Ol Bung Bilong Marit i Givim Biknem Long Jehova
WELSH NA ELTHEA I BIN MARIT LONG SOWETO, SAUT AFRIKA, LONG 1985. SAMPELA TAIM, BILONG TINGIM DISPELA DE BILONG AMAMAS TUPELA I SAVE LUKLUK LONG OL PIKSA BILONG OL LONG MARIT WANTAIM PIKININI MERI BILONG OL, ZINZI. EM I SAVE AMAMAS TRU LONG KOLIM NEM BILONG OL LAIN I BIN KAM LONG DISPELA MARIT NA EM I AMAMAS MOA YET LONG OL PIKSA BILONG MAMA BILONG EM TAIM EM I PASIM OL NAISPELA KLOS BILONG MARIT.
LONG wanpela haus bung bilong Soweto, wanpela brata i kirapim bung bilong marit long wanpela tok i stori long marit. Bihain, sampela yangpela Kristen i mekim ol singsing i save litimapim nem bilong God. Taim singsing i pinis ol lain i kaikai i stap na harim musik long sampela kaset bilong ol singsing bilong Kingdom, tasol ol i no opim tumas, nogut krai bilong en i bikpela na i pasim ol long toktok. Ol i no bin tilim ol wain samting long ol lain i bin kam long dispela marit, na musik i no pairap, na i no gat ol danis. Olsem na ol lain i kam long dispela marit i kisim amamas long bung wantaim ol narapela na mekim sampela tok bilong amamasim tupela nupela marit. Dispela bung i stap inap 3-pela aua samting. Wanpela elda Kristen, nem bilong em Raymond, i tingim dispela marit na em i tok olsem: “Taim mi tingting bek long dispela marit, mi save amamas.”
Taim Welsh na Elthea i bin marit, tupela i mekim wok volantia long brens-ofis bilong Sosaiti Was Taua long Saut Afrika. Ol i no gat bikpela mani bilong mekim planti bilaspasin o singautim bikpela lain long kam long bung bilong marit. Sampela Kristen, taim ol i laik marit ol i save lusim wok painia samting na kisim wok mani bambai ol i ken wokim bikpela bung bilong marit na i gat planti bilas samting long en. Tasol Welsh na Elthea i no bel hevi long ol i bin wokim bung bilong marit i no gat bikpela pe bilong en, long wanem, dispela i helpim ol long mekim yet wok bilong God long olgeta de i go inap long taim Elthea i karim Zinzi.
Tasol olsem wanem sapos yangpela man na meri i pasim tok long marit na ol i laikim sampela musik bilong dispela graun na sampela danis long bung bilong marit bilong ol? Olsem wanem sapos ol i laik baim wain na bia samting bilong ol lain i kam long dispela bung? Sapos ol i gat mani inap long mekim, ating i orait long wokim wanpela bikpela bung bilong amamas long marit o nogat? Ol i ken mekim wanem na dispela de i stap olsem samting bilong amamas na samting i helpim ol lain i lotuim God? Yumi mas tingim gut ol dispela askim, long wanem, Baibel i tokim yumi olsem: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”—1 Korin 10:31.
Abrusim Pasin Bilong Hambak Nabaut
I hatwok long tingim wanpela bung bilong marit i no gat amamas long en. Tasol nogut ol i tingting long ol amamas tasol na ol i no bosim skin na sampela pasin i no gutpela tumas i kamap long dispela bung. Long planti marit bilong ol lain i no Witnes, i gat ol samting i save kamap i no givim biknem long God. Olsem, pasin bilong dring spak i save kamap planti taim. Na sori tru, dispela i bin kamap long sampela marit bilong ol Kristen tu.
Baibel i toksave long yumi olsem: “Man i dringim planti bia, em bai i tok bilas na tok nogut na pait nabaut.” (Sindaun 20:1) Long tok Hibru, insait bilong tok i stap long dispela skripsa i olsem “wokim bikpela pairap.” Sapos wain na bia samting inap mekim na wanpela man i wokim bikpela pairap tumas, em nau, pairap inap kamap bikpela moa yet sapos i gat bikpela lain i stap na ol i dring planti tumas! Tru tumas, kain bung olsem inap kamap olsem bung bilong “spak na hambak na singaut bikmaus nabaut,” Baibel i makim ol dispela samting olsem “pasin bilong olpela bel.” Sapos man i no tanim bel, ol dispela pasin nogut inap pasim em long kisim laip oltaim aninit long Kingdom bilong God.—Galesia 5:19-21.
Long tok Grik dispela tok “spak na hambak” i makim sampela yangpela i spak liklik na raun long rot na singsing na danis na wokim musik. Sapos ol lain i stap long bung bilong marit i wok long dring planti, na musik i pairap tumas na ol i mekim save long danis na kalap kalap nabaut, samting nogut inap kamap, olsem ol i bung bilong spak na hambak nabaut. Long kain bung olsem, ol lain i no strong tumas long samting bilong spirit ol inap pundaun long traim, na ating ol bai insait long sampela narapela pasin bilong olpela bel, olsem “pasin pamuk na pasin doti na pasin bilong bel i kirap long mekim ol pasin nogut, . . . na belhat.” Ol man inap mekim wanem na pasin bilong olpela bel i no inap bagarapim bikpela amamas bilong bung bilong marit bilong Kristen? Bilong bekim dispela askim, yumi ken tingim wanpela marit Baibel i stori long en.
Wanpela Marit Jisas i Bin Go Long En
Sampela lain i bin singautim Jisas wantaim ol disaipel long wanpela bung bilong marit long Kana bilong Galili. Ol i go, na tu Jisas i bin mekim samting long dispela bung ol lain i amamas long en. Taim wain i laik pinis, Jisas i wokim mirakel na kamapim sampela wain moa i gutpela tru. Taim bung i pinis, ating bihain nupela man marit wantaim famili bilong em i mekim wok inap long sampela hap taim long wain i stap yet.—Jon 2:3-11.
Dispela marit Jisas i bin go long en i ken lainim yumi long sampela samting. Wanpela samting i olsem: Jisas na ol disaipel bilong em i no go nating long dispela bung bilong marit. Baibel i tokaut klia olsem ol lain i bin singautim ol. (Jon 2:1, 2) Na tu, long tupela narapela tok piksa bilong bung bilong marit, planti taim Jisas i tok ol man i stap long dispela bung, long wanem, ol lain bilong wokim dispela bung ol i bin singautim ol na ol i kam.—Matyu 22:2-4, 8, 9; Luk 14:8-10.
Pasin bilong sampela kantri i olsem, long bung bilong marit olgeta man i stap long dispela hap i gat laik long go bai i go, maski ol lain i singautim ol o nogat. Tasol dispela inap kamapim sampela hevi long mani. Ating tupela i laik marit ol i no laik bai kaikai i sot, olsem na ol i kisim dinau bilong baim planti kaikai na dring bilong bikpela lain manmeri. Olsem na sapos tupela Kristen i makim namba stret i kam long bung na bai i no gat planti man tumas i kam, ol narapela Kristen tupela i no bin singautim ol, ol i mas tingim laik bilong tupela na bihainim. Wanpela man i bin marit long Kep Taun, long Saut Afrika, em i bin singautim 200 manmeri long kam long marit bilong em. Tasol 600 i bin kam, na kaikai i pinis hariap na sampela i no gat kaikai. Sampela bilong ol dispela lain i kam nating, ol i raun long bas tasol bilong lukim Kep Taun long dispela de bilong marit. Man i lukautim dispela raun long bas em wanpela wantok bilong dispela meri i laik marit, olsem na em i ting em i samting bilong em sapos em i laik kisim ol dispela lain olgeta i go long dispela marit, maski em i no bin askim man o meri i laik marit!
Sapos i no gat toksave olsem em wanpela bung bilong olgeta man, orait man i bihainim tru pasin bilong Jisas bai i no inap go na kisim ol kaikai na dring bilong ol man bilong dispela bung sapos ol i no bin singautim em. Ol man i tingting long go, maski ol lain bilong bung i no bin singautim ol, ol i ken givim askim long ol yet, olsem: ‘Sapos mi go long dispela marit, bai dispela i kamapim klia olsem mi no tingim tupela nupela marit? O taim mi go dispela inap givim hatwok long tupela na daunim amamas bilong dispela de?’ Wanpela Kristen i bihainim savepasin em i no inap bel nogut long ol lain i no bin singautim em—em bai i gat tingting long salim wanpela pas bilong tok amamas long tupela nupela marit na tok ol i ken kisim blesing bilong Jehova. Na sapos em i tingting long salim wanpela presen i go long tupela bilong helpim amamas bilong dispela de bilong marit, em tu i gutpela.—Saveman 7:9; Efesus 4:28.
Em Wok Bilong Husat?
Long sampela hap bilong Afrika, em wok bilong ol wanblut i gat bikpela krismas liklik long lukautim ol samting bilong bung bilong marit. Ating tupela i laik marit ol bai amamas long dispela samting, long wanem, ol yet bai i no gat hevi long baim ol samting. Na ol inap ting olsem sapos hevi samting i kamap long dispela bung, i no wok bilong ol long stretim. Tasol nogut tupela i orait hariap long kisim sampela helpim long famili. Pastaim tupela i mas save gut olsem ol wanblut bai tingim laik bilong tupela na bihainim.
Tru, Jisas em i Pikinini bilong God na em i bin “lusim heven na i kam daun,” tasol i no gat samting i givim tingting long yumi olsem Jisas i bin kirap na bosim dispela marit long Kana. (Jon 6:41) Baibel i tokim yumi olsem ol i bin makim wanpela man long stap olsem “man i bosim kaikai.” (Jon 2:8) Na dispela man i bosim kaikai i save bihainim tok bilong het bilong dispela nupela famili, em man i bin marit long dispela bung.—Jon 2:9, 10.
Ol wanblut Kristen i mas daun long het bilong nupela famili, olsem God i bin makim. (Kolosi 3:18-20) Em wok bilong em long makim wanem ol samting ol bai mekim long bung bilong marit. Sapos em inap, man bilong marit i ken bihainim laik bilong dispela meri em i laik maritim, na papamama bilong tupela wantaim. Tasol sapos ol wanblut i strong long mekim ol samting i no stret long laik bilong tupela, ating long gutpela pasin tupela bai tokim ol wanblut olsem ol no ken helpim tupela, na tupela yet bai baim ol samting bilong marit bilong ol. Long dispela rot i no gat ol samting i kamap na bihain tupela bai bel hevi long en taim ol i tingim de bilong ol long marit. Olsem, long marit bilong tupela Kristen long Afrika, wanpela wanblut i no wanlotu bilong ol em i stap olsem man i bosim kaikai, na taim ol i laik dring em i bin kamapim sampela tok olsem ol wantok i dai pinis ol i ken stap gut!
Sampela ol nupela marit i save lusim bung bilong marit taim dispela i no pinis yet. Sapos olsem, em wok bilong dispela nupela man marit long makim sampela lain ol inap lukautim bung na bai ol samting i kamap long en i stret wantaim ol lo bilong Baibel na ol bai i no larim bung i go i go inap longpela taim tumas.
Stretim Ol Samting Pastaim na Bihainim Gutpela Tingting
Long dispela marit Jisas i bin go long en, i luk olsem ol i gat planti gutpela kaikai, na long dispela as Baibel i tok olsem i gat man i bosim kaikai i stap. Olsem yumi stori pinis, ol i gat planti wain i stap. Ating ol i gat musik i stret long dispela kain bung na sampela danis i gutpela, long wanem, em pasin bilong ol Juda taim ol i bung bilong amamas. Jisas i kamapim klia dispela samting taim em i kolim dispela tok piksa bilong pikinini i bin lusim papa. Long dispela stori, papa, em wanpela maniman, em i amamas tru taim pikinini bilong em i bin tanim bel na kam bek, olsem na em i tok: “Bai yumi kaikai na amamas.” Jisas i tok ol i wokim “musik na . . . ol manmeri i wok long danis” long dispela bung.—Luk 15:23, 25.
Tasol Baibel i no kamapim sampela tok i makim olsem ol i gat ol musik na danis long dispela marit bilong Kana. Long olgeta bung bilong marit Baibel i stori long en i no gat wanpela i kamapim sampela stori bilong danis. Dispela i givim tingting long yumi olsem ol lain i stap gut long God long taim bilong ol man i bin raitim Baibel, ol i no save ting danis i bikpela samting bilong mekim long bung bilong marit. Olsem wanem? Yumi inap kisim sampela save long dispela samting?
Long sampela marit bilong ol Kristen long Afrika, ol i mekim wok long ol samting i wok long pawa bilong mekim krai bilong musik i bikpela. Musik i antap tumas, olsem na ol lain i kam long dispela bung i gat hatwok long toktok wantaim ol narapela. Sampela taim yu ken luksave olsem kaikai i sot tasol ol man i amamas long mekim save danis, na sapos ol i no was gut, pasin bilong ol long danis bai i go nogut olgeta. Kain bung olsem i kamap olsem wanpela pati bilong danis tasol na i no olsem wanpela bung bilong tingim marit. Na tu, taim musik i pairap tumas dispela i save pulim ol hambak lain long kam long dispela bung, maski i no gat sampela i bin singautim ol i kam o ol lain bilong wokim bung i no save long ol.
Tok i stap long Baibel i no makim olsem i mas i gat sampela musik na danis long ol bung bilong marit. Em nau, dispela inap givim sampela tingting long tupela i laik marit na bai bung bilong marit bilong ol i givim biknem long Jehova, a? Tasol long hap saut bilong Afrika, i no longtaim i go pinis na sampela yangpela Kristen bilong sanap wantaim tupela i laik marit ol i bin tromoi planti aua long lainim wanpela kain danis bilong redi long bung bilong marit. Inap sampela mun bikpela hap taim tumas i lus long mekim dispela samting. Tasol ol Kristen i mas “i gat taim” bilong “skelim gut wanem ol samting i bikpela samting tru,” olsem wok bilong autim tok, stadi bilong ol yet, na go long olgeta miting Kristen.—Efesus 5:16; Filipai 1:10, NW.
Wain Jisas i bin kamapim i planti tru, na yumi ken save olsem planti lain i bin stap na dispela bung bilong marit long Kana i gat ol gutpela samting tru long en. Tasol yumi ken save ol man long dispela bung i stap isi na ol i no bin dring planti tumas wain olsem sampela bung bilong marit bilong ol lain Juda. (Jon 2:10) Olsem wanem yumi ken save long dispela samting? Long wanem, Bikpela bilong yumi Krais Jisas i bin stap long dispela bung. Taim yumi tingim Jisas na skelim pasin bilong em wantaim ol narapela man, yumi save em bai was gut na bihainim lo bilong God long abrusim ol poroman nogut, olsem: “Yu no ken poroman wantaim ol man i save dring planti wain.”—Sindaun 23:20.
Olsem na sapos tupela i laikim sampela wain samting long bung bilong marit bilong ol, em wok bilong ol long makim sampela lain i gat gutpela tingting long bosim gut pasin bilong tilim ol dring long ol man. Na sapos ol i laikim sampela musik, ol i ken makim sampela musik i stret long bung bilong marit bilong Kristen na askim wanpela man long lukautim krai bilong musik. No ken larim ol lain i kam bung i kirap na bosim musik na pilaim sampela musik bilong ol yet i no gutpela tumas o wokim krai bilong musik i go antap moa. Sapos i gat sampela danis, ol lain i ken kirapim danis long pasin isi na pasin i stret long bung bilong ol Kristen. Sapos sampela wanblut i no wanlotu o sampela Kristen i no strong tumas long samting bilong spirit i kirap na mekim sampela pasin nogut long danis, dispela man bilong marit i ken senisim musik o long gutpela pasin askim ol long pasim danis. Sapos em i no mekim olsem, dispela bung bilong marit inap kamap olsem wanpela pati nogut na pundaunim sampela.—Rom 14:21.
Samting nogut inap kamap long bung taim ol man i wokim sampela danis bilong nau o musik i pairap tumas o i gat planti wain samting, olsem na sampela man bilong marit i tambuim ol dispela samting long marit bilong ol. Sampela i bin sutim tok long ol long dispela samting, tasol i gutpela moa sapos ol i tokim man bilong marit olsem ol i amamas long em i no laik bai samting i kamap na i bagarapim gutpela nem holi bilong God. Tasol sampela man bilong marit i stretim rot na long bung bilong marit i gat gutpela musik na hap taim bilong danis na liklik wain samting inap tasol long ol. Tasol maski em i makim wanem samting ol bai mekim long dispela bung, sapos sampela pasin nogut i kamap, nau em bai i gat asua long dispela.
Long Afrika sampela man em ol i no strong tumas long ol samting bilong spirit ol i no amamas long ol bung bilong marit i bihainim gutpela pasin Kristen, na ol i tok em i olsem bung bilong planim man i dai. Tasol ol i no bihainim pasin bilong tingting gut. Ol inap kisim amamas inap liklik taim long ol dispela pasin nogut bilong olpela bel, tasol bihain bel bilong Kristen bai i gat tok, na tu dispela samting i bagarapim nem bilong God. (Rom 2:24) Tasol spirit holi bilong God i save kamapim amamas. (Galesia 5:22) Planti Kristen i marit pinis ol i tingim de bilong ol long marit na ol i amamas, long wanem, ol samting i bin kamap long dispela de em bilong amamas na i no gat samting i kamap na “ol man i tok nogut long dispela.”—2 Korin 6:3.
Welsh na Elthea inap tingim yet ol gutpela tok ol wanblut i no wanlotu bilong ol i bin mekim long bung bilong marit bilong tupela. Wanpela i bin tok olsem: “Mipela les pinis long ol bung bilong marit bilong nau i gat planti pairap long en. Em i gutpela tru long go long wanpela marit i bihainim gutpela pasin na i no wankain olsem ol narapela.”
Nambawan bikpela samting i olsem, ol bung bilong marit bilong ol Kristen i bihainim gutpela pasin na stap olsem taim bilong amamas, ol dispela bung i save givim biknem long Man em i as bilong marit, em God Jehova.
[Blok/Piksa long pes 22]
SAMTING BILONG TINGIM LONG BUNG BILONG MARIT
• Sapos yu askim wanpela bilong famili i no wanlotu bilong yu long mekim sampela toktok, yu save gut olsem em bai no inap kamapim sampela tok i no stret long pasin Kristen?
• Sapos ol bai pilaim musik, yu bin makim ol singsing i stret long bung bilong ol Kristen?
• Bai krai bilong musik i no antap tumas?
• Sapos yu orait long ol i danis, bai pasin bilong danis i stret long bung bilong ol Kristen?
• Sapos i gat wain samting long bung, bai i gat liklik tasol o olsem wanem?
• Bai yu makim sampela man inap bosim gut pasin bilong tilim ol dispela dring?
• Yu bin makim taim i gutpela bilong pinisim bung bilong marit?
• I gat sampela man inap lukautim gut dispela bung na ol bai stap inap long bung i pinis?