Painim Gutpela Amamas Long Kaikai Bilong Marit

1, 2. Bilong wanem yumi tingting gut long ol kaikai bilong marit?

BAIBEL i tok, long “las taim” bai ol man i “laikim tumas kain kain amamas bilong bodi, na ol i no laikim God.” Ating yu yet yu lukim dispela pasin i kamap long nau. (2 Timoti 3:1-4) Planti taim long ol kaikai bilong marit yumi inap lukim kain pasin olsem.a Olsem na yumi mas ting olsem wanem long kaikai bilong marit? Ating ol Kristen i no ken wokim kaikai bilong marit o i go long kaikai bilong marit? O ating i gat sampela pasin yumi mas abrusim bambai yumi no kamap man bilong “laikim tumas kain kain amamas bilong bodi”?

² Ol manmeri i wokim kaikai bilong marit o ol i go long kaikai bilong marit, yumi no ken tok ol i man bilong “laikim tumas kain kain amamas bilong bodi,” long wanem Jisas na ol disaipel bilong em ol i bin i go long wanpela kaikai bilong marit long Kena.

3. Long taim bilong Baibel ol i save wokim kaikai bilong marit o nogat?

³ Marit em i taim bilong amamas. Man na meri i marit, tupela i amamas, na famili na ol pren bilong ol tu i amamas. Long bipo yet ol i save wokim kaikai bilong marit na amamas wantaim (Jenesis 29:21, 22; Hetman 14:3, 10, 17) Ol Juda i save long dispela pasin bilong wokim kaikai long taim bilong marit, olsem na long tripela tok piksa Jisas i stori long kaikai bilong marit. (Matyu 22:2-14; 25:1-13; Luk 14:7-11) Hap bilong Revelesen long Baibel i tok: “Ol dispela man God i bin singautim i kam long bikpela kaikai bilong marit bilong Pikinini Sipsip, em ol i ken amamas.”—Revelesen 19:9.

4. Olsem wanem long planti kaikai bilong marit?

⁴ Ol wokboi bilong God long bipo—Jisas na ol disaipel tu—ol i painim gutpela amamas long ol kaikai bilong marit. Na planti tausen Kristen long nau tu, ol i bin painim gutpela amamas long taim bilong kaikai bilong marit. Wanpela Witnes long Saut Afrika i marit na em i singautim wanpela wanblut i kam lukim marit. Dispela wanblut em i no wanpela Witnes. Bihain dispela wanblut i tok: “Bipo mi no save long gutpela pasin bilong ol Witnes long wokim kaikai bilong marit. Long planti kaikai bilong marit mi bin i go long en bipo i gat planti tumas dring na musik i pairap bikpela na mi les long dispela pasin.” Yes, planti Kristen i wokim kaikai bilong marit long gutpela pasin.

5. Tasol wanem sampela hevi i bin kamap?

⁵ Tasol ol samting bilong. dispela graun i laik pulim yumi long kamap man bilong “laikim tumas kain kain amamas bilong bodi.” Olsem na sampela elda Kristen i tok:

‘Planti ol i ting taim ol i go long kaikai bilong marit, ol i no ken bosim moa skin. Ol i ting ol i no inap amamas olsem long ol narapela taim, olsem na long kaikai bilong marit ol i mekim nabaut na bihainim kain kain laik bilong skin. Ol i no i stap isi liklik.’—Yurop.

“O1 i save tingim taim bilong marit i olsem taim bilong harim wanpela tok, na kisim liklik kaikai, na danis danis, mekim save i go inap long bikmoning tru. Sampela i pilim olsem long kaikai bilong marit ol i ken dring, winim skel, na planti taim ol i dring tumas.”—Latin Amerika.

“Taim ol i wokim kaikai bilong marit, ol i save danis i go inap tulait. Sampela kaikai bilong marit i kamap olsem pati nogut—ol i bihainim pasin bilong ol manmeri bilong dispela graun na ol i singaut nabaut na dring planti na mekim danis nogut. Planti ol i laik resis na ol i pasim klos i dia tumas na baim planti katon bia.”—Afrika.

Was Gut

6. Yumi tingim tok bilong bos bilong kaikai long Kena na yumi save long wanem samting i save kamap long planti kaikai bilong marit bilong ol Juda?

⁶ Planti manmeri i save, long kaikai bilong marit long Kena, Jisas i tanim wara i kamap wain. Tasol yumi mas tingim dispela samting, olsem: “Bos bilong kaikai em i traim dispela wara nau i kamap wain, na em i . . . singautim dispela man i marit, na em i tokim em, ‘Olgeta man ol i save tilim gutpela wain pastaim. Na bihain ol man i dring planti pinis, orait ol i save tilim wain i nogut liklik.”’ (Jon 2:9, 10) Em i no tok, ol man i go long dispela kaikai bilong marit ol i dring planti tumas na spak. Nogat. Jisas i no ken orait long pasin bilong spak na dring longlong. Sapos ol i spak em i no ken wokim sampela wain moa. Tasol dispela bos bilong kaikai i save, long planti kaikai bilong marit bilong ol Juda ol manmeri i save dring planti tumas na ol i save spak.

7. Sapos Kristen i laik putim dring, olsem wain o bia samting, long kaikai bilong marit, em i mas tingim wanem samting?

⁷ Long sampela kaikai bilong marit long nau ol i no putim bia o wain samting, long wanem long hap bilong ol, planti man i save dring tumas, na nogut ol man i kam long kaikai ol i dring planti tumas na hevi i kamap. Sampela brata long Afrika i tok, sapos i no gat bia o wain long taim bilong marit, dispela marit i kamap marit Kristen tru. Long sampela hap, ol man i pilim olsem i no stret ol Kristen i dring, olsem na long kain hap olsem i gutpela sapos i no gat dring long kaikai bilong marit. (Rom 14:20, 21) Tasol yumi mas skelim gut. Askim skin bilong yu yet: Dispela kaikai bilong marit Jisas i go long en, em i ‘nogut’ long wanem i gat wain? Baibel i no tambuim wain samting. Nogat. Baibel i tambuim pasin bilong dring planti na pasin bilong spak.—Provep 23:20, 21; 1 Pita 4:3.

8, 9. (a) Sapos ol i putim dring, olsem wanem ol i ken was gut, nogut sampela i dring planti tumas? (b) Wanpela elda i tok wanem long dispela hevi?

⁸ Man na meri i marit, sapos tupela i laik putim dring, olsem bia o wain samting long kaikai bilong marit, tupela i mas bihainim gutpela tingting na i no ken putim planti tumas dring. (1 Timoti 3:2; Matyu 23:25) Long dispela kaikai bilong marit long Kena, ol man i kam long dispela kaikai ol i kisim dring olsem wanem? Ating “ol wokman” i givim long ol. (Jon 2:5, 9) Olsem na ating man na meri i marit bai ol i makim sampela man bilong givim dring long ol man i kam long kaikai (na ating ol bai makim skel ol i ken givim). Tasol taim ol Kristen i wokim kaikai bilong marit ol i mas putim orens o ti na kofi tu bilong ol manmeri i no laik dring wain o bia samting.

⁹ Wanpela elda long Sentral Amerika em i tok: “Hevi i kamap long wanem ol i singautim bikpela lain tumas i kam bung na ol i no inap bosim. Na sampela taim sampela man bilong ausait ol i kam nating long kaikai, ol i no bin singautim ol i kam, na ol i kisim planti dring i kam na pasin ol i mekim i bagarapim gutpela nem bilong ol Kristen.” Olsem na husat i mas bosim ol samting i kamap long kaikai bilong marit? Gutpela sapos ol i singautim hamas man i kam? Ol i mas mekim wanem kain pasin long ol kaikai bilong marit?

Husat i Mas Bosim?

10. Ol i ken bihainim wanem pasin Baibel i stori long en na bai ol inap bosim gut kaikai bilong marit?

¹⁰ Long kaikai bilong marit long Kena, i gat wanpela “bos bilong kaikai.” (Jon 2:9) Olsem na long kaikai bilong marit long nau tu, ating bai ol i makim wanpela brata em i gat save na gutpela tingting na em i ken bosim dispela kaikai. Em i save long laik bilong man na meri i marit na em i ken bosim musik na ol wokman i sutim kaikai na ol narapela tu, o em i ken toktok wantaim tupela na harim tok bilong ol. Em i ken bosim tu ol atendan, olsem ol man bilong givim sia long ol man i kam long kaikai. Em i ken wok wantaim ol long helpim ol manmeri i kam long kaikai, na ol i ken was, nogut sampela man ol i no bin singautim ol, ol i kam insait. Tingim ol samting i bin painim dispela man Jisas i stori long em, em i go long kaikai bilong marit, tasol em i no mekim pasin i stret long wanpela kaikai bilong marit.—Matyu 22:11-13.

11. Man na meri i marit, sapos tupela i laik makim wanpela man bilong helpim tupela long bosim kaikai, tupela i mas tingim wanem samting?

¹¹ Long kaikai bilong marit bilong ol man bilong ausait, planti taim menesa bilong haus bung o nambawan bilong string-ben samting, em i bosim ol samting ol i mekim long kaikai. Ating em i mekim sampela tok olsem em i save mekim long olgeta kaikai bilong marit na mekim sampela tok pilai i no gutpela. Tasol sapos yu laik bai ol samting long kaikai bilong marit i stret wantaim ol lo Kristen, yu ting i gutpela sapos wanpela man bilong ausait—em i no wanpela brata bilong spirit o wanpela famili bilong yu—em i bosim ol toktok na ol samting ol manmeri i mekim? Sapos yu larim wanpela man bilong ausait i bosim kaikai, ating yu no mekim gutpela pasin long ol brata Kristen. Tasol Baibel i tok: “Yumi mas mekim gutpela pasin long olgeta man. Tasol yumi mas strong tru long mekim gutpela pasin long ol brata i bilip long Bikpela.”—Galesia 6:10.

12. Em wok tru bilong husat long bosim ol samting long kaikai bilong marit, olsem Baibel i makim?

¹² Planti taim famili bilong man o meri i laik marit ol i wokim kaikai bilong marit. Ol i baim ol samting, olsem na ol i ting ol yet i mas bosim dispela kaikai. Ol i laik makim husat i ken i kam long dispela kaikai na wanem kain kaikai o dring bai ol i putim. Na ol i laik bosim ol samting ol manmeri i mekim long dispela kaikai. Baibel i no tok husat i baim kaikai long kaikai bilong marit long Kena, tasol Baibel i tok, taim wanpela bikpela samting i kamap, “bos bilong kaikai em i singautim dispela man i marit.” (Jon 2:9) Taim man i marit, nupela famili i kamap na em i het bilong en. Baibel i makim olsem. (Efesas 5:22, 23) Olsem na long kaikai bilong marit em i wok tru bilong dispela man i marit long bosim ol samting. Em i mas mekim long pasin sori na tingim gut laik bilong meri bilong em na famili bilong tupela. Tasol em yet i mas tok long ol samting i ken kamap na ol samting i no ken kamap long dispela kaikai bilong marit.

Husat Bai Kam?

13. Long taim bilong Baibel ol i save singautim planti man i kam long kaikai bilong marit o olsem wanem?

¹³ Long taim bilong Baibel, ating ol i save singautim bikpela lain tru i kam long kaikai bilong marit o liklik lain tasol, em yumi no save. Taim Samson i marit, papamama bilong em i go long kaikai bilong marit na 30 poroman bilong meri bilong em ol i go na ating i gat sampela moa tu, olsem sampela famili bilong tupela. (Hetman 14:5, 10, 11, 18) Long marit bilong ol Juda, ol i save singautim ol wanlotu bilong ol, na sapos sampela man bilong narapela hap i stap long ples long dispela taim, ol i save singautim ol tu i kam. Jisas na ol disaipel bilong em ol i bilong narapela hap bilong Galili, tasol ol i go long kaikai bilong marit long Kena. Na long dispela kaikai i gat planti wain, olsem na ating ol i bin singautim planti man i go long dispela kaikai. Jon 2:1, 2, 6.

14, 15. Sampela i mekim wanem na olgeta manmeri i kam long marit ol i ken kisim liklik kaikai na amamas wantaim tupela? Tasol wanem sampela hevi i bin kamap?

¹⁴ Long nau ol man i gat kain kain laik na tingting. Sampela i laikim bikpela kaikai bilong marit na sampela, nogat. Long sampela hap, taim man na meri i marit, ol i tok olgeta manmeri i laik i kam ol i ken i kam; olgeta brata Kristen i save gut long dispela man na meri ol i ken i kam. Ating ol bai givim liklik sanwis o kek samting long ol, i no bikpela kaikai, tasol bai ol inap sekanim man na meri i marit na toktok wantaim tupela na amamas wantaim. Sampela taim ol i tok, olgeta pren bilong man na meri marit ol i ken i kam, na planti ol i save kisim sampela kaikai i kam. Ol i bungim ol dispela kaikai na long dispela rot i gat kain kain kaikai inap long olgeta na i no putim hevi long man na meri i marit o long narapela man—Apose1 20:35.

¹⁵ Taim yumi kaunim ol tok piksa bilong Jisas yumi save, long marit bilong ol Juda ol i save wokim bikpela kaikai bilong marit. (Matyu 22:2; Luk 14:8) Tasol yumi mas tingting gut na stretim gut ol samting sapos yumi laik wokim bikpela kaikai bilong planti man long nau. Wanpela mama long Amerika i stori long wanpela samting nogut i bin kamap long wanpela kaikai bilong marit, em i tok:

‘Taim ol i save i gat marit, ol yangpela bilong longwe longwe ol i kam bilong kisim nating kaikai na danis. Ol manmeri mipela bin singautim ol i kam long marit, ol i stap yet long Haus Kingdom na ol dispela narapela i go long ples bilong kisim kaikai bilong marit. Ol i kisim pinis olgeta ples sindaun long ol tebol, na taim mi kam insait mi laik krai. I no gat ples bilong ol manmeri mipela bin singautim ol i kam. Mi bel hevi tru. Ol i no mekim pasin sori. Ol i kam nating na kisim kaikai mipela bin redim bilong ol pren tru na ol wanblut.’

16. Long Baibel ol manmeri i kam nating long kaikai bilong marit o olsem wanem?

¹⁶ Maria na Jisas wantaim ol disaipel bilong em, ol i no i go nating long dispela marit long Kena. Nogat. Ol i bin “singautim” ol. (Jon 2:1, 2) Jisas i tok: “Sapos wanpela man i singautim yu na yu go long kaikai, . . . (Luk 14:8, 9, 16, 17) Long tok piksa bilong marit bilong pikinini man bilong king, Jisas i stori long ol manmeri ol i “singautim ol i kam.” (Matyu 22:3, 9, 10) Wanpela man, ol i bin singautim em i kam, tasol em i no mekim pasin i stret bilong de bilong marit, olsem na ol i rausim em. Na 5-pela yangpela meri i laik i go insait long wanpela kaikai bilong marit, ol i no larim ol i go insait. (Matyu 22:11-13; 25:10-12) Olsem na yumi no ken kirap nogut long nau sapos ol man ol i bin singautim ol na ol i putim klos i stret bilong marit ol tasol i ken i go long kaikai bilong marit. Gutpela pasin bilong man i wokim kaikai bilong marit em i no bilong helpim ol man ol i tingting tasol long kisim kaikai na painim amamas.—Filipai 3:18, 19; Eklisiastis 5:11.

17. Sampela ol i wokim bikpela kaikai bilong marit na singautim planti man na wanem hevi i bin kamap?

¹⁷ Man na meri i marit o famili bilong tupela, sapos ol i laik redim bikpela kaikai bilong planti man, ating bai ol i tromoi bikpela mani. (Skelim Mak 6:35-37.) Wanpela ripot i kam long hap bilong Pasifik i tok:

‘Planti ol i save wokim bikpela kaikai tumas. Sampela i kisim bikpela dinau bambai ol inap wokim bikpela kaikai bilong marit. Olsem na taim ol i marit nupela ol i gat bikpela dinau. Ating ol i sem long putim liklik kaikai tasol, olsem na ol i kisim dinau bambai ol inap wokim bikpela kaikai.’

Taim yangpela man na meri i marit nupela, sapos tupela i gat bikpela dinau, dispela inap kamapim kros namel long tupela. O sapos papamama o famili bilong tupela i bin wokim bikpela kaikai bilong marit na nau ol i mas tromoi bikpela mani bilong stretim dinau, yu ting bai tupela i amamas? Nogat, a? Ol man bilong ausait ol i laik hambak na sampela ol i save wokim bikpela kaikai tru na ol i gat bikpela dinau tru. (Provep 15:25; Galesia 6:3) Tasol yu ting ol Kristen tru i ken bihainim kain pasin olsem? Luk 12:29-31 i tok wanem?

18, 19. (a) Sampela ol i gat wanem tingting na ol i wokim bikpela kaikai bilong marit? (b) Sapos wanpela pren bilong yu em i no singautim yu i go long kaikai bilong marit bilong em, yu mas ting olsem wanem? (Luk 14:12)

¹⁸ Sampela man i wokim bikpela kaikai bilong marit na as bilong dispela i olsem: Ol i laik resis na winim ol narapela man. Sampela elda long Wes Afrika i tok:

‘Sampela i save tromoi bikpela mani na wokim bikpela kaikai. Ol i ting man i tromoi bikpela mani moa, em i winim ol narapela. Olsem na sampela i pret long putim liklik kaikai tasol. Tasol yumi no ken bihainim pasin bilong dispela graun, olsem pasin bilong ai gris. Na yumi no ken ting yumi mas mekim olgeta pasin ol narapela man i mekim.—Lukim 1 Jon 2:15-17.

¹⁹ Na sampela i pilim olsem ol i mas wokim bikpela kaikai, nogut ol i wokim liklik kaikai tasol na ol i no singautim sampela man na ol dispela man i kros. Olsem na ol i wokim bikpela kaikai na singautim planti man. Ol i no bihainim gutpela tingting. Tasol yumi no laik bai ol brata sista i pret, nogut yumi kros, na ol i wokim bikpela kaikai na kisim bikpela dinau na ating dispela bai pasim ol long mekim wok painia samting, a? Sapos ol i no singautim yumi, yumi ken save ol i bin skelim gut olgeta samting, mani bilong ol tu, na ol i no inap singautim planti man. Sapos ol i no singautim yumi, ating as bilong dispela i olsem: Ol i save yumi strongpela Kristen na yumi no ken kros sapos ol i no singautim yumi. (Eklisiastis 7:9; 1 Korin 13:4-7) Tasol yumi inap amamas wantaim ol—yumi ken i go harim tok bilong Baibel taim tupela i marit, em bikpela samting. Sapos yumi ting dispela tok i samting nating na yumi ting kaikai bilong marit em i bikpela samting, ating yumi laik kamap man bilong “laikim tumas kain kain amamas bilong bodi, na ol i no laikim God.”—2 Timoti 3:4.

20. Sapos yumi no singautim planti tumas manmeri i kam long kaikai, ating bai i no gat wanem ol kain pasin i kamap?

²⁰ Sapos yumi skelim gut hamas manmeri bai yumi singautim i kam long kaikai bilong marit na pe bilong baim ol samting, bai i no gat sampela pasin nogut i kamap. Olsem: Sampela ol i laikim tumas mani na ol i baim narapela kain laplap bilong wokim klos bilong marit. Bihain, taim wanpela man na meri i laik marit, ol i baim dispela laplap i go long ol long bikpela pe moa. Long sampela kaikai bilong marit, ol i bin tokim ol manmeri i kam long dispela kaikai long “baim” kek, o taim ol i laik danis wantaim meri i marit nupela, ol i mas “baim” em, olsem pinim mani long dres bilong em. Sampela ol tingting tumas long mani na ating dispela i as bilong wanpela pasin sampela i save mekim long kaikai bilong marit, em ol i save hambak long mani bilong ol na tromoi bikpela mani long ol man i wokim musik. O ol i givim bikpela mani, olsem presen, bilong “baim sia” na long kaikai bilong marit bai ol inap kisim nambawan sia klostu long man na meri i marit nupela.—Luk 14:8-11.

Helpim Olgeta long Painim Amamas

21. Olsem wanem long musik long kaikai bilong marit?

²¹ Long taim bilong pait bilong ol Makabi, long wanpela marit bilong ol Juda, ol manmeri i holim tamborin na mekim musik ol i kam bungim man na meri marit long rot. (1 Maccabees 9:39, The Oxford Annotated Bible; skelim wantaim Sam 45:8) Long nau tu, long planti kaikai bilong marit bilong ol Kristen, ol i save putim musik. Em inap helpim ol long amamas moa yet long dispela taim—o em inap bagarapim amamas bilong ol. Olsem wanem? Long wanem sampela taim ol i putim musik i pairap tumas na ol i no bosim. Sampela man bilong wokim musik ol i save laikim musik kain olsem bilong disko, o ol i laik bai ol man i ken lukim save bilong ol long wokim musik na ol i mekim nabaut na mekim save wokim musik. Tasol dispela kain pasin i no stret long kaikai bilong marit bilong ol Kristen. Sapos musik i pairap tumas na man i sindaun klostu long narapela man i no inap harim ol tok em i mekim, bai ol i no inap toktok gut wantaim. Na bai ol yangpela wantaim ol lapun i no amamas.

22. Yumi ken mekim wanem na bai i no gat sampela hevi long musik?

²² Tru tumas, yumi mas was gut long musik yumi putim long kaikai bilong marit na i mas i gat man bilong bosim. Sapos i gat string-ben o wanpela man i wokim musik, yumi mas was gut moa yet. Gutpela sapos yumi no kisim ol man bilong ausait bilong wokim musik. Sapos ol i baim sampela man bilong wokim musik, brata i marit o brata ol i makim bilong bosim musik, em i mas tokim ol dispela man wanem kain musik ol i ken wokim na wanem kain musik ol i no ken wokim. (Eksodas 32:6, 17, 18) Em i mas tokim ol, ol i no ken wokim musik long laik bilong ol manmeri i kam long kaikai, ol i mas askim man i marit pastaim o “bos” bilong kaikai. Planti taim sapos i gat wanpela string-ben o wanpela man i wokim musik bai i gat hevi, long wanem ol i wokim musik i no stret long ol Kristen o ol i wokim pairap tumas. Olsem na planti brata sista i save kisim plet-singsing o kaset na putim musik ol yet i laikim, na ol i makim wanpela brata i bikpela pinis na em i bosim musik. Em i no larim ol yangpela i no strong long spirit long putim wanem wanem kain musik ol i laikim.—1 Korin 13:11; Hibru 5:14.

23-25. I gat wanem ol narapela samting man na meri i marit i ken mekim na bai kaikai bilong marit i kamap olsem gutpela bung Kristen?

²³ Ol Kristen i marit nupela ol i laik bai ol manmeri i bin i kam long kaikai bilong marit bilong ol, ol i ken amamas taim ol i tingim bek ol samting i bin kamap long dispela kaikai. Olsem na sapos i gat musik long dispela kaikai o musik na danis, em i mas stret wantaim ol tu Kristen. Sapos ol i makim sampela man bilong mekim sampela tok, ol man ol i makim na ol tok ol dispela man i mekim em i mas stret long wanpela bung bilong ol Kristen.

²⁴ Long tok piksa bilong 10-pela yangpela meri, kaikai bilong marit i kirap ‘long biknait’ long wanem man i marit nupela em i no kam kwik. (Matyu 25:5, 6) Na long narapela tok piksa Jisas i tok king i tokim ol wokboi bilong em long redim kaikai bilong marit na em i salim ol i go singautim ol man long rot. Olsem na yumi save dispela kaikai bilong marit i kamap long san. (Matyu 22:4, 9) Long nau sampela kaikai bilong marit i go inap long biknait, na taim ol strongpela Kristen i lusim na i go long haus bambai ol i ken slip, nau ol narapela i kirap na mekim nabaut. Olsem na sampela nupela marit i makim taim bilong kaikai i mas kirap na taim em i mas pinis. Olsem bai olgeta manmeri i kam long dispela kaikai ol i ken tingim gut ol samting ol i mas mekim na redi long mekim ol wok Kristen bilong ol long de bihain long marit.

²⁵ Ol Kristen inap painim gutpela amamas long kaikai bilong marit sapos ol i tingting gut na mekim pasin i stret. Tasol man na meri i marit, tupela i no ken tingting tasol long de bilong marit. Tupela i mas tingting long bihain. Tupela i mas tingim ol wok bilong Kristen tru tupela i mas mekim taim ol i marit pinis.

[Futnot]

Tingim Sampela Tok Hia?

□ Bilong wanem ol Kristen i mas was gut long ol kaikai bilong marit?

□ Gutpela sapos ol i mekim wanem taim ol i putim wain o bia samting long kaikai bilong marit?

□ Em wok tru bilong husat long was long ol samting i kamap long kaikai bilong marit?

[Piksa long pes 17]

Bos bilong kaikai i askim man i marit long wain