Yu Stap Narapela Kain Tru Long Ol Manmeri Bilong Dispela Graun?
“Pasin bilong Kristen i klin na i no gat asua long ai bilong God Papa bilong yumi, em i olsem: . . . Yumi mas lukautim gut wokabaut bilong yumi, na pasin bilong dispela graun em i no ken mekim doti bel bilong yumi.”—JEMS 1:27
1, 2. Husat i tok ol Kristen i mas i stap narapela kain long ol manmeri bilong dispela graun? Olsem wanem ol Witnes Bilong Jehova i save ol i mas i stap narapela kain long ol manmeri bilong dispela graun?
JISAS em i namba wan man bilong tok olsem ol Kristen ol i no bilong dispela graun. (Jon 15:19) Na long apinun, paslain long taim em i dai, em i beten long Papa bilong em na em i tok: “Tok bilong yu, mi givim pinis long ol. Na ol manmeri bilong dispela graun ol i birua long ol. Long wanem ol i no bilong dispela graun, olsem mi no bilong dispela graun.” Na wantu em i tok gen: “Ol i no bilong dispela graun, olsem mi no bilong dispela graun.”—Jon 17:14, 16.
2 Planti misin ol i kolim Kristen, ol i no wok long bihainim dispela tok. Tasol ol Witnes Bilong Jehova i save ol Kristen i mas klia olgeta long pasin bilong dispela graun. Ol i save Seten em i hetman bilong dispela graun. (Jon 14:30; 1 Jon 5:19) Sapos ol i insait liklik long pasin bilong dispela graun bai ol i stap aninit long strong bilong Seten. Jems i toksave olsem: “Sapos man i laik pren long pasin bilong graun, orait bai em i kamap birua bilong God.” (Jems 4:4) Olsem na yumi save yumi mas i stap narapela kain long ol manmeri bilong dispela graun.
3. Wanem samting i mekim na ol Witnes Bilong Jehova i narapela kain long ol narapela manmeri?
3 Tasol olsem wanem ol Witnes Bilong Jehova i narapela kain? Jisas i tok ol Kristen i no ken tekewe olgeta long dispela graun. (Jon 17:15) Ol Witnes Bilong Jehova i stap long graun namel long ol narapela manmeri, na ol i save marit na kamapim pikinini wankain olsem ol narapela manmeri. Na ol i mas wok mani, na karim hevi bilong pe bilong ol samting i go antap, na ol i baim takis. Tasol ol i stap narapela kain. Edita bilong lotu long wanpela nius bilong Amerika, em i raitim stori long ol Witnes na em i kamapim tingting bilong em long ol samting i mekim na ol Witnes i stap narapela kain. Em i tok: “Samting i mekim ol Witnes i narapela kain long ol manmeri i sutim tok long ol, em olsem: Ol i save givim bel olgeta long lotu bilong ol—lotu bilong ol i bosim olgeta samting ol i mekim na wanem kain man ol i poroman wantaim ol.” Em nau! Ol Witnes Bilong Jehova i givim bel olgeta long God Jehova; ol i dediket long God. Ol i bilip tru long ol tok promis bilong em long Baibel, na ol i tingim gut olgeta lo bilong em. (1 Jon 5:3) Dispela samting i mekim na ol i narapela kain tru long ol manmeri bilong dispela graun.
4. I gat wanem ol samting na i hatwok liklik long i stap narapela kain? Olsem na yumi olgeta, sampela taim yumi mas mekim wanem?
4 Yumi stap narapela kain na dispela samting i givim hatwok long yumi, long wanem planti man ol i no laikim dispela pasin bilong yumi. Long olgeta taim ol i wok long pulim o subim yumi long bihainim pasin wankain olsem bilong ol. Yumi gat laik long skin long i stap wankain olsem ol narapela man. Olsem na taim yumi no laik insait long wanpela pasin o wok bilong dispela graun na ol man i putim hevi long yumi, yumi mas i gat strongpela bilip bambai yumi inap i stap narapela kain na holimpas lo bilong Jehova. (Aposel 5:29; 15:28, 29) Olsem na gutpela sapos sampela taim yumi skelim yumi yet na yumi givim askim long skin bilong yumi, olsem: Mi stap narapela kain tru long ol manmeri bilong dispela graun?—2 Korin 13:5.
Wok Strong long Autim Tok
5. (a) Sampela man ol i no Witnes, ol i tok wanem long ol Witnes i strong long autim tok? (b) Wanem sampela lo bilong Baibel i kirapim ol Witnes long wok strong long mekim dispela wok?
5 Ol Witnes Bilong Jehova i save wok strong long autim tok. Dispela samting tu i mekim ol i stap narapela kain tru. Sampela man i lukim bikpela wok ol i mekim na ol i litimapim nem bilong ol, tasol sampela man i kros. Ol misineri bilong wanpela lain evanselis ol i tok, long olgeta hap ol i go long en ol i bungim sampela as ples ol i witnes bilong Jehova na ol i wok strong long autim tok! Wanpela nius bilong dispela lain i tok: “Sapos yu toktok wantaim . . . ol misineri long ol samting i kamap long hap ol i wok long en, bai ol i stori long ol Witnes Bilong Jehova.” Bilong wanem ol Witnes i wok strong olsem long mekim dispela wok? Long wanem em laik bilong God. God i laik bai ol i autim dispela gutpela tok bilong Kingdom, na dispela wok em i wanpela mak bilong ol Kristen tru. (Matyu 28:19, 20; Efesas 6:14, 15; Revelesen 22:17) Long nau, dispela wok ol Witnes Bilong Jehova i mekim bilong autim tok long ol man, em i kamapim long ples klia bel bilong ol, olsem ol i givim bel long Kingdom bilong God na ol i laik helpim ol narapela man long lotuim Jehova.—Aisaia 2:2-4; Matyu 24:14.
6. Wanem sampela askim yumi mas givim long skin bilong yumi yet bilong skelim tingting bilong yumi long wok bilong autim gutpela tok bilong Kingdom?
6 Yu tingim wok bilong autim tok em i bikpela samting? Planti man bilong dispela graun i ting wok bilong kisim kaikai na haus samting o kisim amamas em nambawan bikpela samting, winim lotu. (2 Timoti 3:4; 1 Jon 2:16) Tasol Pol i raitim pas long Timoti na em i tok: “Was gut long pasin yu yet yu mekim, na long wok bilong skulim ol man. Oltaim yu mas wok strong long dispela. Sapos yu mekim olsem, bai wok bilong yu em i mekim gut yu yet, na bai em i mekim gut ol man i harim maus bilong yu tu.” (1 Timoti 4:16) Yu gat wankain tingting? Yu save tingim tu toksave bilong aposel Pita, em i tok yumi mas ‵tingim gut de bilong Jehova’? (2 Pita 3:12) Sapos olsem, orait yu save, wok bilong autim dispela gutpela tok bilong Kingdom em i nambawan bikpela wok yumi mas mekim nau long dispela taim. Na yu save, yumi mas mekim hariap dispela wok. Dispela samting bai kirapim yu long mekim sampela samting ating ol man i no Witnes bai ting i narapela kain.
7. Planti ol i bin mekim wanem long wok bilong autim tok? Bilong wanem ol i mekim olsem?
7 Tingim Jon, em i wanpela tisa long wanpela skul long Gana. Em i bilip tru long ol tok bilong Baibel, olsem na em i lusim wok bilong em bambai em inap lusim bikpela hap taim moa long autim gutpela tok bilong Kingdom long ol man. Brian, em wanpela yangpela man bilong Englan, em inap i go long yunivesiti, tasol em i no i go, long wanem em i laik kamap wanpela painia na autim tok long olgeta de. Na Iv, em wanpela yangpela meri bilong Amerika, em i go long koles, tasol sampela mun bihain em i lusim bambai em tu i ken kamap wanpela painia. Yu ting ol dispela yangpela manmeri i mekim pasin longlong? Yu ting ol i no tingting gut? Nogat. Ol man i save bilip tru long ol tok bilong Baibel, ol i save ol dispela yangpela manmeri i bihainim gutpela tingting na i stret ol i mekim ol samting ol i bin mekim. Samting ol i mekim i no ken bagarapim ol long bihain; nogat; em i helpim ol bambai ol inap i stap long bihain. Olsem Pol i tok, dispela wok ol i laik mekim em inap ‘helpim ol yet na ol man i harim maus bilong ol’ long kisim laip.—1 Timoti 4:16.
Narapela Kain Pasin
8. Wanem tok bilong stiaim tingting bilong yumi em i stap long Hibru 1:9 na dispela tu i mekim na ol Witnes i stap narapela kain?
8 Narapela samting i mekim na ol Kristen i narapela kain long ol manmeri bilong dispela graun, em olsem: “Yu bin laikim tumas stretpela pasin, na yu no laik tru long pasin bilong sakim lo.” (Hibru 1:9) Dispela tok em i bilong Krais Jisas, tasol ol Witnes Bilong Jehova i save, dispela tok i makim pasin ol Kristen i mas bihainim. (1 Pita 2:21) Yumi mas laikim tumas ol samting God i tok em i stret, na yumi mas no laik tru long ol pasin God i tok em i pasin bilong sakim lo.
9. (a) Wanem sampela pasin i olsem pasin bilong sakim lo? (b) Tingting bilong kongrigesen Kristen long pasin bilong sakim lo, olsem wanem dispela i narapela kain long tingting bilong ol manmeri bilong dispela graun long pasin bilong sakim lo?
9 Aposel Pol i kolim sampela kain pasin bilong sakim lo, em i tok: “Ol man i save mekim pasin pamuk, na ol man i save bihainim god giaman, na ol man i save bagarapim marit, na ol man i save mekim pasin olsem meri, na ol man i save mekim pasin i gat sem wantaim ol arapela man, na ol stilman, na ol man i save mangal long samting bilong narapela man, na ol man i save spak, na ol man i save tok bilas long narapela man, na ol man i save pulim samting bilong narapela man, olgeta dispela kain man bai ol i no kisim kingdom bilong God.” (1 Korin 6:9, 10) Long nau ol manmeri bilong dispela graun ol i orait long kain kain pasin i no stret. Tasol lo bilong Baibel i no senis. Baibel i tok, sapos wanpela Kristen i kirap bihainim pasin i no stret, olsem mekim pasin pamuk samting, long pasin sori yumi mas helpim em long stretim pasin bilong em. (Galesia 6:1; Jems 5:19, 20) Sapos em i no laik senisim pasin bilong em, ol Kristen i mas givim baksait long em.—1 Korin 5:9-13.
10. Bilong wanem ol Witnes Bilong Jehova i mas lukautim lain bilong ol bambai pasin bilong sakim lo i no ken bagarapim ol?
10 Sampela man i tok dispela pasin i no pasin bilong sori o i strong tumas. Ol i laikim pasin bilong ol manmeri bilong dispela graun, em ol i orait long kain kain pasin i gat sem na pasin i no stret. Olsem wanem? Yu gat wankain tingting? O yu save, taim yumi givim baksait long man i mekim rong, i no olsem yumi no sori long dispela man, tasol yumi no laik tru long pasin bilong em, em pasin bilong sakim lo? Na yu save kongrigesen i mas mekim olsem long em bambai ol i ken i stap kongrigesen Kristen? Jems i tok: “Pasin bilong Kristen i klin na i no gat asua long ai bilong God Papa bilong yumi, em i olsem: . . . Yumi mas lukautim gut wokabaut bilong yumi, na pasin bilong dispela graun em i no ken mekim doti bel bilong yumi.” (Jems 1:27) Sapos wanpela lain i larim bikpela rong i mekim doti lain bilong ol, ol i no ken tok ol i bihainim lotu i tru, a?
11. Ol man i bihainim lo Kristen ol i no mekim wanem kain tok?
11 O1 Kristen i mas ‘no laik tru long pasin nogut.’ Ol i no ken mekim pasin nogut, tasol i no dispela samting tasol. Nogat. Baibel i tok: “Pasin pamuk na olgeta pasin doti na mangal nogut, tok bilong ol dispela pasin em i no ken kamap liklik namel long yupela. I no inap yumi manmeri bilong God yumi toktok long dispela kain pasin. Yupela i no ken mekim tok doti na tok kranki na tok pilai nogut.” (Efesas 5:3, 4) Ol Kristen tru ol i no save mekim tok doti o tok pilai nogut, na ol i no save stori long ol pasin i no klin bilong kirapim bel bilong ol. Na ol narapela man i save long dispela pasin bilong ol. Long nau wan wan man tasol i gat klinpela tingting na i save mekim klinpela tok.
12. Long pasin bilong painim amamas olsem wanem ol Witnes i narapela kain long ol manmeri bilong dispela graun?
12 Ol Witnes Bilong Jehova i stap narapela kain long pasin bilong painim amamas tu. “Seten i stap het bilong olgeta man bilong graun,” olsem na ol Witnes i was gut long ol samting ol manmeri bilong dispela graun i save painim amamas long en. (1 Jon 5:19) Ol i save klia olgeta long planti kain pilai bilong pati, na ol nius, na video, na piksa wokabaut, na musik, na televisen, sapos ol dispela samting i gat samting bilong ol spirit nogut long en o pasin i gat sem, o i kamapim pasin nogut bilong pait na bagarapim man. Ol i was gut tu long ol samting bilong painim amamas em ol man i tok em i gutpela bilong famili, tasol em i helpim pasin pamuk samting o i helpim dispela tingting olsem ol man i ken mekim laik bilong ol yet wan wan. Ol i save ol Kristen i no ken orait long kain samting olsem. (1 Korin 15:33) Man i bilip tru long ol tok bilong Baibel em i no ken painim amamas long ol samting ol Kristen i no ken toktok tu long en.
13. Ol i tok yumi mas was gut long ol samting yumi mekim bilong painim amamas, yu ting dispela i strongpela lo tumas o i pasim tingting bilong yumi? Stori long dispela samting.
13 Yu gat tingting olsem? O yu ting ol Witnes Bilong Jehova i gat strongpela lo tumas na ol i pasim tingting bilong ol? Sapos olsem, orait yu tingting: Taim ol man i save wanpela kaikai long tin i bagarap, na ol i tokim ol papa bilong stua long rausim ol dispela tin kaikai long stua, yu save kros na yu pilim olsem ol i pasim laik bilong yu long wanem nau yu no inap baim dispela kaikai? Nogat, a? Yu amamas, long wanem nau dispela samting i no inap bagarapim yu. Orait, i wankain tasol long ol Witnes Bilong Jehova. Taim ol brata i toksave long ol olsem planti samting ol man bilong graun i painim amamas long en em i nogut, ol i no save kros na tok dispela i pasim laik bilong ol na i strongpela lo tumas. Nogat. Ol i amamas, long wanem nau ol inap was gut na dispela samting i no ken bagarapim ol.
Narapela i Laikim Tru Narapela
14. Jisas i tok wanem pasin bai makim ol Kristen i narapela kain long ol narapela manmeri?
14 Narapela samting i makim ol Kristen i narapela kain long ol manmeri bilong dispela graun, em olsem: Long apinun, paslain long taim Jisas i dai, em i tokim ol disaipel bilong em: “Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:35) Olsem wanem na dispela pasin bilong sori bai stap olsem mak long ai bilong ol man bilong ausait? Long wanem, long nau ol samting i kamap olsem Pol i tok: “Bai ol man i laikim ol yet tasol, na bai ol i laikim tumas mani. . . . Bai ol i no save pren long ol wanblut bilong ol yet.” (2 Timoti 3:2, 3) Long kain taim olsem, sapos i gat wanpela lain i stap em ol i bilong olgeta hap bilong graun na narapela i laikim tru narapela, dispela bai narapela kain tru. Kain gutpela pasin sori olsem i stap namel long ol Witnes Bilong Jehova; ol i stap olsem ol brata brata tru.—1 Pita 2:17.
15. Long wanem taim ol Witnes inap kamapim long ples klia pasin bilong ol olsem ol i save laikim tru ol brata?
15 Taim ol Witnes i kibung, ol man inap lukim dispela pasin bilong sori i stap namel long ol, na planti taim ol i mekim sampela gutpela tok long en. Taim i gat bikpela bagarap i kamap, kwiktaim ol Witnes i save go helpim ol brata bilong ol. Na insait long kongrigesen, ol Kristen tru i save mekim pasin sori long ol brata bilong ol na tingim gut ol. Na taim hevi i kamap, ol i wok strong long bihainim tok bilong Baibel i tok: “Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong en.”—Kolosi 3:12-14.
Ol i Was Gut, Nogut Ol i Pundaunim Brata
16. (a) Pol i toktok long wanem samting em i givim rot long ol Kristen bilong pastaim bambai ol i ken kamapim bel bilong ol, ol i laikim tru ol brata? (b) Em i kamapim wanem tok bilong stiaim tingting bilong ol na dispela tok inap stiaim tingting bilong yumi long planti samting long nau?
16 Ol Witnes i gat dispela kain pasin bilong sori na dispela samting i mekim ol i narapela kain long narapela samting tu. Long nau, planti man i tingting tumas long ol samting i stret ol i ken mekim o kisim, na ol i strong long mekim o kisim dispela samting. Tasol Pol i kolim narapela kain pasin yumi mas bihainim, em i tok: “Yumi mas bihainim olgeta pasin i save mekim yumi stap wanbel, na olgeta pasin i save strongim bilip bilong ol brata.” (Rom 14:19) Long ol ves klostu long dispela ves, Pol i toktok long wanpela hevi i bin kamap long kaikai. Lo bilong Moses i tambuim sampela kaikai long ol Juda, tasol ol Kristen i no aninit long dispela Lo. Ol i ken kisim wanem wanem kaikai ol i laikim, tasol ol i no ken kaikai planti tumas. Tasol sampela Kristen, bipo ol i aninit long Lo bilong Moses, taim ol i lukim ol Kristen i kaikai samting Lo bilong Moses i tambuim, long ai bilong ol dispela i samting nogut na ol i tingting planti. I stret ol dispela narapela Kristen i kaikai ol dispela samting, tasol yu ting ol i strong long mekim taim ol i save dispela samting i pundaunim brata bilong ol? Sapos ol i bihainim tok bilong Pol ol i no ken strong long mekim. Pol i tok: “Sapos yu kaikai mit, o yu dring wain, o yu mekim narapela samting, na dispela i save mekim brata bilong yu i pundaun, mobeta yu no mekim dispela. Em i gutpela pasin.” (Rom 14:21) Em i givim gutpela tok long yumi, a? Dispela tok inap stiaim tingting bilong yumi long sampela narapela samting tu, a?
17, 18. (a) Olsem wanem tok bilong Rom 14:21 inap stiaim tingting bilong yumi long strongpela dring? (b) Olsem wanem dispela tok inap stiaim tingting bilong yumi long klos yumi pasim? (c) Dispela tok inap stiaim tingting bilong yumi long wanem ol narapela samting tu na bai yumi sori long ol brata?
17 Olsem: Baibel i orait long Kristen i dring wain o bia samting inap long skel bilong em. (1 Timoti 3:8; 5:23) Tasol sampela ol i tingting planti long pasin bilong kisim strongpela dring. Sampela ol i no lain long dring bia o wain, na sampela ol i save spak maski ol i kisim liklik tasol. Olsem na sapos long wanpela bung o pati i gat kain man olsem i stap, bai yu subim em o semim em bambai em i kisim dring na dring wantaim yu? O bai yu yet yu no ken dring, nogut yu pundaunim em?
18 Na tingim ol klos yumi pasim. Baibel i no makim wanem kain klos Kristen i mas pasim; Baibel i tok tasol Kristen i mas pasim klos i klinpela na ol inap long em. (1 Timoti 2:9) Long planti kantri i gat sampela kain klos ol man i save orait long en bilong i go long wok o long bikpela haus kaikai samting. Dispela i olsem “lo” bilong ol. I gat kain kain klos olsem em man o meri i ken pasim. Tasol sapos wanpela man o meri i sakim dispela “lo” bilong ol man na em i pasim klos i narapela kain tru, bai i olsem em i laik litimapim em yet, o em i laik pulim ai bilong ol man, o em i narapela kain man. Ol Kristen, ol man wantaim ol meri, ol i mas tingim gut dispela samting. Olsem wanem? Yu redi long sakim laik bilong yu long sampela kain bilas bambai yu inap helpim dispela gutpela tok bilong Kingdom na yu no ken pundaunim brata bilong yu?
19-21. (a) Bilong wanem ol Witnes Bilong Jehova i wok strong long i stap narapela kain long ol manmeri bilong dispela graun? (b) I gat wanem narapela pasin bilong ol manmeri bilong dispela graun em yumi mas i stap narapela kain long en?
19 Yes, Jisas i tok stret olsem: Ol Kristen “ol i no bilong dispela graun.” (Jon 17:16) Ol Witnes Bilong Jehova ol i save autim dispela gutpela tok bilong Kingdom, na ol i save sakim pasin nogut, na ol i save laikim tru ol brata na tingim gut ol bambai ol i no ken pundaunim ol. Long ol dispela samting ol Witnes i narapela kain tru long ol manmeri bilong dispela graun na dispela samting i helpim gut ol. Dispela samting i lukautim ol na planti hevi i save painim ol manmeri long nau, ol dispela hevi i no painim ol.
20 Olsem wanem? Yu wok long i stap narapela kain tru long ol manmeri bilong dispela graun? Yu wok strong long i stap narapela kain? Sapos ol Witnes i no i stap narapela kain, bai ol i stap wankain long ol manmeri bilong dispela graun em Seten i god bilong ol. (2 Korin 4:4) Bai ol i no i stap olsem ‘lain holi.’ Bai ol i no i stap klin; bai pasin bilong dispela graun ‘i mekim doti bel bilong ol.’ Na bai lotu bilong ol i “gat asua long ai bilong God.” (Jems 1:27; 1 Pita 1:14-16) Sapos yu laik i stap wankain olsem ol manmeri bilong dispela graun na bihainim pasin bilong ol, yu mas tingim gut tok bilong Jems 4:4.
21 Aposel Pol i stori long narapela samting bai bosim tingting bilong ol manmeri bilong dispela graun long nau. Em i tok bai ol man i “laikim tumas mani.” (2 Timoti 3:1, 2) Ol samting i kamap tru olsem Pol i tok. Long nau planti manmeri i tingting strong long kisim mani; dispela samting i bosim olgeta samting ol i mekim. Olsem wanem? Ol Kristen i stap narapela kain long dispela samting tu? Sapos yumi sakim pasin bilong “laikim tumas mani,” yumi inap i stap laip long nau? Orait, long tok i kamap bihain long dispela bai yumi stori long dispela samting
Yu InapTingim?
◻ Olsem wanem yumi save ol Kristen i mas i stap narapela kain long ol manmeri bilong dispela graun?
◻ Wanem ol tok bilong Baibel i helpim ol Witnes Bilong Jehova long kisim stretpela tingting long wok bilong autim tok?
◻ Ol Witnes Bilong Jehova i bihainim tok bilong Hibru 1:9 na olsem wanem dispela i mekim ol i narapela kain long ol manmeri bilong dispela graun?
◻ Ol i bihainim tok bilong Rom 14:21 na dispela i mekim wanem long pasin bilong ol?
[Piksa long pes 14]
Ol Witnes Bilong Jehova lain pinis olsem ol i mas was gut long ol amamas bilong dispela graun