Husat Ol i Stap Wanbel Namel Long Ol Man i Stap Birua Birua?
“Bai mi putim ol i stap gut, olsem lain sipsip insait long banis.”
—MAIKA 2:12, NW.
1, 2. Olsem wanem na yumi no ken wetim ol hetman bilong graun i helpim ol manmeri i kamap wanbel?
INAP planti tausen yia pinis ol manmeri i bruk long ol narapela narapela lain. Wok politik na ol samting bilong mani na bisnis na sindaun bilong ol i brukim ol i stap narapela narapela lain. Ol i stap birua birua na ol i save pait. Dispela samting i kamap moa nogut nau long taim bilong yumi. Long Namba Tu Pait Bilong Olgeta Hap inap olsem 55 milion manmeri i dai pinis. Na ol i bin tromoi tupela bom nogut bilong atomik long Hirosima na Nagasaki na bikpela bagarap tru i kamap.
2 Na long dispela taim planti narapela pait i bin kamap na planti milion manmeri i dai pinis. Nau planti gavman i gat ol bom nogut bilong nuklia na ol inap bagarapim olgeta man na meri na pikinini. I olsem wanpela nius bilong Englan (The Guardian) i tok, ‘ol lain man, ol liklik lain wantaim ol bikpela lain, ol i redim ol samting bilong pait na redim tingting bilong ol long mekim pait.’ Tru tumas yumi no ken wetim ol hetman bilong graun i helpim yumi. Ol i no inap helpim ol lain man long i stap Wanbel.
Ol Misin i Bin Mekim Wanem?
3, 4. Sapos yumi skelim ol samting i bin kamap, yu ting ol lotu bilong dispela graun ol inap helpim ol manmeri long kamap wanbel?
3 Tasol ating ol misin ol inap helpim ol lain man long i stap Wanbel? Nogat. Sapos yumi skelim ol samting ol i bin mekim bai yumi save, ol i no inap mekim. Wanpela nius (Chicago Tribune) i tok: “Olgeta bikpela lotu i save tok yumi mas i stap sekan na i stap olsem brata brata na sori long ol narapela man, tasol long nem bilong God ol yet i bin mekim nogut tru long sampela man na daunim ol tru.” Na wanpela edita (C. L. Sulzberger) em i tok, ol lotu i as bilong planti pait na ol i gat asua long blut bilong planti man.
4 Tru tumas. I gat planti pait bilong lotu i bin kamap. Na long taim bilong yumi, long Namba Wan na Namba Tu Bikpela Pait na long ol narapela pait tu, wanpela pasin i bagarapim tru nem bilong God em i bin kamap, em olsem: Katolik i kilim i dai Katolik, na Talatala i kilim i dai Talatala, na Muslim i kilim i dai Muslim, na Juda i kilim i dai Juda. Ol lotu bilong dispela graun i no bin helpim ol man long i stap wanbel. Nogat. Ol dispela lotu yet i mekim na ol man i bruk bruk na i stap birua birua.
5. Husat i as bilong ol lotu bilong dispela graun, em ol i bruk bruk?
5 Ol lotu i bruk bruk, olsem na yumi save God i no as bilong ol dispela lotu. Sampela man bai kirap nogut long dispela tok, long wanem ol i ting olgeta lotu i gutpela. Tasol Baibel i tok: “God i no save paulim nabaut ol samting. Nogat. Em i save mekim yumi stap wanbel.” (1 Korin 14:33) Spirit holi o strong bilong God i no save kamapim “pasin birua, na kros, na bel nogut, na mangal, na hambak, na tok pait, na brukim lain.” Spirit nogut i as bilong ol dispela kain pasin. (Galesia 5:19, 20) Jems 3:14, 15 i tok, save i as bilong ol dispela kain pasin i “kamap long olpela bel, na Seten em i papa bilong en.” Seten em i “god giaman bilong dispela graun.”—2 Korin 4:4.
Haus i Bruk
6. Wanem lo Jisas i kolim i makim stret ol samting i mas painim ol manmeri bilong dispela graun?
6 Ol lain man i bruk bruk na yumi tingim tok bilong Jisas, em i tok: “Sapos ol man bilong wanpela kingdom ol i bruk tupela lain na ol i pait, bai dispela kingdom i bagarap. Na sapos ol man bilong wanpela taun o wanpela haus ol i bruk tupela lain na ol i pait, dispela taun o haus i no inap i stap.” (Matyu 12:25) Olsem na ol man bilong dispela graun ol i mas bagarap, long wanem ol i bruk bruk. Olgeta man i save, yumi mas i stap wanbel bambai yumi no ken bagarap.
7. Sampela man i save, i mas i gat wanem samting na bai yumi no ken bagarap?
7 Olsem na planti bikpela man bilong graun i tok, ol man i mas senisim tingting bilong ol. Wanpela saveman bilong saiens (Harold Urey) em i tok: “I gat wanpela rot tasol bilong stretim ol hevi bilong ol man, em olsem: I mas i gat wanpela gavman tasol bilong bosim olgeta hap bilong graun.” Na narapela bikpela saveman bilong saiens, em Albert Einstein, em i tok, i mas i gat wanpela lo tasol bilong bosim olgeta lain man na bai ol inap sindaun gut wantaim. Einstein i tok: ‘Yumi mas pinisim olgeta samting nogut i brukim ol man i stap narapela narapela lain.’ Tru tumas, planti man i save, i mas i gat wanpela gavman tasol bilong bosim olgeta hap bilong graun.
8. Ol lain man bilong dispela graun ol i bruk bruk, ol inap abrusim bagarap?
8 Tasol yu ting ol gavman bilong dispela graun i laik lusim wok bilong ol long bosim graun na givim long narapela man? Na ol bai givim long husat? Ol i no ken givim long Yunaitet Nesen. Ol lain man i no save harim tok bilong Yunaitet Nesen. Taim ol i laik pait, ol i save pait. Ol manmeri bilong dispela graun i gat narapela narapela tingting politik na narapela narapela kain sindaun na narapela narapela kain lotu. Ol i bruk bruk na bagarap i mas painim ol.—Sefanaia 3:8; 1 Jon 2:15-17.
Ol i Stap Wanbel Tru
9. Ating ol lain man i no inap i stap wanbel o olsem wanem?
9 Olsem na ating ol lain man i no inap i stap wanbel? Nogat! Mipela bilip tru na tok olsem: Bai olgeta lain man i stap wanbel. Dispela samting i mas kamap! Na sampela manmeri ol i stap wanbel pinis! I gat wanpela lain ol i mekim olsem Einstein i tok, ol i lusim ol samting i ‘brukim ol i stap narapela narapela lain’ na ol i stap wanbel tru. I gat wanpela gutpela gavman i stap, em i winim ol narapela gavman na i bosim olgeta hap bilong graun. Planti milion manmeri bilong olgeta lain ol i givim bel long dispela gavman.
10. Wanpela gavman tru em i mas i gat wanem ol samting?
10 Tasol ating yu laik save, mipela i toktok long wanpela gavman tru i gat ol lo tru bilong en, na i gat sampela manmeri ol i bihainim ol lo bilong en? Dispela gavman em wanem gavman? Na ol dispela manmeri i stap wanbel tru, ol i husat? Wanpela gavman tru i gat (1) ol hetman bilong en ol i stap laip, na (2) i gat ples tru em i stap long en, na (3) i gat ol lo bilong en, na (4) i gat ol manmeri i stap aninit long en. Olsem gavman bilong Papua Niugini. Gavman bilong yumi i gat ol hetman bilong en, em praim-minista na ol memba, na i gat ples bilong en, em Mosbi, na i gat ol lo bilong en i bosim yumi. Na yumi ol manmeri i stap aninit long dispela gavman yumi inap olsem 3 milion samting. Olsem na dispela gavman em i wanpela gavman tru, a?
11. Ol nius i tok wanem na yumi save, i gat wanpela lain i stap ol i wanbel tru?
11 Na olsem tasol i gat wanpela lain tru long nau ol i stap wanbel! Ol i husat? Na ol i mekim wok bilong wanem gavman? Olsem wanem na yumi inap tok ol i stap wanbel tru? Wanpela nius bilong Brasil (O Tempo) i tokaut long dispela lain ol i narapela kain tru. Nius i tok: “I gat planti bikpela bikpela lotu i stap long olgeta hap bilong graun na ol i save kamapim ol tok bilong ol, tasol i no gat wanpela lain ol i pas tru wantaim na narapela i sori long narapela olsem ol Witnes Bilong Jehova.”
12. Wanem tingting, em wanpela nius bilong Beljam i kamapim, em i stret wantaim bilong ol Witnes Bilong Jehova?
12 Na wanpela nius bilong Beljam (La Nouvelle Gazette) i putim het-tok, olsem: “Saveman Bilong Amerika i Tok i Gat Wanpela Rot Tasol na Bai Man i No Ken Pait na Tromoi ol Bom Nogut Bilong Nuklia, Em Olsem: Dispela Rot Witnes Bilong Jehova Wanpela Rot Tasol na Bai Ol Man i No Ken Pait na Tromoi Ol Bom Nogut Bilong Nuklia, Em Olsem: Dispela Rot Ol Witnes Bilong Jehova i Tok long En!” Dispela nius i tok, ol man i mas ‘senisim sindaun bilong ol … na ol i mas laikim wanpela gavman tasol i bosim ol.’ Long dispela rot tasol bai gutaim na pasin sekan inap kamap. Tingting bilong ol dispela saveman i stret wantaim ol tok ol Witnes Bilong Jehova i autim. Wanem dispela tok? Em dispela tok Jisas i bin autim, olsem: Gavman bilong God, em kingdom bilong em long han bilong Krais, dispela wanpela gavman tasol bai bosim olgeta hap bilong graun. Dispela gavman em rot bilong God bilong stretim hevi bilong ol man. No gat narapela rot. Dispela rot tasol. Jisas i lainim ol Kristen long beten long God na tok olsem: “Kingdom bilong yu i mas i kam.” (Matyu 6:10) Na Danyel 2:44 i tok, dispela Kingdom o gavman bai ‘bagarapim olgeta narapela kingdom na em yet bai stap oltaim.’
Ol i Mekim Pasin Sori Tru na i Stap Wanbel Tru
13. Wanem samting i kamap long 1914 na bai i gat wanpela gavman bilong bosim olgeta hap bilong graun?
13 Ol samting i kamap bihain long 1914 olsem Baibel i tok profet long en ol dispela samting i soim yumi, dispela gavman bilong God i kirap pinis long mekim wok bilong en long heven. Long 1914 God i putim Krais Jisas i stap King bilong dispela gavman. (Matyu 24:3-14; 2 Timoti 3:1-5; Revelesen 12:10) Ol gutpela lo bilong dispela gavman i stap long buk i holi moa, em buk bilong God o Baibel. (2 Timoti 3:16, 17) Kirap long 1914 Gutpela Wasman, Krais Jisas, i bin wok long bungim ol manmeri ol bai stap long Nupela Taim bilong God. Olgeta dispela samting i samting tru na i kamap tru.—Matyu 25:31-46; Jon 10:14-16; 2 Pita 3:13.
14. Wanem pasin i save brukim ol man i stap narapela narapela lain, tasol ol Witnes i lusim pinis dispela pasin?
14 Ol Witnes Bilong Jehova ol i bilong i stap long dispela Nupela Taim, olsem na ol i givim bel pastaim long kingdom o gavman bilong God. Taim ol i kaunim tok bilong Jisas, em i tok, “Yupela i mas laikim tru ol brata, olsem mi laikim yupela,” ol i bilipim dispela tok na ol i mekim olsem tasol long olgeta hap bilong graun. (Jon 15:12) Ol manmeri bilong dispela graun i save birua long man bilong narapela lain na ol i bruk bruk. Tasol ol Witnes i lusim pinis dispela pasin na ol i stap wanbel. Ol i save laikim olgeta manmeri, maski ol i bilong wanem lain o wanem ples o wanem kain skin.
15, 16. Ol man bilong ausait i tok wanem na i save ol Witnes i lusim pinis pasin bilong birua long man bilong narapela lain na ol i stap wanbel?
15 Wanpela sister Katolik i raitim tok long wanpela nius bilong lotu long Itali (Andare alle genti) na em i tok long ol Witnes Bilong Jehova, olsem: “Yumi mas litimapim nem bilong ol, long wanem ol i sakim olgeta pasin bilong pait na bagarapim man. Maski ol man i givim kain kain hevi long ol, tasol ol i no bikhet … Sapos long wanpela moningtaim yumi olgeta yumi kirap na yumi pasim tok pinis long bel bilong yumi olsem yumi no ken pait moa olsem ol Witnes Bilong Jehova, bai pasin bilong dispela graun i kamap narapela kain!”
16 Wanpela nius bilong Itali (Il Corriere de Trieste) i tok: “Yumi mas litimapim nem bilong ol Witnes Bilong Jehova, long wanem ol i holimpas bilip na ol i autim klia ol tok. Ol i no olsem ol narapela lotu. Ol i no save beten long dispela wanpela God long nem bilong Krais na askim God long blesim tupela lain wantaim em ol i pait. Nogat. Ol i stap wanbel, olsem na ol i no inap mekim olsem. Na ol i no save insait long ol wok politik o bihainim laik bilong sampela Hetman bilong Gavman o sampela lain politik.”
17. Long 1 John 3:10-12 na Jon 13:35 Baibel i tok wanem long mak bilong ol pikinini bilong God na ol pikinini bilong Seten?
17 Dispela i stret wantaim tok bilong Baibel long 1 Jon sapta 3 ves 10 i go inap 12, em i tok: “Sapos yumi laik save husat i pikinini bilong God, na husat i pikinini bilong Seten, orait yumi ken save olsem: Man i no mekim stretpela pasin, em i no bilong God. Na man i no save laikim tru brata bilong en, em tu i no bilong God. Bipo tru yupela i harim tok olsem: Yumi mas laikim tru ol brata. Yumi no ken i stap olsem Ken. Em i man bilong Seten, na em i kilim i dai brata bilong en.” Ol pikinini bilong God ol i laikim tru ol brata wanlotu bilong ol, ol i no save kilim ol i dai. Ol pikinini bilong Seten i save kilim i dai ol brata bilong ol.—Jon 13:35.
18. Ol manmeri bipo ol i stap birua, taim ol i kamap Witnes, olsem wanem long ol?
18 Olsem na long Lebanon, taim sampela Arap o Juda o man ol i tok ol i Kristen ol i kamap Witnes Bilong Jehova, ol i no birua moa. Ol i save pas tru wantaim long pasin sori na ol i stap wanbel. Na i wankain tu long hap bilong Noten Ailan. Ol man bilong dispela hap, bipo ol i Katolik o Talatala, taim ol i kamap Witnes ol i no birua moa. Na ol blakskin na waitskin long Amerika na ol manmeri bilong ol narapela narapela lain bilong Afrika, em bipo ol i stap birua birua na ol i save pait, taim ol i kamap Witnes ol i no birua moa. Ol i save pas gut wantaim na i stap wanbel na narapela i laikim narapela. Wanpela nius bilong Englan (New Society) i stori long dispela samting, olsem: ‘Taim nupela man i kam insait long lain Witnes, kwiktaim ol i lainim em long lusim pasin bilong birua long man bilong narapela lain. Ol Witnes i winim ol narapela lain long mekim dispela samting.’
As Bilong i Stap Wanbel
19. I gat wanem tupela samting na ol Witnes Bilong Jehova i narapela kain?
19 Tasol olsem wanem ol Witnes bilong Jehova inap i stap wanbel olsem na narapela i laikim tru narapela? Ating ol i bin winim bikpela skul o ol i gat bikpela nem o bikpela mani kago o bikpela save? Nogat. Ol i man nating tasol. Tasol i gat tupela samting na ol i narapela kain: (1) Ol witnes Bilong Jehova i bilip olsem olgeta tok bilong Baibel em i tok bilong God na ol i wok strong long bihainim ol dispela tok. Olsem aposel Pol i tok: “Bipo yupela i kisim tok bilong God long maus bilong mipela, tasol yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela bilipman.” (1 Tesalonaika 2:13) Na (2) ol Witnes Bilong Jehova i bihainim pasin bilong ol aposel bilong Krais, em ol i tok: “Mipela mas bihainim tok bilong God tasol. Mipela no ken bihainim tok bilong ol man.”—Aposel 5:29.
20. Wanem as tru bilong pasin wanbel i stap namel long ol Witnes bilong Jehova?
20 Wanem samting i save painim ol manmeri ol i bilip olsem olgeta tok bilong Baibel em i tok bilong God na ol i wok long bihainim? Aposel 5:32 i tok, God i save “givim Holi Spirit long ol manmeri i bihainim tok bilong em.” Em, dispela samting i as bilong strong bilong ol Witnes na ol inap i stap wanbel maski olgeta narapela lain i no i stap wanbel.
21, 22. (a) Olsem na husat ol i truim tok profet bilong Aisaia 2:2-4? (b) Wanem ol samting, em Baibel i tok profet long en, i painim ol Witnes long nau?
21 Orait, husat i truim tok profet bilong Aisaia sapta 2 ves 2 i go inap 4 (NW)? Aisaia i stori long taim bilong yumi na em i tok, long dispela taim bai lotu bilong Jehova i kamap strong, na bai planti manmeri i tok: “Yupela kam, na yumi go antap long maunten bilong Jehova . . . na bai em i lainim yumi long pasin bilong em, na bai yumi wokabaut long rot bilong em.” Na Aisaia i tok, bai Jehova i “bosim gut ol lain man na stretim ol samting bilong planti lain man. Ol i mas wokim ol bainat bilong ol i kamap samting bilong wokim gaden, na ol i mas wokim ol spia bilong ol i kamap sisis bilong katim han bilong diwai. Narapela lain i no ken holim bainat bilong pait long narapela lain, na ol i no ken lain moa long pait.”
22 Husat ol i bin larim God na tok bilong em long Baibel i “stretim ol samting” namel long ol? Husat ol i bin bihainim tok bilong God na ‘ol i no lain moa long pait’? Husat ol i bin i stap kalabus inap planti planti yia, long wanem ol i no laik insait long pait na kilim i dai ol narapela man? Husat ol i bilip tru olsem Baibel em i tok bilong God na ol i bihainim ol tok bilong God? Husat ol i stap olsem ol brata brata namel long ol man i stap birua birua? Em ol Witnes Bilong Jehova tasol. Nau planti handet tausen “arapela sipsip” ol i kam bung wantaim hap lain bilong “liklik lain sipsip,” em ol i stap yet long graun, em lain remnan. (Jon 10:16; Luk 12:32) Wanpela tok profet God i mekim long maus bilong Hosea i kamap tru long nau na i helpim ol dispela “arapela sipsip” tu. Em i tok, bai olgeta wokboi bilong em ‘i bung wantaim na i stap wanbel’ aninit long wanpela Hetman, em Krais Jisas, em i kisim pinis strong bilong bosim Kingdom. (Hosea 1:11) Ol i stap wanbel na dispela samting i truim tok bilong Jisas. Em i beten long God na em i tok, em i laikim olgeta disaipel ol i ken “i stap wanbel,” olsem em wantaim Papa i stap wanbel. (Jon 17:20-22) Olsem na God i bin truim tok promis bilong em, olsem: “Bai mi putim ol i stap gut, olsem lain sipsip insait long banis.”—Maika 2:12, NW.
Yu Tingim Ol Dispela Tok
□ Olsem wanem yumi save, God em i no as bilong ol lotu bilong dispela graun?
□ 1 Jon 3:10-12 i tok wanem na i makim ol manmeri ol i stap wanbel tru namel long ol man i stap birua birua?
□ Wanem as tru bilong strong bilong ol Witnes na ol inap i stap wanbel? Olsem wanem na ol i kisim dispela strong?
□ Wanem ol gutpela tok profet long lain bilong God i mas i stap wanbel ol i kamap tru long nau?
[Piksa long pes 12]
Sampela manmeri bilong olgeta hap ol i stap wanbel pinis!