Ol Bung Bilong Marit i Save Givim Biknem Long Jehova

Stori daunbilo long bung bilong marit bilong ol Kristen, pastaim ol i bin wokim long Itiopia long tok ples Amharik bilong stiaim tingting bilong planti manmeri em nau tasol ol i kamap Witnes Bilong Jehova. Dispela stori i toktok long sampela lo na pasin bilong ples ating ol i narapela kain long ol lo na pasin long hap bilong yu. Ating bai yu amamas long kisim save long ol dispela samting. Na tu, dispela stori bai kamapim sampela tok bilong Baibel i gutpela long bihainim, maski ol pasin bilong wokim marit long hap bilong yu i narapela kain.

“MARIT Kristen Yumi Inap Amamas Long En,” em nem bilong wanpela gutpela stori bilong stadi long Wastaua bilong Janueri 1, 1985. Narapela stori long dispela nius, em “Painim Gutpela Amamas Long Kaikai Bilong Marit.” (Man i gat tingting long marit, em i ken lukim sampela tok moa long buk Rot Bilong Kamapim Amamas Insait Long Famili, sapta 2, na buk Rot Bilong i Stap Amamas Taim Yu Yangpela Yet, sapta 19 na 20.)a Planti manmeri i bin kamap Witnes Bilong Jehova bihain long taim ol i wokim ol dispela stori, olsem na mipela laik kamapim sampela tok bilong ol dispela stori i stret long bihainim long hap bilong yumi, na sampela tok moa na bai ol marit yumi wokim i ken givim biknem long Jehova, em As bilong marit.

Pastaim yumi ken tingim wanpela askim: Wanem taim i gutpela long wokim marit? Marit i mas kamap insait long wanpela hap taim ol tumbuna i bin makim olsem taim bilong wokim marit o olsem wanem? Sampela i bilip olsem sapos ol i wokim marit insait long narapela hap taim long yia, orait dispela marit bai i no inap i stap gut. Dispela em wanpela bilip bilong ol tumbuna i no gat as bilong en, long wanem, planti marit i stap amamas na wanbel long lotuim Jehova, tasol ol i no bin marit insait long dispela hap taim ol tumbuna i bin makim. Yumi no bilip olsem i gat sampela kain strong em inap lukautim yumi o nogutim yumi. Nogat. (Aisaia 65:11; Kolosi 2:⁠8) Sapos yumi wokim marit insait long wanpela mun em ol tumbuna i bin makim olsem taim bilong marit, bai yumi no helpim ol wanblut i no Witnes long save long wanem pasin i tru na wanem pasin i giaman, a? Ol Kristen i ken marit long wanem wanem mun ol i gat laik long en​—⁠no gat rong long dispela.

Taim tupela i stretim rot bilong wanpela brata i ken mekim wanpela tok bilong marit bihain long taim tupela i marit long pasin bilong gavman, orait, i gutpela sapos planti de i no lus namel long taim ol i marit na taim bilong mekim dispela tok. Sapos tupela i laik bai tok bilong marit i ken kamap long Haus Kingdom, orait pastaim tru tupela i mas askim lain elda long dispela samting. Ol elda i laik save long ol samting tupela i laik mekim long taim bilong marit na bai bel bilong ol elda i no gat tok. Tupela i mas putim tok bilong marit long taim i no gat miting samting bilong kongrigesen. Brata ol i makim bilong mekim tok bilong marit, em bai bung wantaim tupela pastaim na givim sampela gutpela tok long tupela. Em i laik save olsem i no gat wanpela samting bilong pasim tupela long marit, olsem ol i no bin mekim sampela pasin i no stret na i no gat wanpela lo i tambuim tupela long marit, na em inap wanbel long ol samting ol i laik mekim long taim kaikai bilong marit i kamap bihain. Brata i mas mekim tok bilong marit insait long 30 minit samting, na em i mas mekim long gutpela pasin na kamapim ol tok bilong Baibel. Tok bilong marit em i bikpela samting, winim kaikai bilong marit i kamap bihain.

Bung bilong marit bilong Kristen em i gutpela rot bilong soim olsem yumi “no bilong dispela graun.” (Jon 17:14; Jems 1:​27) Pasin bilong yumi long mekim stret ol samting i mas kamap ples klia. Olsem na yumi mas kam long taim stret bilong marit; nogut yumi mekim na ol man i sindaun ol i mas wet i stap o wanpela miting bilong kongrigesen i laik kirap. Em samting meri i laik marit i mas tingim, long wanem, ating ol wanblut bilong em i no Witnes ol bai kirapim em long kamap bihaintaim​—⁠ol i ting dispela inap mekim na ol man bai ting em i gat namba. Strongpela Kristen sista bai kamap long taim stret na dispela bai kamapim klia olsem pasin daun na pasin bilong tingim ol narapela ol i bikpela samting long em! Na tu, taim yumi singautim wanpela man i kam kisim poto bilong marit, yumi mas stretim gut ol samting. I gutpela sapos yumi tokim em long bilas gut, olsem putim saket, nektai, na gutpela trausis, na taim em i laik kisim poto, em i no ken pasim rot bilong brata long mekim tok. Em i no ken kisim poto long taim brata i beten. Pasin bilong yumi long mekim stret ol samting bai givim biknem long Jehova na litimapim tok i tru. Nogut yumi wok long bihainim olgeta liklik liklik pasin ol man bilong ausait i bin makim bilong taim bilong marit na yumi no tingim as tru bilong marit.

Inap bung bilong marit i ken kamap gutpela, i no olsem i mas i gat kaikai bilong marit, tasol Baibel i no tambuim yumi long mekim dispela samting bilong amamas. Tasol kain bung olsem bilong ol Kristen tru i mas i stap narapela kain long ol bung bilong ol ausaitman ol i save dring na kaikai planti tumas, na musik i pairap bikpela, na i gat ol danis nogut, na sampela taim pait i kamap tu. Baibel i tok pasin bilong “hambak na singaut bikmaus nabaut,” olsem pati nogut bilong kisim amamas, em pasin bilong olpela bel. (Galesia 5:​21) Sapos bikpela lain tumas i kam bung, bai i hatwok long bosim, olsem na gutpela sapos lain i kam bung i no ken bikpela tumas. Na yumi no ken ting yumi mas bihainim pasin bilong ples na sanapim wanpela haus sel. Sapos sampela i laik mekim wok long haus sel, long wanem, san i strong tumas o kain samting olsem, orait em samting bilong ol yet.

Sapos yu no laik bai bikpela lain tumas i kam bung, orait wokim pas na givim long ol man yu laik singautim ol i kam. I gutpela sapos yu singautim ol man wan wan; kongrigesen, nogat. Yumi ol Kristen i laik mekim stret ol samting, olsem na yumi no ken kros sapos ol i no singautim yumi i kam. Na tu, i gutpela sapos yumi wokim pas bilong singautim man i kam long kaikai bilong marit, long wanem, yumi no laik bai rauspela man o meri i kam​—⁠nogut planti brata sista i lusim dispela bung. (1 Korin 5:​9-​11) Sapos tupela i singautim sampela wanblut o pren ol i no Witnes long kam, orait, ol i no ken singautim planti​—⁠ol i mas moa tingim ol “manmeri i bilip long Bikpela.” (Galesia 6:​10) Sampela i bin singautim ol pren na ol wanblut bilong ausait i kam long tok bilong marit; bung bilong kaikai, nogat. Bilong wanem ol i bin mekim olsem? Long wanem, long sampela kaikai bilong marit, sampela wanblut bilong ausait i bin mekim sampela pasin i no stret na planti brata na sista i bin pilim olsem ol i no inap i stap. Sampela marit i bin stretim rot na bai ol wantaim famili na ol gutpela pren Kristen tasol i ken kaikai wantaim.

Olsem Jon 2:​8, 9 i tok, sapos yumi laik wokim kaikai bilong marit, i gutpela sapos i gat “man i bosim kaikai.” Man i marit i ken makim wanpela Kristen bilong bosim ol samting​—⁠em i laik bai ol man i kam bung i mas mekim stret ol samting na bihainim stretpela pasin. Taim ol man i bringim presen i kam, nogut ol i hambak long ai bilong ol man. (1 Jon 2:​16) Musik i gutpela, tasol ol i mas was gut long ol tok bilong en, na musik i no ken pairap tumas. Planti man i laik bai wanpela elda i ken harim pastaim ol musik ol i laik kamapim. Na mas was gut long ol danis, long wanem, as bilong planti danis bilong ples em ol danis nogut i save kirapim bel bilong man. Long taim bilong katim kek bilong marit na opim botol sampen, sampela man bilong ausait i bin ting dispela i olsem mak bilong ol i ken kirap na mekim nabaut. Olsem na planti Kristen ol i no save putim bia o wain samting long kaikai bilong marit, long wanem, ol i no laik bai hevi i kamap.

Yumi laik litimapim nem bilong Jehova, olsem na yumi no laik hambak long ai bilong ol man bilong ol i ken tingim yumi yet. Sampela buk bilong graun ol tu i bin tokaut long pasin bilong wokim bikpela kaikai tumas. I no gutpela sapos tupela i kisim bikpela dinau bambai ol inap wokim bikpela kaikai bilong marit, na inap planti yia bihain ol i sot long ol samting, long wanem, ol i mas tromoi bikpela mani bilong stretim dinau bilong dispela wanpela de tasol! Na tu, klos ol i pasim long dispela de bilong marit i mas gutpela inap long dispela de na i mas stret long man i laik bihainim tok bilong God. (1 Timoti 2:​9, 10) Stori “Christian Weddings Should Reflect Reasonableness” (Wastaua [tok Inglis] bilong Janueri 15, 1969) i stori long klos olsem:

“De bilong marit em i bikpela samting, olsem na tupela i marit ol i laik bilas gut na amamas. Tasol i no olsem ol i mas pasim wanpela kain klos tasol. Ol i mas tingim pasin bilong ol man long hap bilong ol, pe bilong klos na laik bilong ol yet. . . . Tasol yu ting i stret sapos ol i tromoi bikpela mani long baim klos na nau ol yet o sampela narapela i gat hevi long mani? . . . Sampela meri i marit ol i bin mekim wok long klos bilong marit bilong wanpela pren o wanblut. Na sampela, ol yet i bin wokim klos bilong marit bilong ol na dispela i bin givim bikpela amamas long ol, na ating bihain ol inap mekim wok gen long dispela klos. Na i no gat rong long tupela i pasim ol naispela klos kain olsem ol i save pasim long olgeta de . . . Sampela ol inap tromoi bikpela mani long baim ol bilas bilong marit, tasol ol i no mekim​—⁠ol yet i laik wokim marit i no gat bikpela pe tumas, long wanem, ol i save, yumi stap long taim bilong hevi.”

Na tu, i no olsem ol i mas kisim planti poroman bilong sanap wantaim tupela i laik marit. Ol dispela poroman tu i no ken bilas tumas o mekim sampela samting i pulim ai bilong ol narapela. Rauspela man o meri i ken go insait long Haus Kingdom na harim tok bilong marit, tasol Wastaua, bilong Janueri 1, 1985, i tok: “I no stret sapos ol i kisim rauspela man o meri i stap poroman bilong ol o sampela manmeri em pasin bilong ol i no stret wantaim lo bilong Baibel.”

Tru, Jisas i bin go long bung bilong marit, tasol ating em i no ken orait long pasin bilong planti man em ol i amamas long marit na ol i draivim ka long taun na mekim planti pairap; polis i bin kotim ol draiva i bin mekim hon i krai krai. (Lukim Matyu 22:21.) Long olgeta dispela samting, no ken bihainim bilaspasin bilong ol man bilong ausait ol i hambak bilong pulim ai bilong ol man. Ol Kristen i mas bihainim gutpela tingting na daunim ol yet.​—⁠Sindaun 11:⁠2.

Olsem wanem? Yumi ken go long bung bilong marit bilong ol wantok, ol wanwok, o ol man i stap long lain bilong yumi na ol man yumi save long ol? Olgeta wan wan Kristen yet i mas tingim wanem samting ol i laik mekim. I gutpela sapos yumi tingim olsem yumi no gat bikpela hap taim tumas​—⁠yumi mas lusim bikpela hap taim long mekim wok autim tok, stadi, na wok bilong famili na kongrigesen. (Efesus 5:​15, 16) Long Sarere Sande, i gat ol miting na wok autim tok na yumi no laik lusim. (Hibru 10:​24, 25) Planti bung bilong marit i kamap long taim stret bilong kibung o long taim bilong autim tok long taim bilong Kaikai Bilong Bikpela. Ol brata bilong yumi long olgeta hap bilong graun ol i mekim bikpela wok bambai ol i ken go long Kaikai Bilong Bikpela, olsem na yumi no ken larim sampela narapela samting i pulim yumi long mekim olsem. Taim yumi no save yet long tok i tru, yumi bin tromoi bikpela hap taim long raun wantaim ol man bilong ausait, na ating yumi mekim pasin i nogutim nem bilong God. (1 Pita 4:​3, 4) Nau yumi kisim narapela tingting long ol samting yumi mas putim i go pas. Yumi ken salim wanpela kat i go long tupela bilong ausait bilong tok olsem yumi amamas long marit bilong ol, o yumi ken go lukim ol inap sotpela taim long wanpela narapela de. Sampela i bin mekim wok long taim bilong marit long ol i ken autim tok na kamapim sampela tok bilong Baibel i stret long man na meri i marit nupela.

Sapos long bung bilong marit tupela i tingim ol samting bilong spirit na ol i no tingim ol pasin bilong dispela graun, kain bung olsem bai givim biknem long Jehova. Sapos tupela i no insait long ol samting bilong dispela graun wantaim ol bilaspasin na giaman bilong en, na ol i no larim bung bilong marit i pasim ol long mekim wok bilong God, na ol i mekim pasin daun na ol i no mekim ol bilaspasin bilong pulim ai bilong ol man, orait, ol Kristen bai amamas long dispela bung. Na tu, ol bai amamas long tingting bek long dispela bung na bel bilong ol i no gat tok. Sapos yumi bihainim gutpela tingting, ol bung bilong marit bilong yumi ol Kristen bai litimapim tok i tru long ai bilong ol man i gat gutpela bel.

[Futnot]

[Piksa long pes 24, 25]

Ol Kristen i no save bihainim nating olgeta wan wan pasin bilong bung bilong marit i stap long hap bilong ol