Askim

◼ Bilong wanem ol Witnes Bilong Jehova i no laik kisim sampela buk o nius bilong narapela lotu olsem senis bilong ol buk na nius bilong ol?

Ol Witnes Bilong Jehova i save bihainim tok bilong God na ol i go autim tok long ol man. Jisas i tok, long taim bilong pinis, “bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.

“(Matyu 24:3, 14) Olsem na ol Witnes i no i go long haus bilong ol man bilong painim save o lainim tok i tru. Nogat. Ol i lusim pinis planti aua long lainim tok i tru bilong Baibel na ol i bilip long “dispela gutnius.” Ol i bihainim tok na i go autim dispela tok long ol narapela man.

Planti man i ting olgeta lotu i gutpela na i gat planti rot bilong lotuim God. Tasol Jisas i no ting olsem. (Lukim tok bilong Jisas long Matyu 7:13, 14, 21-23.) Ol saveman bilong ol Grik long bipo long Atens, ol i kirapim ol man long ting olsem i gat planti rot bilong lotuim God. Ol i save “pinisim taim bilong ol long mekim nupela tok na long harim nupela tok.” (Aposel 17:18-21) Taim aposel Pol i kamap long ol, em i no kam bilong kamapim sampela tingting bilong em yet na harim sampela tingting bilong ol. Nogat. Em i save pinis long tok i tru na em i go bilong autim dispela tok long ol. Sampela ol i no bilip, tasol sampela ol i bilip.—Aposel 17:32-34; 2 Korin 6:14-18.

Pol i save long sampela tok ol Grik i bilip long en, na em i mekim wok long dispela save bambai em inap autim gut tok bilong God long ol. (Aposel 17:28) Olsem tasol long nau, ol Witnes Bilong Jehova i save long tingting na bilip bilong ol man bilong ol narapela lotu. Ol i bin stori long ol dispela tingting na bilip long wanpela buk bilong ol (em buk tok Inglis, nem bilong en What Has Religion Done for Mankind?) Na ol i save stori long dispela samting long sampela Wastaua na Kirap! Ol i save kamapim ol dispela tok na tingting na bilip bilong ol narapela lotu na skelim wantaim tok i tru bilong Baibel.

Baibel i toksave long ol Kristen, olsem: “Seten yet i save senisim pasin bilong en na long skin tasol em i kamap olsem ensel bilong lait. Olsem na sapos ol wokman bilong em ol tu i senisim pasin bilong ol na long ai bilong ol man ol i kamap olsem wokman bilong stretpela pasin, orait yumi no ken kirap nogut long dispela. Bihain bai ol i kisim pe inap olsem wok bilong ol.” (2 Korin 11:14, 15) Seten i kamap olsem wanpela ensel bilong lait na giamanim namba wan meri, Iv, em i gutpela olgeta. (1 Timoti 2:14) Olsem na ol Witnes Bilong Jehova i no laik lusim taim nating long kaunim ol buk na nius bilong lotu i no kamapim tok i tru.Ol i no laik kaunim ol buk o nius bilong lotu giaman, em ol inap bagarapim bilip bilong ol na ol i bilong giamanim yumi. Ol i no laik bihainim pasin bilong ol Juda, em Pol i tok: “Ol i bin lusim tok tru bilong God na senisim na kisim tok giaman.”—Rom 1:25.

Na sampela buk na nius bilong lotu ol man i laik givim long ol Witnes, sampela man i bin lusim lotu i tru ol i bin raitim ol tok bilong ol dispela buk. Baibel i tok, ol Kristen tru i mas sakim ol kain man olsem, em ol i lusim bilip na givim baksait long ol samting bipo ol i bilip long en. (2 Jon 9-11; Taitas 3:10, 11) Olsem na i stret Wastaua (tok Inglis) bilong Jun 1983 i tok:

“Long taim bilong ol aposel, Haimenias na Failitas i lusim bilip na ol i laik bagarapim bilip bilong ol narapela. Lo bilong God i tok: Yumi mas sakim ol kain rabis tok olsem. (2 Timoti 2:16-19) Ol Kristen i laik bihainim lo bilong God, ol i sakim tok bilong ol man i lusim bilip. Ol i no laik kaunim ol tok ol i bin raitim em inap bagarapim bilip bilong ol. Ol dispela man i laik “mekim pasin nogut na pulim mani samting bilong ol man,” olsem na yumi no ken baim buk o nius bilong ol na helpim wok nogut bilong ol. (Taitas 1:11) Yumi laik i stap gut long God na holimpas lo bilong em, olsem na yumi save kaunim tasol ol tok i tru na i stret. Yumi holimpas ol tok i tru yumi bin lainim long pastaim long rot bilong dispela lain ol i lainim yumi long tok i tru bilong Baibel.—Skelim 1 Timoti 4:16.”—Pes 15.

Olsem na ol Witnes Bilong Jehova i bihainim gutpela tingting na tok bilong God na ol i no laik kisim sampela buk o nius i kamapim tok giaman o tok bilong ol man i lusim bilip. Ol i no laik kisim ol dispela kain buk o nius olsem senis bilong ol gutpela buk bilong Baibel i kamapim tok i tru, em ol yet i save tilim long ol man.

◼ Man i dring tumas, ol Witnes Bilong Jehova i ting dispela i olsem wanpela sik?

Planti man i tok, pasin bilong dring planti tumas i olsem wanpela sik. Sampela man bilong skelim dispela samting na Sampela dokta ol i tok olsem. Wanpela nius bilong saiens (Science Digest bilong Me 1984) i tok: “Pasin bilong dring planti tumas i olsem wanpela sik ol man i no save yet long as bilong en. Bipo ol i ting em i wanpela sik bilong tingting, tasol nau planti man i ting em i wanpela sik bilong skin. Ol i ting dispela sik i stap long skin bilong papamama na i save kalap long skin bilong pikinini, o sampela hap bilong skin bilong man i no wok gut na taim em i dring em i no inap bosim na em i dring tumas na i olsem dring i kalabusim em. ․․․ Bipo sampela man long Swiden i bin skelim dispela samting na ol i tok, pasin bilong dring tumas i save stap long famili na i kalap long ol pikinini na ol tumbuna pikinini. Ol man i Skelim dispela samting long nau, ol tu i tok olsem.”—Pes 16.

Tasol Sapos yumi tok pasin bilong dring tumas i olsem wanpela sik, yumi mas was gut Long wanem sampela man bilong dring tumas ol i laik haitim rong bilong ol na ol i tok: ‘Sapos mi dring planti, mi no gat asua. Mi gat wanpela sik.’ Na sampela man i tok sapos skin bilong man i gat sik o hap skin i no wok gut na em i dring planti, dispela man i no gat rong. Em, Sampela man i tok olsem.

Tasol yumi ol Kristen yumi bihainim tingting bilong God. Tingting bilong God i stret na i gutpela olgeta na i no save senis. Tasol ol dokta samting ol i save senisim senisim tingting. Tok bilong Jehova, em Baibel, i tok klia olsem: Pasin bilong dring tumas na spak em i tambu. Man i mekim kain pasin olsem, em i no inap kisim kingdom bilong God. Aposel Pol i tok, Sampela Kristen bilong pastaim, bipo ol i man bilong mekim pasin pamuk, na stilman, na spakman, na man bilong pulim mani long ol narapela man. Maski wanem wanem samting i bin kirapim ol na ol i mekim ol dispela pasin, tasol ol inap senisim pasin bilong ol na ol i bin mekim olsem. Pol i tok: “Yupela i waswas pinis. God i makim yupela pinis bilong em. Yupela i kisim nem stretpela man pinis. God bilong yumi em i bin mekim olsem long nem bilong Bikpela Jisas Krais na long Spirit bilong God yet.”—1 Korin 6:9-11.

Olsem na maski ol man i tok pasin bilong dring tumas em i wanpela sik o nogat, tasol yumi mas bihainim lo bilong God long Baibel. Maski man i no bosim gut skin, o ol wanlain o famili i pulim em, o skin bilong em i narapela kain na em i dring tumas, tasol em inap lusim dispela pasin. I gat planti man ol i redi long helpim em. (Lukim Kirap! Mas 1983 p.3-15.) “Olsem na long dispela taim em i stap yet long bodi, em i no bihainim moa dispela pasin bilong bel i kirap, olsem ol man i save mekim. Nogat. Em i bihainim laik bilong God.”—1 Pita 4:2.