No Ken Surik Bek

TUPELA bikpela ami i laik pait. Ol i redi long pait. Olgeta soldia i redi i stap na ol i wetim tok bilong kirapim pait. Ol i mas pait strong na tingting strong long winim pait. Ol i no ken pret. Olgeta soldia wan wan i save, bagarap inap painim em. Tasol em i save, sapos long dispela taim em i surik bek, ating bai lain bilong em i lus long pait. Olsem na em i mas tingting strong long ol samting em i bilip long en na i kirapim em long insait long dispela pait. Em i mas stap gut long wok bilong em.

Ol Kristen tru i kain olsem soldia. Aposel Pol i raitim pas long Timoti na em i tok: “Yu mas i stap gutpela soldia bilong Krais Jisas na karim hevi bilong dispela wok wantaim mipela arapela soldia.” (2 Timoti 2:3) Tru, soldia i mas redi long “karim hevi” na em i mas holim strong tingting bilong em long mekim gut wok bilong em. Soldia Kristen tu i mas mekim olsem. Long wanem em i mekim wok bilong helpim nem bilong Nambawan Bikpela bilong heven na graun.

Olsem wanem man inap kamap soldia bilong Krais Jisas? Em i mas bilip long ol samting God i mekim long rot bilong Krais bilong baim bek ol man na em i mas dediket long God Antap Tru, olsem givim laip olgeta bilong em long Em. Na em i mas kisim baptais long wara bilong makim dediket bilong em.

Soldia Kristen i mekim wanem na i olsem em i mekim pait? Ol samting Krais Jisas na ol aposel i mekim i soim yumi, soldia Kristen i no ken holim samting tru bilong mekim pait, olsem gan o bainat samting. Kristen i mekim wok long bainat bilong spirit (em Tok Bilong God o Baibel), na em i pait wantaim ol spirit nogut i stap antap. (Efesas 6:12, 17) Dispela kain pait bilong spirit i helpim ol man long lusim ol strong bilong tudak na i stap long lait. Taim man i dediket long God na tok promis long givim laip bilong em long God i olsem em i tok promis long insait long dispela pait bilong spirit.—Matyu 5:14-16; Rom 13:12.

Soldia Kristen i save go long haus bilong ol man na wok long painim ol man i laik harim tok. (Luk 10:5, 6; Aposel 5:42) Taim em i painim pinis wanpela man i laik harim tok, em i save go lukim em long olgeta wik na lainim em long ol tok i tru bilong Baibel. Long dispela rot soldia Kristen i helpim ol man long lusim ol tok kranki bilong ol lotu giaman. (Skelim tok bilong Jon 8:31, 32.) Taim ol dispela manmeri i harim tok na pilim tru ol gutpela tok bilong Baibel, ol tu i kamap soldia bilong Krais.

Tingting Strong long Winim Pait

Long ol pait bilong dispela graun planti man i bagarap—laip bilong ol i lus. Tasol dispela pait bilong spirit i save helpim ol man long kisim laip—em i no bagarapim ol man. Olsem na soldia Kristen i mas laik tru long helpim ol man long kisim laip, na em i mas laikim tumas God na ol narapela man, na dispela samting bai helpim em long wok gut aninit long Krais.

Tasol ol spirit nogut i laik pundaunim ol Kristen bambai ol i no pait strong na ol i lus. Ol dispela spirit nogut i stap klostu long graun na ol i wok strong long pundaunim ol man bambai olgeta man i lusim God. (Revelesen 12:l2) Ol samting bilong skin em inap helpim ol man, Seten na ol spirit nogut i mekim wok long dispela bilong pundaunim ol. Ol maniman na ol rabisman tu inap laikim tumas mani kago na bai dispela samting i pundaunim ol. Sampela wokboi bilong God tu inap pundaun long dispela samting. Nogut ol i kirap laikim tumas pasin bilong dispela graun, olsem “pasin bilong bel i kirap na aigris na bikhet.”—1 John 2:15, 16.

Sampela manmeri bipo ol i save bung wantaim kongrigesen Kristen, ol i kirap long tingim tumas ol samting bilong skin na ol i lusim pait bilong spirit o ol i slek long pait. Sori tru! Taim pait i stap, soldia i no ken larim ol narapela samting i pulim nabaut tingting bilong em. Em i mas tingting strong long winim pait. Nogut em i tingting strong long narapela samting na em i lus. Aposel Pol i tokim Timoti: “Mi ting long dispela tok bilong God bipo mipela i givim long yu, . . . Yu mas holim dispela tok bilong God, na yu mas pait strong wantaim ol birua. Long dispela pait yu mas holimpas bilip na klinpela pasin.” (1 Timoti 1:18, 19) Dispela kain pait bai kamap strong moa long ol Kristen i go inap long taim God Jehova i bagarapim olgeta birua bilong wok king bilong em long rot bilong Pikinini bilong em.—Revelesen 19:11-16.

Stap Gut long Wok

Olsem na i bikpela samting ol Kristen i mas stap gut long wok! Tasol wanem samting inap helpim yumi? Sapos wanpela soldia i laik pait wantaim bikpela lain ami ol inap planti tausen, em yet tasol em i no inap winim pait. Maski em i no pret, tasol bai ol i daunim em. Na i wankain tu long ol soldia Kristen. Sapos Kristen wanpela tasol i laik pait wantaim bikpela lain ol spirit nogut, bai em i lus long pait. Tasol yumi mas save, yumi no stap wanpis. God Jehova i sambai long yumi na bikpela lain ensel tu, na yumi bung wantaim ol brata Kristen bilong yumi, olsem na yumi inap sanap strong na winim pait.

Bikpela samting em olsem: Yumi mas mekim wok long olgeta samting yumi inap kisim long rot bilong oganaisesen bilong God bilong strongim yumi. Yumi mas bung wantaim wanpela bilong ol 46,000 samting kongrigesen bilong ol Witnes Bilong Jehova na bai yumi lain long mekim pait na lain long pasim ol klospait. (Efesas 6:10-20) Sapos long laik bilong yumi yet yumi lusim ol wanbilip bilong yumi na yumi stap longwe long ol, bai yumi olsem wanpela soldia i laik pait wantaim bikpela lain ami. Olsem na yumi bihainim gutpela tingting na yumi save bung wantaim lain bilong God na wok wantaim ol long dispela pait bilong spirit, na yumi save klia long ol samting i laik pulim yumi long lusim wok Kristen bilong yumi.

Yumi no ken lusim tingting long dispela samting, olsem: Pait bilong spirit yumi mekim i helpim yumi yet na ol narapela man long kisim laip. (1 Timoti 4:16) Yumi no ken surik bek. Yumi mas pait strong—yumi mas wok strong long autim tok na lainim ol man. Yu mas i stap “gutpela soldia bilong Krais Jisas” na bai yu inap winim pasin bilong dispela graun.—2 Timoti 2:3, 4; Hibru 10:38; Jon 16:33.