Ol i No Insait—Pasin Kristen Long Taim Bilong Las De
“Ol i no bilong dispela graun, olsem mi yet mi no bilong dispela graun.”—JON 17:16.
1, 2. Jisas i tok wanem long i stap bilong ol lain bilong em na ol man bilong dispela graun? Dispela tok i kamapim wanem ol askim?
LONG laspela nait long i stap bilong em long graun, Jisas i mekim longpela beten ol disaipel i putim yau long en. Taim Jisas i beten, em i mekim wanpela tok i stori stret long laip bilong olgeta Kristen tru. Em i tok long lain bilong em olsem: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun. Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun.”—Jon 17:14-16.
2 Tupela taim Jisas i tok ol lain bilong em ol i no bilong dispela graun. Pasin bilong ol long stap olsem bai kamapim sampela hevi—ol man bilong graun bai i no laikim ol. Tasol ol Kristen i no ken tingting planti; Jehova bai was long ol. (Sindaun 18:10; Matyu 24:9, 13) Tok bilong Jisas inap kirapim yumi long tingim askim olsem: ‘I gat wanem as na ol Kristen tru ol i no bilong dispela graun? Olsem wanem ol i no bilong dispela graun? Sapos ol man bilong graun i no laikim ol Kristen, orait, ol dispela Kristen i gat wanem tingting long ol man bilong graun? Na bikpela samting moa em ol i gat wanem tingting long ol gavman bilong graun?’ Ol bekim bilong Baibel long ol dispela askim i bikpela samting, long wanem, ol i mekim sampela samting long i stap bilong yumi olgeta.
“Yumi Stap Pikinini Bilong God”
3. (a) Wanem samting i mekim yumi stap narapela kain long ol man bilong dispela graun? (b) Wanem samting i kamapim klia dispela graun “i stap aninit long strong bilong Satan”?
3 Yumi pas gut wantaim Jehova, dispela em i wanpela as na yumi no bilong dispela graun. Aposel Jon i tok: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19) I stap ples klia olsem tok bilong Jon i tru. Ol bikpela pait, pasin raskol, pasin bilong mekim nogut long narapela, daunim narapela, giaman, na pasin pamuk ol i pulap tru long graun na ol i kamapim klia em Satan i wok long stiaim tingting bilong planti man, i no God. (Jon 12:31; 2 Korin 4:4; Efesus 6:12) Taim man i kamap wanpela Witnes Bilong Jehova, bai em i no insait long ol dispela pasin nogut na bai em i no orait long ol tu, na dispela i save mekim em i no bilong dispela graun.—Rom 12:2; 13:12-14; 1 Korin 6:9-11; 1 Jon 3:10-12.
4. Long wanem ol rot yumi kamapim klia yumi bilong Jehova?
4 Jon i tok ol Kristen i “stap pikinini bilong God,” ol i narapela kain long ol man bilong graun. Ol man husat i dediket long Jehova, ol i bilong Bikpela tasol. Aposel Pol i tok: “Sapos yumi stap laip, em i samting bilong Bikpela. Na sapos yumi dai, em tu i samting bilong Bikpela. Olsem na sapos yumi stap laip, o sapos yumi dai, yumi bilong Bikpela tasol.” (Rom 14:8; Song 116:15) Yumi bilong Jehova, olsem na yumi lotu long em wanpela tasol. (Kisim Bek 20:4-6) Dispela em i as na Kristen tru i no save mekim sampela samting bilong graun i stap olsem namba wan bikpela samting long laip bilong em. Em i save rispek long ol plak samting bilong ol gavman, tasol em i no lotu long en, long tingting o long sampela samting em i mekim, nogat. Na em i no lotu long ol man i gat nem long pilai spot o sampela narapela man i gat nem. Em i save rispek long rait bilong ol narapela long bihainim laik bilong ol yet, tasol em i save lotu tasol long Man bilong wokim yumi. (Matyu 4:10; KTH 19:10) Dispela samting tu i mekim em i stap narapela kain long ol man bilong dispela graun.
“Kingdom Bilong Mi Em i No Bilong Dispela Graun”
5, 6. Olsem wanem pasin bilong daun long Kingdom bilong God i mekim yumi stap narapela kain long ol man bilong dispela graun?
5 Ol Kristen i save bihainim Krais Jisas na ol i stap aninit long Kingdom bilong God, dispela tu i mekim na ol i no bilong dispela graun. Taim Jisas i kot na sanap long ai bilong Pontius Pailat, em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” (Jon 18:36) Kingdom em i rot bilong mekim nem bilong Jehova i kamap holi, kamapim klia Em i nambawan bos, na kamapim laik bilong Em long graun olsem ol i save bihainim long heven. (Matyu 6:9, 10) Long taim em i stap long graun, Jisas i autim gutnius bilong Kingdom, na em i tok ol lain bilong em bai autim dispela gutnius i go inap long las de. (Matyu 4:23; 24:14) Long 1914 truim bilong Kamapim Tok Hait 11:15 i kamap: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” I no longtaim na dispela Kingdom bilong heven tasol bai bosim olgeta manmeri. (Daniel 2:44) Wanpela taim bai kamap we ol man i holim wok gavman ol tu i mas daun long wok bos bilong dispela kingdom.—Song 2:6-12.
6 Ol Kristen tru long nau i save tingim ol dispela samting, olsem na ol i stap aninit long Kingdom bilong God na ol i bihainim tok bilong Jisas long “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Dispela i no mekim na ol i givim baksait long kantri ol i save stap long en, nogat, tasol em i save mekim ol i stap narapela kain long ol man bilong graun long samting bilong spirit. Namba wan wok bilong ol Kristen long nau i wankain olsem ol Kristen long taim bilong ol aposel, em bilong ‘autim tok long kingdom bilong God.’ (Aposel 28:23) I no gat wanpela gavman long graun i gat rait long traim pasim dispela wok God i givim long ol lain bilong em.
7. I gat wanem as na ol Kristen i no insait long ol samting bilong dispela graun? Ol i mekim wanem bilong kamapim klia dispela pasin bilong ol?
7 Ol i bilong Jehova na ol i bihainim Jisas na ol i stap aninit long Kingdom bilong God, olsem na long taim bilong yumi ol Witnes Bilong Jehova i no bin insait long ol kros pait samting insait long wanpela kantri o long pait i kamap namel long ol narapela narapela kantri. Ol i no bin sapotim wanpela sait i insait long pait, ol i no bin kisim ol gan samting na kirap pait long narapela lain, na ol i no bin mekim ol tok giaman bilong helpim wanpela lain i daunim narapela lain. Ol i kamapim bilip bilong ol maski i gat planti man i birua nogut tru long ol, ol i bihainim ol stiatok ol Witnes i bin kamapim long ol hetman bilong gavman Natsi bilong Jemani long 1934: “Mipela i no gat laik long insait long wok politik, mipela i givim bel long kingdom bilong God em Krais i stap King bilong en. Mipela bai i no bagarapim wanpela man. Mipela laik stap bel isi na mekim gutpela pasin long olgeta man taim rot i op.”
Ol Mausman na Namba Tu Mausman Bilong Krais
8, 9. Olsem wanem ol Witnes Bilong Jehova long nau i mekim wok olsem mausman na namba tu mausman bilong Kingdom? Dispela wok i mekim ol i stap olsem wanem long ol gavman bilong graun?
8 Pol i stori long em yet na ol narapela Kristen God i bin makim na tok: “Mipela i kisim maus bilong Krais na autim tok bilong en. I olsem God yet i singaut long olgeta man long maus bilong mipela.” (2 Korin 5:20; Efesus 6:20) Kirap long 1914 i stret ol Kristen God i bin makim i holim nem olsem mausman bilong Kingdom bilong God, em ol i stap “pikinini” bilong en. (Matyu 13:38, NW; Filipai 3:20; KTH 5:9, 10) Na tu, Jehova i bin kisim “planti manmeri tru” long olgeta lain em “ol arapela sipsip,” em ol Kristen i wet long kisim laip oltaim long graun, na Jehova i kisim ol bilong helpim ol dispela pikinini bilong Kingdom long mekim wok bilong ol. (KTH 7:9; Jon 10:16) Ol dispela “arapela sipsip” yumi ken tok ol i olsem namba tu mausman bilong Kingdom bilong God.
9 Wanpela mausman bilong gavman na ol wokman bilong em, ol i no save insait long wok gavman samting bilong kantri ol i wok long en. Na olsem tasol, ol Kristen i no save insait long ol wok politik samting bilong ol gavman bilong graun. Ol i no save tingim wanpela lain na givim baksait long narapela lain, maski em ol lain bilong wanpela kantri o wanpela kala skin o lain i gat mani o lain i stap rabis o lain i wok wantaim bilong stretim samting. (Aposel 10:34, 35) Ol i save “mekim gutpela pasin” long olgeta man. (Galesia 6:10) Olsem na ol man i no ken tok ol i no laik harim tok bilong ol Witnes, long wanem, ol Witnes i save sapotim lain bilong narapela skin, kantri, o wanples samting.
Pasin Bilong Laikim Tru Narapela
10. Pasin bilong laikim tru narapela i bikpela samting long ol Kristen o olsem wanem?
10 Na tu, ol Kristen i no save insait long ol samting bilong dispela graun, long wanem, ol i save pas gut wantaim ol narapela Kristen. Jisas i tokim lain bilong em: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Pasin bilong laikim tru ol brata em i bikpela samting long man i laik stap wanpela Kristen. (1 Jon 3:14) Wanpela Kristen i save pas gut wantaim Jehova na Jisas, na em i save pas gut tru wantaim ol narapela Kristen. Em i no save tingim ol brata i stap long kongrigesen bilong em tasol, nogat. Em i save laikim tru “ol arapela manmeri bilong God, ol i stap long olgeta hap bilong graun.”—1 Pita 5:9.
11. Olsem wanem pasin bilong ol Witnes Bilong Jehova long laikim tru ol wanbilip i stiaim wokabaut bilong ol?
11 Long nau ol Witnes Bilong Jehova i soim pasin bilong ol long laikim tru ol brata long rot bilong truim tok bilong Aisaia 2:4: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” Jehova i skulim ol, olsem na ol Kristen tru ol i stap wanbel wantaim God na ol wanbilip. (Aisaia 54:13) Ol i laikim tru God na ol brata bilong ol, olsem na ol i no inap tru long kisim gan samting na pait long ol brata Kristen—o narapela man—long ol narapela kantri. Gutpela bel isi na pasin wanbel bilong ol em i bikpela hap bilong lotu bilong ol, em i kamapim klia olsem God i givim spirit holi long ol. (Song 133:1; Maika 2:12; Matyu 22:37-39; Kolosi 3:14) Ol i “wok long kamap wanbel wantaim ol arapela manmeri,” long wanem, ol i save “Bikpela i save lukautim ol stretpela manmeri.”—Song 34:14, 15.
Tingting Bilong Ol Kristen Long Ol Manmeri Bilong Graun
12. Wanem tingting bilong Jehova long ol manmeri bilong graun na ol Witnes Bilong Jehova tu i bihainim? Ol i bihainim olsem wanem?
12 Jehova i tok pinis olsem bagarap bai painim ol lain bilong dispela graun, tasol em i no skelim yet ol wan wan man i stap long dispela graun. Em bai mekim dispela samting long rot bilong Jisas long taim Em i makim. (Song 67:3, 4; Matyu 25:31-46; 2 Pita 3:10) Tasol inap long dispela samting i kamap, Jehova i mekim bikpela pasin sori tru long ol manmeri. Em i givim dispela wanpela Pikinini bilong em na bai rot i op bilong olgeta man i ken kisim laip oltaim. (Jon 3:16) Yumi ol Kristen i bihainim pasin bilong God long sori long ol man long taim yumi tokim ol long samting God i mekim bilong kisim bek ol, maski ol i sakim yumi planti taim.
13. Yumi mas i gat wanem tingting long ol man i holim wok gavman?
13 Yumi mas i gat wanem tingting long ol man i holim wok gavman samting? Pol i bekim dispela askim long taim em i raitim dispela tok: “Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.” (Rom 13:1, 2) Ol man bilong graun i holim wok bos, long wanem, God i larim ol, tasol i gat mak bilong strong bilong ol (namba sampela man i holim i antap long ol narapela man o i liklik long ol, tasol long olgeta taim namba ol man i holim i liklik long namba bilong Jehova). Wanpela Kristen i save daun long gavman, long wanem, dispela em i insait long pasin bilong em long daun long Jehova. Tasol olsem wanem sapos samting God i tok yumi mas mekim i pait wantaim samting gavman i tok yumi mas mekim?
Lo Bilong God na Lo Bilong Sisar
14, 15. (a) Olsem wanem Daniel i bin abrusim hevi long taim em i no inap bihainim wanpela tok? (b) Tripela Hibru i mekim wanem long taim hevi long bihainim tok i kamap na ol i no gat rot long abrusim?
14 Daniel na tripela poroman bilong em ol i stap gutpela piksa long pasin bilong daun long ol gavman bilong graun na long wok bos bilong God wantaim. Taim dispela fopela yangpela Hibru i go kalabus long Babilon, ol i bihainim ol lo bilong dispela kantri na wantu sampela lain i makim ol long kisim sampela trening. Daniel i save olsem sampela hap bilong dispela trening inap pait wantaim Lo bilong Jehova, olsem na em i toktok wantaim bos bilong dispela trening. Dispela i mekim na bos hia i stretim ol samting bilong tingim tingting i stap long bel bilong dispela fopela Hibru. (Daniel 1:8-17) Ol Witnes Bilong Jehova i bihainim pasin bilong Daniel taim ol i bihainim gutpela pasin na kamapim tingting bilong ol long ol hetman na bai ol i ken abrusim sampela hevi.
15 Tasol bihain, ol i gat hevi long daun long wok bos bilong man long graun na ol i no inap abrusim. King bilong Babilon i bin sanapim wanpela traipela imis long ples stret bilong Dura na em i tokim ol hetman bilong gavman, wantaim ol hetman i bosim ol provins, long ol i mas bung bilong dediketim dispela imis. King i bin makim tripela pren bilong Daniel long stap hetman bilong bosim provins Babilon, olsem na tok bilong king i stret long ol tu. Insait long dispela bung i gat hap taim bilong ol man i mas brukim skru long imis. Tasol ol dispela Hibru i save olsem dispela bai brukim lo bilong God. (Lo 5:8-10) Olsem na taim ol narapela i brukim skru, ol i sanap i stap. Ol i save olsem sapos ol i no bihainim tok bilong king, ol inap kisim bikpela pen na dai—em long rot bilong mirakel tasol na laip bilong ol i no lus—tasol ol i strong long ol i no ken brukim lo bilong Jehova, maski indai inap painim ol.—Daniel 2:49–3:29.
16, 17. Ol aposel i bin tok wanem taim ol hetman i tambuim ol long wok autim tok? Bilong wanem ol i tok olsem?
16 Long taim bilong ol aposel, ol hetman bilong lotu Juda long Jerusalem i bin singautim ol aposel bilong Jisas Krais na tokim ol long ol i no ken autim tok moa long nem bilong Jisas. Ol i bin mekim wanem? Jisas i bin tokim ol long kamapim ol disaipel bilong olgeta lain manmeri, em ol lain bilong Judia tu. Na em i bin tokim ol long autim tok long nem bilong em long Jerusalem na long olgeta narapela hap bilong graun. (Matyu 28:19, 20; Aposel 1:8) Ol aposel i bin save olsem ol samting Jisas i tokim ol long mekim, dispela i makim ol samting God i laik bai ol i mekim. (Jon 5:30; 8:28) Olsem na ol i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 4:19, 20; 5:29.
17 Ol aposel ol i no bikhet. (Sindaun 24:21) Tasol taim ol hetman bilong graun i tambuim ol long bihainim laik bilong God, ol inap mekim wanpela tok tasol, ‘Mipela i mas bihainim tok bilong God, man nogat.’ Jisas i bin tok “samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Sapos yumi brukim wanpela lo bilong God, long wanem, wanpela man i tokim yumi long mekim, em yumi givim samting bilong God i go long man. Yumi no save mekim olsem, olgeta samting i stret yumi givim long Sisar, yumi save givim, tasol yumi save Jehova em i namba wan bikpela bos. Em i King bilong heven na graun, Man bilong wokim yumi, em i As bilong olgeta wok bos.—KTH 4:11.
Yumi Bai Sanap Strong
18, 19. Ol brata bilong yumi i sanap strong olsem wanem? Yumi ken mekim wanem bilong bihainim pasin bilong ol?
18 Long nau, planti gavman i save olsem ol Witnes Bilong Jehova i no save insait long samting bilong graun, na yumi tenkyu long dispela samting. Tasol long sampela kantri, ol Witnes i bin karim hevi long ol man i mekim nogut tru long ol. Kirap long 1900 samting na i kam inap long nau tu, sampela brata na sista bilong yumi i bin wok strong tru, long samting bilong spirit i olsem ol i pait bilong ol i ken ‘ran strong long resis.’—1 Timoti 6:12.
19 Yumi ken mekim wanem bilong sanap strong olsem ol dispela brata sista? Namba wan samting em yumi no save lusim tingting olsem ol man bai birua long yumi. Olsem na yumi no ken bel hevi o kirap nogut sapos dispela samting i kamap long yumi. Pol i tokim Timoti: “Tru tumas, olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12; 1 Pita 4:12) Satan em i bos bilong dispela graun, olsem na olsem wanem bai ol man i no birua long yumi? (KTH 12:17) Sapos yumi stap gut long bilip bilong yumi, bai i gat sampela i ‘kirap nogut long dispela, na tok nogut long yumi.’—1 Pita 4:4.
20. Paragraf i kirapim yumi long tingim wanem ol trupela tok bilong strongim yumi?
20 Namba tu, yumi bilip olsem Jehova na ol ensel bai helpim yumi. Olsem Elisa bilong bipo i bin tok: “Yumi gat bikpela lain moa bilong helpim yumi.” (2 King 6:16; Song 34:7) Ating Jehova i tingim samting em i tingting pinis long mekim na em i larim ol birua i givim hevi long yumi inap sampela hap taim. Tasol oltaim em bai givim strong long yumi na bai yumi ken karim hevi. (Aisaia 41:9, 10) Sampela i bin indai, tasol dispela i no pretim yumi. Jisas i tok: “Yupela i no ken pret long ol man i save kilim i dai bodi, tasol ol i no inap kilim spirit bilong yupela. Nogat. Yupela i mas pret long God tasol. Em inap bagarapim spirit na bodi tu long hel [“Gehena,” NW ].” (Matyu 10:16-23, 28) Nau long dispela taim yumi stap olsem “man bilong narapela ples.” Yumi save mekim wok long taim bilong yumi long “kisim dispela laip em i laip tru,” em laip oltaim long nupela taim God bai kamapim. (1 Pita 2:11; 1 Timoti 6:19) Sapos yumi stap gut long God, i no gat wanpela man i ken kisim dispela gutpela prais long yumi.
21. Oltaim yumi mas tingim wanem samting?
21 Olsem na yumi mas tingim samting i dia tumas long yumi, em yumi pas gut long God Jehova. Oltaim yumi laik amamas long gutpela samting yumi kisim long rot bilong stap olsem lain i bihainim Krais na lain i aninit long Kingdom. Yumi mas laikim tru ol brata bilong yumi, na oltaim yumi mas amamas long ol samting ol i mekim bilong soim pasin sori long yumi. Nambawan bikpela samting em yumi laik bihainim tok bilong man i raitim song, em i tok: “Yu mas bilip na wetim Bikpela i kam helpim yu. Sanap strong. Yu no ken bel hevi. Yu mas bilip na wetim Bikpela i helpim yu.” (Song 27:14; Aisaia 54:17) Sapos yumi mekim olsem, bai yumi stap olsem planti Kristen i bin stap paslain long yumi, yumi bai sanap strong na save olsem samting yumi wetim bai kamap tru—ol Kristen i stap gut long God na ol i no insait long ol samting bilong graun.
Yu Inap Stori Long Dispela?
• Olsem wanem pasin bilong pas gut long Jehova i mekim yumi stap narapela kain long ol man bilong graun?
• Yumi lain bilong stap aninit long Kingdom bilong God, yumi mekim wanem bilong yumi no insait long ol samting bilong dispela graun?
• Olsem wanem pasin bilong laikim tru ol brata i helpim yumi na yumi no insait long kros pait samting, na yumi stap narapela kain long ol man bilong graun?
[Piksa long pes 15]
Pasin bilong yumi long aninit long Kingdom bilong God i mekim yumi stap olsem wanem long ol man bilong graun?
[Piksa long pes 16]
Wanpela Hutu na wanpela Tutsi i amamas long wok wantaim
[Piksa long pes 17]
Ol brata Kristen bilong lain Juda na Arap
[Piksa long pes 17]
Ol Kristen bilong Serbia, Bosnia, na Kroesia ol i amamas long bung wantaim
[Piksa long pes 18]
Wanem pasin i stret long bihainim taim ol hetman i tokim yumi long brukim lo bilong God?