“Holi Spirit i Givim Yumi Pasin Bilong i Stap Wanbel”
1. (a) Long Efesas 4:1-6 Pol i mekim wanem gutpela tok long pasin bilong i stap wanbel? (b) Olsem wanem na dispela tok i stret long yumi long nau tu?
POL i raitim pas long ol Kristen long Efesas na em i tok ol i mas i stap wanbel. Ol i mas bihainim pasin daun na bai ‘Holi Spirit i givim ol pasin bilong i stap wanbel.’ (Efesas 4:1-6) Pol i stap tupela yia long Efesas, em i save ol brata sista long dispela kongrigesen i kain kain. Ol i bilong ol narapela narapela lain. Tasol em i save long ol samting Jehova i bin givim long lain bilong em bilong helpim ol long i stap wanbel. Pol i kirapim ol Kristen long Efesas long pilim tru ol dispela samting na holimpas. Dispela samting em bikpela samting long nau tu. Bilong wanem? Long wanem long nau tu planti manmeri bilong “olgeta lain man, na bilong olgeta graun, na bilong olgeta kain skin, na bilong olgeta tok ples” ol i kam insait long lain bilong Jehova.—Revelesen 7:9, 10.
2. Jehova i mekim wanem bilong helpim lain bilong em long graun bambai ol i stap wanbel?
2 Jehova i mekim ol samting bilong kamapim laik bilong em na em i mekim lain bilong em i stap wanbel olsem lain sipsip insait long banis bilong sipsip.” (Maika 2:12, NW) Em i givim ol samting long ol bilong soim rot long ol bambai ol i no ken bruk nabaut. Em i mekim olsem wanem? Em i putim Pikinini bilong em, Krais Jisas, i stap het bilong kongrigesen. Long Baibel em i putim ol tok bilong kamapim laik bilong em, na long rot bilong oganaisesen bilong em long graun em i bosim wok bilong ol wokboi bilong em bambai ol i mekim wok i stret wantaim laik bilong em. Sapos yumi skelim ol samting God i bin mekim bilong soim rot bilong lain bilong Em bihain long 1919, dispela bai strongim bilip bilong yumi.
Redi Bilong Autim Tok long Olgeta Hap
3. Long taim bilong pinis, God bai mekim Wanem long lain bilong Kingdom, olsem Baibel i tok?
3 Taim Baibel i stori long pinis bilong dispela taim nau, Baibel i tok bai God i bungim gen “ol manmeri em i bin makim bilong em,” ol i olsem sipsip i ranawe nabaut, na bai ol i kamap wanlain tru na i stap wanbel. Bai em i bungim ol laspela manmeri bilong lain bilong Kingdom. (Matyu 24:31; 13:37-43, 47-50) Dispela samting i kamap olsem wanem?
4. Krais na ol ensel i mekim wok long wanem samting yumi inap lukim bilong bungim lain remnan? (b) Long wanem tupela rot God i helpim lain bilong em na ol i stap wanbel?
4 Baibel i tok Krais bai salim ol ensel bilong em bilong mekim dispela samting. No gat wanpela man long graun em inap lukim ol dispela ensel i mekim wok. Tasol yumi inap lukim ol samting i kamap long oganaisesen bilong Jehova long graun na yumi inap save, ol dispela ensel i wok i stap. Long taim bilong Namba Wan Pait Bilong Olgeta Hap ol man i mekim nogut long ol wokboi bilong Jehova, tasol bihain ol i kisim strong gen long rot bilong sampela tok bilong Wastaua, olsem ol tok bilong wanpela Wastaua bilong 1919 i stori long “Ol Manmeri i No Pret, Bai Ol i Kisim Blesing.” Jehova i gat bikpela wok yet bilong ol. Olsem na long bikpela kibung bilong 1919 long Sida Poin, Ohaio, ol i harim wanpela tok, nem bilong en: “Autim Tok Bilong Kingdom,” na ol i harim olsem bai i gat wanpela nupela nius bilong ol (tok Inglis), nau yumi kisim long tok Pisin na yumi save kolim Kirap! Dispela nius i bilong helpim ol man bambai ol i ken save long gutpela taim bilong Krais i stap king em bai kamap. Olgeta “manmeri [God] i bin makim bilong em,” ol i mas insait long dispela wok. Long 1922, long narapela kibung long Sida Poin, ol i harim strongpela tok long ol i mas “autim tok, autim tok, autim tok long King na kingdom bilong em.” Long 1925, ol i kisim save long olsem wanem wok ol wokboi bilong Jehova i bin mekim bihain long 1919 i stret wantaim ol tok bilong Revelesen sapta 12. Dispela samting tu i kirapim ol long wok strong moa. Na long 1931, long wanpela kibung bilong Kolombas, Ohaio, na long 50 narapela kibung, ol i tokaut long nupela nem bilong ol, em olsem: Ol Witnes Bilong Jehova. Dispela nem i makim ol dispela Kristen i narapela kain long ol narapela man ol i kolim Kristen, olsem Krisendom, na ol i mekim wok bilong God Jehova yet. (Aisaia 43:10-12) Jehova i helpim lain bilong em (1) long kisim save isi isi long ol tok bilong Baibel, na (2) em i kirapim ol long wok strong long autim tok bilong em. Long dispela tupela rot em i helpim ol long i stap wanbel.
5. Ol i wok wantaim na Jehova i soim rot long ol na wanem samting i kamap namel long 1921 na 1935?
5 Ol i liklik lain, tasol Jehova i soim rot long ol na ol i wok gut wantaim, olsem na tok bilong Kingdom i go kamap long olgeta hap bilong graun. Namel long 1921 na 1935 ol i tilim 205,217,917 buk na buklet long planti planti tok ples. Ol i tilim planti handet milion liklik nius na ol i mekim bikpela wok long redio. Olsem na planti tausen moa ol i harim tok na ol i dediket long Jehova na kisim baptais na spirit i makim ol. Wok bilong bungim lain bilong Kingdom i laik pinis. Tasol wok bilong autim tok long ol man em i no pinis. Jehova i redim lain bilong em long ol samting i laik painim ol long bihain.
Sanap Strong na Sakim Birua
6. Jehova i redim ol wokboi bilong em long wanem narapela samting?
6 Long taim bilong Namba Wan Pait Bilong Olgeta Hap, ol birua i mekim na lain remnan i kamap olsem wanpela lain sipsip i ranawe nabaut. Bihain tu ol birua i mekim nogut tru long ol na i laik daunim wok bilong ol olgeta. Tasol Jehova i redim ol na strongim ol bambai ol i no ken i stap moa olsem wanpela lain sipsip i ranawe nabaut. Jehova i strongim ol olsem wanem?
7. Taim ol Isrel i wokim gen haus lotu bilong Jehova, Jehova i helpim ol olsem wanem na ol i wok gut wantaim na ol i no pret long ol birua?
7 Taim ol Isrel i lusim Babilon na i go bek long ples bilong ol, ol birua i wok long pasim ol bambai ol i no ken wokim gen haus lotu bilong Jehova. Tasol Jehova i strongim ol. Em i kirapim ol profet na sampela man bilong givim tok bilong em long ol. Na spirit bilong Jehova i daunim ol samting i stap olsem maunten na i laik pasim rot bilong ol. Spirit bilong Jehova i strongim ol na ol i stap wanlain tru na ol inap wok gut wantaim.—Hagai 1:1-8; Sekaraia 4:1-14.
8. Jehova i strongim ol Kristen bilong pastaim olsem wanem?
8 Long taim bilong ol aposel tu ol birua i mekim nogut long ol manmeri i lotu tru long Jehova, na Jehova i kirapim ol aposel long raitim sampela pas bilong strongim ol na soim rot long ol. Ol dispela pas i makim Seten yet i as bilong dispela pasin birua. Seten i laik pasim maus bilong ol manmeri i autim gutpela tok bilong Kingdom. Em i save kirapim ol man long mekim nogut long ol, na long rot bilong ol giaman brata em i wok long brukim ol kongrigesen bambai ol i no i stap wanbel. Long dispela rot em i laik pasim wok bilong ol Kristen tru. Tasol olgeta man inap save husat i as bilong dispela samting. (Efesas 6:10-13; 2 Korin 11:12-15; 1 Pita 5:5-8) God i sori long ol na long maus bilong Pol, em i kirapim ol long ‘sanap wanbel, na helpim ol man long bilip long gutnius, na i no ken pret long ol birua.—Filipai 1:27, 28.
9. (a) Olsem wanem Jehova i helpim lain bilong em long nau? (b) Stori long sampela samting em i bin mekim bilong strongim ol.
9 Long taim bilong yumi tu Jehova i bin helpim lain bilong em na strongim ol. Em i mekim olsem long rot bilong lain remnan, em ol i olsem wanpela ‘gutpela wokboi.’ Jisas em i het bilong lain na dispela samting i helpim yumi long taim stret. (Matyu 24:45-47) Olsem na long 1925, dispela lain ol i olsem ‘gutpela wokboi,’ long rot bilong Wastaua ol i helpim ol man i kaunim tok bilong Wastaua long save, Kingdom bilong God i kirap mekim wok long heven long 1914, na i gat tupela oganaisesen tasol—em oganaisesen bilong Jehova na oganaisesen bilong Seten. Long 1929 ol i tokaut strong long wok bilong ol Kristen tru long bihainim tok bilong God i nambawan na tok bilong man i nambatu. Isi isi ol i stretim oganaisesen na long 1938 ol i kirap bihainim pasin bilong God long makim ol elda o wasman. Kongrigesen i no vot moa bilong makim ol. Dispela olgeta samting i helpim ol wokboi bilong Jehova long pas gut wantaim na i strongim ol. Em i helpim ol long taim stret!
10. (a) Olsem wanem na em i helpim ol long taim stret? (b) Taim ol man i kirap long birua long ol, Jehova i mekim wanem samting moa bilong helpim ol?
10 Long 1930 i go inap long 1939 na long taim bilong Namba Tu Pait bilong olgeta hap tu ol man i mekim nogut long ol Witnes Bilong Jehova long planti hap. Ol i putim planti long kot. Na long planti kantri gavman i tambuim wok bilong ol. Planti Witnes i kalabus longtaim long ol banis kalabus nogut. Tasol taim dispela hevi i laik painim ol, kwiktaim Jehova i strongim ol. Ol Wastaua (tok Inglis) bilong 1931 i stori long ol samting ol Juda i bin mekim long taim bilong Kwin Esta. Ol i pait bilong lukautim skin bilong ol yet na pasin wok nogut bilong ol birua. Ol Wastaua i skelim dispela wantaim ol samting yumi mas mekim long nau long pait bilong spirit. Long 1934 Wastaua i stori long tripela Hibru ol i bin tromoi ol long bikpela paia na Jehova i lukautim ol. Dispela tok i bilong strongim ol Witnes Bilong Jehova na taim bikpela traim i painim ol, olsem “paia,” bai ol inap bilip long Jehova na sanap strong. (Danye1 3:17, 18, 28) I gat bikpela wok bilong Jehova i stap yet na Jehova i no ken larim Seten wantaim lain bilong em i pasim dispela wok.
Bungim ‘Bikpela Lain’ Bilong Kisim Laip
11. (a) Jehova i redim ol wokboi bilong em bilong mekim wanem bikpela wok moa bilong autim tok? (b) Stori long sampela samting God i mekim i kamap bilong redim ol.
11 Wok bilong bungim “liklik lain” bilong Kingdom em i laik pinis na Jehova i kirapim lain bilong em long tingim narapela bikpela wok, em wok bilong lainim ol manmeri bilong ‘bikpela lain,’ em ol bai winim taim bilong “bikpela hevi tru” na i stap oltaim long Paradais long graun. Olsem na long 1918, presiden bilong Sosaiti Was Taua i mekim wanpela tok long Los Enjeles, long Amerika, na bihain planti handet moa ol i mekim gen dispela tok, nem bilong en: “Planti Milion Man Nau Ol i Stap Laip, Ol i No Ken i Dai.” Na long 1923 Wastaua (tok Inglis) i makim ol “arapela sipsip” bilong Jon 10:16 ol i wankain olsem “ol sipsip” long tok piksa bilong Jisas long sipsip na meme. Dispela lain i wok long kamap ples klia. Long 1931 ol i kisim save olsem ol tok bilong Esikiel 9:1-11 i makim dispela lain. Ol i kisim mak long pes bilong ol bilong kisim laip. Long 1932 ol i save Jonadap i olsem piksa bilong dispela lain. Jonadap i givim bel olgeta long God Jehova wanpela tasol. God yet i givim ol dispela save long lain bilong em bilong redim ol long save ol i kisim long 1935. Long 1935, long wanpela kibung long Wosington, ol i harim tok olsem ‘bikpela lain manmeri,’ em Revelesen 7:9-17 i stori long ol, ol i lain bilong graun. Planti handet long dispela kibung ol i bilong dispela lain. Spirit bilong Jehova i bosim wok bilong bungim dispela lain, na kwiktaim dispela wok i go bikpela.
12. (a) Taim God i kisim lain bilong graun i kam bung wantaim ol manmeri bilong lain bilong heven, olsem wanem dispela i no brukim lain bilong ol? (b) Ol i wok wantaim na Jehova i blesim wok bilong ol na wanem gutpela wok i bin kamap?
12 Taim dispela lain bilong graun i kam bung wantaim lain bilong heven, ol i pas gut wantaim o ol i bruk nabaut? Ol i pas gut wantaim. Ol i kamap “wanpela lain sipsip tasol”olsem Jisas i tok profet pinis, na Jisas em i dispela “wanpela wasman tasol” bilong ol. (Jon 10:16) Ol i save, maski ol i kisim laip long heven o long graun, ol i kisim long marimari bilong Jehova tasol. Na olgeta wantaim i gat wok long autim tok long nem bilong Jehova na long Kingdom bilong em. Na olgeta wantaim i mas i stap gut long ol lo Kristen. Ol i stap wanlain tru na ol i stap wanbel tru. Olgeta i wok wantaim long autim tok bilong Kingdom long olgeta hap bilong graun, olsem na bikpela lain manmeri ol i kam bung. Taim Namba Wan Pait Bilong Olgeta Hap i pinis, liklik lain Witnes tasol ol i autim tok bilong Kingdom. I go inap long 1941 na long dispela yia i gat 100,000 samting ol i mekim dispela wok long olgeta hap bilong graun. Long nau inap 2,652,323 ol i wok wantaim long autim tok bilong Kingdom. Ol samting i kamap olsem Jehova i bin tok long maus bilong profet Aisaia, olsem: “Man nating em bai kamap planti olsem wan tausen, na man i liklik em bai kamap olsem wanpela bikpela lain. Mi Jehova, mi yet bai mi hariapim dispela wok long taim stret bilong en.”—Aisaia 60:22, NW.
Wok Wantaim Bilong Wokim Ol Haus Kingdom Samting
13. Lain Witnes i go bikpela na Sosaiti Was Taua i mas mekim wanem bilong wokim ol buk? Olsem na wanem samting i bin kamap?
13 Lain Witnes i go bikpela na ol i mas i gat ol samting bilong helpim ol long mekim wok bilong ol. Namel long 1920 na 1929 haus faktori long Bruklin, Nu Yok i wokim olgeta buk na nius samting bilong ol Witnes Bilong Jehova. Tasol nau ol i gat ol haus faktori bilong mekim dispela wok long 30 narapela kantri. Long laik bilong ol yet ol brata i givim mani, olsem kontribyusen, bilong helpim dispela wok. Na sapos ol brata long wanpela kantri ol i sot, orait ol brata long narapela kantri i helpim ol.—Lukim 2 Korin 8:14.
14. Kirap long 1935 olsem wanem yumi bin kisim ol Haus Kingdom inap long bikpela lain ol i kam bung?
14 Long 1935 ol i kisim save olsem ‘bikpela lain’ ol i lain bilong graun. na long dispela yia presiden bilong Sosaiti Was Taua long dispela taim, em J. F. Rutherford, em i kolim wanpela ples bung ol Witnes long Hawaii olsem Haus Kingdom. Kirap long dispela taim na i kam inap long nau, ol Witnes Bilong Jehova i save kolim haus miting bilong ol olsem Haus Kingdom. Long 1940 i gat 5,118 kongrigesen tasol, tasol nau i gat 46,000 samting kongrigesen. Wok bilong ol witnes i go bikpela na ol i bin wokim planti nupela Haus Kingdom na Haus Kibung bilong helpim ol nupela man i laik harim tok. Ol i wok gut wantaim long givim mani na long mekim wok na ol i wokim ol dispela nupela Haus Kingdom na Haus Kibung. Lain bilong Jehova ol i stap wanbel na ol i givim bel olgeta long helpim wok!
15. Bilong wanem i bikpela samting yumi mas i gat gutpela haus inap long ol man i ken i kam bung long en?
15 Planti nupela man i kam long ol Haus Kingdom bilong ol Witnes Bilong Jehova long nau, winim olgeta taim bipo. Yumi amamas long olgeta manmeri ol i laik i kam bung na kisim save long ol pasin bilong Jehova bambai ol i ken bihainim ol dispela pasin. (Aisaia 2:2, 3 Hibru 10:23-25) Ol dispela nupela manmeri i pilim tru ol samting Jehova i mekim bilong lainim ol, olsem na yumi mas i gat ol Haus Kingdom inap long ol i ken i kam bung wantaim yumi na kisim save. Orait, yumi ken mekim wanem?
16. (a) Sapos kongrigesen i go bikpela na yumi mas kisim nupela Haus Kingdom, yumi mas ting olsem wanem long givim mani o mekim wok bilong helpim ol brata long kisim dispela haus maski yumi bai bung long en o nogat? (b) Sapos lain Witnes i go bikpela long wanpela hap i gat bikpela pe bilong baim haus o graun, orait ating ol brata i ken mekim wanem na bai ol inap kisim nupela Haus Kingdom?
16 Yumi save bung long ol narapela narapela kongrigesen, tasol yumi “wanpela lain sipsip tasol.” Yumi wanbel wantaim. Sapos yumi laik helpim planti manmeri moa bambai ol i ken save long lotu i tru na yumi laikim tumas ol brata kristen long yumi, bai yumi wok strong long mekim ol wok yumi inap mekim bilong helpim kongrigesen bilong yumi yet na ol narapela kongrigesen tu. Olsem wanem? Ol kongrigesen i kamap planti long wanpela hap na ol i mas wokim nupela Haus Kingdom? Orait, ol brata i bung yet long olpela Haus Kingdom, ol i ken helpim ol brata bilong kongrigesen i mas wokim nupela Haus Kingdom. Ol i bin tingting gut na wok gut wantaim na sanapim sampela nupela Haus Kingdom insait long tupela de tasol. Long sampela kantri, pe bilong baim graun o haus long taun i go antap tru. Olsem na ol kongrigesen wan wan i no gat mani inap long ol i kisim wanpela Haus Kingdom bilong ol. Tasol sapos sampela kongrigesen i wok wantaim, ating bai ol inap kisim. Taim ol brata i tokaut long sampela wok yumi inap mekim bilong helpim ol brata bambai ol i gat haus bilong bung long en na mekim miting, yumi save mekim wanem?
17. 1 gat wanem ol tok long Baibel i stret long dispela samting?
17 Taim ol Isrel i laik wokim haus lotu sel bilong Jehova, ol i givim bel long bringim ol mani samting i kam bilong helpim dispela wok. Ol i bringim planti samting tumas i kam. (Eksodas 35:5-9; 36:5-7) Bikpela mani samting ol i givim bilong helpim trupela lotu, God i no amamas long dispela tasol. Jisas i stori long wanpela meri wanpis em i putim mani long bokis mani bilong tempel. Maski em i givim liklik mani tasol, tasol Jisas i tok dispela meri em i mekim gutpela wok, long wanem em i sot tru, tasol em i givim olgeta mani bilong em. Aposel Pol i stori long pasin bilong givim kaikai o mani samting bilong helpim ol brata long samting bilong skin na em i tok: “Sapos man i laikim tumas long givim samting, orait God i laikim tumas dispela pasin. God i save ting long olgeta samting dispela man i gat, na em i skelim pasin bilong em long dispela. Em i no skelim em long samting em i no gat. . . . Nau long dispela taim planti samting bilong yupela em i ken inapim samting long ol man i sot. Olsem na sapos yupela i sot long samting na ol i gat planti, orait ol i ken inapim samting long yupela. Long dispela pasin bai yupela inap olsem ol. Em i olsem Baibel i tok, ‘Man i kisim planti kaikai mana, em i no gat planti tumas. Na man i kisim liklik, em i no sot.’” (2 Korin 8:12-15) Dispela tok i ken stiaim tingting bilong yumi na yumi ken wok gut wantaim long helpim ol brata long wokim nupela Haus Kingdom o skruim olpela Haus Kingdom i go bikpela maski yumi stap long dispela hap o nogat.
18. (a) Wanem samting i kirapim yumi long mekim wanpela Tokaut long ol “Stap Wanbel long Kingdom” Kibung Distrik? (b) Wanem insait bilong namba wan bikpela tok bilong dispela tokaut? (c) Wanem insait bilong namba tu bikpela tok? (d) Wanem insait bilong namba tri? (e) I gat wanem tok beten long pinis bilong dispela Tokaut?
18 “Holi Spirit i givim yumi pasin long i stap wanbel.” Lain bilong Jehova ol i stap wanbel na yumi olgeta wan wan inap helpim dispela pasin. Long ol “Stap Wanbel long Kingdom” kibung distrik yumi bin mekim wanpela tokaut Long dispela samting. Dispela tokaut i stap long pes 23. Gutpela sapos nau yu skelim ol tok bilong dispela tokaut na tingting long olsem wanem yu ken bihainim ol dispela tok.
Bai Yu Bekim Wanem Tok?
□ Jehova i lukautim yumi olsem wanem bambai yumi inap i stap wanbel?
□ Olsem wanem Jehova i stiaim ol samting bilong bungim na inapim lain bilong Kingdom?
□ Olsem wanem Jehova i strongim ol Witnes paslain long taim bilong Namba Tu Pait Bilong Olgeta Hap na long taim bilong pait tu?
□ Long wanem rot God i redim lain bilong em bilong bikpela lain ol bai kam bung wantaim ol kirap long 1935?
□ Olsem wanem yumi ken helpim ol brata i sot long Haus Kingdom?
[Blok long pes 23]
TOKAUT LONG I STAP WANBEL
Yumi ol Witnes Bilong Jehova i bung long “Stap Wanbel long Kingdom” Kibung Distrik, yumi laik tokaut olsem: Yumi pilim tru olgeta gutpela samting Jehova i bin mekim bilong helpim yumi. Yumi tenkyu tru long em, long wanem em i bin salim Pikinini bilong Em i kam na em i kisim yumi i stap lain bilong holim Nem bilong em.
Olsem na YUMI TOKAUT long ol samting yumi laik mekim: Namba wan, yumi laik holimpas pasin bilong i stap wanbel. Jehova i putim yumi i stap olsem wanpela lain sipsip long banis bilong em na yumi bilip tru olsem em bai soim rot long yumi na givim spirit bilong em long yumi bilong stiaim tingting bilong yumi. Namba tu, yumi laik wokabaut stret long ai bilong ol man long olgeta taim na wok strong long autim tok bilong Kingdom long olgeta man i laik harim. Na namba tri, maski husat husat i laik pulim yumi long lusim wok bilong Jehova, bai yumi sakim ol na sanap strong.
Na YUMI BETEN olsem: Yumi mas i stap gut bambai Jehova i ken laikim yumi, na oltaim yumi mas pilim gutpela wok yumi inap mekim, olsem yumi inap autim Nem bilong Jehova na autim gutpela tok bilong Kingdom bilong em i stap long han bilong Krais.
[Piksa long pes 25]
Ol i wok gut wantaim long givim mani na mekim wok bambai i gat ol Haus Kingdom inap long ol
[Rait long pes 26]
“Ol manmeri i bringim planti samting tumas. Ol samting inap pinis bilong mekim olgeta wok Bikpela i bin tokim mipela long mekim.”—Eksodas 36:5