king pinis na nau em i skelim ol lain man.—Luk 4:18; 21:24; Matyu 25:31, 32.
7. Dispela Man bilong bringim tok em i bringim wanem tok i kam?
7 Long tingting bilong yu lukim dispela Man bilong bringim tok, em i wokabaut strong long ol maunten. Em i laik tru long autim dispela gutpela tok long ol man i wok long painim God. “Lek” bilong em i gutpela tru! Lek bilong em i karim em i go kwiktaim mekim dispela wok bilong pasin sekan. Em i wok strong long autim tok long dispela “pikinini meri bilong Sion” bipo em i stap kalabus. Em i tokim dispela lain remnan bilong ol 144,000 Isrel bilong spirit, God i laik kisim bek ol. Na bihain bai Em i kisim bek ‘bikpela lain manmeri bilong olgeta lain, em ol man i no inap kaunim namba bilong ol.—Revelesen 7:4, 9, 10.
8. Wanem bikpela tok ol i mas autim? Bilong wanem i bikpela tok long nau?
8 Bikpela tok bilong dispela gutpela tok bilong pasin sekan, em olsem: “God bilong yu i kamap king pinis!” Husat dispela God? Olsem wanem em i kamap king? Em dispela God ol misin bilong Krisendom i no save laikim nem bilong em na ol i no save stori long em. Em Nambawan Bikpela King JEHOVA. Em dispela Man, long Aisaia 52 ves 5 na 6 (NW), em i tok: “Oltaim, long san olgeta, ol i toknogut long nem bilong mi. Olsem na lain bilong mi ol i mas save long nem bilong mi.” Na em i mas stretim bek nem bilong em, long wanem nau em i taim bilong skelim ol dispela lain. Ol tu i mas save long em na aninit long em, em i “King bilong ol lain man.”—Jeremaia 10:7, NW; Revelesen 14:7.
9. Nau “Bikpela bilong yumi” i mekim wanem wok? Na Krais bilong em i mekim wanem wok? (b) Olgeta man i litimapim nem bilong God ol i ken tenkyu long em long wanem samting?
9 Dispela Bikpela King em dispela “Bikpela bilong yumi” sampela maus long heven i tok long em taim ol i toktok long ol samting i bin kamap kirap long 1914. Ol i singaut strong na ol i tok: Bikpela bilong yumi wantaim Krais tupela i kamap king bilong olgeta graun! Na em bai i stap king oltaim oltaim!” Na ol narapela i lotuim God ol i tok: “Bikpela yu God I GAT Olgeta Strong. Yu stap nau, na bipo tru yu stap. Yu kisim pinis bikpela strong bilong yu, na yu stap king. Olsem na mipela i tenkyu long yu. [Ol lain man] i belhat, tasol belhat bilong yu i kamap pinis.” Kingdom i kamap pinis na nau Krais Jisas i wok king wantaim Papa bilong em, em Bikpela Jehova. Jisas i bihainim ol stretpela lo bilong God Jehova na mekim kot.—Revelesen 11:15, 17, 18; 12:10; Jon 5:30.
10. Pol i kamapim tok bilong Joel 2:32 na Aisaia 52:7 na soim yumi long wanem samting?
10 Dispela king i bringim tok i kam, i no em wanpela tasol i autim tok bilong pasin sekan. Nogat. Aposel Pol i kamapim tok bilong Joel 2:32 na em i tok: “Olgeta man i kolim nem bilong [Jehova] na i singaut long em, bai em i kisim bek ol.” Na bihain Pol i mekim sampela askim na em i kolim tok bilong Aisaia 52:7, em i tok: “Tasol, sapos ol i no bilip long em, olsem wanem bai ol i singaut long em? Na sapos ol i no harim tok bilong em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim? Na sapos God i no salim ol man bilong autim tok, olsem wanem bai ol i autim? Baibel i tok olsem: Ol man i bringim gutnius, olaman, ol i mekim gutpela pasin tru!”’—Rom 10:13-15.
11. Planti manmeri i mekim wanem long nau na i save, ‘lek’ bilong ol i gutpela?
11 Olsem na i gat sampela moa, em ‘lek’ bilong ol i gutpela. Ol dispela manmeri i bihainim gutpela tok dispela Man bilong tok bilong God i bringim. Na ol i kamap man bilong autim gutpela tok—bikpela lain ol i autim tok bilong Kingdom. Long nau ol inap olsem 2 milion hap samting, ol man na meri na pikinini bilong olgeta lain! Sapos yu insait long dispela lain, yu gat gutpela wok tru yu inap mekim—yu inap autim tok long “wanpela samting i moa gutpela”! Sapos lek tru bilong yu i karim yu i go oltaim long ol haus bilong autim tok long God i laik kisim bek ol man, orait, lek bilong yu i gutpela tru! Yu insait long truim bilong tok bilong Sam 19:4, em Pol i kamapim long Rom 10:18 na em i tok: “Nek bilong ol i go pinis long olgeta graun. Na tok bilong ol i go inap long olgeta ples.”—Lukim tu Sam 99:1-3; 148:12, 13.
Oganaisesen Bilong God i Mekim Wok!
12. (a) Nau em i bikpela taim bilong mekim wanem? (b) Ol i kisim save long wanem ol bikpela tok i tru long 1925?
12 Tru tumas, “God bilong yu i kamap king pinis!” Olsem na nau em i taim bilong litimapim nem bilong dispela God i gat laip, em Jehova, em Nambawan Bikpela King. Namel long 1920 na 1930 lain remnan ol i amamas, long wanem “God i save givim lait long ol stretpela manmeri.” God i givim save long ol long Kingdom bilong em. Na long yia 1925 ol i kisim wanpela Wastaua (tok Inglis bilong Mas 1) i stori long ol tok profet bilong Baibel i makim Kingdom bilong God i kamap pinis long heven long 1914, na King Krais Jisas i bin tromoi Seten wantaim ol ensel nogut i kam daun long graun, na oganaisesen bilong God na oganaisesen bilong Seten i mas pait i go inap long pinis.—Sam 97:11; Revelesen 12:1-12.
13. (a) Lain bilong God i kamap strong olsem wanem i go inap long yia 1938? Wanem samting i kamap long taim stret long 1938?
13 Dispela pait bilong spirit i stap yet, tasol ol manmeri i wok wantaim oganaisesen bilong Jehova, oltaim ol i kisim moa moa “lait” o save long Baibel na dispela samting i strongim ol, na lain bilong ol i go bikpela. Long 1938 inap 50,769 manneri i mekim wok bilong Kingdom. Wok bilong ol i go bikpela kwiktaim, olsem na ol i mas stretim gut ol wok, na Jehova i helpim ol long taim stret! Long 1938 ol i kisim tupela Wastaua (tok Inglis bilong Jun 1 na Jun 15) i stori long “Oganaisesen” Na long Julai na Ogas ol i kisim 4-pela Wastaua (tok Inglis) i stori long “Pait Bilong Em.” Ol i kirap bihainim tru lo bilong God long bosim ol kongrigesen bilong ol Witnes Bilong Jehova, na dispela samting i strongim ol taim pait bilong spirit i kamap strong moa. Olsem Aisaia sapta 60 ves 17 na 22 i tok, ol samting i kamap gutpela namel long lain bilong God na wok bilong Kingdom i go bikpela kwiktaim.
14. (a) Wanem samting long nau i wankain olsem ol wok Solomon i mekim bilong wokim ol haus? (b) Olsem na yumi gat wanem askim?
14 Ol Wastaua i stori long “Oganaiseen” ol i stori long ol samting i bin kamap taim Solomon i stap king (1,100 samting yia paslain long taim bilong Krais), na ol i skelim wantaim wok king bilong Krais i kirap long yia 1914 C.E. Solomon i kamap king na long namba foa yia bilong em, em i kirap wokim ol haus. Em i lusim 7-pela yia long wokim haus lotu, na narapela 13 yia long wokim haus bilong king. Na i wankain tu taim Bikpela Krais Jisas i kamap king. Namel long 1918 na 1938 em i kirapim bek tuupela lotu na strongim haus bilong God, em “lain bilong em.” (1 Pita 4:17) Laspela Wastaua i stori long “Oganaisesen” i tok:
“Baibel i makim olsem: Inap 20 yia Solomom i mekim wok bilong em long wokim ol haus, olsem yumi stori pinis, na bihain em i makim dispela wok long ol narapela hap bilong Isrel.(1 Kin. 9:10, 17-23; 2 Kro. 8:1-10) Na bihain kwin bilong hap bilong saut, em i stap long ‘arere tru bilong graun,’ em i kam bilong harim Solomon i autim gutpela save bilong em. (Mt. 12:42; 1 Kin. 10:1-10; 2 Kro. 9:1-9, 12) Olsem na yumi laik askim olsem: Wanem samting liklik taim bai kamap long lain bilong Jehova long graun? Yumi bilip na wet i stap.”
Orait, nau 46 yia i lus pinis na yumi lukim wanem samting i bin kamap?
Lain i Go Bikpela!
15. (a) Wanem lain long nau ol i olsem “kwin bilong hap bilong saut”? (b) Oganaisesen bilong God long graun i putim wanem ol samting bilong helpim dispela lain? Ol dispela samting i helpim ol olsem wanem?
15 Bikpela lain tru, ol i bilong “arere bilong graun” na “kwin bilong hap bilong saut” i olsem piksa bilong ol, ol i kam. Em ol “arapela sipsip” bilong Bikpela na ol i kam harim gutpela save Bikpela bilong ol, em King Krais Jisas, i autim. Dispela Man “em i winim Solomon.” Lain remnan ol i olsem ‘gutpela wokboi’ na Bikpela Krais Jisas i bin bungim ol na givim wok long ol hia long graun. Long rot bilong ol em i givim gutpela kaikai bilong spirit long ol man. (Mt. 12:42; 24:45-47) Maski Namba Tu Pait Bilong Olgeta Hap i kamap, tasol dispela “wokboi” i wok strong moa long dispela gutpela tok. Long yia 1943 i kirapim Skul Giliat long Saut Lansing Nu Yok long Amerika. Ol i lainim sampela gutpela wokman bilong God na salim ol i go mekim wok misineri long olgeta hap bilong graun. Long olgeta 6-pela 6-pela mun ol i salim 100 samting ol i go.
16. (a) Sat long pes 11 i makim wok i go bikpela olsem wanem kirap long 1943? (b) Wanem ol samting i bin kamap namel long 1973 na 1983?
16 Olsem wanem? Jehova i blesim ol wok oganaisesen bilong em long graun i mekim? Tru tumas. Lukim sat i stap long pes11 i makim lain bilong autim tok bilong Kingdom i go bikpela kirap long 1943 long olgeta 10-pela 10-pela yia bihain. Yumi tingim dispela 10-pela yia namel long na 1983. Namel long dispela taim i bin kamap na sampela man i bel nogut ol i lusim bilip na lusim oganaisesen. Tasol em i gutpela taim tu bilong stretim samting na strongim ol brata. Tru tumas, taim ‘ol taun i no bagarap yet,’ planti “sipsip” moa i mas i kam bung.—Aisaia 6:11; lukim tu Luk 22:31, 32; Matyu 25:31-33.
17. I gat wanem samting na ol Witnes Bilong Jehova long olgeta hap ol i ken amamas long nau?
17 Long yia 1983 wok bilong Kingdom i kamap strong. Long planti kantri bikpela lain moa ol i autim tok bilong Kingdom, winim olgeta taim bipo. Lukim blok long pes 12 na bai yu ken save long bikpela amamas ol brata i kisim, long wanem Jehova i mekim lain bilong ol i go bikpela. Long kirap bilong yia wok i go bikpela long olgeta hap na nau i gat 2,652,323 manmeri i autim tok bilong Kingdom long 205 kantri. Dispela lain i winim lain bilong 1982 inap 174,715. Yumi litimapim nem bilong Jehova long dispela gutpela blesing!—Malakai 3:10; Diuteronomi 28:12, 13.
18. Taim yumi harim tok long planti man i kisim baptais, dispela i mas kirapim yumi long mekim wanem?
18 Yumi amamas tu long lukim planti nupela man ol i dediket long Jehova na kisim baptais! Long ol “Stap Wanbel long Kingdom” Kibung Distrik bilong 1983, planti nupela man ol i kam bung wantaim lain bilong Jehova na ol i stap wanbel insait long oganaisesen bilong God. Inap 161,896 manmeri ol i bin kisim baptais long 1983. Dispela lain i go bikpela inap 17 pesen, winim yia bipo. Jehova i mas blesim wok bilong yumi long 1984 tu na bai yumi ‘kisim planti pis’ na painim planti nupela man moa ol i laik harim tok! (Jeremaia 16:16) Taim yumi painim pinis ol dispela gutpela manmeri, yumi mas givim kaikai long ol. Yumi mas mekim gutpela wok long Baibel na dispela buk Yu Inap i Stap Oltaim long Paradais long Graun.—Matyu 10:7, 11.
19. Ripot bilong Memorial bilong 1983 i soim yumi long wanem samting?
19 Na yumi amamas tru long harim tok olsem 6,767,707 manmeri long 46,235 kongrigesen ol i bung long Mas 29, 1983 na mekim Memorial. Inap 9,292 tasol ol i kisim bret na wain bilong makim ol i gat tingting long kisim laip long heven. Ol narapela ol i “arapela sipsip” na lain bilong ol i go bikpela inap 514,920, winim bilong 1982. Bikpela lain tru, ol i gat pasin daun, ol i laikim Kingdom bilong Jehova!
20. Yumi mas mekim wanem long ol nupela man i kam bung na ol manmeri ol i bin lusim wok bilong Jehova? Bilong wanem yumi mas mekim olsem?
20 Spirit bilong God i givim tingting long King Devit na Devit i tok: Ol manmeri i daunim nem bilong ol yet bai ol i stap gut long graun. Bai ol i sindaun gutpela tumas na amamas i stap. “ (Sam 37:11; lukim tu Matyu 5:5) Ol Witnes Bilong Jehova long olgeta hap ol i mas wok strong long helpim ol dispela manmeri i gat pasin daun, em ol i kam bung wantaim ol. Ol i mas helpim ol dispela manmeri i bin i kam bung long Memorial, na helpim ol manmeri bipo ol i save bung wantaim ol, tasol ol i lusim pinis wok bilong Jehova. Long pasin sori ol i mas helpim ol long ol samting bilong spirit. Jehova i no laik bai ol i lus. (Matyu 18:14) Ol dispela manmeri i mas “wasim klos bilong ol long blut bilong Pikinini Sipsip na klos i kamap waitpela,” na ‘klos’ bilong ol i mas i stap waitpela. ‘Bikpela lain’ i mas i go bikpela moa, em ol i gat pasin daun, ol i mas kirap, na dediket long Jehova na kamap, wokboi bilong em. Na bai ol tu i ken amamas long wok wantaim lain bilong Em na ‘autim tok long wanpela samting i moa gutpela.’—Revelesen 7:9, 14.
Bai yu bekim wanem tok?
□ Ol samting bilong truim tok bilong Aisaia 52:1, 2 i kamap olsem wanem long nau?
□ Olsem wanem long tok bilong Aisaia 52:5-7 na ol manmeri i autim tok bilong Kingdom?
□ Jehova i mekim wanem bambai lain bilong em i redi na lain bilong ol i go bikpela?
□ I gat wanem samting na yumi ken save, Jehova i bin blesim wok bilong lain bilong em, na em i bin blesim tru long 1983?
[Blok long pes 12]
Sampela gutpela ripot i kam long ol namba tu ofis bilong Sosaiti Was Taua long 1983:
▪ Kanada: Lain pablisa í go bikpela, winim yia bipo inap 13 pesen. I gat 77,003 ol i autim tok.
▪ Sili: Long mun Ogas lain pablisa long dispela hap i go bikpela, winim olgeta taim bipo. I gat 21,344 ol i autim tok. Dispela lain i go bikpela inap 25 pesen na 70,522 ol i bin i kam long Memorial.
▪ El Salvado: Namel long Janueri na Ogas, long olgeta mun, lain pablisa i go bikpela na nau i gat 12,008 ol i putim ripot. Dispela lain i go bikpela inap 25 pesen na 44,967 ol i bin i kam long Memorial.
▪ Aialan: Lain pablisa i wok long i go bikpela na long mun Ogas, long namba wan taim, inap 2,215 i autim tok. Inap 127 ol i bin kisim baptais. Dispela lain i go bikpela inap 17 pesen.
▪ Isrel: Long mun Epril, long namba wan taim, lain pablisa i go bikpela inap 297, em i go bikpela inap 14 pesen.
▪ Filapin: Paslain long ol kibung distrik bilong 1982 i gat 60,000 pablisa i autim tok. Bihain long ol kibung, dispela lain i go bikpela na i gat 70,000 ol i autim tok.
▪ Sri Lanka: Inap faipela mun, lain pablisa long dispela hap i go bikpela, na long mun Me long namba wan taim i gat 764 ol i autim tok—i go bikpela inap 14 pesen.
▪ Long wanpela kantri long Afrika ol i tambuim wok bilong yumi: Bikpela lain tru ol i bung long taim bilong Memorial, winim lain pablisa inap 2 taim. Inap 25,430 ol i bung.
[Sat long pes 11]
(For fully formatted text, see publication)
Wok Bilong Kingdom i Go Bikpela
(Ol i makim long ol 10-pela 10-pela)
Ol Manmeri i Autim Tok (Averes)
1943 109,794
1953 468,106 I go bikpela inap: 358,312
1963 956,648 I go bikpela inap: 488,542
1973 1,656,673 I go bikpela inap: 700,025
1983 2,501,722 I go bikpela inap: 845,049