Insait Bilong Ol Tok i Kam Long Olgeta Hap
Ating ‘Bagarap’ i Laik Kamap
Sampela saveman i tok, sapos ol man i kirapim pait na tromoi ol bom nuklia, em dainamait o TNT bilong en eminap olsem 5,000 milion ton, orait bikpela smok na sit bilong paia bai kamap na bai tudak i karamapim hap bilong not na bai i gat bikpela kol tru inap long kilim i dai ol man. Long wanpela nius (Science) wanpela saveman i bin kisim Nobel Prais, em Herbert A. Simon, em i tok:‘Sapos dispela tok i stret, orait i no gat wanpela lain inap kirapimpait nuklia, maski ol i laik pait wantaim wanpela lain ol i no gat ol bom nuklia, long wanem sapos ol i tromoi ol bom nuklia bilong ol bai ol i kilim i dai skin bilong ol yet.’
Planti saveman i pilim olsem dispela samting inap pasim ol lain man ol i no ken kirapim pait nuklia na bai ol i rausim ol bom nuklia. Thomas Powers i tok (long nius The At1antic), olsem: ‘Sapos ol man i save long dispela bikpela kol tru em inap kamap na kilim i dai ol man, em i gutpela. Ating dispela bai pasim ol na ol i no ken pait.’ Tasol yu ting ol i no ken resis moa long hipim planti samting bilong pait? Nogat, a? Dispela man Powers i tok dispela samting bai kirapim ol bikpela gavman long wokim ol nupela samting bilong pait—bai ol i wokim planti liklik samting inap sut stret i go long mak na bagarapim samting, na bai ol inap bagarapim sampela samting long biktaun, tasol ol i no ken bagarapim biktaun olgeta.’ Na em i tok, ‘dispela bikpela kol bilong nuklia i no ken pasim ol man na bai i no gat bikpela pait i kamap; nogat; tasol em i subim ol man long bihainim nupela rot na bikpela bagarap i no ken kamap.’
Ol man i tingim dispela bikpela kol bilong nuklia em inap kamap na ol i no wetim gutpela samting i kamap; nogat; ol i pret long ol narapela samting inap kamap, olsem: Dispela samting bai kirapim ol bikpela gavman moa yet long mekim wok long ol bom samting “i no inap kilim i dai ol yet”? Taim pait i kamap, ating ol lain insait long pait bai ol i mekim wok long ol bom nuklia, maski dispela inap bagarapim ol yet, long wanem ol i no laik lus long pait? Dispela pasin bilong ol man, em ol i laik helpim skin bilong ol yet tasol, dispela samting tu bai kirapim God I Gat Olgeta Strong na bai em i kamapim pait bilong em, em Amagedon. Liklik taim tasol na bai em i mekim, na Tok Bilong Em, em Baibel, i tok: “King i no winim pait na rausim ol birua long bikpela ami tasol.”—Sam 33:16; Revelesen 16:14, 16.
Amagedon—Em Wanem Samting?
Long televisen, presiden bilong Amerika, em Ronald Reagan, em i tok, ‘no gat wanpela man i save tok profet bilong Baibel i makim Amagedon bai kamap 1,000 yia bihain o em bai kamap long tumora.’ Tasol wanpela man bilong lotu (dairekta bilong Kristik Institut), nem bilong em Andrew Lang, em i stori long ol dispela tok bilong Reagan na em i tok, ‘Planti taim em i tok ating Amagedon bai kamap long taim bilong yumi, ating Amagedon bai kamap long hap bilong Midel-Is, ating ol ami bilong Rasia bai insait long Amagedon.’
Baibel i tok, “ol king bilong olgeta man bilong graun” bai bung long Amagedon bilong bagarap, tasol God bai lukautim ‘bikpela lain manmeri’ em ol i stap gut long ai bilong em na ol i no ken bagarap. (Revelesen 7:14, 15; 16:14, 16; 19:19-21) Amagedon (tok Hibru, “Har-Magedon,” olsem “Maunten Bilong Megido”), em i wanpela ples tru i stap long hap bilong Midel-Is. Na ol ami bilong olgeta lain man ol i no inap i go pulap long hap bilong Megido, dispela taun bilong bipo em Baibel i stori long en, long wanem bai ol i pas pas tumas. Olsem na Amagedon i makim ol samting i kamap na dispela pait bilong God i kirap, olsem ol lain man i bung na birua long God Jehova. Dispela samting i mas kamap taim ol samting olsem “mak” i kamap na yumi lukim ol dispela samting i kamap long nau. Olsem na Amagedon i mas kamap long taim bilong yumi.—Matyu 24:3-15, 21, 34.
Ol Yangpela Meri i Karim Pikinini
Wanpela blakskin i save raitim tok long ol nius, nem bilong em William Raspberry, em i tok, ‘Yumi sampela yumi tingting planti long wanem, long nau planti yangpela meri blakskin ol i kisim bel na ol i karim pikinini, na ol man i save tokim ol, ol i no ken mekim pasin pamuk na kamapim nating pikinini, long wanem dispela samting i pasim ol na ol i mas lusim skul, na bai ol i no inap kisim gutpela wok mani, na i bagarapim sindaun bilong ol, na bai skin bilong pikinini bilong l i no strong na tingting bilong ol i bagarap na ol i no inap lain gut.’ Tasol Raspberry i tok, ‘Mi save kirap nogut long ol dispela tok ol man i givim long ol na mi bel hevi, long wanem i no gat wanpela taim ol i tokim ol long stretpela pasin na lo ol i mas bihainim.’
Tru tumas, yumi mas lainim ol yangpela olsem pasin pamuk i no stret, long wanem Baibel i tambuim. Sapos ol i pamuk (na planti taim ol i kamapim pikinini long dispela rot), ol i kalapim stretpela lo bilong Baibel. (Galesia 5:19-23) Na yumi mas lainim ol long ol lo bilong God long marit na long mekim bikpela long ol pikinini. Aposel Pol i makim olsem ol Kristen i mas bosim skin, nogut ol i marit kwik taim ol i yangpela yet na ‘laik bilong ol i strong tumas.’ (1 Korin 7:8, 9, 36) Ol man i bin skelim dispela samting na ol i tok, ol manmeri i bikpela pinis na ol i marit ol i kamap gutpela papa na mama, olsem na ol dispela lo na tambu i stret.